Ko e ako mei he konifelenisi lahí

Teuteuʻi Fakalaumālie Koe

ʻI heʻetau hoko ko ha kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau monūʻia ke maʻu ha palōfita moʻui ʻi he māmaní he kuongá ni. ʻOku hoko ʻene ngaahi akonakí pea mo e ngaahi akonaki ʻa e kau taki ʻo e Siasí ko ha mālohi lahi ki he kau mēmipa ʻo e Siasí—kau ai ʻa e toʻu tupu ʻokú ke akoʻí. Naʻe folofola e ‘Eikí: “ke ke tokanga ki [he] ngaahi lea kotoa pē mo e ngaahi fekau [ʻa e palōfitá] te ne fai kiate koe … ; he ke mou tali ʻene leá, ʻo hangē ko e lea ia mei hoku ngutu ʻoʻokú, ʻi he kātaki mo e tui kotoa pē. Koeʻuhí ʻi hoʻomou fai ʻa e ngaahi meʻá ni ʻe ʻikai ikuna ʻa kimoutolu ʻe he ngaahi matapā ʻo helí; ʻio, pea ʻe fakamovetevetea atu ʻe he ʻEiki ko e ʻOtuá ʻa e ngaahi mālohi ʻo e fakapoʻulí ki muʻa ʻiate kimoutolu” (Tokāteline mo e Ngaahi Fuakava 21:4–6).

Ngaahi Maʻuʻanga Tokoni ki Hoʻo Teuteú

Fili mo e kau palesitenisī fakakōlomú pe fakakalasí ha pōpoaki ʻe taha pe lahi ange mei he konifelenisi lahi fakamuimuitahá ʻa ia ʻokú ke ongoʻi ʻe mahuʻingamālie taha ki he toʻu tupu ʻokú ke akoʻí.

ʻE lava ke maʻu ʻa e ngaahi lea mo e ngaahi vitiō mei he konifelenisi lahí ʻi he ʻinitanetí (vakai conference.lds.org) pea ʻi he Gospel Library app.

Ngaahi Fehuʻi ke ke Fakalaulauloto ki ai kimuʻa Peá Ke Faiakó

Ko e hā ha ngaahi tefitoʻi moʻoni pē tokāteline naʻe akoʻi ʻi he pōpoaki konifelenisi ko ʻení? Ko e fē ʻi he ngaahi meʻá ni ʻokú ke ongoʻi ʻe tokoni lahi taha ki he toʻu tupu ʻi ho kōlomú pe kalasí?

Ko e hā ha ngaahi aʻusia pe sīpinga naʻe fakaʻaongaʻi ʻe he tokotaha leá? Ko e hā ha ngaahi tefitoʻi moʻoni ʻoku akoʻi mai ʻe he ngaahi aʻusia pe sīpinga ko ʻení? Ko e hā ha ngaahi aʻusia mei hoʻo moʻuí te ke lava ʻo vahevahe, ʻa ia ʻoku felāveʻi mo e ngaahi tefitoʻi moʻoni ko ʻení?

Ko e hā naʻe fakaafeʻi kitautolu ʻe he tokotaha leá ke tau faí? Ko e hā e ngaahi tāpuaki naʻá ne palōmesi mai te tau maʻú? Ko e hā e ngaahi fakaafe mo e ngaahi tāpuaki kuo talaʻofa mai te ke aleaʻi mo e toʻu tupú?

Ko e Faiako ‘i he Founga ‘a e Fakamoʻuí

“Fakakaukau ki he founga ʻe lava ai ʻe hano fakaʻaongaʻi ʻo e hivá, fanga kiʻi talanoá, fakatātaá mo e kalasi kehekehe ʻo e ʻātí, ʻo fakaafeʻi mai e Laumālié, fakamaʻalaʻala ha ngaahi tefitoʻi moʻoni ʻo e ongoongoleleí ʻi ha ngaahi founga fakangalongataʻa, pea tokoni ki he kau akó ke nau fakafekauʻaki e ongoongoleleí ki heʻenau moʻui fakaʻahó. Manatuʻi ʻoku ʻikai totonu ke fakatefito e tokangá ʻi he ngaahi maʻuʻanga tokoní, ka ko ha meʻa pē ia ke tokoni atu ke toe lelei ange hoʻo akoʻi ʻaki e ngaahi tokāteline ʻo e ongoongoleleí” (Faiako ʻi he Founga ʻa e Fakamoʻuí, 22).

