Stanap Olsem Wan Tru Man blong Mileniom
I Kam long Elda Rasel M. Nelson
Presiden blong Kworom blong Olgeta Twelef Aposol
I kamaot long wan wol divosen blong ol yang adalt, “Becoming True Millenials,” we i bin hapen long Brigham Yang Yunivesiti–Hawae long 10 Jenuware 2016. Blong kasem ful toktok blong hem, go long broadcast.lds.org.
Yufala i wan “jeneresen we God i jusum.” we God i odenem finis yufala blong mekem wan bigfala wok—blong help blong mekem ol pipol blong wol ia oli rere from Seken Kaming.
Ol pikja oli kam long Skoti Rifsnaeda
Plante pipol oli tokbaot yumi, se yumi ol tru man blong mileniom. Mi mas talem se taem ol man we oli mekem stadi oli stap singaotem yu long toktok ia mo oli tokbaot wanem nao stadi blong olgeta i talem abaot yu—ol samting we yu laekem, we yu no laekem, ol filing blong yu, mo ol fasin blong yu, ol samting we yu strong long hem mo olgeta we yu no strong long hem—mi no filim gud i stap. I gat wan samting long wei we oli yusum toktok ia mileniom we i no stret long tingting blong mi. Mo yes, mi no intres tumas long wanem ol ekspet (man blong stadi) oli gat blong talem abaot yu, be mi intres moa blong save wanem Lod nao i talem long mi abaot yu.
Taem mi prea abaot yu, mo askem Lod olsem wanem Hem i stap filim abaot yu, mi filim wan samting we i defren evriwan long wanem ol man blong stadi ia oli stap talem. Ol filing long saed blong spirit we mi bin kasem abaot yu, i lidim mi blong biliv se toktok ia, mileniom, maet i stret long yu—be from wan defren risen, be i no hemia we ol ekspet ia oli stap andastanem.
Toktok ia, mileniom i stret long yu long wei ia we i mekem yu stap tingbaot se huia rili yu, mo wanem nao ril stamba tingting blong yu long laef ia. Wan tru man blong mileniom i wan we i tijim, mo oli tijim hem long saed blong gospel blong Jisas Kraes long laef bifo laef long wol ia, we i mekem ol kavenan longwe wetem Papa long Heven long saed blong sam samting we i nidim paoa long tingting—wetem tu, ol samting long saed blong klin fasin we i nidim paoa long tingting blong mekem—mo hem i mekem olgeta samting ia long taem we hem i stap long wol.
Wan tru man blong mileniom i wan man o wan woman we God i trastem hem inaf blong sendem hem long wol long taem blong dispensesen ia we i moa impoten long histri blong wol. Wan tru man blong mileniom i wan man o wan woman we i stap laef naoia blong help blong mekem ol pipol blong wol ia oli rere from Seken Kaming blong Jisas Kraes mo taem ia we bae Hem i rul blong wan taosen yia. Yu no mestem toktok blong mi—yu yu bon i kam long wol blong yu stap wan tru man blong mileniom.
Kwestin hem i: “?Olsem wanem yu save stanap mo laef olsem wan tru man blong mileniom?” Mi gat fofala tingting blong givim blong yu folem.
1. Lanem Huia Rili Yu
Tekem taem blong tingting wetem prea long saed blong ol tru samting ia:
-
Yu yu wan boe o gel blong God we Hem i jusum yu.
-
Hem i mekem yu folem fasin blong Hem.
-
Oli bin tijim yu long spirit wol, blong yu rere from eni samting mo evri samting we bae yu fesem long las pat blong ol las dei ia (luk long D&C 138:56). !Tijing ia i stap strong insaed long yu!
Yu yu stap laef long taem blong “leven aoa.” Lod i talem se hemia i las taem we bae Hem i singaotem ol wokman blong Hem oli kam long plantesen blong Hem blong pulum tugeta olgeta we Hem i bin jusum aot long ol fo kwota blong wol ia. (Luk long D&C 33:3–6.) Mo oli bin sendem yu i kam blong tekpat long kam tugeta ia. Bakegen mo bakegen, mi bin luk stret long ae blong mi strong paoa blong ol tru man blong mileniom taem oli stap tekem save long saed blong trutok i go long ol narafala man. !Hemia i pat blong aedentiti blong yu, mo stamba tingting blong yu olsem sid blong Ebraham (luk long Galesia 3:26–29)!
