1 Mo i bin hapen se Alma mo Amulek, tufala i kasem oda blong aot long bigtaon ia; mo tufala i go aot, mo tufala i kamaot i go long graon blong Saedom; mo luk, tufala i faenem long ples ia evri pipol we oli bin aot long graon blong Amonaeha, we oli sendemaot olgeta, mo oli stonem olgeta, from oli biliv long ol toktok blong Alma.

2 Mo tufala i talem long olgeta evri samting we i bin hapen long ol waef mo ol pikinini blong ol pipol ia, mo tu, long saed blong tufala, mo paoa ia we i bin mekem tufala i kam fri.

3 Mo tu, Siesrom i ledaon i sik long Saedom, wetem wan fiva we i hot tumas, we bigfala trabol blong tingting blong hem i mekem from fasin nogud blong hem, from hem i ting se Alma mo Amulek i nomo gat; mo hem i ting se oli bin kilimded tufala from rabis fasin blong hem. Mo bigfala sin ia, mo ol plante narafala sin blong hem, i bin givim bigfala trabol long tingting blong hem kasem taem we i kam soa bigwan, we hem i no fri; from hemia hem i stat blong bon long wan hot we i olsem faea.

4 Nao, taem we hem i harem se Alma mo Amulek i stap long graon blong Saedom, hat blong hem i bin stat blong gat paoa; mo hem i sendem wan toktok i go kwiktaem nomo long tufala, from hem i wantem tufala blong kam long hem.

5 Mo i bin hapen se, tufala i go kwiktaem nomo, i obei long toktok we Siesrom i sendem long tufala; mo tufala i go insaed long haos blong Siesrom; mo tufala i faenem hem long bed blong hem, i sik, mo hem i stap daon wetem wan fiva we i hot olsem faea; mo tingting blong hem tu i soa bigwan from ol rabis fasin blong hem; mo taem hem i luk tufala, hem i stretem han blong hem long tufala, mo i askem strong tufala blong save mekem hem i kam oraet bakegen.

6 Mo i bin hapen se, Alma i tekem han blong hem, mo i talem: “?Yu biliv long paoa blong Kraes, blong kasem fasin blong sevem man?”

7 Mo hem i ansa mo talem: “Yes, mi biliv long evri toktok we yu bin tijim.”

8 Mo Alma i talem: “Sapos yu biliv long fasin blong Kraes blong pemaot man, yu save kam oraet bakegen.”

9 Mo hem i talem: “Yes, mi biliv folem ol toktok blong yu.”

10 Mo afta, Alma i bin prea long Lod, i talem: “O Lod, God blong mifala, gat sore long man ia, mo mekem hem i kam oraet bakegen folem fet blong hem we i stap long Kraes.”

11 Mo taem we Alma i bin talem ol toktok ia, Siesrom i stanap long ol leg blong hem, mo i stat blong wokbaot; mo samting ia i mekem wan bigfala sapraes long evri pipol; mo nius blong samting ia i go long evri ples long graon blong Saedom.

12 Mo Alma i baptaesem Siesrom i kam long Lod; mo hem i stat, long tetaem ia i go, blong prij long ol pipol.

13 Mo Alma i stanemap wan jos long graon blong Saedom, mo i konsekretem ol pris mo ol tija insaed long kantri ia, blong oli baptaesem i kam long Lod, eni man we i wantem blong kasem baptaes.

14 Mo i bin hapen se, oli plante; from oli kam long ol bigfala grup, long evri ples blong Saedom mo oli kasem baptaes.

15 Be long saed blong ol pipol we oli bin stap long graon blong Amonaeha, oli stap yet olsem wan pipol we i gat strong hat mo we i stronghed; mo oli no sakem ol sin blong olgeta, oli talem se evri paoa blong Alma mo Amulek i kam long devel; from we bilif blong olgeta i olsem blong Nehor, mo oli no biliv long fasin blong sakem ol sin blong olgeta.

16 Mo i bin hapen se Alma mo Amulek; Amulek, from hem i livim fogud evri gol blong hem, mo silva, mo ol gudgudfala samting blong hem, we i bin stap long graon blong Amonaeha, blong kam talem toktok blong God, from olgeta ia we oli fren blong hem long bifo, mo tu, papa blong hem, mo famli blong hem, oli bin sakemaot hem;

17 From hemia, afta we Alma i bin stanemap jos long Saedom, hem i luk wan bigfala kontrol, yes hem i luk se ol pipol oli kontrolem ol hae tingting blong hat blong olgeta, mo oli stat blong putum tingting blong olgeta i stap daon long fored blong God, mo oli stat blong kam tugeta long ples blong wosip, blong wosipim God long fored blong olta, oli stap gohed blong lukaotgud mo prea oltaem, blong oli save kam fri aot long Setan, mo fri long ded, mo fri long fasin blong prapa spolem gud olgeta—

18 Nao olsem we mi bin talem, Alma i luk evri samting ia, from hemia, hem i tekem Amulek mo tufala i kam long graon blong Sarahemla, mo hem i tekem Amulek i go long haos blong hem, mo i givhan long hem long ol hadtaem blong hem, mo i mekem hem i kam strong moa long Lod.

19 Mo olsem ia nao, nambaten yia blong rul blong ol jaj long ol pipol blong Nifae i bin finis.