Givim Seves Insaed long Jos
Ol Ful Sandei Seves blong Mi
Man we i raetem hemia i stap long Kalifonia, YSA
Ol Sandei blong mi, oli fulap long samting blong mekem, be mi talem tangkyu se mi save givim seves, be mi no fesem ol hadtaem we ol fasfala lida blong Jos, olsem Elda Pali P. Prat oli bin fesem.
Foto pikja i kam long Jidi Wein
Hem i Sandei moning. Long fored blong mi, mi gat 12 aoa blong ol miting, ol intaviu, ol konfemesen, mo ol odinesen. Bae mi stat long wan stek senta mo bae mi finis long wan narafala mitinghaos long narasaed blong taon—evri samting ia long wan dei we i hot tumas.
Mi glad tumas from wanwan miting, intaviu, konfemesen, mo odinesen. Be yestedei, taem mi stap tingbaot se bae mi bisi tumas wetem ol samting blong wokem, mi stap harem nogud long miwan—kasem taem mi openem buk ia, Autobiography of Parley P. Pratt (Laef blong Parli P. Prat) mo mi stat ridim long ples we mi bin stop long hem. Elda Prat, oli bin tekem hem i wan prisena, wetem Josef mo Haeram Smit, wetem sam narawan moa, long ol taem we i had tumas long Misuri. Afta we oli tekem olgeta i go long Indipendens, ol Brata oli mas slip tugeta longwan rum mo mas slip long floa wetem wan pis wud olsem pilo.
Wan moning, we i kolkol mo gat sno, Elda Prat i girap, mo oli no luk hem, be hem i kamaot long ples blong slip ia. Hem i tekem rod i go long Is, tru long taon mo graon we oli stap. Afta we hem i wokbaot wan moa haf kilometa, Elda Prat i go insaed long wan dak bus, mo sno we i foldaon i kavremap trak blong leg blong hem, mo ol tri oli haedem hem.
Hem i tingtingbak long hadtaem ia. Blong gohed long Is, i minim blong ronwe i go long wan nara stet, mo bae hem i save sendem man i go from famli blong hem. Blong gobak long ples blong slip ia, i minim blong go long kalabus, mo bae oli talem se hem i rong long ol bigfala kraem. Wetem temtesen blong ronwe; Elda Prat i tingbaot “bigfala trabol, o iven ded” we bae hem i mekem long ol narafala prisena sapos hem i ronwe.
Tingting i fasfas, nao wan skripja i kasem tingting blong hem: “Man we i wantem sevem laef blong hem, hem bambae i lusum laef blong hem. Be man we i lusum laef blong hem from mi, mo from gud nius blong mi, hem bambae i sevem laef blong hem” (luk long Mak 8:35; D&C 98:13).
Elda Prat i gobak long hotel. Plante manis insaed long kalabus bae i kam—i no gat famli, i no gat felosip wetem ol Sent, o i no gat wei blong givim seves long koling blong hem olsem wan aposol.1
Mi sarem buk, mi tingting hevi long ol sakrifaes blong ol fasfala Sent—sam long olgeta oli ol bubu blong mi. From testemoni blong olgeta long saed blong gospel mo fet blong olgeta long Jisas Kraes, oli bin stap strong tru long nogud fasin mo fasin blong givim hadtaem. From oli bin stap strong, tedei, mi save givim seves mo wosip olsem we mi wantem, mi joenem olgeta long fet mo testemoni.
Taem mi stap rere from Sabat dei ia, famli blong mi i sef, i wet from wan dei blong wosip long wan mitinghaos we i naes tumas. Felosip blong olgeta Sent bae i mekem dei blong mi i wan gudwan. Bae mifala i glad wetem olgeta long ol konfemesen mo odinesen we bae oli hapen, ol responsabiliti we oli mekem, mo fet we i kam strong moa. Bae mifala i kakae sakramen, mo tingbaot Sevya blong yumi mo sakrifaes blong Hem we i pem praes from yumi. Mo tedei long naet, bae mifala i kam tugeta insaed long hom blong mifala blong ridim Buk blong Momon, mo prea tugeta bifo mifala i go slip long ol gudfala bed blong mifala, mo putum hed blong mifala long ol sopsop pilo.
Ol Sandei blong mi, oli fulap long samting blong mekem. From hemia, mi talem tangkyu mo gat blesing from.