Mānava i te Ve’a tāhepetoma a te feiā ’āpī pa’ari

Manava i te Ve’a tahepetoma a te feiā ’āpī pa’ari—e piara’a tāhepetoma i’ō nei i roto i tā ’outou fa’anahora’a ’āfa’ifa’i o te Vaira’a buka ’evanelia tei pāpa’ihia nō te feiā ’āpī pa’ari e te feiā ’āpī pa’ari, nā reira ato’a te feiā fa’atere o te ’Ēkālesia ’e te tahi atu feiā ’aravihi nō ni’a i te mau tumu parau e tano ia tātou i teie mahana.

Tā mātou fā

Tā mātou fā ’o te tauturura’a ïa ia ’outou ’ia ’ite mai i te pāhonora’a i tō ’outou mau tāmatara’a ’e i te pūai nō te fa’aruru i te reira. E rave tātou i te reira nā roto i te tuatāpapa-’āmui-ra’a i te ’evanelia a Iesu Mesia ’e te hi’ohi’ora’a e nāhea te feiā ’āpī pa’ari nā te ao ato’a nei i te tūtavara’a ’ia ora i te reira.

Nō ni’a ia tātou

Nā mua roa : ’Ua fa’auruhia teie tuha’a tā’āto’a nō ’outou. Tei mua tātou i te mau fa’aotira’a, i te mau tāmatara’a ’āpī, ’e i te mau tāuiuira’a e rave rahi i roto i teie tau o tō tātou orara’a. ’E ’ua hina’aro mātou e arata’i ia ’outou nā roto i te reira mau mea ato’a. Tē hina’aro ato’a nei mātou ’ia ’ite ’outou ē, tē hi’o nei mātou ia ’outou ’ia au i tō ’outou iho huru, ’eiaha rā ’ia au i tō ’outou ti’ara’a tīvira, nō reira ïa e’ita teie tuha’a e pi’ihia Feiā ’āpī pa’ari tāhepetoma. Teie mau mea i roto nō te tā’āto’ara’a o te feiā ’āpī pa’ari, tei ’ōtahi ’e tei fa’aipoipohia, ’aore rā tei ’ōtahi fa’ahou ā, inaha ho’i tā ’outou ’ohipa e fa’atupu i ni’a i te ’Ēkālesia—’e i ni’a i te ao nei—e nehenehe e riro ’ei mea fāito ’ore, noa atu ā tō ’outou vaira’a ’ei feiā ’āpī pa’ari.

Tē mana’o ato’a nei mātou ē, te mau tumu pārau tā tātou e tuatāpapa nei, e ’ana’anatae ïa te tā’āto’ara’a o te feiā ’āpī pa’ari, ’e tae noa atu i te feiā i ni’a atu i te 30 matahiti. ’Ua ’ite mātou ē, tō ’outou ’ana’anatae i te mau tumu parau ’e te mau tāmatara’a ’o tā tātou e paraparau, e’ita ïa te reira e taui nō te mea noa ē, ’ua fa’ahanahana ’outou i te tahi fa’ahou mahana fānaura’a. Te mau fifi tā tātou e fa’aruru nei i teie mahana e tano ïa nō te rahira’a o tātou ’e e mau fifi rahi mau e ti’a ai ia tātou pā’āto’a ’ia ’ohipa ’āmui, noa atu te fāito o tō tātou matahiti.

