Glad blong Stap Lanem Samting

I Kam long Tad R. Kalista

Sandei Skul Jeneral Presiden

Taem yumi kam ol man mo woman we i tingting strong blong lanem samting, bae yumi save tabu glad ia, we i kam taem wan i stap lanem mo stap laef folem gospel blong Jisas Kraes.

I gat wan stori we i tokbaot wan man we oli kam blong save hem olsem man blong taon we i stap mekem nating. Hem i no wantem wok, i no wantem lukaotem wan wok. Hem i stap laef long hadwok blong ol narafala man. Long en, ol pipol blong taon oli harem se i inaf nao. Oli disaed se bae oli tekem hem i go aotsaed long baondri blong taon mo blokem hem blong nomo kam long taon. Taem wan man blong taon ia i stap tekem hem long wan wilkat i go long en blong baondri blong taon, man we i draevem wilkat i filim bigfala lav mo sore i kavremap hem. Maet, man ia we oli sakemaot hem, hem i nidim wan moa janis. Nao, folem tingting ia, hem i askem: “Ei, ?yu wantem wan basket kon blong statem wan niu laef bakegen?”

Man ia i ansa: “?Be oli klinim finis?”¹

Ol Tija mo Olgeta we Oli Stap Lan: Wan Ikwol Responsabiliti blong Tekpat

Samtaem, yumi faenem se sam pipol oli wantem skripja i kam long wan plet—oli wantem se wan bae i ridim mo eksplenem skripja long olgeta bifo oli ridim. Oli wantem gospel i kam long olgeta long ol gud bit blong miusik, o i kam long vidio klip. Oli wantem Sandei Skul tija blong i rere mo i fidim olgeta long spun long lesen ia, be olgeta oli no rere gud, o oli no tekpat.

Long narasaed, Sevya i bin invaetem olgeta pipol we oli stap lan aot long Hem blong oli go hom, from se oli no save andastanem ol toktok blong Hem. Hem i givim oda long olgeta blong oli prea, tingting hevi, mo “mekem rere ol tingting blong [olgeta] blong tumoro,” taem bae Hem i “kam long [olgeta] bakegen” (luk long 3 Nifae 17:2–3).

Lesen hem i hemia: Hem i responsabiliti, i no blong tija nomo, blong rere mo kam, be tu, hem i responsabiliti blong man we i stap lan. Semmak olsem we tija i gat responsabiliti blong tij wetem Spirit, hem we i stap lan tu, hem i gat responsabiliti ia blong lanem samting wetem Spirit (luk long D&C 50:13–21).

Buk blong Momon i rekodem: “man we i prij i no gud bitim man we i lisin; mo tija i nomo gud bitim man we i stap lan; mo, olsem ia nao yumi luk se olgeta evriwan i semmak” (Alma 1:26; oli ademap italik).

Wanem i stap daon ia i samfala tingting long wanem yumi save mekem blong save filim glad ia we i kam taem yumi mekem pat blong yumi blong stap lanem mo stap laef folem gospel.

Stap Lanem Samting long Hom

Stadi Ol Skripja

Evri memba i responsibol blong lanem gospel hemwan; yumi no save givim responsabiliti ia long wan narawan. Plante long ol save ia oli kam taem yumi stadi long skripja evri taem. Presiden Harol B. Li (1899–1973) i talem: “Sapos yumi no stap ridim ol skripja blong yumi evri dei, testemoni blong yumi bae oli kam bunbun moa.”² Aposol Pol i talem se ol man Jiu long Biria “oli glad moa blong tingbaot ol tok blong tufala i winim ol man Tesalonaeka. Oli wantem tumas blong harem tok blong tufala,” mo afta Pol i talem risen we olgeta ia oli olsem: “mo evri dei, oli stap ridim gud ol tok blong Baebol blong faenemaot se ol tok blong tufala i tru no i no tru.” (Ol Wok 17:11; oli ademap italik).

