Ako mei he konifelenisi lahí

Teuteuʻi Fakalaumālie Koe

ʻI heʻetau hoko ko e mēmipa ‘o e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau monūʻia ke tau maʻu ha palōfita moʻui ʻi he māmaní he ʻahó ni. ʻOku hoko ʻene ngaahi akonakí pea mo e ngaahi akonaki ʻa e kau taki ʻo e Siasí ko ha mālohi lahi ki he kau mēmipa ʻo e Siasí—kau ai ʻa e toʻu tupu ʻokú ke akoʻí. Naʻe folofola e ‘Eiki: “ke ke tokanga ki [he] ngaahi lea kotoa pē mo e ngaahi fekau [ʻa e palōfitá] te ne fai kiate koe … ; he ke mou tali ʻene leá, ʻo hangē ko e lea ia mei hoku ngutu ʻoʻokú, ʻi he kātaki mo e tui kotoa pē. Koeʻuhí ʻi hoʻomou fai ʻa e ngaahi meʻá ni ʻe ʻikai ikuna ʻa kimoutolu ʻe he ngaahi matapā ʻo helí; ʻio, pea ʻe fakamovetevetea atu ʻe he ʻEiki ko e ʻOtuá ʻa e ngaahi mālohi ʻo e fakapoʻulí ki muʻa ʻiate kimoutolu” (Tokāteline mo e Ngaahi Fuakava 21:4–6).

Ngaahi Maʻuʻanga Tokoni ke Tokoni ki Hoʻo Teuteú

Fili mo e kau palesitenisī fakakōlomú pe fakakalasí ha pōpoaki ʻe taha pe lahi ange mei he konifelenisi lahi fakamuimuitahá ʻa ia ʻokú ke ongoʻi ʻe mahuʻingamālie taha ki he toʻu tupu ʻokú ke akoʻí.

ʻOku maʻu atu ʻi he ʻinitanetí ʻa e ngaahi tatau tohi mo e vitiō ki he konifelenisi lahí (vakai, conference.lds.org) pea ʻi he Gospel Library app.

Ngaahi Fehuʻi ke Fakalaulaulotoa kimuʻa ʻi Hoʻo Akoʻí

Ko e hā ha ngaahi tefitoʻi moʻoni pe ngaahi tokāteline naʻe akoʻi ʻi he pōpoaki konifelenisi ko ʻení? Ko e fē ʻi he ngaahi meʻá ni ʻokú ke ongoʻi ʻe ʻaonga taha ki he toʻu tupu ʻi hoʻo kōlomú pe kalasí?

Ko e hā ha ngaahi aʻusia pe sīpinga naʻe fakaʻaongaʻi ʻe he tokotaha leá? Ko e hā ha ngaahi tefitoʻi moʻoni ʻoku akoʻi mai ʻe he ngaahi aʻusia pe sīpinga ko ʻení? Ko e hā ha ngaahi aʻusia mei hoʻo moʻui ʻoʻoú te ke lava ʻo vahevahe ʻoku fekauʻaki mo e ngaahi tefitoʻi moʻoni ko ʻení?

Ko e hā ha meʻa naʻe fakaafeʻi mai ʻe he tokotaha leá ke tau faí? Ko e hā ha ngaahi tāpuaki naʻá ne palōmesi mai te tau lava ʻo maʻu? Ko e hā ha ngaahi fakaafe mo ha ngaahi tāpuaki kuo talaʻofa mai te ke aleaʻi mo e toʻu tupú?

Ko e Faiako ‘i he Founga ‘a e Fakamoʻuí

“Fakakaukau ki he founga ʻe lava ai ʻe hano fakaʻaongaʻi ʻo e hivá, fanga kiʻi talanoá, fakatātaá mo e kalasi kehekehe ʻo e ʻātí, ʻo fakaafeʻi mai e Laumālié, fakamaʻalaʻala ha ngaahi tefitoʻi moʻoni ʻo e ongoongoleleí ʻi ha ngaahi founga fakangalongataʻa, pea tokoni ki he kau akó ke nau fakafekauʻaki e ongoongoleleí ki heʻenau moʻui fakaʻahó. Manatuʻi ʻoku ʻikai totonu ke fakatefito e tokangá ʻi he ngaahi maʻuʻanga tokoní, ka ko ha meʻa pē ia ke tokoni atu ke toe lelei ange hoʻo akoʻi ʻaki e ngaahi tokāteline ʻo e ongoongoleleí” (Faiako ‘i he Founga ‘a e Fakamoʻuí, 22).

