Givim Seves long Wan Ples we I Longwe Moa long Jodan

I Kam long R. Val Jonson mo Rejel Kolman

Ol Jos Magasin mo Pablising Seves

O weaples moa, Lod i nidim yu.

Nid ia i bigwan i stap.

Long stat blong yia 2013, i bin gat faef kes blong misel long Sahatari refuji kamp long Midel Is kantri ia, Jodan. I bin gat ova long 100, 000 refuji blong Siria, we oli fulap tumas long wan ples, we oli stap long denja blong kasem nogud sik ia. Gavman blong Jodan i bin putum plan blong bigfala kampen blong stikim man blong mekem se sik ia i no go olbaot. Plan, hem i blong givim stik meresin long 90,000 refuji blong Siria, we yia blong olgeta i stap bitwin 6 manis mo 30 yia, long tu wik taem nomo.

Be i gat wan problem i stap. Unites Nations Children’s Emergency Fund (UNICEF) i bin gat meresin ia. Ministri blong Helt blong Jodan i gat ol klinik i stap. Wanem we oli no gat, oli ol narafala saplae—ol stik, ol kontena blong putum ol sap tul, ol aesbokis blong putum meresin—mo taem i stap go¹

Nao tufala ia i kam, Ron mo Sandi Hamon, senia welfea misinari we oli stap olsem ol kantri daerekta long Jodan blong LDS Charities. From se Ron mo Sandi, tufala i bin stap wok finis wetem UNICEF mo Ministri blong Helt, kwiktaem oli joenem han blong faenemaot olsem wanem nao LDS Charities i save help.

Ron i talem: “Mifala i askem praes blong pem olgeta saplae ia. Taem oli talem long mifala, mifala i talem: ‘Mifala i ting se LDS Charities i save help’ Oli askem: ‘?Bae yufala i save hariap long hem? !Mifala i mas muv hariap wetem!’”

Long 20 aoa taem LDS Charities i bin apruvum blong oli pem olgeta saplae ia we i nid. “Taem mifala i bin talem long Ministri blong Helt mo UNICEF,” Ron i talem, “oli bin sapraes wantaem. ?Olsem wanem nao wan NGO [non-gavman oganaesesen] i save muv kwiktaem olsem? Stik meresin kampen i bin save muv i go folem stret taem, be tu, i bin givim insperesen long wan kampen we i kavremap ful kantri mo oli bin stikem plante handred blong ol taosen man Jodan mo refuji blong Siria.”

Oli stopem sik.

Antap long hemia, gudfala patnasip ia wetem UNICEF, Ministri blong Helt blong Jodan mo LDS Charities i bin stap olsem rod blong sam fiuja wok.

Olsem wanem nao Ron mo Sandi Hamon, tufala i bin kasem ples ia long wan impoten taem long Medel Is, i stap olsem wan testeman blong fet blong tufala Hamon mo insperesen we i stap biaen long misinari program blong ol kapol misinari blong Jos.

Oli Nidim: Ol Misinari Kapol

Long 2012, tufala Hamon i bin stap long misin olsem ol odinens wokman insaed long Reksbeg, Aedaho Tempol. Ron i gat wan gudfala bisnis blong pulum tut, mo i bin stap tij long Relijin Dipatmen long Brigham Yang YunivesitiAedaho. Be nomol wok blong evri dei laef blong tufala i bin jenis wantaem taem tufala i kasem stret tingting long spirit blong putum pepa blong go long wan misin. Taem we tufala i go long hem, i mekem tufala i sapraes. Ol pikinini blong tufala we oli mared, oli stap long ol defren level long wok blong olgeta, mo Ron i no stap lukluk yet blong hem i stop long wok. Be Spirit i talem long tufala se oli nidim tufala mo evri samting bae i oraet nomo.

Olsem we i bin hapen, ol prishud lida long hedkwota blong Jos oli bin livim kakae mo stap prea blong faenem stret kapol blong wok olsem kantri daerekta blong LDS Charities long Aman, Jodan.

Sandi i talem: “Hem i bin klia se Lod i bin go fastaem long mitufala, i rere long evri smolsmol samting long saed blong wok we Hem i gat long mitufala. Mifala i save se Hem i mekem hemia long evri misinari we i givim seves. Hem i gud blong save se Sevya i stap stretem ol samting blong yu bifo yu go long misin, o iven bifo yu kasem ples.”

