Vuli mai na koniferedi raraba

Vakarautaki Iko Vakayalo

Ni da lewe ni Lotu i Jisu Karisito ni Yalododonu Edaidai, eda sa vakalougatataki ni tiko e dua na parofita bula e vuravura nikua. Na nona ivakavuvuli, kei ira na iliuliu ni Lotu raraba tale eso, e sa vu ni kaukauwa levu kivei ira na lewe ni Lotu—oka kina na itabagone o vakavulica. Na Turaga a cauraka: “O koya sa kilikili kina ki na lotu me muria na vosa kei na ivakaro kecega sa vakatakilai vua [na parofita] me tukuna vei kemudou … ; ni dou sa rogoca na nona vosa, me vaka ga ni dou rogoca mai gusuqu, ena yalovosota kei na vakabauta. Ni kena vakayacori na veika oqo, ena sega kina ni rawai kemudou na matamata mai eli;, ia na Turaga na Kalou ena vakatalabusesetaka na kaukauwa ni butobuto e matamudou” (Vunau kei na Veiyalayalati 21:4–6).

iVurevure Eso me Vukea Nomu Vakavakarau

Ena mataveiliutaki ni kuoramu se kalasi, digitaka e dua se levu na itukutuku mai na koniferedi raraba wale ga oqo o vakila tu ni na vakaibalebale vakalevu vei ira na itabagone o vakavulica.

Era sa tiko ena initaneti na ilavelave ni vosa kei na vidio mai na koniferedi raraba (raica na conference.lds.org) kei na Gospel Library app.

Veitaro me Tugani ni bera Nomu Veivakavulici

Na ivakavuvuli se ivunau cava so a vakatavulici ena itukutuku ni koniferedi oqo? O cei vei ira qori o nanuma ni na veivuke vakalevu sara vei ira na itabagone ena nomu kuoramu se kalasi?

Na ka sotavi se ivakaraitaki cava soti e vakayagataka o daunivosa? Na ivakavuvuli cava so e vakavulica na ka sotavi se ivakaraitaki eso oqo? Na ka sotavi cava so ni nomu bula vakaiiko o na rawa ni wasea e semati ki na veivakavuvuli oqo?

Na cava e sureti keda kina o daunivosa me da cakava? Na veivakalougatataki cava so e yalataka o koya ni na noda? Na veisureti kei na veivakalougatataki yalataki cava o na veivosakitaka kei ira na itabagone?

Veivakavulici ena iVakarau ni iVakabula

“Navuca na sala e rawa ni sureta kina na Yalo na vakayagataki ni vakatagi, talanoa, yaloyalo, kei na cakacaka ni liga tale eso, vakamatatataka na ivakavuvuli vakosipeli ena sala guilecavi dredre, ka vukei ira na vuli ena semati ni kosipeli ki na nodra bula e veisiga. Nanuma tiko na veivurevure oqori e sega ni dodonu me na usutu ni lesoni, ia mera iyaya ga ni cakacaka me vukei kemuni ena kena vakavulici vakavinaka sara na ivunau ni kosipeli” (Veivakavulici ena iVakarau ni iVakabula, 22).

iTuvatuva ni Soqoni

1. Veivakasalataki Vata ka Wasea na Veika e Sotavi

Veiliutaki kina e dua na lewe ni mataveiliutaki ni kuoramu se kalasi; me rauta e 5–10 na miniti

Liutaka e dua na veivosaki me baleta na veika oqo:

Noda kuoramu se kalasi: O cei e yali tiko nikua? Na veisiko cava so eda sa gadreva me caka? O cei e dodonu me da sureta ki na itaviqaravi mai oqo? O cei sa gadreva na noda veivuke kei na masu?
Noda itavi: Na ilesilesi cava so sa gadrevi me da cakava? Na ilesilesi cava soti eda sa vakayacora rawa? Eda a sureti ira vakacava na tani mera lako mai vei Karisito, ka da na sureti ira vakacava eso tale ena gauna oqo?
Noda bula: Vakananuma na kuoramu se kalasi ena veivosaki ni soqoni sa oti. Na cava so eda sa sotava ena tutaki ni veika eda sa vulica? Na cava so eda sa sotava ena vica na macawa sa oti e sa vaqaqacotaka na noda ivakadinadina ni kosipeli?

Ke rawa, veivosakitaka taumada na veika oqo ena dua na bose ni mataveiliutaki ni kuoramu se kalasi.

