Ol Voes blong Ol Lata-dei Sent
Kapten Moronae i Bin Helpem Mi blong Tij long Praemeri Skul
Pikja i kam long Alen Kans
Mi bin stap long medel blong wan had yia, we mi stap tijim ol pikinini blong 13 kasem 14 yia. Mi jes kam hom, we mi aot long wan had miting wetem asisten prinsipol blong skul, we mi go pas long wan intaviu blong skelem wok blong mi. Mi mi wan niufala tija, mo mi nid blong krietem plante long ol lesen blong mi, nao mi faenem se mi stap traehad blong mekem ol studen oli gohed blong mekem wok mo gat intres. Nao, storian blong mitufala i go kasem poen we nid i stap blong mi mas fosem ol studen blong mi blong mekem wan joes—mekem wok o fesem trabol—mo blong mi mas mekem folem ol woning blong mi.
Mi aot long konfrens miting ia wetem tingting blong mi i slak mo mi filim se wok i tumas. Mi putum tingting se miting ia, bae i stap olsem kwestin blong dei blong mi taem mi stap stadi long ol skripja blong mi long nekis dei. Mi no save biliv. Ol ansa oli kam long mi taem mi bin stap ridim Buk blong Momon.
Mi bin prea long moning ia blong lanem, aot long skripja, olsem wanem blong kam wan tija we i gud moa. Tabu Spirit i bin tijim mi taem mi bin stap rid abaot Kapten Moronae long Alma 44. Long poen ia long stori ia, Kapten Moronae mo ol man blong Nifae oli raonem gud ol man blong Leman long Saedon reva, mo oli bin fraet tumas, mekem se ol man blong Leman oli putum ol tul blong faet blong olgeta i go daon. Mi gohed blong ridim, mo tingting se mi wantem tumas blong kam olsem Kapten Moronae long klasrum: mi givim oda, mi trastem miwan, mo mi gat sakses.
Mi bin ridim tru long storian we i stap mo luk se Moronae i stap talem long Serahemna mo ol man blong Leman se oli mas mekem wan joes: “yufala i givim ol tul blong faet blong yufala long mifala, mo bae … mifala i lego yufala i laef, sapos yufala i go long rod blong yufala mo yufala i nomo kambak blong faet agensem mifala,” sapos no “bae mi givim oda long ol man blong mi blong oli mas foldaon long yufala” (Alma 44:6, 7). !Mi luksave se hem i stap mekem wanem we bos blong mi i bin talem long mi blong mekem! “Givim olgeta tufala joes, mo mekem folem joes ia,” hem i talem. Wetem hemia long maen blong mi, mi disaed blong folem moto blong Moronae, “Luk, bae yumi endem faet ia” (Alma 44:10).
Nao wetem olgeta prinsipol we mi lanem long wan skripja stori abaot wan long ol hiro blong mi, mi gobak long klas, wetem bigfala tras long plan blong faet blong mi. I bin hapen se mi gat wan smol pleiplei we i Kapten Moronae, mo mi putum i stap long poket blong sot blong mi long ful skul yia blong i mekem mi tingbaot olsem wanem Kapten Moronae i bin tijim mi blong lukaotem wan klasrum. Taem mi stap givim tufala joes ia long ol studen, fasin blong olgeta i kam gud, mo oli bin wok, mo mifala i wok wan. Taem yia i finis, mo i bin had yet, be wetem prea we mi kasem ansa, mo wetem paoa blong skripja, mi bin “endem faet ia.”