Tiute i le Atua

E mafai faapefea ona ou faamalosia lo’u aiga?

“E maua le fiafia i le olaga faaleaiga pe a faavae i aoaoga a le Alii o Iesu Keriso. O aiga … manuia e faavae ma tumau i mataupu faavae o le faatuatua, tatalo, salamo, faamagaloga, faaaloalo, alofa, agalelei, galuega, ma gaoioiga faafiafia tuufaatasi” (“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129). A o tatou fesoasoani atu i o tatou matua i le ausiaina o nei sini, e mafai ona tatou fesoasoani i o tatou aiga ia maua le fiafia lea e finagalo i ai le Tama Faalelagi mo i tatou.

Saunia oe lava ia faaleagaga

O a ni aafiaga sa e maua ma lou aiga lea na aumaia ia te oe le fiafia? O a ni faamanuiaga na e vaaia i lou aiga a o e mulimuli i aoaoga a le Faaola?

O le a se mea o e iloa e uiga i le olaga faaleaiga o se alii talavou o e aoaoina? E faapefea ona e fesoasoani i alii talavou ia malamalama e sili ona fiafia aiga pe a latou taumafai e mulimuli i aoaoga a le Faaola?

Ia suesue ma le agaga tatalo ia mau ma punaoa nei. O le a se mea e te lagonaina o le a fesoasoani i alii talavou e faamalosia o latou aiga?

1 Nifae 8:12 (Sa manao Liae i lona aiga ia aai i le fua o le laau o le ola)

1 Nifae 16:14–32 (Ua faamalosi Nifae i lona aiga)

2 Nifae 25:26 (Tatou te aoao a tatou fanau e uiga ia Keriso)

Faataunuuina o Lo’u Tiute i le Atua (2010), 27, 51, 75, 82

“O Le Aiga: O Se Folafolaga i le Lalolagi,” Ensign po o le Liahona, Nov. 2010, 129

Dieter F. Uchtdorf, “I Le Viia ai o i Latou o E Laveai,” Ensign po o le Liahona, Me 2016, 77–80

Bonnie L. Oscarson, “O Tagata e Puipuia le Folafolaga o le Aiga,” Ensign po o le Liahona, Me 2015, 14–17

M. Russell Ballard, “Tamā ma Atalii: O Se Mafutaga Tulaga Ese,” Ensign po o le Liahona, Nov. 2009, 47–50; tagai foi i le vitio “Tamā ma Atalii”

6:3

Vitio: “E Lua Uso e Va 'Ai,” “E Ala i Mea Iti”

NaN:NaN

Tuu atu i alii talavou e taitai

O se tasi o le au peresitene o le korama (po o se fesoasoani i le epikopo i le korama a le ositaulaga) e taitaia le fonotaga a le korama. Na te taitaia alii talavou i le fefautuaai faatasi e uiga i pisinisi faalekorama, aoao i latou i o latou tiute faaleperisitua (mai tusitusiga paia ma le tusi Tiute i le Atua ), uunai i latou e faasoa atu o latou aafiaga i le faataunuuina o o latou tiute i le Atua, ma valaaulia se faufautua po o se isi tagata o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

A o le’i amata le vasega, valaaulia se tasi o le au peresitene o le korama e filifili se viiga e faatatau i le lesona o le vaiaso ua te’a. Tuu atu ia te ia e faitau fuaitau mai le viiga ma faasoa atu i tagata o le korama auala e faatatau ai lenei viiga i le lesona o le vaiaso ua te’a.
Fai atu i se tagata o le korama e faaali atu se ata o se aiga mai tusitusiga paia ma faasoa atu pe na faapefea ona aumaia le fiafia po o le faanoanoa i le aiga ona o amioga a tagata eseese o le aiga (o aiga e talanoaina e mafai ona aofia ai Liae, Iakopo, Atamu, po o isi).

Aoao faatasi

O le faamoemoega o lenei lesona o le uunaia lea o alii talavou taitoatasi e faataunuu lona tiute faaleperisitua e faamalosia ai lona aiga. I le avea ai ma se vaega o lenei lesona, e tatau i uso o le korama ona fai se fuafuaga i a latou tusi Tiute i le Atua e auauna atu ai i tagata o le aiga pe amata ona galulue ia latou galuega faatino o “Aiga ma Uo”. A o lei amataina le fonotaga faalekorama, valaaulia alii talavou e aumai a latou tusi o le Tiute i le Atua i le lotu. I fonotaga faalekorama i le lumanai, valaaulia i latou e faasoa mai aafiaga latou te maua a o latou faataunuuina a latou fuafuaga.