I no longtaem i pas, waef blong mi Wendi, mo mi, i gat wan gud eksperiens longwe long Siberia. Olgeta we oli travel wetem mitufala long dei blong rere ia long Irkutsk, i gat misin presiden, Gegori S. Brinton; waef blong hem, Sali; mo riten misinari boe blong tufala, Sam, we i bin go long wan misin long Rasia. Mifala i visitim naes lek Baekal mo wan ples blong maket long saed blong lek ia.
Taem mifala i gobak long bas blong mifala, mifala i luk se Sam i nogat. Sam taem afta, hem i kambak, wetem wan medel yia woman, we nem blong hem i Valentina. Long lanwis blong Rasia, Valentina i talem: “Mi wantem mitim mama blong yangfala man ia. !Fasin blong hem i gud tumas, hem i waes, mo fasin blong hem i kaen! !Mi wantem luk mama blong hem!” Valentina i laekem wei we Sam i luk, we i fulap long laet mo gud tingting.
Sam i soem Valentia long mama mo papa blong hem, i givim hem wan pepa abaot Sevya, i mekemsua se ol misinari oli go visitim hem. Taem ol misinari oli go luk hem wetem wan kopi blong Buk blong Momon, hem i promesem se bae hem i ridim. Sam narafala woman we oli wok long maket oli glad tu blong luk niufala buk ia we Valentina i bin kasem. Mifala i no save yet en blong stori ia, be from spesel laet we Sam i saenem, Valentina mo samfala fren blong hem oli kam blong save gospel.
Ol tru man blong mileniom, olsem Sam, oli save stret se huia olgeta. Oli ol disaepol blong Jisas Kraes we oli givim ful tingting blong olgeta, we oli holem evri janis we oli gat blong helpem olgetawan mo ol narawan blong rere from mileniom rul blong Sevya blong yumi.
From hemia, i strongfala tingting blong mi blong talem long yufala blong lanem samting yufalawan fastaem blong save huia stret yufala. Askem Papa long Heven long nem blong Jisas Kraes olsem wanem nao Hem i stap filim abaot yu mo misin we yu gat long ples ia. Sapos yu askem wetem wan tingting we i tru, wetem taem, bae Spirit i talemaot long yu ol trutok we bae i jenisim laef blong yu. Raetemdaon ol filing ia, luklukbak long olgeta plante taem, mo folem olgeta stret olsem we yu bin raetemdaon.
Mi promesem yufala se taem yufala i stat blong blong kasem wan smol pat nomo long olsem wanem nao Papa long Heven i stap lukluk yu mo wanem nao Hem i stap dipen long yu blong mekem long bihaf blong Hem, !bae laef blong yu i neva semmak bakegen!
2. Lukluk from—mo Rere—blong Mekem Samting we I No Posibol I Hapen
Oltaem nomo God i bin stap askem ol pikinini blong Hem blong kavenan blong mekem ol had samting. From se yu yu ol boe mo gel blong God we i stap mekem mo kipim ol kavenan, mo yu stap laef long las pat ia blong ol las dei, Lod bambae i askem yu blong mekem ol samting we i had. Hemia yu no save mestem—ol tes blong kavenan blong Ebraham oli no bin stop wetem Ebraham (luk long D&C 101:4–5).
Mi save se yu save harem nogud taem wan i askem yu blong mekem wan samting we i bitim evriwan paoa blong yu. Mi bin wan memba blong Kworom blong Olgeta Twelef Aposol blong 19 manis nomo, taem Presiden Spensa W. Kimbol (1895–1985) i ded. Long fas miting blong Fas Presidensi mo Kworom blong Olgeta Twelef Aposol folem odinesen blong Presiden Esra Taf Benson (1899–1994), Presiden i bin givim ol stret wok long Olgeta Twelef blong mekem. Instraksen blong Hem long mi, i tekem olgeta toktok ia: “Elda Nelson, yu bambae yu mas openem ol ples long ol kantri long Is Yurop blong prijim gospel long olgeta.”