Ron i talem: “Taem mitufala i luklukbak, mitufala i glad tumas we mitufala i neva talem wan ples, o askem blong go long wan kantri blong mekem misin blong mitufala. Taem mitufala i livim olgeta samting ia long han blong Lod, i letem Hem blong givim wan eksperiens long mitufala we bae i no hapen, sapos i no bin olsem.”

Eksperiens ia i tekem tu blong wok wetem famli blong King blong Jodan long saed blong ol yumaniterian projek we famli blong king i wantem wok long olgeta. Tufala Hamon i bin wok wetem ol hospital mo ol klinik blong givim trening long ol wokman blong Jodan long saed blong sevem laef blong pikinini, we i mekem se i daonem namba blong ol niubon bebi. Trulong hadwok blong tufala mo samfala moa kapol misinari, LDS Charities i bin givim trening mo ol tul long ol klinik, mo ol oganaesesen we oli wok wetem olgeta pipol we oli gat ol handikap. Long olgeta we tufala Hamon mo ol nara welfea misinari oli bin sapotem, i bin gat wan senta we i stap tijim ol woman we oli gat handikap long olsem wanem blong krietem mo mekem ol spesel klos mo ol handikraf. Olgeta skil ia oli save givim olgeta student wan janis blong lukluk long olgeta nid blong olgetawan mo nid blong ol famli blong olgeta.

midwives practice neonatal resuscitation techniques

Ol nara projek, i bin gat blong wok wetem ol narafala NGO mo gavman blong Jodan long saed blong ol imejensi wok mo lukluk tru long ol studen blong Jodan blong kasem wan long tufala skolasip evri yia blong go long Brigham Yang Yunivesiti. Wan long ol eksperiens we ol Hamon oli bin wok long hem wetem Latin Katolik Jos blong bildim ol rum blong skul blong ol Kristin man blong Irak we oli no bin gat wan nara ples blong mit long hem.

Wetem Lod Insaed long Plantesen blong Hem

Taem oli stap long Jodan, olgeta Hamon oli bin lanem se promes blong Lod i hapen tru long olgeta we oli wok blong Hem: “Bambae mi go long fored blong yufala. Bambae mi stap long raet han blong yufala, mo long lef blong yufala, mo Spirit blong mi bambae i stap insaed long hat blong yufala, mo ol enjel blong mi oli stap raonem yufala, blong sapotem yufala” (luk long D&C 84:88)

Ron i talem: “God i stap wetem yumi long wok ia. Hem i stap insaed long plantesen ia wetem ol wokman blong Hem. Eni kapol we i go long misin, Lod blong plantesen i stap joenem mo wok wetem olgeta insaed long plantesen ia. Yumi no stap biliv long ol merikel long Jodan; yumi stap laef wetem ol merikel.”

I tru nomo, ol enjel we oli bin filim se oli “raonem” olgeta, i gat plante kaen long olgeta, be tu, i gat olgeta enjel long wol ia, speseli ol pikinini blong olgeta, we i bin sapotem olgeta long tingting blong olgeta blong givim seves longwe long hom.

Mo afta, Lod i bin blesem famli blong olgeta wetem proteksen blong Hem mo paoa blong sapotem olgeta. Famli i mas mekem ol jenis long saed blong wok, mo oli mas muv i go long ol defren ples, mo sam helt problem long taem bebi i bon oli kam stret taem ol pikinini blong tufala oli tanem olgeta long Lod, oli toktok tugeta, mo oli bin prea mo livim kakae from wanwan long olgeta.

Ol blesing we ol pikinini blong olgeta oli kasem oli bin gud tumas, mekem se taem Brata mo Sista Hamon i kasem invitesen blong seftem tu yia misin blong tufala i go long tri yia, wanwan long ol pikinini blong tufala oli talemaot bigfala glad blong tufala. Oli bin filimsave se Lod i bin stap mekem wan samting we i spesel tumas long olgeta from risal blong seves blong papa mo mama blong olgeta.

Be yet, tufala Hamon i filim se blong stap longwe long ol pikinini, i wan sakrifaes. Blong stap long narasaed wol, longwe long olgeta we oli lavem tumas, i bin wan had samting. Be i no had olsem i bin had long taem blong bifo. Teknoloji i mekem i posibol blong famli i save wanem i gohed long laef blong wanwan olsem we i nid. Sandi i talem: “Ol kapol oli no stap stop blong toktok wetem ol famli blong olgeta. Mifala i bin stap toktok plante taem wetem ol famli blong ol pikinini we oli stap long hom. From FaceTime mo ol imel, ol fofala niu apupikinini blong mitufala, we oli bin bon i kam long wol taem mitufala i stap long seves, oli bin save mitufala mo oli hapi mo glad blong luk mitufala taem mitufala i gobak.”

Stap Openem Ol Tingting mo Ol Hat

Samfala long ol blesing we ol Hamon oli filim se oli bin kasem aot long seves blong tufala, i we, ae blong tufala i open blong luk bigfala hat mo fasin blong mekem fren we ol pipol blong Jodan oli gat. Taem ol Hamon oli bin kasem koling blong tufala long fas ples, tufala i no save stret se ol pipol ia we bae oli givim seves long olgeta oli olsem wanem.

Ron i talem: “Be mitufala i luk se ol Muslim fren blong mitufala oli naes mo gat bigfala hat. Mo mifala i save stret se sapos oli bin filim se mitufala i stap long denja, bae oli girap mo mekem evri ting blong protektem mitufala.

“Bigfala lav blong olgeta i bigwan tumas. Ol man Jodan oli no laekem blong save se sam narafala man oli no gat samting sapos oli save givhan. Oli bin stap welkamem ol refuji stat long taem bifo Deved finis i kam. Baebol i tokbaot long plante ples we i ‘longwe bitim Jodan,’ mo mitufala i stat blong saenem ol leta blong mitufala ‘Longwe Bitim Jodan’ blong luksave seves blong lav mo sore we mitufala i bin gat janis blong givim long kantri ia we i gat lav mo sore long histri blong hem. Blong plante handred yia, Jodan i bin wan ples blong jareti, mo Lod bin blesem ol pipol ia from jareti ia.”

Taem tufala i wok kolosap wetem ol pipol blong Jodan, i mekem se tufala Hamon i developem samfala strong frensip. “Oli bin invaetem mitufala long plante Iftar kakae, we hem i kakae we i endem fasin blong livim kakae evri dei long taem blong Ramadan,” Sandi i talem. “Ol Muslim fren blong mitufala oli bin invaetem mitufala tu blong go long ol lafet blong blokem woman, mared mo ol nara famli taem.”

Jos i no stap mekem misinari wok o letem ol Muslim oli baptaes long Jodan o long eni ples we loa i blokem, mekem se tufala Hamon i no serem infomesen long saed blong Jos. Be, tufala i lukluk nomo blong bildimap mo holemtaet ol rilesensip—wetem famli laen blong king, ol lokol yumaniterian patna, ol nara kapol misinari we oli stap long misin wetem tufala, mo ol lida blong relijin mo gavman. Taem man i askem tufala blong tokbaot moa long saed blong Jos, tufala Hamon i leftemap tingting blong olgeta we oli askem kwestin blong oli go lukluk websaet blong Jos long LDS.org.

Koling Ia blong Go Givim Seves

Taem yu lukluk ol gudfala eksperiens we Ron mo Sandi tufala i bin gat, ?olsem wanem? ?Tufala i filim se tufala i spesel long medel blong ol narafala kapol we oli singaotem olgeta blong givim seves–o oli save singaotem olgeta blong givim seves?

Yes—mo no. Tufala Hamon i talem: “Mitufala i go givim seves long weaples mo long wanem taem we Lod i nidim wan kapol wetem ol spesel skil mo eksperiens blong mitufala long hem.” “Be hemia i hapen tu long evri narafala senia misinari. Evri kapol we i gat paoa blong go long wan misin, Lod i bin mekem olgeta oli rere blong givim seves long ol wei we i spesel long olgeta. Oli nidim nomo blong praktisim fet inaf blong go long ples we Lod i nidim olgeta, mo bae Hem i yusum olgeta blong mekem samting i defren long laef blong ol narafala man.”

“Ol kapol oli save mekem jenis i hapen,” Elda Robet D. Hels blong Kworom blong olgeta Twelef Aposol i talem. “Ol kapol oli save mekem ol bigfala samting oli hapen we i no gat wan narafala man i save mekem. …

“ … Ol rod we ol kapol oli save givim seves, i no gat limit long hem. I stat long sapot long misin ofis i go kasem lidasip trening, i go long famli histri, tempol wok, mo yumaniterian seves—i gat wan janis blong yusum eni skil o talen we Lod i blesem yu wetem. …

“… Yu bin kasem plante samting long laef blong yu; go mo givim fri seves long wok blong Lod mo Sevya blong yumi. Gat fet; Lod i save weaples nao oli nidim yu long hem. Nid i bigwan tumas, ol brata mo sista, mo olgeta we oli glad blong mekem wok, oli smol nomo.”²