Ko e hā ʻoku mahuʻinga ai e fāmilí?

Naʻe tuʻutuʻuni ʻe he ʻOtuá ʻa e fāmilí pea ko e uho ia ʻo ʻEne palani ki he ikuʻanga taʻengata ʻo ʻEne fānaú. ʻOku fakafaingofuaʻi ʻe he palani fakalangi ko ʻení ʻa e lava e niʻihi fakafoʻituituí ʻo foki ki Hono ʻaó pea fakatahaʻi e ngaahi fāmilí ke taʻengata.

Teuteuʻi fakalaumālie koe

Ko e hā ʻoku mahuʻinga ai ho fāmilí kiate koé? Ko e hā ʻokú ke fakakaukau ʻoku hoko ai ʻa e fāmilí ko e uho ʻo e palani ʻo e fakamoʻui ʻa e Tamai Hēvaní?

Ko e hā e ngaahi pōpoaki ʻoku maʻu ʻe he kau finemuí ʻoku fehangahangai mo e meʻa kuo lea ʻaki ʻe he kau palōfitá ʻo kau ki he mahuʻinga ʻo e fāmilí? Te ke tokoniʻi fēfē kinautolu ke mahino ʻa e mahuʻinga taʻengata ʻo e fāmilí?

Ako ʻi he faʻa lotu e ngaahi potufolofola mo e ngaahi maʻuʻanga tokoni ko ʻení. Ko e hā ha ngaahi potufolofola mo ha ngaahi maʻuʻanga tokoni kehe te nau tokoni ke mahino ki he kau finemuí ʻa e mahuʻinga ʻo e fāmilí?

Loma 8:16–17; Hepelū 12:9 (Ko e fānau kitautolu ʻa e Tamai Hēvaní)

Sēnesi 2:18–24; T&F 131:1–4; 138:48 (Ngaahi moʻoni ʻo e ongoongoleleí kau ki he fāmilí)

Mōsaia 4:14–15; T&F 93:40, 43, 48–50; 68:25, 27–29 (ʻOku ako ʻe he fānaú ʻa e ongoongoleleí mei heʻenau mātuʻá)

“Ko e Fāmilí: Ko ha Fanongonongo ki Māmani,” Ensign pe Liahona, Nōvema 2010, 129

Jeffrey R. Holland, “ ʻOku ʻa e ʻOtuá ʻa e Fāmilí,” Ensign pe Liahona, Mē 2015, 11–13

D. Todd Christofferson, “ ʻUhinga ʻ e Malí, ʻUhinga ʻo e Fāmilí,” EnsignpeLiahona, Mē 2015, 50–53

L. Tom Perry, “Ko e Hoko ko e Mātuʻa Leleí,” Ensign pe Liahona, Nōvema 2012, 26–28

“Fāmilí,” Ki Hono Fakamālohia ʻo e Toʻu Tupú (2011), 14–15

Vitiō: “ʻE lava ke Taʻengata e Fāmilí”; “Ko e ʻApí ko ha Faʻunga Fakalangi”

3:11

1:49

Faiako ‘i he founga ‘a e Fakamo‘uí

Naʻe fai ʻe he Fakamoʻuí ʻa e ngaahi fehuʻi naʻa nau ʻai Hono kau muimuí ke nau fakakaukau mo ongoʻi mālohi ange, pea naʻá Ne fiefia ʻi heʻenau fakahaaʻi ʻenau tuí. Ko e hā ha ngaahi fehuʻi te ke ala fai ki he kau finemuí ke tokoniʻi kinautolu ke nau fakakaukau mo ongoʻi mālohi ange kau ki he mahuʻinga ʻo e fāmilí? ʻE lava nai ʻe he ngaahi fehuʻi ko ʻení ʻo poupouʻi hono fakahaaʻi ʻo e tuí?

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa ku nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Fakaafeʻi e kau finemuí ke nau fakakaukauloto ʻoku fehuʻi ange ʻe ha kaungāmeʻa kiate kinautolu, “Ko e hā ʻoku fuʻu mahuʻinga ai ʻa e fāmilí ʻi homou Siasí?” ʻE fēfē ʻenau talí?
Hiki he palakipoé “Ko e _________ ʻa e uho ʻo e palani ʻa e Tokotaha Fakatupú ki he _______taʻengata ʻo ʻEne ________.” Fakaafeʻi e kau finemuí ke nau lau ʻa e palakalafi ʻuluaki ʻo e “Ko e Fāmilí: Ko ha Fanongonongo ki Māmani” pea fakakakato ʻa e sētesí. Aleaʻi fakakalasi ʻa e ʻuhinga ʻoku moʻoni ai ʻa e fakamatala ko ʻení.