Hemia long 1985. Long ol taem ia we politik i no strong mo yumi singaotem Kolkol Wo, i bin gat wan bigfala simen wol i seperetem taon ia blong Belin, be tu, ful Is Yurop i stap anda long strong rul blong ol komunis. Ol Jos oli klos, fasin blong relijin i wosip i no save hapen nating from i tabu.
Mi bin spendem plante taem blong wok blong mi blong katem openem ol hat blong sevem laef blong man, be mi no gat eksperiens ia we bae i lidim mi blong biliv se mi save openem ol ples long sam kantri blong oli save prijim gospel long olgeta. Be yet, wan profet i bin givim wok long mi, mekem se mi go blong mekem wanem we mi luk se i wan samting we i no posibol blong mekem.
Long stat nomo, ol samting oli kam blokem rod blong mi. Mi stap go long ol kantri ia we mi no save se mi stap go wea. Iven taem we mi bin save faenem nem blong wan stret man blong gavman, bae i hapen se miting i kansel long las minit, o oli pusum i gobak. Long wan kantri, oli seftem taem blong miting blong tu dei, mo oli putum ol temtesen long fored blong mi blong testem mi—sam oli trik blong tekem blak maket mane, o tekpat long ol nara rabis aktiviti. Long wan nara taem, !oli statem miting mo askem stret afta se mi ma go naoia nomo!
Be Lod i bin save mekem wok blong Hem (luk long 2 Nifae 27:20–21), mo mi bin gat spesel janis ia blong lukluk wan merikel i hapen, wan afta narawan—oltaem, mo nomo, afta we mi bin tingting had long hem, mo mi bin prea strong from.
Samfala kantri oli kam blong luksave Jos bifo Bigfala Wol blong Belin i brokdaon. Ol narafala kantri oli kam blong luksave Jos afta. Long 1992, mi bin save givim ripot long Presiden Benson se !Jos i bin stanap long tetaem ia long evri kantri blong Is Yurop!
Olsem wan tru man blong Mileniom we Lod i save dipen long yu, bambae yumekem histri tu i hapen. Bae oli askem yu blong akseptem ol wok we i gat jalenj long olgeta, mo blong kam wan tul long han blong Lod. Mo bambae Hem i mekem se yu save mekem samting we i no posibol blong mekem.
?Olsem wanem nao bae yu save mekem samting we i no posibol blong mekem? Taem yu mekem wanem i nid blong mekem blong fet blong yu long Jisas Kraes i kam strong, taem yu mekem i kam antap save ia blong yu long saed blong doktrin we oli tijim insaed long Jos we i kambak, mo taem yu no stop blong lukaotem trutok. Taem oli askem yu blong mekem ol samting we i no posibol blong hapen, yu—olsem wan tru man blong Mileniom, we rus blong yu i fas strong long doktrin we i klin tru—bae yu save mekem wan step wetem fet mo gogohed mo wetem glad, mekem evri samting we i stap long paoa blong yu blong mekem ol samting tingting blong Lod oli kamtru (luk long D&C 123:17).
Bae i gat ol dei we tingting blong yu bae i slak evriwan. !So yu mas prea blong gat strong paoa long tingting blong yu no givap! Bambae yu nidim paoa ia from se bae i no longtaem, bae i no wan popula samting blong stap olsem wan Lata-dei Sent. Sore tumas, sam long olgeta we yu ting se oli ol fren blong yu, bae oli stap tanem baksaed blong olgeta long yu. Mo bae yu luk se sam samting i no stret nating.
Be mi promesem yu se taem yu folem Jisas Kraes, bae yu faenem se yu gat paoa wetem pis mo tru glad. Taem yu stap kipim olgeta kavenan blong yu long fasin we i stret we i stret, mo taem yu stap difendem Jos mo kingdom blong God long wol tedei, bae Lod i blesem yu wetem paoa mo waes tingting blong mekem samting we i no posibol blong mekem.
