Ol Voes blong Ol Lata-dei Sent
Ol Enjel we Nem blong Tufala i Masta mo Misis Dann
Pikja i kam long Wilson Ong
Mi bin stap luk Tivi, taem mama blong mi i ringim mi blong talem se brata blong hem, we i gat 92 yia, Anggel Floid, mo waef blong hem, Anti Mili, tufala i sik wetem flu mo tufala i no gat kaekae long haos blong tufala. I no gat wan long tufala we i oraet inaf blong go long stoa blong pem eni samting. Anggel Floid mo Anti Mili, tufala i no gat wan famli we i stap kolosap long tufala, mekem se i no gat wan i stap blong helpem tufala.
Mama blong mi i askem sapos mi save help. Mi wan nomo mi memba blong Jos long pat blong famli ia, mo oli bin askem mi blong stap help long ol defren taem bifo. Problem i we, mi mi stap long Yuta, YSA, mo anti mo anggel blong mi, tufala i stap long Hemet, Kalifonia, YSA.
Mi talem long mama blong mi blong givim mi smol taem blong mi tingting long wanem blong mekem. Mi gat wan fren we i stap kolosap long Hemet, mekem se mi bin ringim hem mo askem sapos hem i save eniwan we i stap long Hemet. Hem i talem se i gat wan woman we hem i bin givim seves wetem long Redland Kalifonia Tempol, nem blong hem Sista Dann we i wan Rilif Sosaeti presiden longwe.
Taem Sista Dann i ansarem telefon, mi stat olsem: “Halo Sista Dann. Yu no save mi, be nem blong mi i Nansi Litel, mo mi stap long Yuta. Mi mi wan memba blong Jos, be anti mo anggel blong mi we oli stap long Hemet, tufala i no memba blong Jos. Tufala i sik mo tufala i no gat kakae long haos blong tufala.” Mi talem ples we tufala i stap long hem, we i longwe long ples we hem i stap long hem, mo mi eksplenem se mi jes wantem gat wan infomesen abaot wan restrong we i stap kolosap long tufala, we i save karem kakae we i tan i go long tufala.
Be Sista Dann i strong se hem nao wetem hasban blong hem, bae tufala i tekem kakae i go long anti mo anggel blong hem. Tufala i bin gat sam supsup we tufala i mekem mo sam bred, mo mama blong hem i jes mekem sam kuki biskit. Mi talem no, be hem i strong se bae tufala i go.
Samfala aoa afta, Sista Dann i ring mo talem long mi se evri samting i oraet. Mama blong mi i bin ring afta blong talem long mi wanem we anggel Floid i tokbaot long visit blong tufala ia. Hem i talem: “Ol enjel oli kam long haos blong mi, nem blong tufala, Masta mo Misis Dann. Tufala i kam wetem fulap kaekae: ol frut, ol vejetebol, supsup we oli kukum, bred mo samfala kuki biskit. Ol kuki ia oli ol beswan long eni narafala we mi bin kakae bifo.” Famli Dann i bin visitim anggel blong mi, helpem tufala wetem nid blong tufala, mo afta, Brata Dann i tekem Anti Mili blong mi we i no gat paoa, mo i gat sik blong Alsaema (lusum tingting) i aot long bed i go long wan jea long kijin blong mekem se Sista Dann i save fidim hem.
Taem Anggel Floid i ringim mama blong mi blong tokbaot visit blong tufala Dann, hem i krae. Hem i talem se hem i neva mitim sam pipol we oli gat kaen fasin mo oli kea. Hem i talem long mama blong mi se mi mi laki blong stap laef long Yuta mo gat “evri Momon” ia oli raonem mi.
Fo dei afta long visit, Anggel Floid i wokbaot i go long leta bokis blong hem, mo i glis mo i foldaon. Hem i bangem hed blong hem mo fo dei afta, hem i ded. I no gat wan i luk hem bifo hem i ded, be nes nomo we i stap lukluk long tufala long haos, mo Brata mo Sista Dann.
Mi talem tangkyu from eksampol we i olsem hemia blong Kraes we wan long ol Rilif Sosaeti sista we i stap longwe, wan we mi no mitim hem yet, i bin helpem anti mo anggel blong mi.