’Ua ’ite mātou ē, nō roto mai ’outou pā’āto’a i te mau peho orara’a ta’a ’ē, te ha’api’ira’a ta’a ’ē, te fāito fāna’o ta’a ’ē, te ta’ere ’e te huru ta’ata ta’a ’ē. Nō reira, e paraparau tātou i te mau tumu parau rau, ’e e rave rahi ’o tō tātou mau ’ā’amu e matara mai nā roto hau atu i te 20 reo i roto i te Vaira’a buka ’evanelia—tē hina’aro nei mātou e toro i te rima ia ’outou pā’āto’a ’e ’ia riro mau ’ei tauturu nō ’outou pā’āto’a. Tē hōpoi mai nei te feiā ’āpī pa’ari nā te ao ato’a nei i tō rātou fa’aro’o ’e tā rātou mau tārēni i te ’Ēkālesia. I te mau vāhi e rave rahi, e ’ere tātou i te feiā fa’atere noa nō ananahi, tē fa’atere nei tātou i te ’Ēkālesia i teie mahana, noa atu ā e mau vāhi e mea maoro te ’Ēkālesia i te ha’amaura’ahia. ’E e riro tā tātou ’ohipa i te toro roa atu i pīha’i atu i teie mahana, nō te mea ’o tātou ato’a ho’i te mau metua o te u’i nō muri mai.

E nehenehe tātou e rave tāmau noa

E rave rahi atu ā te mau mea tā tātou e nehenehe e parau nō ni’a i te faufa’a ’e te fāito pūai o te feiā ’āpī pa’ari, terā rā, mai te mea e tāmau noa tātou i te parau, e au ïa ē, tē fa’atietie ra tātou ia tātou (nō te mea, e u’i maita’i mau tō tātou). ’Ua nava’i noa te parau ē, tē hina’aro nei te Atua ia tātou, tē hina’aro nei tātou i te Atua ’e tāna ’Ēkālesia, ’e tē hina’aro nei tātou i te tahi ’e te tahi. « e fa’atupu [’āmui tātou] i te tua’ā’ai », mai tā te peresideni Russell M. Nelson i parau nō ni’a i te feiā ’āpī pa’ari. « Nāna e ha’apūai ia ’outou nō te fa’aoti i te mea e’ita e nehenehe e rave. …

« … E ‘u’i mā’itihia’ ’outou’ (1 Petero 2:9), tei fa’atōro’a-ātea-hia e te Atua nō te rave i te hō’ē ’ohipa fa’ahiahia—nō te tauturu i te ta’ata o teie nei ao ’ia fa’aineine nō te Tae-piti-ra’a mai o te Fatu ! »¹

Noa atu te tauira’a tāmau o teie tau, ’e te fa’ahepora’a o te ananahi ta’a ’ore, e nehenehe i te ti’ara’a feiā ’āpī pa’ari e riro ’ei taime fa’ahiahia nō te ’ite iāna iho ’e nō te tupura’a i te rahi, te ’itera’a i tā tātou fā i’ō nei i ni’a i te fenua nei, ’e te ’apora’a mai e nāhea i te tāpe’a i te ’evanelia ’ei pū nō tō tātou orara’a. Tē ’oa’oa nei mātou ’ia rave i terā tere ’e ’outou, ’e maita’i ē, e haere tāmau mai ’outou !

I hea mātou e ’itehia ai

Tei roto te Ve’a tāhepetoma a te feiā ’āpī pa’ari i te Vaira’a buka ’evanelia i raro a’e i te mau ve’a ’aore rā te feiā pa’ari > Feiā ’āpī pa’ari. E ’ite ato’a mai ’outou i te tahi o tō tātou mau ’ā’amu i roto i te ve’a Liahona i ni’a i te ’api Facebook o te Liahona ’e i ni’a i te ’api fāri’ira’a ChurchofJesusChrist.org

Tē hina’aro nei mātou e fa’aro’o ia ’outou

E aha te mau tumu parau tā ’outou e hina’aro ’ia ’āparauhia ?
E aha te mau ’ā’amu tā ’outou e fa’a’ite mai ?
E aha tō ’outou mau mana’o nō mātou ?

E nehenehe ’outou e hāpono mai i tō ’outou iho mau ’ā’amu, mau mana’o ’e mau parau i ni’a ia liahona.ChurchofJesusChrist.org. Maoro noa mātou i te fa’aro’o ia ’outou !