Lav agensem Rabis Tingting
Sapos yumi save kam blong andastanem moa wanem hem i rabis tingting, bae yumi kam blong lanem olsem wanem blong stap longwe long hem mo olsem wanem blong mekem ol joes we i pulum yumi go kolosap long Tabu Spirit.
Rabis Tingting
Hem i wan toktok we i no naes blong harem. Plante long yumi i no wantem tingbaot nomo, mo tu, yumi no wantem lanem abaot samting ia. Toktok ia i tokbaot wan filing we i gat rabis tingting long hem, wan samting we i tudak—wan filing we i pulum tingting, be yet, hem i rong.
I gat wan gudfala risen from hemia. Sapos “fasin blong lavem mane tumas hem i stamba blong olgeta fasin nogud” (Fas Timoti 6:10), nao, i tru nomo se fasin blong gat rabis tingting i sikret fren blong hem. Hem i wan korap fasin mo i daonem man. Fasin blong gat rabis tingting i tanem olgeta pipol, ol tingting, mo iven ol aedia i go long ol samting blong mas gat, o mas kasem blong mekem bigfala wantem ia insaed, i harem gud. Be sapos yumi save samting ia finis, ?from wanem nao yumi nidim blong save moa long saed blong samting ia?
From se, taem yumi andastanem wanem nao hem i rabis tingting, yumi save lanem olsem wanem blong lidim tingting, filing, mo aksen blong yumi blong yumi stap longwe long rabis tingting, mo winim tingting ia taem hem i kamkamaot. Hemia bae i lidim yumi blong go kolosap moa long Tabu Spirit, we i klinim gud ol tingting blong maen, ol tingting we yumi wantem mekem, mo i mekem se yumi kam strong moa. Mo hemia, bae i lidim yumi long wan laef we i moa hapi, i gat moa pis mo i gat moa glad.
Wanem Stret Hem I Rabis Tingting
Plante taem, yumi tingting long rabis tingting olsem blong gat ol strong filing insaed long bodi, we oli no stret, long wan narawan; be i posibol tu, blong gat rabis tingting, o kavetem eni kaen samting: mane, propeti, ol samting, mo tu, yes i hapen, ol narafala pipol (luk long Guide to the Scriptures, “Lust” long Inglis).
Rabis tingting i pusum wan blong kasem samting long wan rod we i agensem tingting blong God. Hem i tekem eni kaen filing, o filing blong wantem samting we i mekem se wan i lukluk nomo long ol samting blong wol, o i gat ol selfis fasin—i lukluk long intres blong hemwan, i wantem samting, i gat strong filing insaed long bodi, mo i wantem tumas samting—be i no wantem stap obei long olgeta komanmen blong God.
Long nara toktok, i blong wantem ol samting we i no folem tingting blong God, o blong wantem blong gat ol samting long wan rod we i no folem rod blong God, i wan rabis tingting, mo hemia i lidim man blong i no stap hapi.1
Denja blong Rabis Tingting long Saed blong Seks
Nomata we yumi bin kasem woning agensem fasin blong gat rabis tingting olsem wan wei blong kavetem eni kaen samting, long saed blong seks, hemia i wan bigfala denja evriwan. Sevya i bin wonem yumi: “Eni man we i stap lukluk long wan woman, blong wantem hem tumas, i bin mekem adaltri finis long hat blong hem” (Matiu 5:28).
Ol Aposol blong bifo oli bin givim fulap mo fulap woning agensem fasin blong gat rabis tingting long saed blong seks. Olsem wan eksampol nomo, Aposol Jon i talem: “Oltaem man i wantem tumas ol rabis samting we tingting blong hem i wantem, mo i wantem tumas ol samting we ae blong hem i luk, mo i flas tumas long ol samting we hem i gat. Be ol fasin ia, oli no kamaot long Papa blong yumi, ol stap kamaot long wol ia nomo” Fas Jon 2:16; luk tu long ves 17; Rom 13:14; Fas Pita 2:11).
