Ol Lesen we Oli Kam long Mama
I Kam long Elda Jairo Masagardi
Blong Olgeta Seventi
Taem mi stap gro i kam antap, taem mi bin gat eni mane, mama blong mi bae i tekem mane ia we i naes gud—we i no benben tumas o i no doti—bae i givim i go long wan wokman blong Jos we mifala i stap go long hem. Hem i bin mekem hemia ful laef blong hem. Hem i talem: “Hemia i blong God.” Ol toktok ia oli bin stap long tingting blong mi stat long tetaem ia. Taem mi bin baptaes long Jos blong Jisas Kraes blong Ol Lata-dei Sent we mi wan bigman finis, i no bin had long mi blong pem taeting, from se mama blong mi i bin tijim mi blong obei long loa ia.
Mama blong mi i bin tijim mi tu blong stap ones, iven sapos hem i minim blong mekem ol samting we i had. Neiba blong mifala i stap planem evri kaen frut mo vejetebol. Samtaem, frut blong tri blong hem bae i karem kaekae i kam long saed fanis blong mifala. Wan taem, mi pikimap sam long ol frut ia mo tekem i go long mama blong mi. Hem i lukluk mi mo talem: “Hemia i no blong yumi ia.” Mi no save bilivim. Mi talem: “?Yu talem olsem wanem ia? !Frut i stap long saed fanis blong yumi!” Bakegen hem i talem: “Hemia i no blong yumi ia.” Nao hem i tekem han blong mi, mo mifala i wokbaot i go long haos blong ol neiba. Mitufala i askem olgeta blong oli fogivim mifala from mifala i tekem frut ia. Mama blong mi i talem se sapos mifala i wantem wan samting, mifala i mas karem long fasin we i ones.
Maet papa mo mama blong yufala i no ol memba blong Jos, o yu no agri oltaem wetem ol joes blong olgeta. Stil yu save lanem ol tru prinsipol aot long olgeta, olsem fasin blong stap ones, responsabiliti, dipen long yuwan, mo wok had. Olgeta prinsipol ia bambae oli ol bigfala blesing long laef blong yu.