I lana lauga “Ia Viia ai o i Latou o E Laveai,” Sa aoao mai ai Peresitene Dieter F. Uchtdorf e uiga i aiga: “Atonu e tutusa o tatou kenera, ae e le tutusa i tatou. E tulagaese o tatou agaga. … E mafai ona tatou filifili e patipatia nei eseesega.” O a ni uiga po o malosiaga tulagaese o i ai i alii talavou taitasi? E mafai faapefea ona faaaoga e alii talavou taitoatasi ona malosiaga tulagaese e faamanuia ai lona aiga? E mafai foi ona suesue uso o le korama i vaega o le lauga i ni vaega toalaiti, vaavaai mo ma faasoa mai ni mea na taua tele ia i latou. E mafai foi ona e valaaulia uso o le korama e matamata i se tasi o ata vitio mai i lenei otootoga ma vaavaai po o a ni mea sa faia e tagata o le aiga e faaleleia ai a latou mafutaga. E mafai faapefea ona patipatia e alii talavou eseesega i totonu o latou aiga? O a ni manatu e mafai ona latou faasoa mai e uiga i le auala e mafai ai ona latou faamalosia a latou mafutaga faaleaiga?
I lana lauga “O Tagata e Puipuia le Folafolaga,” na aoao mai ai Sister Oscarson faapea “e mafai e i tatou uma—o tamaitai, alii, autalavou, ma le fanau, nofofua pe faaipoipo—ona galulue ia avea ma fatuaigatausi. E tatau ona ‘faia o tatou aiga’ ma nofoaga o le faatulaga tatau, malutaga, paia, ma ia saogalemu” (Ensign po o le Liahona, Me 2015, 17). O a nisi auala na fautua mai ai Sister Oscarson e mafai ai e tagata o le Ekalesia ona puipuia ma faamalosia o latou aiga? O le a se mea e mafai e alii talavou ona faia i le taimi nei e fesoasoani ai e faia o latou aiga ma faatulaga tatau, paia, ma ia saogalemu?
Mafaufau e valaaulia nisi o uso o le korama e aoao atu se vaega o lenei lesona. Mo se faataitaiga, e mafai ona latou faasoa mai mea o faia e o latou aiga e aumai ai le fiafia, pe e mafai foi ona latou faaaogaina se tasi o gaoioiga nei. Atonu ua uma ona faamaea e nisi o ositaulaga le gaoioiga “Aiga” i leTiute i le Atua (itulau 80–82) ma e mafai ona faasoa mai ni a latou aafiaga.
Valaaulia ia alii talavou e tusi i lalo ni faafitauli na taofia mai nisi o aiga mai le fiafia. Tuu atu ia tofu alii talavou taitasi ma se kopi o le “O Le Aiga: O Se Folafolaga i le Lalolagi” (tagaiTiute i le Atua, 107). Tuu atu i uso o le korama ni nai minute e faitau ai parakalafa e fitu ma vase ia mataupu faavae lea na taitai atu ai i le fiafia i le olaga faaleaiga. Fai atu i alii talavou taitasi e faitau le 1 Nifae 16:14–32 ma faasoa mai ni auala na faaaoga ai e le aiga o Liae nei mataupu faavae. Fai atu ia i latou e faasoa mai ni aafiaga sa latou mauaina lea na aoao ai i latou i le taua o nei mataupu faavae i le olaga faaleaiga.
Valaaulia ia alii talavou e faitau le “Aiga” i le Mo le Malosi o le Autalavou ma faailoa ma faasoa mai mea e mafai ona latou faia e faamalosia ai o latou aiga. Fai atu i alii talavou taitasi e susue lana tusi o le Tiute i le Atua i le vaega “auauna atu i isi” (tiakono, 26; aoao, 50; ositaulaga, 74) ma tusi po o a mea e mafai ona ia faia e faamalosia ai lona aiga e ala i le auauna atu ia i latou (tagai “O lau lava fuafuaga e tuuina atu se auaunaga”). Fai atu i ni nai alii talavou e faasoa mai i le korama a latou fuafuaga.

Fai atu i alii talavou e faasoa mai mea na latou aoaoina i le aso. Pe ua latou malamalama i le auala e mafai ai e i latou, o e umia le perisitua, ona faamalosia o latou aiga? O a ni o latou lagona po o uunaiga o i ai? Pe o i ai ni a latou fesili faaopoopo? Mata e aoga le faaaluina o se isi taimi i lenei autu?

Fuafuaga o le Tiute i le Atua

Tuu atu se taimi i le faaiuga o le fonotaga a le korama mo alii talavou e fai ai ni fuafuaga i totonu o o latou tusi Tiute i le Atua pe o totonu o le lomiga i le initoneti o le Tiute i le Atua. O nei fuafuaga e patino, ae e mafai e tagata o le korama ona fesoasoani i le tasi ma le isi e fatufatu ni manatu mo a latou fuafuaga.

Valaaulia e faatino

O le alii talavou o loo taitai e faaiuina le fonotaga. E mafai ona ia:

Fai atu i alii talavou e tusi i a latou tusi Tiute i le Atua mea e mafai ona latou faia e faamalolosia ai o latou mafutaga ma tagata o o latou aiga (pe afai latou te le’i faia; tagai itulau 82).
Fai atu i tagata o le korama e faasoa atu ni auala sa latou fesoasoani ai i o latou aiga ia fiafia atili.
Tuu atu lana molimau e uiga i le tiutetauave taua ua i ai i alii talavou taitoatasi e fesoasoani ai i lona aiga ia fiafia atili.

Gaoioiga a le Autalavou e Fesootai i ai

Fuafua se gaoioiga a le Mutuale lea o le a fesoasoani i alii talavou e faaaoga ai mea sa latou aoaoina i lenei lesona.