Tiute i le Atua

E faapefea e le agavaa ona aafia ai le mana o le perisitua?

O le pule o le perisitua e maua mai le faauuina, ae o le mana o le perisitua e manaomia ai le amiotonu patino, faatuatua, usiusitai, ma le filiga. E tusa lava pe tatou te maua le pule o le perisitua e ala mai le faaeeina o lima, o le a tatou le maua le mana o le perisitua pe afai tatou te le usiusitai, le agavaa, pe le naunau foi e auauna atu.

Saunia oe lava ia faaleagaga

O le a le eseesega i le va o le pule o le perisitua ma le mana o le perisitua?Aisea e muai manaomia ai le agavaa mo le mauaina o le mana o le perisitua?

E mafai faapefea ona e fesoasoani i e o umia le Perisitua Arona ia malamalama i le va o le agavaa ma le mana o le perisitua? O a nisi o faaosoosoga o loo feagai ma alii talavou e ono le mafai ai ona latou maua le mana o le perisitua?

A o e sauniuni, suesue ma le agaga tatalo mau ma punaoa nei. O le a se mea ua uunaia ai oe e faasoa atu i alii talavou?

MF&F 38:42 (Ua poloaiina e umia le perisitua ina ia mama)

MF&F 121:34–46 (O le mana o le perisitua e faalagolago i le amiotonu o le tagata)

Russell M. Nelson, “O Le Tau o le Mana o le Perisitua,” Ensign po o le Liahona, Me 2016, 66–69

Neil L. Andersen, “Mana o le Perisitua,” Ensignpo o le Liahona, Nov. 2013

David A. Bednar, “O Mana o le Lagi,” Ensign po o le Liahona, Me 2012, 48–51

Ola Agavaa,” Faataunuuina o Lou Tiute i le Atua (2010), 16–17 (tiakono), 40–41 (aoao), 64–65 (ositaulaga)

Vitio : “Faapaiaina Outou”; “Mana o le Perisitua ma le Pule o le Perisitua”

4:38

1:52

Tuu atu i alii talavou e taitai

E taitai e se uso o le au peresitene o le korama le fonotaga faalekorama. Na te taitaia alii talavou i le fefautuaai faatasi e uiga i mataupu faalekorama, aoao atu i latou i o latou tiute faaleperisitua (mai tusitusiga paia ma le tusi o le Tiute i le Atua), ma valaaulia se faufautua po o se isi uso o le korama e aoao atu se lesona o le talalelei. E mafai ona ia saunia e ala i le faatumuina o se lisi o mataupu talanoaina o le fonotaga a le korama i le taimi o se fonotaga a le au peresitene.

Amata le aafiaga faaleaoaoga

Filifili mai nei manatu pe mafaufau i ni ou lava manatu e iloilo ai le lesona o le vaiaso ua tea ma faalauiloa atu le lesona o lenei vaiaso:

I le gasologa o le vaiaso, valaaulia ni nai alii talavou e o mai i le fonotaga faalekorama ua saunia e faasoa mai ni aafiaga na latou maua e fesootai ma le lesona o le vaiaso ua tea.
Tuu atu i se alii talavou e tape moli i le potuaoga. O le a le aoga o se matauila e aunoa ma le malosiaga faaeletise? E faapefea ona fesootai lenei mea i se tasi o umia le perisitua? Faitau faatasi le Mataupu Faavae ma Feagaiga 121:36–37, ma fai atu i alii talavou e talanoaina pe faapefea e le amiotonu ona aafia ai le mana o le perisitua.

Aoao faatasi

O le faamoemoega o lenei lesona ina ia fesoasoani i alii talavou taitasi ia malamalama pe faapefea ona aafia e lona agavaa lo latou mana faaleperisitua. O se vaega o lenei lesona, e tatau i tagata o le korama ona faia ni fuafuaga i totonu o a latou tusi o le Tiute i le Atua e suesueina ai ma ola i tulaga faatonuina o loo i le Mo le Malosi o le Autalavou. Ao lei faia le fonotaga a le korama, valaaulia alii talavou e o mai ma aumai a latou tusi Tiute i le Atua i le lotu. I fonotaga a le korama i le lumanai, valaaulia i latou e faasoa mai a latou aafiaga ao faataunuuina a latou fuafuaga.