Fokotuʻutuʻu ki he Fakatahá

1. Fealēleaʻaki Fakataha mo Fevahevaheʻaki e Ngaahi Aʻusiá

Tataki ʻe ha mēmpa ʻo e kōlomú pe kau palesitenisī ʻo e kalasí; fakafuofua ki he miniti ʻe 5–10

Tataki ha fealēleaʻaki fekauʻaki mo e ngaahi meʻa hangē ko ʻení:

Ko ʻetau kōlomú pe kalasí: Ko hai ʻoku ʻikai ʻi heni he ʻaho ní? Ko e hā ha ngaahi ʻaʻahi ʻoku totonu ke tau fai? Ko hai ʻoku totonu ke tau fakaafeʻi ki ha ʻekitivitī ʻoku ʻamanaki ke fai? Ko hai ʻokú ne fie maʻu ʻetau tokoní mo e ngaahi lotú?
Ko hotau ngaahi fatongiá: Ko e hā ha ngaahi ngāue ʻoku fie maʻu ke tau fai? Ko e hā ha ngaahi ngāue kuo tau fakahoko? Kuo tau fakaafeʻi fēfē nai e niʻihi kehé ke nau haʻu kia Kalaisi, pea ʻe lava fēfē ke tau fakaafeʻi e niʻihi kehé he taimí ni?
Ko ʻetau moʻuí: Fakamanatu ki he kōlomú pe kalasí e fealēleaʻaki mei he fakataha ne toki ʻosí. Ko e hā ha ngaahi aʻusia kuo tau maʻu ʻi hono fakaʻaongaʻi e meʻa kuo tau akó? Ko e hā ha ngaahi aʻusia kuo tau maʻu ʻi he ngaahi uike kuo maliu atú, naʻá ne fakamālohia ʻetau ngaahi fakamoʻoni ki he ongoongoleleí?

Kapau ʻe lava, aleaʻi ʻa e ngaahi meʻa ko ʻení kimuʻa ʻi ha fakataha ʻa e palesitenisī fakakōlomú pe fakakalasí.

2. Ako Fakataha

Tataki ʻe ha takimuʻa pe faiako pe ko ha mēmipa ʻo e kōlomú pe kalasí; fakafuofua ki ha miniti ʻe 25–35

Hili hono ako ʻa e pōpoaki kuo filifili mei he konifelenisi lahí pea mo e fekumi ki he tataki ʻa e Laumālié (vakai, “Ngaahi Fehuʻi ke ke Fakalaulauloto ki ai kimuʻa Peá Ke Faiakó”). Palani leva ha founga ke tokoni ki he toʻu tupú ke nau ʻiloʻi e ngaahi moʻoni mei he pōpoakí. ʻE lava ke tokoni e ngaahi ʻekitivitī ko ʻení ke:

