Tiute i le Atua

E faapefea ona ou fesoasoani i isi ia maua faamanuiaga o le Togiola a le Faaola?

A o saunia ma faatautaia e e umiaina le Perisitua Arona le faamanatuga, latou te fesoasoani i tagata o le Ekalesia e faafou le mana faamama o le Togiola i o latou olaga.

Saunia oe lava ia faaleagaga

O a ni ou lagona a o e saunia, faatautaia, pe taumafa foi i le faamanatuga? Aisea e taua ai le faamanatuga ia te oe?

O le a se manatu o alii talavou i le sauniga o le faamanatuga? O le a se mea e mafai ona latou faia e saunia lelei atili ai e faatautaia le faamanatuga? O le a se mea e te fia manao ia latou malamalama i ai e uiga i le tiutetauave o loo ia i latou? O a nisi auala e mafai ai e e o umia le Perisitua Arona ona fesoasoani i isi ina ia maua faamanuiaga o le Togiola?

O a ni mau ma ni lauga e mafai ona fesoasoani i alii talavou e malamalama ai i le matafaioi o loo ia i latou e fesoasoani ai i isi ia maua faamanuiaga o le Togiola?

Luka 22:19–20; 3 Nifae 18:1–11 (Na faavaeina e Iesu Keriso le faamanatuga)

MF&F 20:76–79 (E faatautaia e e umia le Perisitua Arona le faamanatuga)

MF&F 38:42 (E tatau ona agavaa e umia le perisitua e faatino ai sauniga)

Opetaia 1:21 (E tatau ona avea i tatou ma faaola i le mauga o Siona).

Boyd K. Packer, “O Le Togiola,” Ensign po o le Liahona, Nov. 2012, 75–78

“Faamanatuga,” Faamaoni i le Faatuatua (2004), 45–47

“O Le Avea ma Faaola i Luga o Mauga o Siona,” Aoaoga a Peresitene o le Ekalesia: Iosefa Samita: Iosefa Samita [2007], 499).

Vitio: “O le Perisitua Maoae,” “Faapaiaina Outou Lava”

2:59

4:38

Aoao atu i le ala a le Faaola

I faatulagaga uma lava, sa avea ai lava le Faaola ma faataitaiga ma faiaoga mo Ona soo. Na Ia aoao i latou e tatalo e ala i le tatalo faatasi ma i latou. Na Ia aoao i latou e alolofa atu ma auauna atu e ala i [Lona] alofa ma auauna atu ia i latou. E mafai faapefea ona avea oe ma se faataitaiga o mataupu faavae o loo e aoao atua?

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai i alii talavou e faasoa mai se mea latou te manatua mai le lesona o le vaiaso ua tea. O a ni fesili o i ai pea? O faapefea ona latou ola ai i mea ua latou aoaoina?
Valaaulia uso o le korama e lisi i luga o le laupapa a latou tali i le fesili “E faapefea ona ou fesoasoani i isi ia maua faamanuiaga o le Togiola?”

Aoao faatasi

O le faamoemoega o lenei lesona o le fesoasoani lea i alii talavou taitasi ia malamalama pe faapefea ona faataunuu ona tiute faaleperisitua e fesoasoani ai i isi ia maua faamanuiaga o le Togiola. I le avea ai ma se vaega o lenei lesona, e tatau i uso o le korama ona faia ni fuafuaga i a latou tusi o le Tiute i le Atua e faatautaia ai sauniga faaleperisitua i le faaaloalo. A o lei faia se fonotaga faalekorama, valaaulia alii talavou e o mai ma aumai a latou tusi o le Tiute i le Atua i le lotu. I fonotaga faalekorama i le lumanai, valaaulia i latou e faasoa mai ni o latou aafiaga o loo latou mauaina a o latou faataunuuina a latou fuafuaga.

