Ol Voes blong Ol Lata-dei Sent
Stap Plis mo Askem Man I Sore
Pikja i kam long Stan Felos
Long wan trip i go long wan siti kolosap insaed long Estonia, mi bin luk wan man we i stap plis mo askem mane. Mi sapraes tumas, from mi luksave man ia we mi bin save hem taem mi bin stap olsem wan misinari long taon ia, 10 yia bifo. Hem i stap pulum wan bigfala plastik we i fulap long botel, semmak olsem bifo, blong salem ol botel ia. Mi tingbaot se, oltaem, bae hem i askem sapos yu gat selen, mo sapos yu givim sam selen long hem, bae hem i askem sam moa long yu.
Mi sek wantaem blong luk hem. Afta 10 yia, hem i stap semmak nomo—i gat moa grei hea, be i luk se hem i bin stap laef long semfala laef ia blong askem mane long rod, dei afta dei. Mi tingbaot ol 10 gudfala yia we mi bin laef, mo long taem ia mi bin mared long tempol, mi winim skul blong mi, mi faenem wan gudfala wok, mo mi stap glad long wan gud helt.
Mi ting se hemia nao las taem we bae mi luk hem, mo mi filim se mi mas givim wan samting long hem. Problem i we, mi gat wan pepa mane nomo i stap, we mane blong hem i moa bitim wanem we mi wantem givim. Mi harem nogud long joes ia we mi gat—givim wan samting long hem, o givim hem moa bitim we mi wantem. Mi disaed se bae i no mekem wan samting i defren long mi, mo bae i mekem dei blong hem i wan hapi wan, mekem se mi givim mane ia long hem.
Tu dei afta, mi nao mi stap long semmak situesen, be tetaem ia, mi nao mi stap askem mane mo askem man blong i sore long mi. Mi bin mestem deit blong wan impoten aplikesen blong wan skolasip. Mi ting se mi sendem aplikesen tu wik bifo taem i klos, be mi sek bigwan taem mi jekem bakegen, mo luk se mi bin sendem i go wan dei i let.
Mane blong skolasip ia i 100 taem moa long mane ia we mi bin givim long man ia we i bin stap askem mane, mo mi luksave se hemia i wan defren situesen we i tanem i kambak long mi. Mi nao mi stap askem man i sore long mi, tru long prea long Papa blong mi long Heven, mo tru long imel i go long ol wokman blong yunivesiti. Oli bin talem se bae oli putum aplikesen i go, be bae oli raetem se aplikesen i kam let.
Prea blong mi i gat ansa mo mi bin gat blesing blong kasem skolasip, we i bin givhan long saed blong mane, i givhan long waef blong mi, mo miwan bakegen. Be moa impoten long eksperiens ia, hem i we i tijim mi wan bigfala lesen: ?olsem wanem? ?Yumi evriwan i no man blong stap askem samting long fored blong God? (luk long Mosaea 4:19).