Olsem Wanem blong Mekem Kraes I Stap long Medel blong Laef blong Yumi

I Kam long Elda D. Tod Kristofeson

Blong Kworom blong Olgeta Twelef Aposol

I kam long wan divosen blong Brigham Yang Yunivesiti- Aedaho we hem i bin givim long 27 Jenuware 2009.

Jisas i winim stret fasin blong stap wan evriwan wetem Papa blong Hem taem Hem i folem fulwan tingting blong Papa blong Hem, hemia long saed blong bodi mo long saed blong spirit. Taem Hem i tokbaot Papa blong Hem, Jisas i talem: “Oltaem mi stap mekem olgeta samting we hem i wantem” (Jon 8:29). From se hem i bin tingting blong Papa, Jisas i bin agri blong Hem i ded, “wanem we Pikinini i wantem bae i kam wan pat blong wanem we Papa i wantem” (Mosaea 15:7). From se Hem i bin lukluk long Papa nomo, hemia nao i bin wan long risen from wanem seves blong Jisas i bin klia mo i bin gat paoa. I no gat eni kaen tu tingting we i kam spolem Hem.

Long semfala wei, yu mo mi, i save putum Kraes long medel blong laef blong yumi mo kam wan wetem Hem semmak olsem we Jisas i wan wetem Papa (luk long Jon 17:20–23). Yumi save stat blong sakemaot evri samting long ol laef blong yumi afta yumi bildim bak ol laef blong yumi wetem ol impoten samting i kam faswan wetem Sevya long medel. Faswan, bae yumi putum ol samting i stap we i mekem i posibol blong stap tingbaot Hem oltaem—stap prea oltaem, stap stadi mo tingting hevi long ol skripja, stadi wetem tingting long ol tijing blong ol Aposol, stap rere evri wik blong tekem sakramen wetem fasin blong stap klin inaf, Sandei wosip, stap rekodem mo stap tingbaot wanem we Spirit mo eksperiens i stap tijim yumi abaot fasin blong stap wan disaepol. Maet i gat ol nara samting we bae oli kam long tingting blong yu we i go stret wetem situesen blong laef blong yu long tetaem ia. Taem we yu putum inaf taem mo rod i stap from ol impoten samting ia, blong stap putum laef blong yu i lukluk nomo long Kraes, mo stretem yu blong ol samting ia oli stap, nao yu save stat blong ademap ol narafala responsabiliti mo ol nara impoten samting, olsem taem mo samting we yumi gat, olsem edukesen, ol famli responsabiliti, mo ol samting we yuwan, yu wok from. Long wei ia, wanem we i impoten, bae i no save go draon long medel blong ol gudfala samting blong laef blong yumi, mo ol samting we oli no impoten tumas bae oli no kam faswan, o bae oli go lus nomo.

Nomata se hemia bae i no isi blong mekem, yumi save oltaem, muv fored wetem fet long Lod. Mi save talem tru se, wetem taem, tingting long hat mo paoa blong oltaem tingbaot mo folem Sevya, bae i gro. Yumi mas wok wetem longfala tingting from risal ia, mo prea oltaem blong save luksave samting mo kasem help we i kam long heven we yumi nidim (luk long 2 Nifae 32:9).