Mo olgeta woning ia oli gohed blong stap kamaot tedei.2 Elda Jefri R. Holan blong Kworom blong Olgeta Twelef Aposol i eksplenem: “?From wanem nao rabis tingting i wan sin we i kilim man i ded? Okei. Antap long fasin ia blong prapa spolem gud Spirit blong sol blong yumi, mi ting se hem i wan sin from hem i rabisim hae mo tabu rilesensip we God i stap givim yumi long laef long wol ia—we i lav we wan man mo wan woman i gat long tufala mo tingting ia blong wantem se kapol ia i tekem ol pikinini oli kam long wol ia insaed long wan famli we bae i stap blong oltaem.”3
Taem yumi letem filing blong rabis tingting i putum gru blong hem, hemia i stap olsem rus blong plante wok blong sin. Bae i stat taem yu sakem ae nomo, mo hemia i save lidim yu blong brekem loa mo fesem evri nogud risal blong hem. Hemia i from se rabis tingting i ronemaot Tabu Spirit, mo i mekem se yu nomo strong blong fesem temtesen, mo ol rabis wok mo ol trik blong enemi.
Ol nogud joes blong King Deved oli wan eksampol long olsem wanem nao, filing ia, i strong mo i save kilim ded man. Deved i stap mo ae blong hem i kasem Batseba we i stap swim, nao i gat rabis tingting long hem. Rabis tingting i mekem se hem i mekem rabis wok, mo i mekem se ol man blong hem oli tekem woman ia i go long hem, mo hem i slip wetem woman ia. Afta long hemia, i traem blong haedem sin blong hem; nao Deved i givim oda blong oli putum hasban blong Batseba i stanap long fored blong faet blong meksua se bae enemi i kilimded hem (luk long 2 Samuel 11). Long en, Deved i lusum praes ia blong Kraes i mekem hem i kam olsem wan god (luk long D&C 132:38–39).
Situesen blong Deved i go tumas, be i pruvum poen ia: rabis tingting i wan temtesen we i gat paoa. Taem yumi sarenda long hem, i save mekem se yumi go mekem ol samting we man we i no oraet long tingting bae i go mekem. Hem i tru we rabis tingting i save spolem gud man, i isi blong i girap, mo i strong blong temtem yumi blong tanem baksaed long Tabu Spirit, mo tanem tingting blong yumi blong mekem ol rong samting, nao hem i stap olsem wan bigfala denja. I save stat taem wan i luk ponografi, i lisin long ol toktok blong miusik we i tokbaot klia ol rabis fasin, o taem wan i slip wetem man o woman taem i no stret blong mekem. Long semtaem, ol rabis filing i save pusum wan blong go lukaotem ponografi. Rilesensip ia we i stap hapen oltaem, i gat bigfala paoa mo i gat bigfala denja long hem.4
Rabis tingting long saed blong seks i daonem man, i mekem ol rilesensip oli nomo strong, mo i prapa spolem gud rilesensip we yumi gat wetem God. “Mo i tru mi talem long yufala, olsem we mi bin talem bifo: hem we i lukluk long wan woman nao i wantem hem tumas, o sapos eniwan i mekem adaltri long hat blong hem, bambae hem i no gat Spirit, be bambae hem i tanem baksaed long fet mo bambae hem i fraet” (D&C 63:16).
Olsem we Elda Rijad G. Skot (1928–2015) blong Kworom blong Olgeta Twelef Aposol i bin tijim: “Rabis fasin long saed blong seks i putum wan fanis i stap blong Tabu Spirit wetem evri paoa blong leftemap tingting, givim laet mo paoa, i no kam. Hem i wekemap ol strong filing insaed long bodi mo long tingting. Wetem taem, hem i mekem se hanggri blong hem i no save stop, mo i pusum hem we i stap mekem rong blong go long sin we i moa bigwan.”5
Wanem I No Rabis Tingting
Yumi bin luk wanem hem i rabis tingting, mo hem i impoten tu blong andastanem wanem hem i no rabis tingting, mo blong mas lukaotgud blong no talem se ol stret tingting, stret filing long bodi oli ol rabis tingting. Rabis tingting i wan kaen filing long bodi, be i gat tu olgeta filing long bodi we oli ol stret filing. Eksampol, yumi save wantem ol gudfala mo stret samting we bae i helpem yumi blong mekem wok blong Lod i hapen.