Ako fakataha

ʻE lava ʻo tokoni e ngaahi ʻekitivitī takitaha ʻi laló ke akoʻi e kau finemuí ki he mahuʻinga ʻo e fāmilí. Muimui ʻi he tataki ‘a e Laumālié, ʻo fili ha ʻekitivitī ʻe taha pe toe lahi ange ‘e ‘aonga lahi taha ki hoʻo kalasí:

Tā ha siakale ʻi he palakipoé. Fakaafeʻi ha finemui ke ne tā ha fāmili ʻi loto ʻi he siakalé. Tohi takai ʻi he siakalé ʻa e moʻui ʻi he maama fakalaumālié, moʻui fakamatelié, mo e moʻui hili ʻa e moʻuí ni. Kole ki ha finemui ke ne lau e palakalafi hono tolu ʻo e “Ko e Fāmilí: Ko ha Fanongonongo ki Māmani” pea kumi ha ngaahi founga ʻoku feʻunga ai e fāmilí mo e ngaahi kotoa ko ʻeni ʻo e palani ʻo e fakamoʻuí. Fakaafeʻi e kau finemuí ke nau vahevahe ʻa e meʻa ʻoku nau ongoʻi ki honau fāmilí pea mo e ʻuhinga ʻoku nau fie maʻu ai ke nau fakataha mo kinautolu hili ʻa e moʻui ní.
Fakaafeʻi e kau finemuí ke nau lau ʻa e lea ʻa ʻEletā D. Todd Christofferson “ ʻUhinga ʻo e Malí, ʻUhinga ʻo e Fāmilí”pe ko e ngaahi palakalafi fakamuimuitaha ʻe valu ʻo e lea ʻa ʻEletā L. Tom Perry “Ko e Hoko ko e Mātuʻa Leleí,” pea kumi e tali ki he fehuʻi “Ko e Hā ʻoku mahuʻinga ai ʻa e fāmilí?” Fakaafeʻi kinautolu ke vahevahe ʻa e meʻa ʻoku nau maʻú. Ko e hā ʻe lava ke fai ʻe he kau finemuí ke fakahaaʻi ʻoku mahino kiate kinautolu ʻa e mahuʻinga ʻo e fāmilí? ʻE kaunga fēfē e mahino ʻoku nau maʻu ki he mahuʻinga ʻo e fāmilí mo e founga ʻenau tauhi e kau mēmipa honau fāmilí?
Vahe ki he finemui takitaha ha taha ʻo e ngaahi potufolofola ʻi he fokotuʻutuʻu ko ʻení. Kole ki he kalasí ke nau fekumi ʻi he “Ko e Fāmilí: Ko ha Fanongonongo ki Māmani” pea kumi ha potufolofola ʻoku fekauʻaki mo ʻenau folofolá. Fakaafeʻi e finemui takitaha ke ne vahevahe ʻene potufolofolá pea mo e konga ʻi he fanongonongó ʻokú na fekauʻakí. Kole ange ke nau vahevahe ha faʻahinga meʻa kuo nau aʻusia ʻokú ne fakatātaaʻi e mahuʻinga ʻo e fāmilí.
ʻI hano fakaʻatā ʻe he pīsopé, fakaafeʻi ha fefine ʻe toko taha pe tokolahi ange mei he uōtí ʻa ia ʻoku lelei ʻaupito ʻene nofomalí ke vahevahe mo e kalasí ʻene ongo kau ki he nofomalí mo e fāmilí. Ko e hā te na talaange ki ha taha ʻoku ʻikai lelei e tuʻunga hono fāmilí he taimi ní? (Vakai, “Fāmilí,” Ki Hono Fakamālohia ʻo e Toʻu Tupú, 15.) Ko e hā te nau talaange ki ha taha ʻoku ʻikai ke ne mahuʻingaʻia ʻi he fie maʻu ke ne mali mo maʻu ha fānaú? Poupouʻi e kau finemuí ke nau ʻeke ha ngaahi fehuʻi kau ki he teuteu ke malí mo e fāmilí.
Vahevahe e kalasí ki ha kulupu ʻe fā. ʻAi ke nau ako ʻe he kulupu takitaha ha konga ʻo e lea ʻa Carole M. Stephen ʻOku ʻa e ʻOtuá ʻa e Fāmilí” (ʻoku kamata ʻa e konga takitaha ʻaki ha foʻi moʻoni ʻoku ʻasi mataʻāʻaá fekauʻaki mo e fāmilí). Kole ki he kulupu takitaha ke nau feakoʻiʻaki e meʻa ne nau ako mei heʻenau kongá. ʻE lava fēfē ke nau akoʻi mo moʻui ʻaki ʻa e ngaahi moʻoni ko ʻení ʻi honau fāmilí mo e tukui koló?

Kole ki he kau finemuí ke nau vahevahe ʻa e meʻa naʻa nau ako ʻi he ʻaho ní. ʻOku mahino nai kiate kinautolu ʻa e ʻuhinga ʻoku mahuʻinga ai ʻa e fāmilí? Ko e hā haʻanau ngaahi ongo pe fakakaukau? ‘Oku toe ‘i ai nai haʻanau ngaahi fehuʻi kehe? ʻE ʻaonga nai ke toe tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Fakakaukau ki ha fāmili anga māʻoniʻoni ʻoku nau saiʻia ai pea nau hiki ha ngaahi founga pau te nau lava ʻo muimui ai ki he fāmili ko iá.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.