Ina ia fesoasoani i alii talavou e aoao e uiga i le tau o le mana o le perisitua, atonu e te manao e aumai ni mea faitino eseese ma fesili atu i alii talavou e mate mai pe fia le tau o mea faitino taitasi. Aisea e sili atu ai le tau o isi mea faitino nai lo isi? O a mea e sili ona taua i o tatou olaga, ma o le a se tau e tatau ona tatou “totogiina” mo i latou? Atonu e mafai ona e valaauliaina ia alii talavou e suesue i le lauga a Peresitene Russell M. Nelson “O Le Tau o le Mana o le Perisitua,” vaavaai mo le tau e tatau ona tatou totogiina e faaaoga ai le perisitua. O a ni ona atuatuvalega mo e umia le perisitua? O le a se mea o ia talosagaina mai ai i tatou ina ia faia?
Valaaulia alii talavou e faitau le Mataupu Faavae ma Feagaiga 38:42; 121:34–46 ma tali fesili nei: E faapefea e le agasala ona aafia le mana o le perisitua? O a mataupu faavae o faatautaia le faaaogaina o le perisitua? Valaaulia alii talavou e saunoa e uiga i e umia le perisitua latou te iloa o loo faailoa mai ai mataupu faavae o taialaina mana o le perisitua. Tagai Tiute i le Atua, 40.)Fai atu ia i latou e sue i le vaega o le “Galue” ia latou tusi Tiute i le Atua (itulau 17, 41, po o le 65) ma fai ni fuafuaga ia ola ia sili atu le agavaa mo le perisitua e ala i le suesue ma le mulimuli i tulaga faatonuina i le Mo Le Malosi o le Autalavou.
Valaaulia se tagata o le korama e faamatala le tala i le teteeina e Iosefa o le ava a Potifara (tagai Kenese 39, 41) ma leisi ia faamatalaina le tala i le tuuina atu o Tavita i faaosoosoga (tagai 2 Samuelu 11–12). O se korama, talanoa po o a mea o aoao mai e nei tala e uiga i le fesootaiga i le va o le mana o le perisitua ma le agavaa o le tagata patino. Na faapefea ona faamanuiaina Iosefa i lona faamaoni? O le a se mea na ono faia e Tavita e aloese ai mai lona faanoanoaga? (Tagai Tiute i le Atua, 64.) Valaaulia alii talavou e sue i le vaega “Galue” ia latou tusi o leTiute i le Atua (itulau 17, 41, po o le 65) ma faia fuafuaga ia sili atu le ola agavaa mo le perisitua.
Tusi i le laupapa, “E faapefea e le agavaa ona aafia ai le mana o le perisitua?” ma valaaulia tagata o le korama e faasoa mai a latou tali i le fesili lea. Valaaulia i latou e mafaufau i lenei fesili ao latou faitauina ia parakalafa e fitu mai le lauga a Elder Neil L. Andersen “Mana o le Perisitua” e amata mai le fuaitau “Ua tatou iloa o le mana o le perisitua paia.” O a ni lagona faaopoopo ua i alii talavou e uiga i aafiaga o le agavaa patino o le tagata i le mana o le perisitua? O a nisi mea e mafai ona faatapulaaina lo tatou mana o le perisitua? O a ni mea e mafai ona tatou faia e mauaina ai le mana sili atu o le perisitua?
Valaaulia alii talavou e saili le lauga ā Elder David A. Bednar “O Mana o le Lagi” pe matamata le vitio “O le Mana o le Perisitua ma le Pule o le Perisitua,” vaai mo faamatalaga o loo aoao ai i latou e uiga i le agavaa ma le mana o le perisitua. Ona valaaulia lea o i latou e faasoa mai i le korama mea latou te maua.

1:52

Fai atu i alii talavou e faasoa mai mea na latou aoaoina i le aso. Pe ua latou malamalama i le taua o le faamaoni? O a ni o latou lagona po o ni uunaiga? Pe o i ai ni a latou fesili faaopoopo? Mata e aoga le faaaluina o se isi taimi i lenei aoaoga faavae?

Motugaafa faafaiaoga

“A e aoao mai tusitusiga paia, e tele lava ina fesoasoani i le au aoao le vaavaai mo se mea patino” ( O Le Aoao Atu, E Leai Se Isi Valaauga e Sili Ai [1999], 57).

Valaaulia e faatino

O le alii talavou o loo taitai e faaiuina le fonotaga. E mafai ona ia faasoa maia i le korama fuafuaga ua ia faia e suesue ma faaaoga tulaga faatonuina i Mo Le Malosi o le Autalavou. E mafai foi ona ia faamatalaina faapea mo vaiaso o sosoo ai, o le a fesiligia uso o le korama e faasoa mai pe na faapefea e le faataunuuina o a latou fuafuaga ona fesoasoani ia i latou e ola agavaa e faaaoga lo latou perisitua.