Fokotuʻutuʻu ʻo e Fakatahá

1. Fealeaʻaki Fakataha mo Vahevahe e Ngaahi Aʻusiá

Tataki ‘e ha mēmipa ʻo e kau palesitenisī fakakōlomú pe fakakalasí; fakafuofua ki ha miniti ‘e 5–10

Tataki ha fealeaʻaki fekauʻaki mo ha ngaahi meʻa hangē ko ʻení:

Ko ʻetau kōlomú pe kalasí: Ko hai ʻoku ʻikai ke ʻi heni he ʻaho ní? Ko e hā ha ngaahi ʻaʻahi ʻoku fie maʻu ke tau fai? Ko hai ʻoku totonu ke tau fakaafeʻi ki ha ʻekitivitī ʻoku ʻamanaki ke fai? Ko hai ʻokú ne fie maʻu ʻetau tokoní mo e ngaahi lotú?
Ko hotau ngaahi fatongiá: Ko e hā ha ngaahi ngāue ʻoku fie maʻu ke tau fai? Ko e hā ha ngaahi ngāue kuo tau fakahoko? Kuo tau fakaafeʻi fēfē nai ʻa e niʻihi kehé ke nau haʻu kia Kalaisi, pea ko e hā e founga te tau lava ai ʻo fakaafeʻi mai e niʻihi kehé he taimí ni?
Ko ʻetau moʻuí: Fakamanatu ki he kōlomú pe kalasí ʻa e fealeaʻaki mei he fakataha kuo ʻosí. Ko e hā ha ngaahi meʻa ne tau aʻusia ʻi hono fakaʻaongaʻi e meʻa ne tau akó? Ko e hā ha ngaahi aʻusia kuo tau maʻu ‘i he ngaahi uike kuohilí ʻa ia ʻokú ne fakamālohia ai ʻetau ngaahi fakamoʻoni ki he ongoongoleleí?

Kapau ʻe lava, aleaʻi ʻa e ngaahi meʻa ko ʻení kimuʻa ʻi ha fakataha ʻa e palesitenisī fakakōlomú pe fakakalasí.

2. Ako Fakataha

Tataki ‘e ha taki pe ko ha faiako pe ko ha mēmipa ʻo e kōlomú pe kalasí; fakafuofua ki ha miniti ‘e 25–35

Hili hono ako ʻa e pōpoaki kuo filifili mei he konifelenisi lahí pea mo e fekumi ki he tataki ʻa e Laumālié (vakai, “Ngaahi Fehuʻi ke Fakalaulaulotoa kimuʻa ʻi Hoʻo Akoʻí”). Palani leva ha founga ke tokoniʻi ai e toʻu tupú ke nau ʻiloʻi ha ngaahi moʻoni mei he pōpoakí. ʻE lava ke tokoni ʻa e ngaahi ʻekitivitī ko ʻení:

Fakamatala fakanounou ʻa e pōpoakí. Fakaafeʻi ʻa e toʻu tupú ke nau lau ʻa e pōpoakí pea hiki fakanounouʻi ia ʻi ha sētesi pē ʻe taha. Fakatukupaaʻi kinautolu ke fakanounou ‘enau fakamatalá ki ha kupuʻi lea nounou ʻe faingofua ke nau manatuʻi.
Ako fekauʻaki mo ha potufolofola. Fakaafeʻi ʻa e toʻu tupú ke nau lau ha potufolofola ʻoku hā ʻi he pōpoaki kuo filí. Kole ange ke nau aleaʻi e founga ʻoku tokoni ai ʻa e ngaahi akonaki ʻi he pōpoakí ke mahino lelei ange kiate kinautolu ʻa e folofolá.
Teuteu pea vahevahe. Kimuʻa ʻi he fakatahá, fakaafeʻi ha kau talavou pe kau finemui ke lau ‘a e ngaahi konga kehekehe ʻo e pōpoakí pea haʻu mateuteu ke vahevahe ʻenau ngaahi fakakaukaú, ongó, mo e meʻa ʻoku mahino kiate kinautolú.
Kumi ha kupuʻi lea. Fili ha ngaahi palakalafi mei he pōpoakí, pea fakaafeʻi ʻa e toʻu tupú ke nau fekumi ki ha ngaahi kupuʻi lea ʻokú ne tokoniʻi kinautolu ke mahino ʻa e tokāteline ʻoku akoʻí. Kole ange ke vahevahe e meʻa ne nau maʻú pea mo e ‘uhinga ʻoku mahuʻinga aí.
Faʻu ha fakatātā. Fakaafeʻi ʻa e toʻu tupú ke nau kumi ha kupuʻi lea mei he pōpoakí ʻoku mahuʻingamālie kiate kinautolu. Te nau lava leva ʻo faʻu ha pousitā, fakaʻilonga tohi pe vitiō nounou (meme) makatuʻunga ‘i he ngaahi kupuʻi lea ko ʻení, te nau malava ʻo vahevahe pe fakaʻaliʻali ʻi honau ngaahi ʻapí.
Kumi ki ha ngaahi fakaafe mo ha ngaahi tāpuaki. ʻOange ki he talavou pe finemui takitaha ha tatau ‘o e leá pea mo ha ngaahi peni lanu kehekehe, peni vahevahe pe kala. Fakaafeʻi kinautolu ke nau fakaʻaongaʻi ‘a e ngaahi lanu kehekehé ke fakaʻilongaʻi ʻaki ha ngaahi meʻa hangē ko ha ngaahi tefitoʻi moʻoni ʻo e ongoongoleleí, fakaafe ke ngāue, ngaahi tāpuaki kuo talaʻofa, mo ha ngaahi fakatokanga. Fakaafeʻi ʻa e toʻu tupú ke vahevahe ha ngaahi fakakaukau kau ki he meʻa ne nau maʻú.
Vahevahe ha ngaahi kupuʻi lea. Fakaafeʻi ʻa e toʻu tupú ke vahevahe ha ngaahi kupuʻi lea mei he pōpoakí ʻokú ne ueʻi kinautolu. Ko e hā ʻoku ueʻi kitautolu ʻe he ngaahi kupuʻi lea ko ʻení ke tau fakahokó? Ko e hā ha ngaahi faingamālie ʻoku tau maʻu ke tau vahevahe ai ʻa e ngaahi ako ko ʻení mo e niʻihi kehé?
Teuteu ha lēsoni. Kole ki he toʻu tupú ke nau ngāue tautautoko ua ke palaniʻi ha lēsoni efiafi fakafāmili ʻi ʻapi ʻo makatuʻunga ʻi ha konga ʻo e pōpoakí. Ko e hā te tau lava ʻo fai ke tokoni ai ki he kau mēmipa ʻo hotau fāmilí ke mahino kiate kinautolu ʻa e ngaahi akonaki ko ʻení mo e founga ʻoku nau fekauʻaki ai mo ʻetau ngaahi moʻuí? Fakaafeʻi ha niʻihi ʻo e ngaahi hoá ke vahevahe ʻenau ngaahi palaní.
Lau pea vahevahe. Lau fakataha ha ngaahi kupuʻi lea mei he pōpoakí. Kole ki he toʻu tupú ke vahevahe ha ngaahi sīpinga mei he folofolá pea mo ʻenau moʻuí ʻa ia ʻoku fakahaaʻi ai ʻa e ʻuhinga ʻo e ngaahi kupuʻi lea ko ʻení kiate kinautolú.

3. Palani ke ngāue

Tataki ‘e ha memipa ʻo e kau palesitenisī fakakōlomú pe fakakalasí; fakafuofua ki ha miniti ‘e 5–10

Te ke poupouʻi fēfē ‘a e toʻu tupú ke nau fakaʻaongaʻi ʻa e (ngaahi) pōpoakí ʻi heʻenau moʻuí? Fakakaukau ki he ngaahi meʻa ko ʻení:

Kole ki he toʻu tupú ke aleaʻi ha ngaahi ongo ne nau maʻu lolotonga e fakatahá. Ko e hā ha meʻa naʻe mahuʻingamālie kiate kinautolu? ʻOku ʻi ai nai ha meʻa te nau lava ʻo fai fakataautaha pe fakakōlomu ke fakaʻaongaʻi ai ʻa e meʻa kuo nau akó?
ʻOange ki he toʻu tupú ha ngaahi miniti siʻi ke hiki e meʻa te nau fai ʻi he ngaahi uike ka hokó ke nau ngāue ai fakatatau mo ʻenau ngaahi ongó. Fakaafeʻi kinautolu ke vahevahe ʻenau ngaahi fakakaukaú.
Fakamanatu ki he toʻu tupú te nau maʻu ʻa e faingamālie ke vahevahe ʻenau ngaahi aʻusiá ʻi he kamataʻanga ʻo e fakataha hokó.