Ol Toktok blong Profet long Wan Ples we Man i No Tingting long Hem
Woman we i raet i bin stap long Ajentina taem hasban blong hem i bin stap olsem misin presiden.
Wan magasin we oli livim i stap bae i jenisim laef blong Oska Kastro blong oltaem.
Oska Kastro i bin kasem baptaes mo konfemesen afta we hem i faenem Liahona blong jeneral konfrens insaed long haos ia we hem i muv i go insaed long hem.
Pikja i kam long Dan Bur; foto i kam long hem we i raet
Dei ia we waef blong Oska i livim hem wetem tufala smol pikinini blong tufala, i bin wan had taem tumas long laef blong hem. I gat plante desisen blong mekem. Hem i bin stap lukaotem wan wok, mo naoia, bae hem i nidim wan niufala ples blong stap long hem. Hem i luk se laef blong hem i go prapa nogud olgeta. Hem i tingting se bae hem i givap, mo sapos i no from tufala naes pikinini blong hem, bambae hem i givap finis.
Long San Ruan, Ajentina, i no gat fulap haos i stap blong rentem, long praes we Oska i wantem. Be i gat wan smol haos long wan sef ples we wan grup blong sam yang man oli jes aot long hem, mekem se Oska i rentem ples ia, mo i rere blong statem niu laef wetem ol pikinini blong hem.
Insaed long niufala haos blong olgeta, i bin gat samfala magasin mo buk we oli slip i stap long floa, mo afta we oli wok ful dei blong klinap mo putum gud ol samting, Oska i sidaon mo i lukluk wan long ol magasin ia. Kova blong magasin ia i pulum tingting blong hem. Andanit long taetol, Liahona, i gat wan pikja blong wan olfala man we i stanap long wan taoa, i stap toktok long ol pipol. Man ia i mekem hem i tingbaot samfala pikja blong sam profet long Baebol.
Oska i bin openem magasin mo i stat blong rid: “Wanwan long yumi i save finis se yumi mas talem long ol pipol we yumi lavem se yumi lavem olgeta. Be wanem we yumi save, i no kamaot oltaem long wanem we yumi mekem.”1 Oska i tingbaot ol strong toktok we hem mo waef, tufala i stap taltalem long tufala plante taem. Hem i wantem tijim ol pikinini blong hem blong oli gud moa bitim hemia. Oska i gohed blong ridim magasin ia, mo i stat blong filim hop i stat blong gro insaed long hem. Bifo wik i finis, hem i bin ridim evri atikol blong magasin ia mo i bin wantem blong save moa.
Wan manis afta, tufala misinari i stap wokbaot long ples blong Oska. Oska i go kolosap long tufala, mo askem sapos oli ol Lata-dei Sent misinari mo bae hem i pem tufala hamas blong kasem sam moa magasin blong Jos. Tufala elda i talem se praes blong hem i 20 minit blong taem blong hem.
Long nekis dei, tufala misinari i kam visitim Oska long hom blong hem. Oska i tokbaot long tufala abaot taem we hem i stap tekem ol samting i go insaed long haos mo hem i faenem ol olfala buk, magasin mo buklet we i mekem se hem i save abaot Jos. Hem i eksplenem se fasfala atikol we hem i ridim, i go stret wetem laef blong hem long tetaem ia. Hem i bin save finis se famli i impoten, mo hem i bin wantem save moa long saed blong famli haos naet, mo famli prea. Hem i talem long tufala elda ol nara samting we hem i bin lanem abaot Jos, mo tu, abaot Josef Smit mo restoresen blong gospel.
Hem i lukluk i go stret long ae blong tufala elda, mo talem ol toktok ia we evri misinari i wantem tumas blong harem: “Mi biliv se Josef Smit i wan profet blong God.” Tufala elda i invaetem hem blong kasem baptaes, mo wetem wota long ae i ron, Oska i akseptem. Samfala wik afta, Oska Kastro i bin baptaes mo oli konfemem hem i kam memba blong Jos.
Lod i bin mekem Oska i rere, mo spirit blong hem i wantem blong sakem sin, mo i rere blong lanem samting mo gro. Long dei ia we i wan memori mo i fulap long filing, spirit blong ol mesej blong jeneral konfrens long Liahona i tajem hat blong Oska. Olgeta fasfala ona blong hom ia oli no bin save wanem bae i hapen taem oli livim biaen samfala magasin blong Jos, be gospel blong mesej insaed long ol magasin ia oli kam wan impoten misinari tul. I lidim hem i go long ol trutok we hem i bin stap lukaotem, mo oli jenisim laef blong Oska blong oltaem.