Merikel blong Mediom Faea
?Yu yu wantem samting naoia nomo—o yu yu wantem Samting we i raet?
Traem tingting se i gat wan yang man, we i stap hemwan long haos, mo i hanggri i stap (yes mi save, be yu traem gat pikja ia). Naoia, traem tingting long yang man ia, we i disaed blong mekem wan hot jis sanwij hemwan nomo blong fas taem.1 Traem tingting se papa mo mama blong yangfala man ia i neva tijim hem olsem wanem blong rusum wan jis sanwij, mo hem i neva luk wan man i mekem.
Be, yang man i putum evri samting i stret insaed long bred blong hem: jis, smol bata aotsaed long bred (mo smol mayones insaed). Nao, hem i go karem fraepan mo putum antap long stov. (Bae yumi tekem tu se hem i no gat lektrik tul blong mekem sanwij blong hem.)
Nao, i gat wan tingting ia i strong long maen blong hem—wan tingting we plante pipol oli no luksave blong gat tingtingolsem: “Sapos mi mekem hit ia i go antap, bae i tan hariap moa.”
Traem tingting se bae wanem i hapen afta. (O yu no traem blong tingting nomo.)
Bae sanwij blong hem i braon gud mo i faefaerap taem oli kakae, o bae jis blong hem i kam sopsop gud we i lastik—be i no save gat tugeta. Ating bae bred blong hem i lukluk mo i filim olsem ston blong volkenu mo jis i no sopsop gud, we i no gudgud tumas.
Olsem we yu luk, problem blong hem i from hem i no luksave samting (we i save gat ekskius from) mo from hem i no save wet longtaem (mo hemia i no gat eskius from). Sapos bae hem i ripitim semfala mistek ia long nekis taem, bae hem i no gat gudfala eskius, from bae hem i no save talem se hem i no save, be bae hem i save talem se hem i no save wet longtaem.
Blong mekem sanwij ia i stret, bae hem i mas faenem merikel ia blong mediom faea.
Mediom I No Strong Evriwan
Mediom faea long wan stov i stret wan blong mekem wan rus jis sanwij, mo plante nara kakae, from se i letem kaekae i tan gud be i no drae insaed. Wan samting nomo we i nogud long hem, i we i nidim plante moa taem, mo yumi mas lukluk long hem oltaem, we i minim se wan i mas save wet longtaem.
Lod i talem se : “gohed wetem fasin blong stap wet longtaem gogo kasem taem yufala i kam stret evriwan” (luk long D&C 67:13). Long ples ia Hem i stap tokbaot fasin blong kam stret evriwan ia we i bitim fasin blong mekem ol naes rus jis sanwij; Hem i wantem yumi blong kam moa olsem Hem. Jisas Kraes hem i stret eksampol blong fasin blong save wet longtaem. Mo pat blong folem eksampol blong Hem, i minim blong mekem ae blong yumi i lukluk i go longwe mo bigwan moa, i lukluk i go bitim taem naoia, mo i stap luk bigfala praes we i kam taem yumi gat disiplin o kontrol long yumiwan, taem yumi gat fet, fasin blong obei, hadwok we i gogohed mo i strong, save tekem ol had samting, mo gat lav—long nara toktok, blong gat fasin blong save wet longtaem.
Yumi save talem se mining blong hem, blong gat fasin blong save wet longtaem i minim blong save wet, we yumi luk se i no wan intresting samting nating, be olsem we Presiden Dita F. Ukdof, Seken Kaonsela long Fas Presidensi i bin tijim yumi, hemia i moa bitim blong stap wet: “Blong gat fasin blong save wet longtaem i minim blong mekem samting mo wet semtaem, blong stap strong. I minim blong stap wetem wan samting mo mekem evri samting we yumi save mekem—stap wok, stap hop, stap praktisim fet; stap gotru long hadtaem wetem strong fasin, iven taem we ol samting we hat blong yumi i wantem i kam sloslo. Fasin blong save wet longtaem i no blong stap strong nomo; ! Hem i blong stap strong wetem gud fasin!”2
Hem i no blong sakem jis sanwij antap long fraepan mo fogetem; hem i blong luklukgud long hem, mo tantanem wanwan taem, long raet taem.
Hem i no blong go tru long skul o seminari o jos; hem i blong wok blong lanem samting o blong wosip.
Hem i no blong stap wet nomo blong kasem wan testemoni long saed blong Buk blong Momon from se yu askem nomo; hem i blong ridim, stadi, tingting hevi, prea, mo laef folem ol tijing we oli stap insaed long buk ia.
Hem i no blong jes sidaon i stap taem ol fren oli stap mekem fani abaot relijin blong yu; hem i blong prea from olgeta mo rili wantem olgeta blong gat wan jenis long hat, mo mekem wanem yu save mekem blong hemia i hapen.
Hem i no blong jes wet kasem taem yu gat 16 yia blong go long wan deit; hem i blong lanem blong lavem blong stap obei mo stap traem blong andastanem olsem wanem blong folem kaonsel blong profet we bae i blesem yu.
Tanem Faea I Go Daon
Fasin blong save wet longtaem mo gat kontrol, o kontrol long yuwan, tufala samting ia i pat blong “frut blong Spirit” (luk long Galesia 5:22–23). Nomata se i gat ol ejen samting we i nidim blong yumi lukluk kwik long olgeta fastaem, (semmak olsem sam kaekae we i nidim hot faea), yumi mas meksua se yumi stap wok blong gat moa fasin blong save wet longtaem mo moa kontrol long yumiwan. Sapos yu stap filim se hemia i stap hapen, hem i wan saen se Spirit i stap wok insaed long laef blong yu.
Merikel blong mediom faea bae i givim yu wan rus jis sanwij we i stret gud, bae i givim hambega we i no bon be i tan stret insaed, ol braon poteto be i no ol blak poteto, mo raes we i sopsop gud i no raes we i strong mo i lastik. Be fasin blong save wet longtaem bae i mekem ol stret wok insaed long laef blong yu (luk long Jemes 1:4), i stap helpem yu blong muv fored blong kam moa olsem Jisas Kraes, i tekem Tabu Spirit i kam lidim tingting blong yu, mo long en, i helpem yu blong tekem yu i go long laef we i no save finis.
Taem we bae yu stap luksave ol samting we oli mekem se bae yu no save wet longtaem, tingting long rus jis sanwij ia (o eni nara kaekae we i stret long yu) mo wanem bae yu sakrifaes long hem taem yu letem fasin blong no save wet i lidim ol aksen blong yu. Sapos yu rong from yu no stap wet longtaem, nao joenem klab. Yu save sakem sin, mo traem bakegen blong folem eksampol mo ol tijing blong Jisas Kraes. I gat moa bitim wan rus jis sanwij blong mekem, mo i neva let tumas blong lanem abaot fasin blong kam stret evriwan wei i kam tru long fasin blong stap wet longtaem.