1 Mo i bin hapen se oli putum ol gadman ova long Ol Man blong Leman we oli prisena, mo fosem olgeta blong go mo berem ol dedman blong olgeta, yes, mo tu, ol dedman blong Ol Man blong Nifae we oli kilimded olgeta; mo Moronae i putum ol man ova long olgeta blong gad long olgeta taem we bae oli mekem ol wok blong olgeta.

2 Mo Moronae i go long bigtaon blong Myulek wetem Lihae, mo hem i tekem lid long bigtaon ia mo givim wok ia long Lihae. Nao luk, Lihae ia i wan man we i bin stap wetem Moronae long plante pat blong ol faet blong hem; mo hem i wan man olsem Moronae, mo tufala i glad long fasin blong tufala blong stap gud; yes, tufala i laekem tufala wanwan, mo tu, olgeta pipol blong Nifae oli laekem tufala.

3 Mo i bin hapen se afta we Ol Man blong Leman oli berem ol dedman blong olgeta, mo tu, ol dedman blong Ol Man blong Nifae, Ol Man blong Nifae oli mekem olgeta oli maj i gobak long graon blong Plante; mo Tiankum, folem ol oda blong Moronae, i mekem se oli mas stat blong mekem wok blong digim wan hol raonabaot long graon, o long bigtaon, Plante.

4 Mo hem i mekem se oli mas bildim wan fanis wetem ol bigfala timba, long saed we i kolosap long bigtaon long hol blong olgeta; mo oli sakem ol graon blong hol i go agensem fanis ia, we oli bildim wetem ol bigfala timba; mo olsem ia nao, oli mekem Ol Man blong Leman oli wok kasem taem we oli raonem bigtaon Plante wetem wan strong wol blong bigfala timba mo graon, we i hae bigwan.

5 Mo bigtaon ia i kam wan strong sapot afta, blong oltaem, mo long bigtaon ia oli gad long Ol Man blong Leman we oli prisena, yes, insaed long wan wol we oli mekem olgeta oli wokem wetem ol han blong olgeta nomo. Nao taem ia Moronae i fosem hem blong mekem Ol Man blong Leman oli wok, from we i isi blong gad long olgeta taem we oli wok; mo hem i wantem blong mekem ol ami oli rere eni taem blong oli save atakem Ol Man blong Leman.

6 Mo i bin hapen se olsem ia nao Moronae i kasem wan win ova long wan long olgeta ami blong Ol Man blong Leman we i moa strong long evriwan, mo hem i tekem bigtaon blong Myulek, we i wan long ol strong sapot blong Ol Man blong Leman long graon blong Nifae; mo tu, olsem ia nao hem i wokem wan strong sapot blong holemtaet ol prisena blong hem.

7 Mo i bin hapen se hem i nomo traem blong mekem wan faet wetem Ol Man blong Leman long yia ia, be hem i mekem ol man blong hem oli rere blong faet, yes, mo blong mekem ol strong wol blong difendem olgeta agensem Ol Man blong Leman, yes, mo tu, blong mekem se ol woman blong olgeta, mo ol pikinini blong olgeta bae i no kasem hadtaem blong kasem kaekae mo hadtaem mo oli save gat kaekae blong ol ami blong olgeta.

8 Mo nao i bin hapen se ol ami blong Ol Man blong Leman, long solwota blong Wes, long Saot saed, taem we Moronae i no stap, from we samfala sikret plan long medel blong Ol Man blong Nifae, we i bin mekem olgeta oli pulaot long medel blong olgeta, ol ami ia oli muv mo winim samfala graon ova long Ol Man blong Nifae, yes, inaf blong mekem se oli winim plante long ol bigtaon blong Ol Man blong Nifae long pat blong graon ia.

9 Mo olsem ia nao, from nogud fasin we i bin stap long medel blong olgeta nomo, yes, from ol fasin blong pulaot mo sikret plan we i stap long medel blong olgeta nomo, oli putum olgeta long ol problem we oli denja olgeta.