3. Lanem Olsem Wanem blong Kasem Paoa blong Heven
Evriwan long yumi i gat ol kwestin i stap. Blong lukluk blong lanem samting, andastanem samting mo luksave trutok i wan impoten pat blong eksperiens blong yumi long laef ia. Plante samting oli bin stap mekem wok blong stadi long olgeta. Yu tu, bae yu lanem samting long wan wei we i gud moa taem yu askem ol kwestin wetem insperesen.
Stret naoia, i gat sam long yufala we i stap traehad blong save wanem bae yu mekem wetem laef blong yuwan. Sam narawan bae i stap askem olgetawan sapos God i fogivim sin blong yufala. Plante long yufala i stap askem olgetawan se huia mo weaples nao kompanion we i no save finis i stap long hem—mo olgeta we oli sapos blong stap oli stap wea.
Sam bae i save gat kwestin se from wanem Jos i stap mekem ol samting we hem i stap mekem naoia. Maet sam long yufala i no save stret olsem wanem blong kasem ol ansa long ol prea blong yufala.
Papa blong yumi long Heven mo Pikinini blong Hem, Tufala i stanap rere nomo blong ansarem ol kwestin blong yufala tru long givhan blong Tabu Spirit. Be i stap long yufala blong lanem olsem wanem nao blong yufala i kwalifae, o bae yufala i laef long wan wei we i inaf blong kasem olgeta ansa ia.
?Bae yufala i stat wea? Stat blong spendem moa taem long ol tabu ples. Tempol hem i wan tabu ples. Semmak tu long japel, ples ia we yufala i mekem bakegen ol kavenan blong yufala evri Sandei taem yufala i kakae sakramen. Mi invaetem yufala blong mekem apatmen blong yufala, ples blong slip blong yufala, hom blong yufala, o rum blong yufala i wan tabu ples; wan ples we i sef we yu save go long hem blong aot long ol tudak samting blong wol ia.
Prea i wan ki. Prea blong save wanem blong stop blong mekem, mo wanem blong stat blong mekem. Prea blong save wanem blong ademap long ples blong yu, mo wanem blong karemaot blong mekem se Spirit i save stap wetem yu oltaem.
Askem strong long Lod blong kasem presen blong luksave ol samting. Afta, laef mo wok had blong stap klin inaf blong kasem presen ia, blong mekem se taem ol samting we oli hapen long wol we i mekem ol tingting oli fasfas, bambae yu save stret wanem we i tru mo wanem nao i no tru (luk long 2 Nifae 31:13).
Givim seves wetem lav. Taem yu givim seves long olgeta we oli lusum rod blong olgeta, o oli harem nogud long saed blong spirit i save openem hat blong yu blong kasem revelesen we i blong yuwan.
Spendem moa taem—plante moa taem—long ol ples we Spirit i stap long hem. Hemia i minim se spendem moa taem wetem ol fren we oli stap wantem mo lukaotem blong gat Spirit i stap wetem olgeta. Spendem moa taem long ol ni blong yu blong prea, moa taem wetem ol skripja, moa taem wetem wok blong famli histri, moa taem insaed long tempol. Mi promesem yu se taem yu givim oltaem wan gudfala pat blong taem blong yu, bambae Hem i dabdabolem wanem we i stap.
Yumi stap sastenem 15 man, olsem ol profet, sia mo reveleta. Taem wan smol problem i girap—mo i luk se problem ia i stap kam bigwan evri dei—olgeta 15 man ia oli faet wetem trabol we i stap, oli traem luk wanem bae i hapen long evri defdefren rod we i stap, mo oli wok had blong lukaotem blong harem voes blong Lod. Afta we mi livim kakae, prea, stadi, tingting hevi mo toktok wetem ol Brata blong mi long saed blong ol hevi problem, bae i hapen plante taem se bae mi wekap long naet from mi kasem sam tingting long saed blong ol problem ia we mi stap wari long olgeta. Mo ol Brata blong mi oli gat ol semfala eksperiens.
Fas Presidensi, mo Kworom blong Olgeta Twelef Aposol oli toktok tugeta, mo oli serem evri samting we Lod i stap lidim mifala blong andastanem mo blong filim, hemia long wanwan blong mifala mo olsem wan grup. Mo afta, mifala i stap luk Lod i muv tru long Presiden blong Jos blong talemaot tingting blong Lod.