Valaaulia se uso o le korama e faaali mai se ata o le Faaola o loo faatautaia le faamanatuga (tagai Tusi Ata o le Talalelei,54). Fai atu ia te ia e faamalamalama mai le nofoaga na tupu ai lea mea, po o le a le mea o tupu i le ata, ma le auala e avea ai ē umiaina le Perisitua Arona ma sui o Iesu Keriso a o latou faatautaia le faamanatuga i le asō. Fai atu i alii talavou pe o a ni o latou lagona a o latou saunia ma faatautaia le faamanatuga.
Valaaulia alii talavou e faitau taitoalua le Mataupu Faavae ma Feagaiga 20:76–79, Luka 22:19–20, ma le 3 Nifae 18:1–11. Fai atu ia i latou e talanoaina po o le a le mea o faatusa i ai le falaoa ma le vai ma po o ai foi o fai ai e umiaina le perisitua ma sui a o latou saunia ma faatautaia le faamanatuga (tagai i le Tiute i le Atua,24). Valaaulia alii talavou e sue i le vaega o le “Galue” o a latou tusi o le Tiute i le Atua (itulau 25, 49, po o le 73) ma fai ni fuafuaga e faavae i mea na latou talanoaina. Uunai i latou e fai atu i o latou matua po o se taitai ia fesili nei: O le a le uiga o le sauniga o le faamanatuga ia te oe? O le a se mea e mafai ona ou faia o sē umia le Perisitua Arona e fesoasoani ai ia te oe ia maua se aafiaga anoa i le faamanatuga? I fonotaga faalekorama i le lumanai, valaaulia uso o le korama e faasoa mai ni tali i nei fesili ma soo se aafiaga ua latou mauaina a o latou faataunuuina a latou fuafuaga.
Ia faitau o se korama le Mataupu Faavae ma Feagaiga 38:42 ma talanoaina pe faapefea ona faatatau lenei fuaiupu ia i latou o loo tauaaoina “ipu” o loo i ai faatusa o le Togiola (tagai Tiute i le Atua,48). Faaali se tasi o ata o loo fautua mai i lenei otootoga, ma fai atu i alii talavou e tagai mo ni mafuaaga e manaomia ai ona latou mama ina ia mafai ai ona faaaoga le perisitua. Valaaulia i latou e sue i le vaega o le “Galue” ia latou tusi o le Tiute i le Atua (itulau 25, 49, po o le 73) ma faia ni fuafuaga e faavae i mea ua latou aoaoina.
Valaaulia alii talavou e faitau ia tatalo o le faamanatuga, faailoa feagaiga o i ai i nei tatalo, ma faamalamalama mai o latou uiga. O a ni upu e tulagaese ia i latou? (tagai i le Tiute i le Atua,72). E faapefea e uiga ma amioga a i latou e faatautaia le faamanatuga ona aafia ai le aafiaga o tagata o le faapotopotoga? Valaaulia alii talavou e sue i le vaega o le “Galue” ia latou tusi o le Tiute i le Atua (itulau 25, 49, po o le 73) ma faia ni fuafuaga e faavae i mea ua latou aoaoina.
Faasoa atu se ata o se tuaa ua maliu e aunoa ma le mauaina o ni sauniga o le malumalu, pe valaaulia ia alii talavou e aumai ni ata o tuaa e faaali atu. Fai atu i alii talavou e talanoa i se auala e mafai ai ona latou fesoasoani ia i latou o e ua maliliu ina ia auai i faamanuiaga o le Togiola. Tuu atu i alii talavou e suesue le parakalafa o loo amata i le “E faapefea ona avea i latou ma faaola i luga o le Mauga o Siona?” mai le Mataupu 41 o le Aoaoga a Peresitene o le Ekalesia: Iosefa Samita (2011). Talatalanoa po o le a le uiga o le avea ma faaola i luga o le Mauga o Siona. Valaaulia ia alii talavou e faasoa mai soo se aafiaga sa latou mauaina i le avea ai ma faaola i luga o le Mauga o Siona.
Aumai i le fonotaga a le korama se mea e suitulaga i le malamalama (e pei o se matauila po o se moliuila). Valaaulia alii talavou e mafaufau po o le a le uiga o le avea ma se malamalama i isi a o e faasoa atu ia i latou le tala i le amataga o le lauga a Peresitene Boyd K. Packer “O Le Togiola.” Fai atu i alii talavou e faasoa mai o latou manatu e uiga i le auala e mafai ona avea ai i tatou ma ni “malamalama pito i lalo” i se tagata o mafatia. E faapefea ona avea i tatou ma ni malamalama pito i lalo pe a tatou faatino o tatou tiute faaleperisitua?

Fai atu i alii talavou e faasoa mai mea na latou aoaoina i le asō. Pe o latou malamalama i le auala latou te fesoasoani atu ai i isi, i le avea ai ma ni e umiaina le perisitua, ina ia maua faamanuiaga o le Togiola? O a ni lagona po o ni uunaiga ua latou maua? Pe i ai nisi a latou fesili? Pe aoga le toe faaalu o se isi taimi i lenei aoaoga faavae?

Fuafuaga o le Tiute i le Atua

Tuu atu se taimi i le faaiuga o le fonotaga a le korama mo alii talavou e fai ai ni fuafuaga i totonu o a latou tusi o le Tiute i le Atua po o totonu o le lomiga i le initoneti o le Tiute i le Atua. O nei fuafuaga e patino, ae e mafai e tagata o le korama ona fesoasoani i le tasi ma le isi e fatufatu ni manatu mo a latou fuafuaga.

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Faasoa mai le fuafuaga sa ia tusia i lana tusi o le Tiute i le Atua ma lana tautinoga e faataunuu.
Talanoaina pe faapefea e uso o le korama ona avatu le faamanatuga ia i latou atonu e le mafai ona auai mai i le lotu (pei ona faatonuina ai e le epikopo).