Ko e hā ʻoku mahuʻinga ai ʻa e ngaahi ouaú ʻi heʻeku moʻuí?

Ko e ouaú ko ha ngāue ʻoku toputapu mo hano tuʻutuʻuni pau ʻoku ʻi ai hono ʻuhinga fakalaumālié. ʻOku fakahoko e ngaahi ouaú ʻaki e mafai ʻo e lakanga fakataulaʻeikí pea ʻi he fakahinohino ʻa kinautolu ʻoku nau maʻu e ngaahi kī ʻo e lakanga fakataulaʻeikí. ʻOku tokoni e ngaahi ouaú ke tau manatuʻi ko hai kitautolu mo fakamanatu mai hotau vā fetuʻutaki mo e ʻOtuá. ʻOku nau tokoni ke tau haʻu kia Kalaisi pea maʻu e moʻui taʻengatá.

Teuteuʻi fakalaumālie koe

Ko e hā ha ngaahi ouau ʻo e ongoongoleleí kuó ke maʻu? Kuo tāpuekina fēfē ʻe he ngaahi ouau ko ʻení hoʻo moʻuí? Ko e hā ʻoku nau mahuʻinga ai kiate koé?

Ko e hā e ngaahi ouau kuo maʻu ʻe he kau finemuí? Ko e hā e ngaahi ouau ʻoku nau teuteu atu ke maʻú? Ko e hā ʻoku fie maʻu ai ke mahino kiate kinautolu e mahuʻinga ʻo e ngaahi ouau ʻo e ongoongoleleí?

Ako ʻi he faʻa lotu ʻa e ngaahi potufolofola mo e ngaahi maