Tiute i le Atua

E mafai faapefea ona ou iloa lo’u Tama Faalelagi?

E alofa le Tama Faalelagi ia i tatou ma e finagalo ia tatou faalatalata atu ia te Ia. Ua Ia tuuina mai ia i tatou le avanoa e tatalo atu ai ia te Ia ma ua folafola mai e faafofoga ma tali mai ia tatou tatalo. E mafai foi ona tatou iloaina o Ia pe a tatou suesue i tusitusiga paia ma upu a perofeta o aso e gata ai ma pe a tatou taumafai e avea atili e faapei o Ia e ala i le mulimuli i Lona finagalo.

Saunia oe lava ia faaleagaga

Mafaufau i la oulua sootaga ma lou Tama i le Lagi. O le a se taimi na sili ona e lagona ai lou latalata ia te Ia? O le a se mea na e faia sa mafai ai ona e lagonaina lou latalata atili ia te Ia?

O a nisi o mea e mafai ona faia e alii talavou e latalata atili ai i le Atua? O le a le lelei o loo latou faia ai nei mea? O le a se mea e mafai ona e faia e fesoasoani ai ia i latou ia faateleina lo latou faatuatua ma le molimau i le Atua?

A o e suesue i tusitusiga paia ma isi punaoa e uiga i le iloaina o le Tama Faalelagi, tagai mo mea ia o le a fesoasoani i alii talavou ia lagonaina e alofa lo latou Tama Faalelagi ia i latou ma finagalo ia latou faalatalata atu ia te Ia.

Ioane 17:3 (O le iloaina o le Tama Faalelagi ma Iesu Keriso e taitai atu ai i le ola e faavavau)

1 Ioane 2:3–5 (Tatou te iloaina le Atua pe afai tatou te tausia Ana poloaiga)

1 Ioane 4:7–8 (O le alofa atu i isi e fesoasoani tatou te iloa ai le Atua)

2 Nifae 32:9; Enosa 1:1–7; Alema 34:17–28; 37:37 (O le tatalo e mafai ona fesoasoani tatou te latalata atili ai i le Tama Faalelagi)

Mosaea 4:9–12 (Ua faamatalaina e le Tupu o Peniamina le auala e faatupulaia ai lo tatou iloa o le Atua)

Mosaea 5:13 (O le auauna atu i le Atua e fesoasoani tatou te iloa atili ai o Ia)

Alema 30:44 (Ua faailoa i mea uma o loo i ai se Atua)

MF&F 88:63 (A tatou faalatalata atu i le Atua, o le a Ia faalatalata mai foi ia i tatou)

M. Russell Ballard, “Tama ma Atalii: O Se Mafutaga Tulaga Ese,” Ensign po o le Liahona, Nov. 2009, 47–50

Faataunuuina o Lo’u Tiute i le Atua (2010), 14–15, 38–39, 62–63

Vitio: “Faataunuuina o Lo’u Tiute i le Atua”

4:56

Aoao atu i le ala a le Faaola

Sa alofa le Faaola i Ona soo ma tatalo mo i latou ma faaauau ona auauna atu ia i latou. Sa Ia maua ni avanoa e faatasi ai ma i latou ma faailoa atu i ai Lona alofa. Sa Ia silafia mea na latou fiafia i ai, o faamoemoega, ma manaoga ma mea sa tutupu i o latou olaga. Saili ni auala e faailoa atu ai lou alofa i alii talavou ma fesoasoani ia i latou ia lagona ma iloaina le alofa tele o le Tama o i le Lagi ia i latou.

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai manatu nei pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Fai i alii talavou taitasi ia tofu sao mai i se upu se tasi e fatu ai se fuaiupu e aotele ai le lesona o le vaiaso ua tea. Tusi la latou fuaiupu i luga o le laupapa.
Faatasi ai ma le faatagaga mai le epikopo, ia valaaulia se tamā o se tasi o uso o le korama e faasoa mai ona lagona e uiga i le avea ai ma se tamā. E mafai ona ia talanoa e uiga i ona lagona e faatatau i lona atalii, o mea o loo ia faamoemoe e ausia e lona atalii i lona olaga, ma le auala na te faamoemoe e fesoasoani ai ia te ia ina ia faamanuiaina. Fai i alii talavou e faatusatusa mea sa fai atu ai lenei tamā ma lagona o lo latou Tama o i le Lagi e uiga ia i latou.

Aoao faatasi

O le faamoemoega o lenei lesona o le fesoasoani lea i alii talavou taitoatasi ia faavaeina se mamanu o le tatalo patino ma le suesuega o tusitusiga paia. Tuu atu se taimi i alii talavou i taimi o fonotaga faalekorama e tusitusi ai ni fuafuaga i totonu o a latou tusi o le Tiute i le Atua. Uunaia i latou e fefaasoaai a latou fuafuaga i le tasi ma le isi, ma i fonotaga faalekorama i le lumanai, valaaulia i latou e faasoa mai po o a ni auala o loo faamalolosia ai e le tatalo patino ma suesuega o tusitusiga paia a latou sootaga ma le Atua.

I le avea ai ma se vaega o a latou fuafuaga o le Tiute i le Atua, atonu sa fatu ai e alii talavou ni fuafuaga mo suesuega patino o tusitusiga paia. E mafai ona avea lenei lesona ma se taimi lelei e faasoa mai ai e alii talavou mea sa latou faia mo a latou fuafuaga ma mea o loo latou aoaoina mai a latou suesuega o tusitusiga paia (tagai i le Tiute i le Atua,13–14, 37–39, 61–62). E mafai foi ona toe fetuunai a latou fuafuaga pe a manaomia. Fai i alii talavou e faasoa mai pe na faapefea ona fesoasoani o latou mausa o le tatalo ma suesuega o tusitusiga paia e faaleleia ai lo latou sootaga ma lo latou Tama Faalelagi.
Valaaulia ia alii talavou e mafaufau e uiga i se tagata latou te iloaina lelei. O a mea na latou faia ina ia latou iloa lelei ai lena tagata? Fesili i ai pe o le a so latou manatu i le eseesega i le va o le iloaina o le Tama Faalelagi ma le iloaina e uiga ia te Ia. Tusi ia mau faasino nei i luga o le laupapa, ma fai atu i alii talavou e sue ma faailoa mai pe mafai faapefea ona tatou iloaina lelei le Tama Faalelagi: 1 Ioane 2:3–5; 4:7–8; Mosaea 4:9–12; 5:13; Alema 30:44. Valaaulia ia alii talavou e faasoa mai mea na latou aoaoina ma pe na faapefea ona latou lagonaina le latalata atili i le Tama Faalelagi e ala i le mulimuli i fautuaga o loo i nei mau.
Faaali le vitio o le “Faataunuuina o Lo’u Tiute i le Atua,” ma tuu atu i alii talavou e vaavaai mo auala o loo faaali mai ai i le vitio ia aafiaga sa fesoasoani i alii talavou ma isi ia iloaina atili le Tama Faalelagi. Fai i alii talavou e faasoa mai o latou manatu e uiga i le auala e fesoasoani ai le faataunuuina o lo latou tiute i le Atua i le faamalolosia o a latou sootaga ma Ia.

4:56
Valaaulia ia alii talavou e faitau ia fautuaga e tolu a Elder M. Russell Ballard mo ona atalii i lana lauga “Tamā ma Atalii: O Se Mafutaga Tulaga Ese” (pe faaali le vitio “Tamā ma Atalii”). Pe na fesoasoani le faia o nei mea latou te lagona ai le latalata atili i o latou tamā? Fai atu ia i latou e fefaasoaai ni auala latou te faaaoga ai le fautuaga a Elder Ballard i lo latou sootaga ma lo latou Tama Faalelagi.

6:3
Talanoa ni auala o loo fesootai ai ia alii talavou i isi i aso nei. E faapefea ona tatou fesootai atu i le Tama Faalelagi? E faapefea ona Ia fesootai mai ia i tatou? O le a se mea e mafai ona tatou faia e faaleleia ai la tatou fesootaiga ma Ia? Valaaulia alii talavou taitasi e faitau se tasi o mau nei e uiga i le tatalo: 2 Nifae 32:9; Enosa 1:1–7; Alema 34:17–28; 37:37. Fai atu i uso o le korama e faasoa mai mea ua latou aoaoina. O le a le fesootaiga i le va o le tatalo ma le iloaina o le Tama Faalelagi? Valaaulia alii talavou e tatala a latou tusi o le Tiute i le Atua i le itulau 14 (tiakono), 38 (aoao), po o le 62 (ositaulaga) ma faia ni fuafuaga e faaleleia ai a latou tatalo i aso taitasi.

Fai atu i alii talavou e faasoa mai mea na latou aoaoina i le asō. O a ni lagona po o ni uunaiga ua latou maua? Pe o latou malamalama i le auala e mafai ona latou iloaina ai le Tama Faalelagi? Pe o i ai nisi a latou fesili? Pe aoga le faaalu o se isi taimi sili atu i lenei autu?

Motugaafa faafaiaoga

O le uunaiaina o alii talavou e faavae se mausa o le tatalo soo ma suesuega o tusitusiga paia e mafai ona avea ma ala aupito sili ona aoga e fesoasoani ai ia i latou e faamalolosia ai a latou sootaga ma le Tama Faalelagi.

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona ia:

Faasoa atu ana fuafuaga e faaleleia ai ana tatalo patino.
Uunaia ia alii talavou e faataunuu ia fuafuaga na latou faia i le asō ma ia saunia e faasoa atu i se fonotaga faalekorama i le lumanai pe na faapefea ona faaleleia ai la latou sootaga ma le Tama Faalelagi.