Vuli mai na koniferedi raraba

Mo Vakarautaki Iko Vakayalo

Eda kalougataga, na lewe ni Lotu i Jisu Karisito ni Yalododonu Edaidai, ni tiko e dua na parofita bula e vuravura nikua. E vuni kaukauwa levu vei ira na lewe ni Lotu na Nona ivakavuvuli, kei na nodra na so tale na iliuliu raraba ni Lotu—e oka kina o ira na itabagone o vakatavulica. E sa tukuna na Turaga: “O koya sa kilikili ki na lotu me muria na vosa kei na ivakaro kecega sa vakatakilai vua [na parofita] me tukuna vei kemudou … ; ni dou na rogoca na nona vosa, me vaka ga ni dou rogoca mai gusuqu, ena yalovosota kei na vakabauta. Na kena vakayacori na veika oqo, ena sega kina ni rawai kemudou na matamata mai eli; ia, na Turaga na Kalou ena vakatalabusesetaka na kaukauwa ni butobuto e matamudou, ka na vakavuna me yavavala ko lomalagi ena vukumudou.” (Vunau kei na Veiyalayalati 21:4–6).

iVurevure me Vukea Mo Vakarau

Digitaka vata kei na mataveiliutaki ni kuoramu se kalasi e dua se sivia na itukutuku mai na koniferedi raraba se qai oti ka ko vakila ena vakaibalebale duadua ki na itabagone ko vakatavulica.

Na ilavelave kei na vidio ni koniferedi raraba era tu ena initaneti ena (raica na conference.lds.org) kei na Gospel Library app.

Na Taro mo Tugana ni bera ni Ko Veivakavulici

Na ivakavuvuli se ivunau cava era vakavulici ena itukutuku ni koniferedi oqo? O cei vei ira oqo ko vakila ni na veivuke vakalevu duadua vei ira na itabagone ena nomu kuoramu se kalasi?

Na cava eso na veika e sotavi se ivakaraitaki cava e vakayagataka ko koya ka vosa? Na ivakavuvuli cava beka e vakatavulica na veika sotavi se ivakaraitaki oqori? Na cava soti beka na veika sotavi ena nomu bula ko rawa ni wasea ka veisotari kei ira na ivakavuvuli oqori?

Na cava e sureti keda kina o koya e vosa meda cakava? Na veivakalougatataki cava e yalataka o koya ni da na ciqoma? Na veisureti kei na yalayala ni veivakalougatataki cava soti ko na veitalanoataka kei ira na itabagone?

Veivakavulici ena iVakarau ni iVakabula

“Vakasamataka e rawa vakacava ni kena vakayagataki na sereivakatagi, italanoa, iyaloyalo, kei na mataqali cakacakaniliga tale eso me sureta na Yalotabu, vakamatatataka na ivakavuvuli ni kosipeli ena sala daunanumi, ka vukei ira na vuli mera semata na kosipeli ki na nodra bula ni veisiga. Nanuma na ivurevure eso oqo e sega ni dodonu me vakanamata kina na lesoni, ia me iyaya ga ni cakacaka me vukei kemuni ena nomuni vakavulica vakavinaka cake na ivunau ni kosipeli” (Veivakavulici ena iVakarau ni iVakabula, 22).

iTuvatuva ni Bose

1. Veivosaki Vata ka Veiwasei Ena Ka e Sotavi

Ni liutaka e dua na lewe ni mataveiliutaki ni kuoramu se kalasi; e rauta ni 5–10 na miniti

Me liutaki ena dua na veitalanoa ni veika me vaka na veika oqo:

Na noda kuoramu se kalasi: O cei e yali mai nikua? Na veisiko cava soti sa gadrevi meda cakava? O cei e dodonu meda sureta ki na itaviqaravi ka roro tiko mai? O cei ena gadreva na noda veivuke kei na masu?
Noda iTavi: Na ilesilesi cava mada e gadrevi meda vakayacora? Na ilesilesi cava soti eda sa vakacavara? Eda sa sureti ira vakacava na tani mera lako mai vei Karisito, ka da na sureti ira vakacava na tani ena gauna oqo?
Noda bula: Vakananumi ira na kuoramu se kalasi mai na veitalanoa ni soqoni sa oti. Na veika cava eda sa sotava ni da vakayacora na veika eda sa vulica? Na veika cava beka eda sa sotava ena veimacawa sa sivi ka vaqaqacotaka na noda ivakadinadina ni kosipeli?

Ke rawa, veitalanoataka taumada na veika oqo ena bose ni mataveiliutaki ni kuoramu se kalasi.