Stadi long skripja evri dei, i wan kaekae we spirit blong yumi i nidim. I no gat wan nara samting, long evri dei laef blong yumi, we i save fulumap hol ia. From hemia, yumi mas putum taem blong stadi long skripja, be yumi no tekem se bae yumi stadi long skripja long fri taem blong yumi.

Sam oli save talem se: “Be mi no gat taem blong stadi long skripja evri dei wetem evri narafala diuti long laef blong mi.” Toktok ia i mekem mi tingbaot stori blong tufala man blong wok wetem akis we tufala i mekem kompetisen blong luk se huia i save katem moa tri long wan dei. Taem san i girap, kompetisen i stat. Evri aoa olsem, man we i sot moa i stap lus long bus blong 10 minit olsem. Evri taem hem i mekem olsem, man we i kompit wetem hem i smael, i saksakem hed blong hem se hem i glad, from hem i sua se hem i stap muv i go. Man ia we i moa bigwan i neva aot long ples we hem i stap long hem, hem i neva stop blong katem wud, i neva spel smol.

Taem we dei i finis, bigfala man i sek blong faenemaot se sotfala man, we hem i luk se i stap westem plante taem blong hem, i bin katem plante moa tri bitim hem. Hem i askem: “?Be yu mekem olsem wanem ia, we oltaem yu stap spel?”

Man we i win i talem: “O, mi stap go faelem akis blong mi.”

Evri taem yumi stap stadi long skripja, yumi stap faelem akis blong yumi long saed blong spirit. Mo merikel pat blong hem, i we, taem yumi mekem olsem, yumi save yusum haf taem we i stap wetem waes.

Rere Bifo Taem

Ol stadi oli soem se wan smol namba nomo blong ol memba blong Jos oli stap ridim ol skripja blong olgeta bifo oli tokbaot long Sandei klas. Wanwan long yumi i save tanemraon fasin ia. Yumi save mekem pat blong yumi blong gat eksperiens blong lanem samting taem yumi rere fastaem bifo yumi go long klas; yumi ridim finis ol skripja mo yumi rere blong serem ol tingting. Taem yumi rere, hemia i wan presen long saed blong spirit we yumi save givim i go long evri memba blong klas.

Stap Lanem Samting long Klas

Tekem Pat long Klas

Komanmen ia, blong yumi mas openem maot blong yumi (luk long D&C 60:2–3), i no blong mekem misinari wok nomo, be blong mekem tu insaed long klas. Taem yumi tekpat, yumi invaetem Spirit, we i save testifae abaot trutok blong ol toktok blong yumi, mo i givim moa laet ia long maen blong yumi. Antap long hemia, taem yumi tekpat, ol tingting blong yumi i save givim insperesen long ol narawan, mo long wei ia, i leftemap tingting blong olgeta tu blong tekpat.

Long wei ia, yumi stap folem tijing prinsipol we Lod i bin tijim se wan nomo i toktok long wan taem, mo evriwan i lisin long toktok blong hem, blong mekem se taem evriwan i gat taem blong toktok, bae evriwan i kam antap from ol toktok blong evriwan (luk long D&C 88:122; oli ademap italik). Samtaem, blong tekpat long klas i no wan isi samting; i nidim blong yumi kamaot long gudfala ples we yumi sidaon long hem. Be taem yumi tekpat, i mekem se evriwan insaed long klas i gro.

Raetemdaon Ol Filing blong Yu

Longtaem smol nao, mi stap karem ol smol waet pepa kad i go long jos, mo mi stap lukaotem ol niu tingting long saed blong doktrin, o ol filing long saed blong spirit we mi save raetemdaon. Mi save talem stret se mi bin kasem plante blesing. Fasin ia i mekem se ol lukluk blong mi oli jenis; i lukluk moa long wan poen, mo i mekem mi lanem samting kwiktaem moa; i mekem tu se mi wantem tumas blong go long jos.