Tingting long hemia:
-
Filing ia blong wantem gat mane. Filing ia, taem yu lukluk olsem nomo, i no wan rabis tingting. Pol i no bin talem se mane i stamba blong olgeta fasin nogud. Hem i talem se “fasin blong lavem mane tumas hem i stamba blong olgeta fasin nogud” (Fas Timoti 6:10; oli ademap italik). Ol tijing blong Jekob i givim moa klia lukluk: “Be bifo yufala i lukaotem ol rij samting, lukaotem kingdom blong God. “Mo afta we yufala i bin kasem wan hop long Kraes, bae yufala i kasem ol rij samting, sapos yufala i lukaotem olgeta; mo bae yufala i lukaotem ol samting ia wetem tingting blong mekem ol gud samting---blong givim klos long olgeta we oli neked, mo blong fidim olgeta we i hanggri, mo blong mekem ol prisena i go fri, mo givhan long ol sik pipol mo olgeta we oli harem nogud” (Jekob 2:18–19).
-
Blong gat ol stret filing long saed blong seks long hasban o waef blong yu. Ol filing ia we God i givim, i help blong mekem wan mared i kam strong moa, i kam strong gud mo i stap wan. Be, hem i posibol tu blong gat ol filing we i no stret long hasban o waef. Sapos yu lukaot blong yuwan nomo i harem gud, o blong yu lukluk nomo blong stretem ol filing blong bodi blong yuwan, nao yumi stap glis i go long ol filing blong rabis tingting, mo hemia i save spolem wan mared. Ki blong luklukgud mo holemtaet wan stret fasin long saed blong seks insaed long wan mared, hem i blong gat wan tingting we i klin gud mo i gat lav.
Impoten prinsipol i blong luklukgud long ol samting ia from wan samting we i stret—blong bildimap kingdom blong God mo blong mekem moa gudfala wok long wol ia. Be rabis tingting, hem i stap leftemap tingting blong yumi blong go aotsaed long ol stret baondri, ples we ol filing blong yumi oli ting nating long God, i mekem pipol i kam ol samting, mo i mekem ol samting, ol rij samting, mo iven paoa oli kam ol bigfala devel we oli kavremap ol gud filing blong yumi, mo i prapa spolem ol rilesensip blong yumi.
From Wanem Nao Plante Taem Yumi Stap Go From Rabis Tingting
Yumi save se rabis tingting i spolem man, mo i wan denja, nao ?from wanem nao hem i wan bigfala temtesen mo i stap long evri ples? ?From wanem nao yumi letem rabis tingting ia i winim yumi? Taem yumi lukluk antap nomo, i luk se selfis fasin o fasin blong nogat kontrol long yuwan i stamba blong rabis tingting. Olgeta samting ia oli kam afta, be strong stamba blong rabis tingting, hem i fasin blong stap emti. Wanwan i save foldaon long rabis tingting taem hem i stap traem blong fulumap wan hol we i stap long laef blong olgeta. Rabis tingting i wan giaman filing, wan rabis samting we i kam tekem ples blong lav, tru valiu, mo fasin blong disaepol we i stap strong oltaem.
Blong gat kontrol long ol filing, long wan wei, i wei we hat blong wan i stap long hem. “[From olsem wanem we man i tingting long hat blong hem, fasin blong hem i semmak nomo]” (Ol Proveb 23:7). Long weaples we yumi stap putum lukluk blong yumi long saed blong tingting mo spirit, bae wetem taem, bae i kam paoa we bae i lidim ol tingting, ol filing mo ol aksen blong yumi. Eni taem we yumi filim se yumi fesem temtesen blong gat rabis tingting, yumi nidim blong riplesem temtesen ia wetem wan samting we i moa stret.
