Stap Livim Kakae mo Stap Prea from Ema

I Kam long Sesili Norang

Woman we i raet i stap laef long Kapitol blong Denmak.

Afta we gel blong mi i stap long windo mo i foldaon, mi ting se bigfala fraet blong mi ia nao i kam.

Famli blong mi i jes kambak long wan naesfala holidei. Afta sapa, mi letem tu long ol pikinini blong mitufala, Makes we i gat fo yia, mo Ema we i gat tri yia, tufala i pleiplei long bedrum we i stap long stori apatmen we i stap long nambafo stori. Long Denmak, ol windo oli pulum i go antap blong i open. Plante taem ol windo oli lok i stap, be mifala i bin livim olgeta oli open smol long taem blong holidei blong mifala, blong mekem se win i kam insaed long haos.

Taem mi stap wasem plet, kwiktaem mi filim se wan samting i rong evriwan. Mi ron i go long living rum, mo semtaem Makes i ron long step i kamdaon. Hem i stap singsingaot wetem fraet, i stap talem se Ema i foldaon aot long windo—mo windo ia i stap 12 mita antap long graon we simen i kavremap. Mi ron i go daon, mi stap singsingaotem nem blong Ema. Mi luk smol gel blong mi i slip daon long simen, olsem se hem i nomo pulum win. Hem i sopsop evriwan taem mi pikimap hem, mo mi ting se bigfala fraet we mi bin gat i kamtru. Hasban blong mi, we i bin folem mi i go aotsaed, i tekem hem long han blong hem, mo kwiktaem i givim wan prishud blesing long hem.

Ambulens i kam kwik, mo Makes mo mi i talem wan prea taem ol paramedik (ol nes blong ambulens) oli wok long Ema. I no longtaem afta, mifala evriwan i stap insaed long ambulens we i stap go long hospital.

Long “intensive care unit”, samfala memba blong famli oli kam blong givim sapot long mifala. Makes i go hom wetem ol kasen blong hem, mo hasban blong mi mo mi i stap, mitufala i no save situesen blong Ema.

Afta we mifala i wet gogo we mitufala i luk se i wan longfala taem, wan long ol dokta i kam, i askem olsem wanem aksiden ia i hapen. Oli talem se, plante taem, taem wan i foldaon antap olsem i kamdaon, bae i gat ol kil insaed long bodi mo i gat smol janis nomo blong wan i laef i stap. Ema, pelvis (bun daon long bak) i brok mo i kil bigwan long hed, be ol smol kil long bodi blong hem bae oli kamgud kwiktaem. Dokta i talem se maet wan enjel i holem hem taem hem i stap foldaon.

Nomata we hem i wan merikel we Ema i laef, hem i no wekap yet, from kil long hed blong hem. Hasban blong mi mo tufala gudfala fren blong hem, oli givim wan narafala blesing long Ema. Long blesing ia, Ema i kasem promes se bae hem i kam gud evriwan, mo bae i no gat problem afta long hemia, mo hemia bae i wan gudfala eksperiens long laef blong hem. Mi bin filim wan bigfala tangkyu from paoa blong prishud. Ful naet, mifala i talem ol prea.

Ema i wekap long koma blong hem fo dei afta. Long ol fo dei ia, ol fren, ol memba blong Jos, mo ol narawan oli bin livim kakae mo oli bin prea from hem. Mi bin filim ol prea blong ol fetful Sent oli kam raonem mi, oli mekem famli blong mi mo mi i stap strong. Mi bin filim olsem we Papa long Heven i bin putum han blong Hem raon long mi mo i givim fulap kamfot long mi.

Stek blong mifala i bin livim kakae long dei ia bifo hem i bin wekap. Mifala i biliv se Papa long Heven i bin harem ol prea blong mifala mo taem Ema i bin wekap, i wan stret ansa blong taem ia we stek i bin livim kakae. Stat long tetaem ia i go, Ema i kam oraet kwiktaem. Faef dei afta, hem i talem fas toktok blong hem afta long aksiden ia, mo naen dei afta, hem i kamaot long hospital. Hem i bin spendem faef wik long wan wiljea, mo afta i statem tritmen blong bodi.

Samples wan manis afta long aksiden, bak blong mi i go nogud from mi stap leftemap Ema. Wan filing we mi nomo gat paoa long bodi, be tu, long spirit i kam kavremap mi. ?Olsem wanem nao bae mi gohed blong lukaot gud long hem?

Wan naet, mi filim sem we mi no gat paoa, mo mi harem se ol samting oli tumas long mi. Mi aot long haos, mo mi go long wan pak mi sidaon long wan stul. Mi prea long Papa long Heven blong wan aoa olsem. Long fas taem long laef blong mi, mi bin filim merikel paoa blong Atonmen blong Sevya we i kavremap mi. Evri sobodi, evri harem nogud we mi bin stap tekem, Hem i tekemaot long mi; evri hevi trabol, Hem i karemaot long solda blong mi afta long prea ia. Ema i bin stap yet long wiljea blong hem, mo mi stap karem tritmen from bak blong mi, be mi bin gat paoa blong gogohed.

Wan yia afta, Ema i save ronron, i laf, i talem stori, mo i tingting olsem we wan gel blong fo yia i sapos blong tingting.

Yumi save se i gat wan Papa we i stap long Heven we i lavem yumi, we i kea long yumi, mo i save yumi wanwan. Hem i save wanem jalenj nao yumi stap go tru long hem. Bae mi neva gat tu tingting long ol merikel we Hem i givim long yumi tru long prea, fasin blong livim kakae, mo prishud blesing.