1 Mo i bin hapen se oli stop mo oli muvaot smol long olgeta. Mo Moronae i talem long Serahemna: “Luk, Serahemna, mifala i no wantem blong kam ol man blong blad. Yufala i save se yufala i stap long han blong mifala, be mifala i no wantem blong kilimded yufala.

2 Luk, mifala i no kam blong faet agensem yufala blong mekem blad blong yufala i ron from paoa; mo mifala i no wantem blong tekem eni man long yok blong slef. Be hemia stret stamba tingting we i mekem yufala i kam agensem mifala; yes, mo yufala i kros long mifala from relijin blong mifala.

3 Be naoia, yufala i luk we Lod i stap wetem mifala; mo yufala i luk we hem i givim yufala i kam long han blong mifala. Mo nao mi wantem se bae yufala i andastanem se samting ia i hapen long mifala from relijin blong mifala mo fet blong mifala long Kraes. Mo nao yufala i luk we yufala i no save spolem hemia, we i fet blong mifala.

4 Nao, yufala i luk we hemia i tru fet blong God; yes, yufala i luk se God bae i sapotem, mo kipim, mo sevem mifala, evri taem we mifala i fetful long hem, mo long fet blong mifala, mo long saed blong bilif long God blong mifala; mo neva bae Lod i letem man i spolem mifala, be nomo sapos mifala i foldaon long fasin blong brekem loa mo tanem baksaed long fet blong mifala.

5 Mo nao, Serahemna, mi givim oda long yu, long nem blong God ia we i gat evri paoa, we i bin mekem ol han blong mifala i kam strong, mekem se mifala i kasem paoa ova long yufala, tru long fet blong mifala, tru long relijin blong mifala, mo tru long ol fasin blong wosip, mo tru long jos blong mifala, mo tru long tabu sapot we mifala i nidim blong givimbak long ol waef blong mifala mo ol pikinini blong mifala, tru long fridom ia we i fasem mifala long ol graon blong mifala mo kantri blong mifala; yes, mo tu, tru long fasin blong lukaotem tabu toktok blong God, we long hemia, mifala i nidim blong givimbak ol glad blong mifala; mo tru long evri samting we i moa sas olgeta long mifala—

6 Yes, mo i no hemia nomo; mi givim oda long yu tru long evri tingting we yu gat from laef, se yufala i givim ol tul blong faet blong yufala long mifala, mo bae mifala i no kam from blad blong yufala, be bae mifala i lego yufala i laef, sapos yufala i go long rod blong yufala mo yufala i nomo kambak blong faet agensem mifala.

7 Mo nao, sapos yufala i no mekem samting ia, luk, yufala i stap long ol han blong mifala, mo bae mi givim oda long ol man blong mi blong oli mas foldaon long yufala, mo mekem ol soa blong ded long ol bodi blong yufala, blong mekem se yufala i nomo stap long wol ia; mo afta bae yumi luk se huia bae i gat paoa long pipol ia; yes, bae yumi luk se huia bae i kam slef.”

8 Mo nao i bin hapen se, taem we Serahemna i harem ol toktok ia hem i kam fored mo i givim naef blong faet blong hem mo huknaef blong hem, mo bonara blong hem long ol han blong Moronae, mo hem i talem long hem: “Luk, hemia ol tul blong faet blong mifala; bae mifala i givim olgeta long yufala, be bae mifala i no letem mifala blong mekem wan strong promes long yufala, we mifala i save se bae mifala i brekem, mo tu, ol pikinini blong mifala; be tekem ol tul blong faet blong mifala, mo letem mifala i aot i go long waelples; sapos no, bae mifala i holemtaet ol tul blong mifala, mo bae mifala i lus o win.

9 Luk, mifala i no blong fet blong yufala; mifala i no biliv se God nao i givim mifala i kam long ol han blong yufala; be mifala i biliv se hem i ol trik blong yufala i sevem yufala long ol naef blong faet blong mifala. Luk, hem i ol jesplet blong yufala mo ol sil blong yufala we oli bin sevem yufala.”

10 Mo nao taem we Serahemna i endem ol toktok ia, Moronae i givimbak naef blong faet mo ol tul blong faet, we hem i bin kasem, i go long Serahemna, mo hem i talem: “Luk, bae yumi endem faet ia.”

11 Nao mi no save tingbaot ol toktok we mi bin talem, from hemia, olsem we Lod i stap laef, bae yufala i no aot sapos yufala i no aot wetem wan strong promes se bae yufala i nomo kambak agensem mifala blong faet. Nao olsem we yufala i stap long ol han blong mifala bae mifala i kapsaetem blad blong yufala long graon, o bae yufala i folem ol samting we mi putumaot.