Fasin blong stap nating i wan nara samting we i save mekem wan i gat ol rabis tingting. Taem yumi no gat samting i stap gohed insaed long laef blong yumi, bae yumi save foldaon isi long ol nogud fos. Taem yumi muv blong lukaotem blong mekem ol gudfala wok (luk long D&C 58:27) mo traehad blong yusum gud taem blong yumi blong mekem ol gud samting, bae yumi no save gat ol rabis tingting, o foldaon long ol nogud fos.
Olsem we Elda Dalin H. Oks blong Kworom blong Olgeta Twelef Aposol i eksplenem, se ol filing we yumi jusum blong folem, oli lidim aksen blong yumi, be tu, i mekem huia we bae yu kam: “Ol filing blong yumi oli talem wanem bae i kam faswan long laef; ol fas samting long laef bae oli lidim ol joes blong yumi; mo ol joes oli talemaot wanem aksen blong tekem. Ol filing we yumi tekem aksen folem, i talem olsem wanem bae yumi jenisim fasin long laef, i talem wanem bae yumi mekem i hapen long laef, mo i talem huia bae yumi kam long laef.”6
Long narafala toktok, yumi mas lukaotgud long ol filing we yumi letem yumi blong folem, be tu, ol tingting ia we oli pusum o mekem ol filing ia oli kam. Olsem we Alma i bin tijim, sapos ol tingting blong yumi oli no klin gud, “ol toktok blong yumi bae oli go agensem yumi” (Alma 12:14)
Meresin: Lav Olsem Hemia blong Kraes
Rabis tingting i wan samting we yu no save ronwe long hem. From Papa long Heven i givim fridom blong joes long yumi, yumi gat paoa ova long ol tingting, ol filing mo ol aksen blong yumi. Yumi no nid blong folfolem ol rabis tingting mo filing blong yumi. Taem temtesen i kam antap, yumi save jusum blong no go folfolem ol rod ia.
?Olsem wanem nao yumi stap winim temtesen blong gat rabis tingting? Yumi stat blong developem wan stret rilesensip wetem Papa long Heven mo jusum blong givim seves long ol narawan. Mo yumi mekem evri fasin blong yumi long saed blong relijin, olsem prea mo skripja stadi, we i stap invaetem Tabu Spirit long laef blong yumi. Long en, sikret tul hem i lav olsem hemia blong Kraes—we i klin gud, we i tru, lav we i ones, wetem wan tingting blong bildimap kingdom blong God mo blong putum ae i stap nomo long glori blong Hem. Lav ia i posibol nomo taem yumi gat Tabu Spirit i stap wetem yumi.
Blong karemaot ol rabis tingting, i nidim wan prea we i kam long hat, we yumi askem God blong karemaot ol filing ia, mo long ples blong olgeta, i putum bigfala lav (luk long Moronae 7:48). Hemia i kam posibol, olsem eni fasin blong sakem eni sin, tru long gladhat blong Atonmen blong Jisas Kraes.7 From Hem, yumi save lanem blong lavem man long wei we Hem mo Papa blong yumi long Heven, Tufala i lavem yumi.
Taem yumi stap lukluk oltaem long Papa blong yumi long Heven, taem yumi stap laef folem fasfala mo seken bigfala komanmen—blong lavem God mo ol narafala man olsem we yumi lavem yumiwan bakegen (luk long Matiu 22:36–39)—mo taem yumi mekem evri samting we yumi save mekem blong laef olsem we Hem i bin tijim yumi, ol tingting we oli klin gud mo oli ones oli lidim laef blong yumi wetem wan paoa we i bigwan we i bigwan. Taem yumi joenem tingting blong yumi long tingting blong Papa, ol temtesen mo risal blong rabis tingting oli go lus, mo stret lav blong Kraes i tekem ples. Afta, yumi fulap long tabu lav ia we i tekem ples blong ol nogud fasin blong wol ia wetem ol naes wok blong bildimap kingdom blong God.