10 Mo nao luk, mi gat samting blong talem long saed blong ol pipol blong Amon, olgeta ia we, long stat, oli bin Ol Man blong Leman; be tru long Amon mo ol brata blong hem, o long ol narafala toktok tru long paoa mo toktok blong God, oli bin jenisim laef blong olgeta i kam long Lod; mo oli bin tekem olgeta i go daon long graon blong Sarahemla, mo stat long taem ia, Ol Man blong Nifae oli bin lukaotem gud olgeta oltaem.

11 Mo from strong promes blong olgeta, oli bin holemtaet olgeta blong oli no karem ol tul blong faet blong olgeta agensem ol brata blong olgeta; from we oli bin mekem wan strong promes se bae oli neva mekem blad i ron bakegen; mo folem strong promes blong olgeta bae oli ded; yes, bae oli letem olgeta nomo blong foldaon long ol han blong ol brata blong olgeta, sapos we i no bin from sore mo lav we i bigwan tumas we Amon mo ol brata blong hem oli gat long olgeta.

12 Mo taswe, oli tekem olgeta i go daon long graon blong Sarahemla; mo Ol Man blong Nifae oli protektem gud olgeta oltaem.

13 Be i bin hapen se taem we oli luk denja, mo ol plante hadtaem mo ol fasin blong kasem hadtaem, we Ol Man blong Nifae i fesem from olgeta, oli harem sore from olgeta mo oli wantem blong tekem ol tul blong faet blong lukaotem gud kantri blong olgeta.

14 Be luk, taem we oli rere blong tekem ol tul blong faet blong olgeta, ol toktok blong Hileman mo ol brata blong hem i winim gud olgeta, from we oli rere blong brekem strong promes we oli bin mekem.

15 Mo Hileman i fraet se sapos oli brekem promes ia, bae oli lusum sol blong olgeta; from hemia, evriwan long olgeta we oli bin mekem kavenan ia, tru promes blong olgeta i fosem olgeta blong luk ol brata blong olgeta oli go tru ol hadtaem blong olgeta, long taem blong denja long tetaem ia.

16 Be luk, i bin hapen se oli gat plante boe we oli no bin mekem kavenan ia blong no tekem ol tul blong faet blong difendem olgeta agensem ol enemi blong olgeta; from hemia, oli kam tugeta long tetaem ia, olgeta evriwan we i save tekem ol tul blong faet, mo oli singaotem olgeta bakegen Ol Man blong Nifae.

17 Mo oli mekem wan kavenan blong faet from fridom blong Ol Man blong Nifae, yes, blong protektem gud graon go kasem we sapos i nid blong oli mas putumdaon laef blong olgeta; yes, mo tu, oli mekem kavenan ia se bae oli neva givimaot fridom blong olgeta, be bae oli faet from evri samting blong protektem gud long Ol Man blong Nifae mo olgetawan bakegen aot long slef.

18 Nao luk, i gat tu taosen long olgeta yang man ia, we oli mekem kavenan ia, mo oli tekem ol tul blong faet blong olgeta blong difendem kantri blong olgeta.

19 Mo nao luk, from we oli neva bin mekem nogud samting long Ol Man blong Nifae long bifo, oli stat nao long taem ia blong givim wan bigfala sapot; from we oli tekem ol tul blong faet blong olgeta, mo oli wantem se Hileman bae i kam olsem lida blong olgeta.

20 Mo olgeta evriwan ia oli ol yang man, mo oli strong tumas wetem strong paoa long tingting, mo tu, oli gat paoa mo oli no les; be luk i no hemia nomo—oli ol man we oli bin tru long evri taem long eni samting we ol ami lida blong olgeta oli trastem olgeta blong mekem.

21 Yes, oli ol man we oli ones mo oli tru, from we ol papa mo mama blong olgeta oli bin tijim olgeta blong obei ol komanmen blong God mo blong wokbaot long stret laef long fored blong hem.

22 Mo nao i bin hapen se Hileman i maj long fored blong ol tu taosen yang soldia blong hem, blong sapotem ol pipol long ol boda blong graon long Saot kolosap long solwota long Wes saed.

23 Mo olsem ia nao twante mo eit yia blong rul blong ol jaj ova long ol pipol blong Nifae i bin finis.