12 Mo nao taem we Moronae i talem ol toktok ia, Serahemna i holemtaet naef blong faet blong hem, mo hem i kros long Moronae, mo hem i ron kwik i kam long fored blong kilimded Moronae; be taem we hem i leftemap naef blong faet blong hem, luk, wan long ol ami blong Moronae i kilimaot naef ia i go long graon, mo i brok long handel blong hem; mo tu, hem i katem Serahemna, we i karemaot skin blong hed wetem hea blong hem mo i foldaon long graon. Mo Serahemna i kamaot long fes blong olgeta i go long medel blong ol ami blong hem.

13 Mo i bin hapen se soldia ia we hem i stanap kolosap, we i katemaot skin blong hed wetem hea blong Serahemna, i pikimap skin wetem hea blong hed ia long graon, mo i putum long en blong naef blong hem, mo hem i leftemap i go antap long olgeta, mo i singaot long olgeta wetem wan voes we i bigwan:

14 “Semmak olsem we skin wetem hea blong hed ia i bin foldaon long graon, we hem i skin wetem hea blong hed blong jif blong yufala, bae yufala tu, i foldaon long graon sapos yufala i no givim ol tul blong faet blong yufala mo aot wetem wan kavenan blong pis.”

15 Nao i gat plante, taem we oli harem ol toktok ia mo luk skin wetem hea blong hed we i stap long naef blong faet, fraet i kasem olgeta; mo plante oli kam fored mo sakem daon ol tul blong faet blong olgeta long leg blong Moronae, mo oli mekem wan kavenan blong pis. Mo olgeta evriwan we oli mekem wan kavenan, oli letem olgeta oli go aot long waelples.

16 Nao i bin hapen se Serahemna i kros bigwan, mo hem i mekem haf blong ami we i stap blong oli kros, blong faet moa strong agensem Ol Man blong Nifae.

17 Mo nao Moronae i kros, from stronghed blong Ol Man blong Leman; from hemia, hem i givim oda long ol pipol blong hem blong oli foldaon long olgeta mo kilimded olgeta. Mo i bin hapen se oli stat blong kilimded olgeta; yes, mo Ol Man blong Leman oli yusum ol tul blong faet blong olgeta mo paoa blong olgeta blong faet.

18 Be luk, ol neked skin blong olgeta mo ol hed blong olgeta we i no gat samting blong blokem olgeta long ol naef blong faet blong Ol Man blong Nifae we oli sap; yes, luk Ol Man blong Nifae oli stikim mo kilim olgeta, yes, mo oli foldaon kwiktaem tumas long fored long ol naef blong faet blong Ol Man blong Nifae; mo namba blong olgeta i stat blong go daon, olsem we soldia blong Moronae i bin profesae.

19 Nao Serahemna, taem we hem i luk se kolosap olgeta evriwan bae oli ded, hem i singaot strong long Moronae, hem i promes se hem mo ol man blong hem bae oli mekem wan kavenan wetem Ol Man blong Nifae, sapos oli letem Ol Man blong Leman, we oli stap yet, oli laef i stap, blong olgeta ia bae oli nomo kam blong faet agensem Ol Man blong Nifae bakegen.

20 Mo i bin hapen se Moronae i mekem se wok blong ded i mas stop bakegen long medel blong pipol ia. Mo hem i karemaot ol tul blong faet long Ol Man blong Leman; mo afta we oli mekem wan kavenan blong pis wetem Moronae, oli letem olgeta oli go aot long waelples.

21 Nao namba blong ol ded blong olgeta oli no kaontem from we namba ia i bigwan; yes, namba blong ded blong olgeta i bigwan tumas, tugeta long saed blong Ol Man blong Nifae wetem Ol Man blong Leman.

22 Mo i bin hapen se oli sakem ol ded blong olgeta insaed long ol wota blong Saedon, mo ol ded ia oli go aot mo ol dip ples blong solwota i berem olgeta.

23 Mo ol ami blong Ol Man blong Nifae, o blong Moronae, oli gobak mo go long ol haos blong olgeta, mo ol kantri blong olgeta.

24 Mo olsem ia nao namba-eitin yia blong rul blong ol jaj ova long ol pipol blong Nifae i bin finis. Mo olsem ia nao histri blong Alma i bin finis, we oli bin raetem long ol buk blong Nifae.