Ol Smol Pikinini mo Sakramen
Man ia we i raet, i stap long Yuta, YSA.
Ol smol pikinini blong mifala oli filim save se sakramen i wan impoten samting long mifala. Maet mitufala i bin save mekem moa blong helpem olgeta blong luk se sakramen i impoten tu long olgeta.
?Yu bin askem yuwan finis se from wanem yumi stap letem ol smol pikinini we oli no baptaes blong oli tekem sakramen? ?Hem i jes blong mekem se oli no krae mo tantanem olgeta tumas taem oli wantem kakae wan pis bred? ?Hem i jes blong mekem se i moa isi blong pasem odinens ia, jes blong mekem oli stap kwaet?
Mi no ting. Mi biliv se i gat ol risen we oli dip moa. Mi bilivim hemia from se mi bilivim se taem Jisas Kraes i talem “evriwan,” Hem i minim evriwan. Mo taem Hem i toktok long wan bigfala grup, Hem i no livim wan i stap aotsaed.
Taem Sevya we i laef bakegen long ded i soem sakramen long ol pipol blong Hem long Ol Amerika, Hem i poenemaot gud se odinens ia i gat wan spesel mining long olgeta we oli bin kasem baptaes finis.1 Mo, Hem i givim komanmen long ol disaepol blong Hem blong oli pasem sakramen i go long ol grup blong ol pipol.2 Mo insaed long grup blong ol pipol ia, i gat ol smolwan.3
Taem ol man we oli kasem prishud tedei oli talem ol prea blong sakramen, oli askem Papa long Heven blong blesem mo mekem tabu bred mo wota blong “sol blong olgeta evriwan we oli tekem.4 Evriwan. Wanwan we i tekpat—mo yumi kaontem tu wanwan smol pikinini.
Sapos we, taem oli tekem bred mo wota, ol pikinini oli kasem ol saen ia olsem wan blesing long sol blong olgeta we i klin evriwan, nao i mas gat wan wei blong helpem olgeta blong faenem mining long odinens ia.
Wetem save ia, mi luklukbak long ol taem we ol pikinini blong mitufala oli bin smol. Waef blong mi mo mi, i bin mekem wan gudfala wok blong mekem se oli stap kwaet long taem we oli stap blesem mo pasem sakramen. Mi ting se ol smol pikinini blong mitufala oli filim save se sakramen i wan impoten samting long mitufala. Maet mitufala i bin save mekem moa blong helpem olgeta blong luk se sakramen i impoten tu long olgeta.
?Wanem nao mitufala i bin save mekem? Mitufala i bin save tingbaot se ol smol pikinini oli save stap kipim ol promes we oli talem long prea blong sakramen. Oli save andastanem, long smol be strong wei blong olgeta, se i minim wanem blong “tingbaot Jisas oltaem.” Oli save mekem promes blong “stap obei long ol komanmen blong Hem.” Oli save soem tu we oli stap “tekem long olgeta nem blong Kraes,” mo save se, i no longtaem, bae olgeta tu i gat janis blong kasem baptaes mo kasem konfemesen.5
?Be weswe nao long fasin blong stap riniu ol kavenan? Ol lida blong Jos oli bin tijim se taem yumi tekem sakramen, yumi stap mekem bakegen olgeta kavenan ia we yumi bin mekem wetem Lod.6 Ol smol pikinini oli no gat eni kavenan blong mekem bakegen.
Mi tingtingbak bakegen long ol taem we ol pikinini blong mitufala oli bin smol. Bae mitufala i no save helpem olgeta blong luklukbak long ol kavenan, be mitufala i bin save helpem olgeta blong lukluk fored from taem ia. Mi luk pikja blong miwan wetem wan yang boe o gel long Sabat moning:
Bae mi talem long hem: “Taem yu gat eit yia, bae yu kasem baptaes mo kasem presen we i Tabu Spirit. Bae yu mekem wan kavenan. Kavenan we bambae yu mekem long tetaem ia bae i olsem ol promes we yu stap mekem naoia taem yu stap tekem sakramen.
“Taem mi tekem sakramen tedei, bae mi riniu kavenan blong baptaes blong mi, semmak olsem we mi stap mekem ol promes ia bakegen. Yu stap ia wetem mi, be yu no stap riniu wan kavenan. Yu no mekem wan yet. Be yu save stat blong praktisim blong mekem wan kavenan. Evri taem yu tekem sakramen, yu save rere blong kasem baptaes mo konfemesen. Olsem ia, bae yu rere gud taem yu kasem eit yia.”
Sapos yu luk se i no isi blong yusum toktok ia, praktisim, long wei ia, nao tingting blong talem long wan wei olsem: Long wan ples we i kwaet, wan papa i save helpem ol pikinini blong hem oli rere from odinens blong baptaes taem hem i soem olgeta olsem wanem bae oli stanap tugeta insaed long wota, mo talem ol toktok blong prea blong baptaes. Hem i no mekem odinens long taem ia. Hem i soem nomo. Long wan wei, hem i stap helpem ol pikinini blong hem blong oli praktis. Long wei ia, bae oli no wari se wanem bae i hapen taem oli go insaed long ol wota blong baptaes. Mi biliv se ol mama mo ol papa oli save helpem ol pikinini tu blong praktis blong mekem mo kipim kavenan blong baptaes. Wanwan sakramen miting i save kam wan tabu praktis taem blong ol smol pikinini taem oli tekem ol saen blong Atonmen blong Sevya.
Nao, mi gobak long fasfala kwestin blong mi. ?From wanem nao yumi letem ol smol pikinini blong tekem sakramen? ?Hem i jes blong mekem oli stap kwaet? No, i no olsem. Yumi stap helpem ol smolwan blong yumi blong tekem sakramen blong oli save tingbaot Sevya blong olgeta mo holemtaet pis blong Hem—wan pis we wol ia i no save givim.7 Yumi helpem olgeta blong rere blong kasem pis ia we bae i kam moa bigwan long fiuja, taem bae oli mekem mo kipim ol kavenan wetem Hem.