Paoa blong Stap Strong blong Gogohed
Hem we i raet, i stap long Yuta, YSA.
Wetem wan leg we i brok, mo wetem hat we i brok, mi bin nidim blong mi kam gud bakegen. Hop i mekem se mi gotru.
Samples wan manis bifo long namba 16 betdei blong mi, famli blong mi i go long wan trip long trak, krosem Yunaeted Stet blong visitim sam long ol ples blong histri blong Jos. I bin oraet long mi blong stap long trak longtaem, from se oltaem, famli blong mi i gat gud taem. Mi tingbaot se mi go insaed long trak long dei ia afta we mifala i bin visitim Winta Kwota, long Nebraska. Ren i ren bigwan. Mi go sidaon long jea biaen, mi karem wan blangket, mo mi benem mi, mi stap lisin long ren gogo mi slip.
Nekis samting we mi save, mi filim se mi stap tantanem mi we i no gat kontrol long hem. Sam taem afta, mi bin lanem se trak blong mifala i flae mo i banggem simen fanis. Mi tingboat smol se wan i talem se leg blong mi i brok mo bae oli katem mi.
I no longtaem afta, taem mi stap kam oraet long hospital, papa blong mi i kam long rum blong mi. Hem i sidaon long saed blong mi long bed blong mi, mo i holem han blong mi. Be mi bin filim save finis wanem bae hem i talem long mi.
Hem i talem: “Gel blong mi, ?yu yu save se yu stap wea?”
“Long hospital,” mi ansa.
“?Mo yu yu save wanem i bin hapen?”
“Yumi gat wan aksiden long trak.”
“Eniwan i tokbaot long yu wanem i hapen long haf famli?”
Mi stop mo mi ansa no.
Hem i talem se evriwan bae i oraet—be mama nomo. Hem i no laef.
Mi ting se bae mi harem nogud bigwan wantaem, be no. Mi sek, be mi no save from wanem, mi bin filim pis, wan swit filing se mi save trastem God se ol samting bae oli oraet.
Mi slip i stap long hospital ia, mi tingbaot wan ples ia blong histri blong Jos we mifala i bin visitim tu dei bifo aksiden i hapen: Bus blong Martin, long Waeoming. Plante paeionia oli ded long ples ia from hanggri, mo from sno mo strong kolkol. Mi tingbaot we mi luk ol hip blong ol ston antap long ol gref, mo mi tingting se i nidim hamas fet blong nara haf blong ol paeionia blong oli tekem ol hankat blong olgeta mo muv i go. Stori ia i bin tajem mi. Taem mi bin stap tingbaot stori ia, mi bin save se ol paeionia oli bin stap strong mo gogohed, mo mi tu, bae mi mas mekem olsem, mo bae mi mas stap strong tu from ol yangfala brata mo sista blong mi.
Fasfala filing blong pis we mi bin filim long fas taem i bin stap wetem mi blong wan wik mo haf olsem. Mi bin stap sidaon long wiljea, mi stap lukluk ol faeawok tru long windo blong hospital long nambafo Julae, taem tingting ia i kasem mi—mama blong mi i go finis. Bae hem i no stap taem bae mi graduet long skul. Bae hem i no stap taem bae mi kasem endaomen blong mi long tempol. Bae hem i no stap long taem blong mared blong mi. Hem i go finis.
Tetaem ia nao ol samting oli stat blong oli had long mi. Leg blong mi i soa nogud, mo mi nomo wantem kakae. Mi stap wajem TV, be mi no stap luk samting, mekem se mi stap slip nomo. Famli blong mi i wari long mi from se mi no stap krae tumas.
Wota blong ae blong mi i kam bigwan nao taem mifala i go hom long Oregon, we haos i emti i stap. Kwiktaem nomo, mi mas mekem samfala responsabiliti blong mama, mo ol brata mo sista blong mi oli kam long mi taem oli harem nogud. Mi traem blong mi stap strong from olgeta. Be i no bin isi.
Taem mi gobak long skul, ol samting i had smol. Evriwan i bin harem abaot aksiden, mo taem oli no save, nao oli harem taem ol tija oli stap presentem mi olsem gel ia we i kasem wan aksiden. Mi filim se oli stap putum mi long wan kona.
I bin had tumas, speseli taem papa blong mi i bin mared bakegen naen manis afta we mama i bin ded. Mi bin save se stepmama blong mi bae i gud long famli blong mifala, mo mifala i nidim hem, be hem i bin had blong stretem tingting blong mi long hemia.
I no evri samting i bin tudak long tetaem ia. Mi bin filim plante lav we i kam long Papa blong mi we i stap long Heven, long famli blong mi mo long ol lida blong Jos blong mi. Wanem we i bin helpem mi blong kam oraet mo muv fored afta long aksiden, i blong stap mekem ol simpol samting we i bin mekem fet blong mi i kam strong moa. Evri dei, mi stap spendem wan aoa bifo mi go long bed blong ridim ol skripja blong mi, blong prea, mo blong raet long jenol blong mi we mi putum i stap insaed long kabod blong klos blong mi. Insaed long praevet ples ia, insaed long kabod blong klos blong mi, mi no nid blong mi stap strong from ol brata mo sista blong mi. Mi save krae olsem we mi bin nidim, mo mi bin save talemaot ful hat blong mi long God. Mi talem long Hem stret olsem wanem mi stap filim, mo hamas nao mi misim mama blong mi. Mi save se Hem i stap harem mi, from ol plante kwaet sore we mi bin filim. Kabod blong klos ia i kam wan tabu ples long mi.
Taem mi bin stap mekem ol simpol samting ia, i bin helpem mi blong joen i stap wetem God, be i no blong stap pusum Hem i go longwe, mo stap gat ol konkon filing. Mi no bin luk se aksiden ia i olsem we God i stap spolem famli blong mi. Mi bin fiim moa paoa blong save stap wet longtaem, mo folem tingting blong Hem, mo gohed blong muv fored tru long ol dei we oli bin had. Mo i bin gat samfala dei we oli rili had.
Afta we papa blong mi i mared bakegen, mi bin wantem blong soem wan gudfala eksampol long ol brata mo sista blong mi, mo mi no wantem gat ol nogud filing long stepmama blong mi, mekem se mi bin gohed blong putum tras blong mi long God. Wan aktiviti insaed long buk blong Progres blong Miwan, i bin lukluk blong mekem laef long hom i gud moa taem mi mekem rilesensip blong mi wetem wan memba blong famli i kam strong moa, hemia long tu wik taem. Wanem we i stap, gol i blong traem blong stap olsem Kraes, mo soem lav tru long ol aksen. Mi bin disaed blong traem mo givhan long stepmama blong mi.
Wetem famli blong hem we i joen long hemia blong mifala, i gat plante plet blong stap wasem. Mekem se mi stat long ples ia nao. Taem mi givim seves ia long tufala wik afta, mi bin filim se mi save lavem stepmama blong mi, mo save gat longfala tingting wetem hem nomata mi no glad long wanem i bin stap hapen. Taem mi bin lukluk nomo blong givim seves, hemia i bin helpem mi blong gotru long ol taem we oli had, hemia from se mi bin filim Spirit i bin stap wetem mi.
Mi stil no andastanem evri samting long saed blong aksiden mo from wanem i hapen long famli blong mi, mo i gat yet ol dei we i had tumas. Be semmak olsem ol paeionia, mi bin putum tras blong mi long God mo mi kasem paoa blong stap gogohed.