Fasin blong wok blong profet ia, oli bin folem long 2012 taem oli jenisim yia blong go long misin, mo bakegen taem oli mekem ol niufala jenis insaed long hanbuk blong Jos, hemia folem fasin blong samfala kantri we oli stap pasem loa blong letem mared bitwin man mo man, mo bitwin woman mo woman i hapen. Wetem fulap la mo sore long evriwan, mo speseli ol pikinini, mifala i faet strong longtaem blong andastanem tingting blong Lod long saed ia.
Wetem plan blong fasin blong sevem man long maen, mo wetem hop blong Hem blong wanwan long ol pikinini blong Hem i kasem laef we i no save finis, mifala i stap lukluk long ol plante defren wei we i posibol, we i save kam antap. Mifala i stap mit oltaem insaed long tempol, mo livim kakae, mo prea blong lukaotem moa daereksen mo insperesen. Mo afta, taem Lod i givim insperesen long profet blong Hem, Presiden Tomas S. Monson, blong talemaot maen mo tingting blong Lod, wanwan long yumi, long tabu taem ia, i filim wan konfemesen long saed blong spirit. Hem i wan spesel janis long mifala, olsem Ol Aposol, blong sastenem wanem we Lod i talemaot long Presiden Monson. Revelesen we i kam long Lod mo ol wokman blong Hem i wan tabu rod blong folem, mo i wan spesel janis blong yu tu, blong yu kasem revelesen blong yuwan.
Ol dia brata mo sista blong mi, yufala i save kam blong save maen mo tingting blong Lod from laef blong yuwan, semmak olsem we mifala, Ol Aposol, i stap mekem from Jos blong Hem. Semmak olsem we Lod i askem mifala blong lukluk gud samting, lukaotem mo tingting hevi, livim kakae mo prea, mo stadi mo faet from ol strong kwestin, Hem i stap askem yu blong mekem semmak taem yu stap lukaotem ol ansa blong ol kwestin blong yuwan.
Yu save lanem olsem wanem blong harem voes blong Lod tru long kwaet voes blong Spirit.1 Bae yu luk se Google, Twitter, mo Facebook, oli save help, !be oli no stap givim ol ansa blong ol impoten kwestin we yu gat!
Ol dia yang fren blong mi, yufala i save kam blong save maen mo tingting blong Lod from laef blong yufalawan. Yufala i no nid blong askem yufalawan se yufala i stap o no long ples we Lod i nidim yufala blong stap long hem, o sapos yufala i stap mekem wanem we Hem i nidim yufala blong mekem. !Yufala i save kam blong save! Tabu Spirit “bae i talem long yufala evri samting we yufala i mas mekem” (2 Nifae 32:3).
4. Folem Ol Profet
Long 1979, taem mi bin stap olsem jeneral presiden blong Sandei Skul, oli bin invaetem mi blong go long wan semina blong ol Ripresentativ blong Rijin, mo long tetaem ia, Presiden Kimbol i bin givim wan toktok wetem insperesen, long saed blong openem ol doa blong nesen we long taem ia oli bin klosem doa long Jos, olsem Jaena. Hem i bin givim jalenj long evriwan we i bin stap blong lanem Mandarin lanwis, blong mekem se mifala i save proposem blong ol skil blong wok blong helpem ol pipol blong Jaena.
Long mi, jalenj blong Presiden Kimbol i olsem wan wok we i kam long profet. Mekem se long naet ia, mi bin askem waef blong mi, Dantsel, sapos hem i glad blong lanem Mandarin lanwis wetem mi. Hem i agri, mo mitufala i faenem wan tija blong helpem mitufala. Yes, mitufala i no kam blong lanem gud blong toktok Mandarin, be mitufala i lanem inaf blong mekem se taem oli bin invaetem mi long nekis yia blong hem (tru long sam bigfala samting we i bin hapen we mifala i no ting long hem) blong go long Jaena olsem wan tija we i stap visit blong tijim man blong katem hat blong man, nao mi bin save akseptem invitesen ia.