Fakanounouʻi ʻe pōpoakí. Fakaafeʻi e toʻu tupú ke nau lau e pōpoakí pea fakamatalaʻi fakanounou ia ʻi ha sētesi ʻe taha. Poupouʻi kinautolu ke fakasiʻisiʻi ʻenau fakamatalá ki ha kupuʻi lea nounou ʻa ia te nau lava ʻo manatuʻi ngofua.
Ako fekauʻaki mo ha veesi folofola. Fakaafeʻi e toʻu tupú ke nau lau ha veesi folofola ʻoku ʻomi ʻi he pōpoaki naʻe filí. Kole ange ke nau aleaʻi e founga ʻoku tokoni ai ʻa e ngaahi akonaki ʻi he pōpoakí ke mahino lelei ange kiate kinautolu ʻa e folofolá.
Mateuteu pea vahevahe. Tomuʻa fakaafeʻi kimuʻa he fakatahá ha kau talavou mo ha kau finemui ʻe niʻihi, ke nau lau ha ngaahi konga kehekehe ʻo e pōpoakí, pea nau omi mateuteu ke vahevahe ʻenau ngaahi fakakaukaú, ongó, mo e mahino ne nau maʻú.
Kumi ha kupuʻi lea. Fili ha ngaahi palakalafi mei he pōpoakí, pea fakaafeʻi e toʻu tupú ke fekumi ʻiate kinautolu, ʻo kumi e ngaahi kupuʻi lea ʻoku tokoni ke mahino kiate kinautolu ʻa e tokāteline kuo akoʻí. Kole ange ke nau vahevahe ʻa e meʻa ne nau maʻú mo e ʻuhinga ʻoku mahuʻinga aí.
Tā ha fakatātā. Fakaafeʻi e toʻu tupú ke nau kumi ha kupuʻi lea mei he pōpoaki ko ʻení ʻoku ʻuhingamālie kiate kinautolu. Hili iá te nau lava ʻo faʻu ha pousitā, meʻa fakaʻilonga tohi, pe ha fakatātā fakatatau mo e kupuʻi lea ko ʻení, ʻa ia te nau lava ʻo vahevahe pe fakaʻaliʻali ʻi honau ngaahi ʻapí.
Kumi ʻo e ngaahi fakaafé mo e ngaahi tāpuakí. ʻOange ki he talavou pe finemui takitaha ha tatau ʻo e leá mo ha ngaahi peni maaka, peni vahevahe, pe kala lanu kehekehe. Fakaafeʻi kinautolu ke nau fakaʻaongaʻi ‘a e ngaahi lanu kehekehé ke fakaʻilongaʻi ʻaki ha ngaahi meʻa hangē ko ha ngaahi tefitoʻi moʻoni ʻo e ongoongoleleí, fakaafe ke ngāue, ngaahi tāpuaki kuo talaʻofa, mo ha ngaahi fakatokanga. Fakaafeʻi e toʻu tupú ke vahevahe ʻenau ngaahi fakakaukaú fekauʻaki mo e meʻa ne nau maʻú.
Vahevahe e ngaahi leá. Fakaafeʻi e toʻu tupú ke vahevahe ha ngaahi kupuʻi lea mei he pōpoaki ʻokú ne ueʻi fakalaumālie kinautolú. Ko e hā ʻoku ueʻi kitautolu ʻe he ngaahi leá ke tau faí? Ko e hā ha ngaahi faingamālie ʻoku tau maʻu ke tau vahevahe ai ʻa e ngaahi ako ko ʻení mo e niʻihi kehé?
Teuteu ha lēsoni. Kole ki he toʻu tupú ke nau ngāue tautautoko ua ke palaniʻi ha lēsoni efiafi fakafāmili ʻi ʻapi, ʻo makatuʻunga ʻi ha konga ʻo e pōpoakí. Ko e hā te tau lava ʻo fai ke tokoniʻi ai e kāu mēmipa ʻo hotau fāmilí, ke mahino kiate kinautolu ʻa e ngaahi akonaki ko ʻení, mo e founga ʻoku nau fekauʻaki ai mo ʻetau ngaahi moʻuí? Fakaafeʻi ha niʻihi ʻo e ngaahi hoá ke vahevahe ʻenau ngaahi palaní.
Lau pea vahevahe. Lau fakataha ha ngaahi kupuʻi lea mei he pōpoakí. Kole ki he toʻu tupú ke vahevahe ha ngaahi sīpinga mei he folofolá pea mo ʻenau moʻuí, ʻa ia ʻoku fakahaaʻi ai ʻa e ʻuhinga ʻo e ngaahi kupuʻi lea ko ʻení kiate kinautolú.

3. Palani ke ngāue

Tataki ʻe ha mēmipa ʻo e kōlomú pe kau palesitenisī ʻo e kalasí; fakafuofua ki ha miniti ʻe 5–10

Te ke poupouʻi fēfē e toʻu tupú ke nau fakaʻaongaʻi e pōpoakí pe ngaahi pōpoakí ʻi heʻenau moʻuí? Fakakaukau ki he ngaahi meʻa ko ʻení:

Kole ki he toʻu tupú ke nau aleaʻi ha faʻahinga ongo pe ueʻi pē ne nau maʻu lolotonga e fakatahá. Ko e hā naʻe ʻuhingamālie kiate kinautolú? ʻOku ʻi ai nai ha meʻa te nau lava ʻo fai fakataautaha pe fakakōlomu ke fakaʻaongaʻi ai ʻa e meʻa kuo nau akó?
ʻOange ki he toʻu tupú ha ngaahi miniti siʻi ke hiki e meʻa te nau fai ʻi he ngaahi uike ka hokó ke nau ngāue ai fakatatau mo ʻenau ngaahi ongó. Fakaafeʻi kinautolu ke vahevahe ʻenau ngaahi fakakaukaú.
Fakamanatu ki he toʻu tupú te nau maʻu ʻa e faingamālie ke vahevahe ʻenau ngaahi aʻusiá ʻi he kamataʻanga ʻo e fakataha hokó.