?From wanem hem i impoten blong raetemdaon ol eksperiens long saed blong spirit we yumi kasem long jos o long narafala ples? Traem tingting se wan mama i stap toktok long yangfala boe blong hem, mo long wan taem, boe i talem: “Mama, hemia wan gudfala kaonsel.” Afta, hem i tekemaot wan notbuk mo i stat blong raetemdaon ol filing we hem i kasem aot long storian blong tufala. Taem tingting blong mama ia i kambak afta we hem i sek, ?yu no ting se mama ia bae i wantem talem moa samting?

Bae i no save mestem. Bae semfala prinsipol ia i semmak tu wetem kaonsel we Papa blong yumi long Heven i stap givim. Taem yumi stap raetemdaon ol filing we Hem i stap givim long yumi, bae i hapen tu se Hem i wantem givim moa revelesen long yumi. Antap long hemia, plante long ol filing ia we yumi kasem, fastaem bae i olsem ol smol sid blong tingting, be sapos yumi fidim gud mo tingting hevi long olgeta, bae oli gro i kam ol bigfala oktri long saed blong spirit.

Profet Josef Smit i bin tokbaot olsem wanem i impoten blong raetemdaon ol niu tingting mo filing: “Sapos yu stat blong toktok raon long samfala impoten kwestin, mo yu no stap raetemdaon olgeta, maet, from we yu ting nating long olgeta samting ia taem God i talemaot long yu, mo yu ting se oli no impoten tumas, nao Spirit i kamaot; mo i gat, o i bin gat, wan bigfala save ia, we i impoten tumas, we naoia, i lus.”³

Glad blong Stap Lanem Samting

Blong stap lanem samting i moa bitim wan tabu diuti. Hem i blong stap tu olsem wan bigbigfala glad.

Long wan taem, wan man blong matematik we nem blong hem Arjimedes, king blong hem i askem hem blong i faenemaot se niufala hat blong king blong hem i strong gol, o sapos man blong wokem hat blong king ia i no bin ones mo i yusum nara samting olsem silva mo mekem i kam gol kala. Arjimed i tingting hevi long wanem bae hem i mekem; nao i faenem ansa blong hem. Hem i glad tumas long wanem we hem i faenem, mekem se, folem kastom stori blong hem, hem i ronron raon long taon, i singaot: “!Yureka! !Yureka!”—we i minim, “!Mi faenem! !Mi faenem!”

Nao glad blong hem i bigbigwan from hem i faenem wan simpol saens prinsipol; be i gat wan glad we i bigwan moa blong faenemaot ol trutok blong gospel blong Jisas Kraes: olgeta trutok ia, oli no givim infomesen nomo long yumi, be tu, i sevem yumi. From risen ia, Sevya i bin talem: “Mi mi stap talemaot ol tok ia long yufala, blong … bambae yufala i glad we i glad” (Jon 15:11). Mo from hemia, ol boe blong God oli singsingaot wetem glad (luk long Job 38:7) taem oli lanem abaot plan blong fasin blong sevem man. Semmak olsem we ol sid oli gat paoa blong gro, ol gospel blong trutok oli gat paoa ia blong givim glad.

Hem i no wan tabu oda nomo blong “luklukgud blong lanem samting” (luk long D&C 88:118), be hem i wan tabu wok blong mekem. Evri taem yumi stadi long ol skripja, rere gud moa mo go long klas, tekpat long toktok insaed long klas, askem ol kwestin, mo raetemdaon ol filing, bae yumi kam moa olsem God, mo long wei ia, yumi stap leftemap paoa blong yumi blong filim glad ia we Hem i stap filim.

Bae yumi evriwan i traehad blong tingting strong moa blong lanem samting, mo lanem moa samting we i tabu—long hom, long klas, mo long eni ples we yumi stap long hem. Taem yumi mekem olsem, bae yumi save filim bigbigfala glad ia we i kam taem yumi stap lanem mo stap laef folem gospel blong Jisas Kraes.