Tiute i le Atua

O le a lo’u tiute i le faataunuuina o le fuafuaga a le Tama Faalelagi?

Na fetalai le Tama Faalelagi o Lana galuega ma [Lona] mamalu o le “ia aumaia le tino ola pea ma le ola e faavavau o le tagata” (Mose 1:39). I le avea ai ma e umia le perisitua, e i ai so tatou tiute i le fuafuaga a le Tama Faalelagi a o tatou tausia i tatou lava ia agavaa ma faatino o tatou tiute faaleperisitua. O nei tiute e aofia ai le faatinoina o sauniga o le perisitua, auauna atu i isi, ma le valaauliaina o tagata uma e o mai ia Keriso.

Saunia oe lava ia faaleagaga

Mafaufau i aafiaga sa e maua i le faataunuuina o ou tiute faaleperisitua. O a ni taunuuga o au taumafaiga? Pe ua e fesoasoani i le Tama Faalelagi e ausia Lana fuafuaga?

O anafea sa e vaaia ai alii talavou o faamanuiaina isi e ala i la latou auaunaga faaleperisitua?

A o e suesue i nei punaoa, faalogo i le Agaga Paia. Mafaufau loloto i mea e mafai ona fai e alii talavou e iloa ai auala latou te fesoasoani ai i le Atua a o latou faataunuuina o latou tiute i le Atua.

Mose 1:39 (O le galuega ma le mamalu o le Atua o le faaeaina o ana fanau)

MF&F 20:46–60, 75–79; 84:111; 107:68 (Tiute o le Perisitua Arona)

MF&F 38:42 (E ao i e umia le perisitua ona mama ma agavaa)

Vitio: “Valaau Atu i Tagata Uma e O Mai ia Keriso”

4:24

Vitio: “Faataunuuina o Lou Tiute i le Atua”

4:56

Faataunuuina o Lou Tiute i le Atua,23 (tiute o tiakono), 46–47 (tiute o aoao), 70–71 (tiute o ositaulaga)

“Savali i le Autalavou mai le Au Peresitene Sili,” Mo le Malosi o le Autalavou, ii–iii

Aoao atu i le ala a le Faaola

Sa tatalo le Faaola mo Ona soo ma sa faaauau pea ona ia auauna atu ia i latou. Sa Ia maua avanoa e faatasi ai ma i latou ma faaali atu Lona alofa. O le a e maua le tele o avanoa e tuuina atu ai auaunaga faaleperisitua a o i ai faatasi i ou autafa ma sē o umia le Perisitua Arona. I nei taimi, ia faasoa atu pe mafai faapefea e mea o loo e faia ona fesoasoani i le faataunuuina o le ata o le faaolataga a le Tama Faalelagi.

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

Valauulia ia alii talavou e fai tau le “Savali i le Autalavou mai le Au Peresitene Sili” ma vaavaai mo le fautuaga mai le Au Peresitene Sili lea e mafai ona fesoasoani ia i latou e faataunuu ai a latou matafaioi i le fuafuaga a le Tama Faalelagi. E faapefea ona lagolago e tiute o le perisitua ia matafaioi nei?
Faaali atu se ata o Ioane le Papatiso (tagai i le Tusi Ata o le Talalelei, 35), ma fesili atu po o le a le mea sa ia faia e saunia ai le ala mo le Faaola (tagai i le Mataio 3). Fai atu i tagata o le korama pe o faapefea ona latou saunia le ala mo le toe afio mai o le Faaola pe a latou faatinoina o latou tiute faaleperisitua.

Aoao faatasi

O gaoioiga taitasi o loo i lalo o le a fesoasoani i tagata o lau korama e malamalama ai pe mafai faapefea ona fesoasoani le faatinoina o o latou tiute faaleperisitua i le Tama Faalelagi ina ia ausia ai Lana fuafuaga. I le mulimuli ai i le musumusuga a le Agaga, filifili se gaoioiga se tasi pe sili atu o le a sili atu ona aoga mo lau korama:

Ia valaaulia ia alii talavou taitoatasi e suesue i le vaega “Tiute o le Perisitua” o le tusi Tiute i le Atua (itulau 23, 46–47, po o le 70–71) ma vase lalo o upu ma fuaitau galue [pe faatino]. Fai atu i alii talavou e faamalamalama pe faapefea ona fesoasoani ia tiute taitasi e faataunuu le fuafuaga a le Tama Faalelagi. O faapefea ona faamanuiaina alii talavou i auaunaga faaleperisitua a isi? O a ni faataitaiga ua latou vaaia o le faamanuiaina o isi i auaunaga faaleperisitua?
I le avea ai o se korama, toe talanoa e uiga i le Mataupu Faavae ma Feagaiga 20:46–60. Ia valaaulia alii talavou e faasoa atu ni aafiaga sa latou maua i le faataunuuina o o latou tiute o le valaaulia o isi e o mai ia Keriso—e aofia ai tagata o aiga ma uo. O faapefea ona latou fesoasoani e faataunuu le fuafuaga a le Atua? Valaaulia i latou e faataitai le faatinoina o ni tulaga e ono oo i ai lea e mafai ai ona latou maua ni avanoa e faasoa atu ai le talalelei. Mo se faataitaiga: “Ua fesili atu lau uo ia te oe pe aisea e te le taalo lakapi ai i le Aso Sa pe inu kofe po o le lauti.” E faapefea ona latou tali atu i fesili a a latou uo pe afai o la latou sini o le faasoa atu o le talalelei? Ia valaaulia i latou e sue i le itulau e 29, 51, po o le 73 o a latou tusi Tiute i le Atua ma fai ni fuafuaga e faavae i mea ua latou aoaoina.
Ia faaali atu se tasi po o vitio uma o loo fautuaina atu i le otootoga lenei. Fai atu i alii talavou e faailoa atu po o a tiute o le perisitua o loo faaalia i vitio ma pe faapefea ona fesoasoani nei tiute faaleperisitua i le faataunuuina o le fuafuaga a le Atua (mo se otootoga o tiute faaleperisitua, tagai Tiute i le Atua itulau 23, 46–47, po o le 70–71). O a ni aafiaga ua latou maua i le faataunuuina o nei tiute? Aisea e taua ai le malamalama o le faataunuuina o o tatou tiute e fesoasoani i le faataunuuina o le fuafuaga a le Atua? E mafai faapefea e lenei malamalamaaga ona aafia ai le auala latou te faataunuuina ai o latou tiute?

Fai atu i alii talavou e faasoa atu se mea ua latou aoaoina i le aso. Pe ua latou malamalama i lo latou tiute i le faataunuuina o le fuafuaga a le Tama Faalelagi? O a ni o latou lagona po o ni manatu o i ai? E i ai ni a latou fesili faaopoopo? Mata e aoga le faaalu o se isi taimi i lenei aoaoga faavae?

Fuafuaga o le Tiute i le Atua

Tuu atu se taimi i le faaiuga o le fonotaga a le korama mo alii talavou e fai ai ni fuafuaga i totonu o a latou tusi Tiute i le Atua.

Valaaulia e faatino

E faaiuina e le uso o le au peresitene o le korama lea o loo taitai le fonotaga. E mafai ona:

Ia faasoa atu ni faataitaiga sa ia vaaia e uiga i isi tagata o le korama o fesoasoani e faataunuu le fuafuaga a le Atua e ala i a latou auaunaga faaleperisitua.
Ia fefautuaai ma tagata o le korama e uiga i mea e mafai ona latou faia o se korama ina ia lelei atili ai le faataunuuina o o latou tiute faaleperisitua.