Nao yumi muv faef yia afta, i go kasem 1985, yia afta we oli bin singaotem mi long Kworom blong Olgeta Twelef. Wan dei, mi kasem wan erjen rikwes blong go long Jaena blong mekem wan operesen long hat long top sta blong nesen ia, we long Jaena oli lukluk long hem olsem wan hiro. Mi eksplenem se wok blong mi long Jos i mekem se bae mi no save go, be ol dokta long Jaena oli plis long mi blong go hariap blong mekem operesen ia we bae i save sevem laef.
Mi tokbaot problem ia wetem kworom presiden blong mi mo Fas Presidensi. Mi bin filim se, olsem wan gud wok long ol pipol blong Jaena, i gud blong mi go mo mekem operesen ia.
Hemia mi bin mekem. !Mi glad tumas we operesen i bin go gud! Mo tu, i bin hapen se hemia i las operesen long hat we mi bin mekem. Hem i long Jaenan, Jaena, long 4 Maj 1985.
Nao yumi muv i go bakegen i go kasem Oktoba 2015. Oli bin invaetem mi mo Wendi blong gobak long Sandong Yunivesiti Skul blong Helt long Jaenan. Mitufala i sapraes blong wan “olfala fren” i welkamem mitufala, mo mifala i mitim bakegen ol dokta ia we mi bin tijim olgeta 35 yia bifo. Wan haelaet blong visit blong mitufala i blong mitim boe mo apuboe blong top opera singga ia. Evri gudfala eksperiens ia oli bin hapen from wan risen: !mi bin folem kaonsel blong wan profet blong stadi long Mandarin lanwis!
Ol profet oli stap luk wanem i stap kam long fiuja. Oli stap luk ol bigfala denja we enemi i putum i stap, o bambae i putum yet long rod blong yumi. Ol profet oli stap luk tu, ol bigfala rod mo janis we oli stap blong olgeta we oli lisin wetem tingting ia blong save obei. !Mi save se hemia i tru.! Mi bin gotru long hemia miwan plante taem we plante taem.
Lod i bin promesem yumi se bae Hem i neva letem wan profet i lidim yumi i go long rong rod. Presiden Harol B. Li (1899–1973) i talem: “Maet bae yu no laekem wanem we i stap kam long atoriti blong Jos. Maet i agensem politik tingting blong yu. Maet i agensem tingting blong sosaeti blong yu. Maet i save spolem samfala pat blong sosol laef blong yu. Be sapos yu lisin long olgeta samting ia, olsem se oli kamaot long maot blong Lod Hemwan, wetem longfala tingting mo fet, promes i we, ‘ol get blong hel oli no save win agensem yu; yes, mo Lod God bae i ronemaot ol paoa blong tudak long fored blong yu, mo bae i mekem se ol heven oli seksek from gud blong yu, mo from glori blong nem blong hem’ (luk long D&C 21:6).”2
Maet bae yu no save andastanem fulwan evri toktok blong wan profet we i stap laef. Be taem yu save se wan profet i wan profet, yu save prea long Lod, wetem tingting i stap daon, mo wetem fet, mo askem blong yuwan yu witnes long wanem we profet blong Hem i bin talem.
Samples raon long 40 B.K.B. plante man blong Nifae oli bin joenem Jos, mo Jos i bin gro. Be ol sikret plan oli stat blong gro, mo plante long ol lida blong olgeta oli bin haed long medel blong ol pipol, mo i bin had blong luk hemia. Taem ol pipol oli kam we oli gat moa mo moa hae tingting, plante long ol man blong Nifae oli “jikim samting we i tabu, oli tanem baksaed long spirit blong profesi mo blong revelesen” (Hileman 4:12).
Ol semfala denja ia oli stap long medel blong yumi tedei. Nogud tru samting we i stap i we “ol wokman blong Setan” (luk long D&C 10:5), oli stap raon long evri sosaeti. Mekem se yufala i mas lukaotgud se yufala i stap folem kaonsel blong hu (luk long Hileman 12:23).
Ol brata mo sista blong mi we mi lavem yufala. Yufala i bon i kam long wol blong yufala i stap ol tru man blong mileniom. Yufala i “jeneresen we God i makemaot” (Fas Pita 2:9), we God i bin odenem yufala finis blong mekem wan bigfala wok—!blong help blong mekem ol pipol blong wol ia oli rere from Seken Kaming blong Lod!