2. Vuli Vata

E liutaka e dua na iliuliu se qasenivuli se dua na lewe ni kuoramu se kalasi; e rauta ni 25–35 na miniti

Na vulici ni tukutuku digitaki eso se itukutuku mai na koniferedi raraba ka vakasaqara na veituberi mai na Yalotabu (raica na “Taro mo Tugana ni bera ni Ko Veivakavulici”). Tuva e dua na sala mo vukei ira kina na itabagone mera kunea na dina mai na itukutuku. Na veiitaviqaravi oqo e rawa ni veivuke:

Vakalekalekataka na itukutuku. Me ra sureti na itabagone mera wilika na itukutuku ka vola na kena ivakaleleka ena dua na yatuvosa. Bolei ira mera musuka na ivakaleleka ki na dua na vosa lekaleka ka rawa ni ra nanuma.
Vulica baleta e dua na tiki ni ivolanikalou. Sureti ira na itabagone mera wilika e dua na tiki ni ivolanikalou ka a cavuti ena itukutuku digitaki. Kerei ira mera veitalanoataka e vukei ira vakacava na ivakavuvuli ena itukutuku mera kilamatata cake na ivolanikalou.
Vakavakarau ka veiwasei. Ni bera na soqoni, sureta e vica na cauravou se goneyalewa mera wilika na duidui tikina mai na itukutuku ka vakavakarau mai mera wasea nodra vakasama titobu, veika era vakila, kei na kilamatata.
Kunea e dua na malanivosa. Digitaka eso na parakaravu mai na itukutuku, ka sureti ira na itabagone mera vakasaqarai ira, ka vaqara na vosa ka vukei ira mera kilamatata na ivunau ka vakatavulici tiko. Kerei ira mera wasea na ka era kunea ka cava e bibi kina.
Cakava e dua na iyaloyalo. Sureti ira na itabagone mera kunea e dua na qaqanivosa mai na itukutuku ka vakaibalebale dina vei ira. Sa na rawa ni ra cakava e dua na posita, ivolamaka, se iyaloyalo lasa ka yavutaki mai na qaqanivosa ka rawa ni ra wasea se vakabira e nodra vale.
Kunea na veisureti kei na veivakalougatataki. Solia vei ira yadudua na cauravou se goneyalewa e dua na ilavelave ni vosa kei na peni kala dui roka, penikau, se kereioni. Sureti ira mera vakayagataka na dui roka me vakatakila na veika me vaka na ivakavuvuli vakosipeli, veisureti me cakacaka, veivakalougatataki yalataki, kei na ivakaro. Sureti ira na itabagone mera wasea na raikiloma eso me baleta na ka era sa kunea.
Wasea na qaqanivosa eso. Sureti ira na itabagone mera wasea na qaqanivosa eso mai na itukutuku ka vakauqeti ira. Na cava e vakauqeti keda na vosa cavuti oqo meda cakava? Na madigi cava e tu vei keda meda wasea kina na ivakavuvuli oqo vei ira na tani?
Vakarautaka e dua na lesoni Kerei ira na itabagone mera cakacaka yarurua mera tuva na lesoni ni lotu ni matavuvale ka yavutaki mai na dua na tiki ni itukutuku. Na cava eda rawa ni cakava me vukea na lewe ni noda matavuvale mera kilamatata na ivakavuvuli eso oqo ka ra sema vakacava ki na noda bula? Sureta e so na veisasa mera wasea ki na kalasi na nodra ituvatuva.
Wilika ka wasea. Wilika vata e vica na qaqanivosa mai na itukutuku. Kerei ira na itabagone me ra wasea e so na ivakaraitaki mai na ivolanikalou kei na nodra bula ka vakaraitaka na ibalebale ni qaqanivosa oqo vei ira.

3. iTuvatuva me cakacakataki

Me liutaka e dua na mataveiliutaki ni kuoramu se kalasi; e rauta ni 5–10 na miniti

Ena vaqaqacotaki ira vakacava na itabagone mera bulataka na itukutuku se itukutuku eso ena nodra bula? Vakasamataka na veika oqo:

Kerei ira na itabagone mera veitalanoataka na veika era vakila se vakauqeti kina ka yaco vei ira ena gauna ni soqoni. Na cava e vakaibalebale vakalevu vei ira? Eso beka na ka era rawa ni cakava vakai ira yadua se vaka kuoramu se kalasi ka me bulataki kina na ka era sa vulica?
Solia e vica na miniti vei ira na itabagone me ra toqa kina na ka era na cakava ena veimacawa e muri mera tutaka kina na nodra veivakauqeti. Mera sureti me ra wasea eso na nodra vakasama.
Me vakananumi vei ira na itabagone ni na nodra na madigi mera wasea na veika era sa sotava ena itekivu ni kalasi e tarava.