3. Vulica Vata

Veiliutaki kina e dua na iliuliu se qasenivuli se lewe ni kuoramu se kalasi; me rauta e 25-35 na miniti

Vulica na itukutuku se veitukutuku digitaki mai na koniferedi raraba ka vaqara na veituberi ni Yalo (raica na “Veitaro me Tugani ni bera Nomu Veivakavulici”). Qai tuvana e dua na sala me vukei ira na itabagone ni kunea na veika dina mai na itukutuku. Na veitaviqaravi oqo ena rawa ni veivuke:

Vakalekalekataka na itukutuku. Sureti ira na itabagone me ra wilika na itukutuku ka vola e dua na ivakaleka ni yatuvosa. Bolei ira me ra vakalailaitaka na nodra ivakaleka ki na dua na malanivosa-leka era na rawa ni nanuma vakarawarawa.
Vulica e dua na ivolanikalou. Sureti ira na itabagone mera wilika e dua na ivolanikalou ka tukuni ena itukutuku digitaki. Kerei ira mera veivosakitaka se sa vukei ira vakacava na ivakavuvuli ena itukutuku mera kila vakamatata cake kina na ivolanikalou.
Vakavakarau ka veiwasei. Ni bera na soqoni, sureta e vica na cauravou se goneyalewa me wilika na wase duidui eso ni tukutuku ka vakavakarau mai ni wasea nodra raititobu, vakila, kei na kilamatata eso.
Vakaraica a dua na malanivosa. Digitaka e vica na parakaravu mai na itukutuku, ka sureti ira na itabagone mera vaqara kina na veimalanivosa e vukei ira ni kila vakamatata na ivunau e vakatavulici tiko. Kerei ira mera wasea na ka era kunea kei na vuna e bibi kina.
Cakava e dua na iyaloyalo. Sureti ira na itabagone mera raica e dua na vosacavuti mai na itukutuku e vakaibalebale vei ira. Me ra qai cakava e dua na ivolakabi, iyala-ni-wiliwili, se ivakananumi e yavutaki ena vosacavuti oqo era rawa ni wasea se vakaraitaka ena nodra itikotiko.
Vakaraica na veisureti kei na veivakalougatataki. Solia vei ira yadua na cauravou se goneyalewa e dua na ilavelave ni vosa kei na peni-ni-makamaka, penikau, se kereioni ena roka duidui eso. Sureti ira mera vakayagataka na roka duidui eso me makataka na veika me vaka na ivakavuvuli ni kosipeli,veisureti me cakacakataki, veivakalougatataki yalataki, kei na ivakaro eso. Sureti ira na itabagone mera wasea na raititobu eso baleta na veika era kunea.
Wasea na vosacavuti eso. Sureti ira na itabagone mera wasea na vosacavuti eso mai na itukutuku e vakauqeti ira. Na cava e vakauqeti keda ni cakava na veivosacavuti oqo? Na madigi cava so e tiko vei keda meda wasea kina na veivakavuvuli oqo vei ira na tani?
Vakarautaka e dua na lesoni Kerei ira na itabagone mera veisasa ka tuva e dua na lesoni ni lotu vakamatavuvale e yavutaki ena dua na iwase ni tukutuku. Na cava eda rawa ni cakava me vukei ira na lewe ni noda matavuvale ni kila vakamatata na veivakavuvuli oqo kei na kedra isema ki na noda bula? Sureta eso na mataveisa me wasea na nodra ituvatuva.
Wilika ka wasea. Wilika vata e vica na vosacavuti mai na itukutuku. Kerei ira na itabagone me ra wasea eso na ivakaraitaki mai na ivolanikalou kei na nodra bula e vakaraitaka na ka e vakaibalebale kina vei ira na veivosacavuti oqo.

3. Navuca mo cakava

Veiliutaki kina e dua na lewe ni mataveiliutaki ni kuoramu se kalasi; me rauta e 5–10 na miniti

O na vakauqeti ira vakacava na itabagone mera tutaka na itukutuku se veitukutuku ki na nodra bula? Vakasamataka na veika oqo:

Kerei ira na itabagone me ra veivosakitaka e dua na ka era a vakila se vakauqeti kina ena gauna ni soqoni. Na cava a vakaibalebale vei ira? E dua beka na ka era rawa ni cakava vakataki ira se vaka kuoramu se kalasi me cakacakataki kina na ka era sa vulica?
Solia e vica na miniti vei ira na itabagone mera vola na ka era na cakava ena macawa veitaravi ena kena cakacakataki na veika era sa uqeti kina. Sureti ira me ra wasea na nodra vakasama.
Vakananuma vei ira na itabagone ni na nodra na madigi me ra wasea na ka era sa sotava ena itekivu ni soqoni ka tarava.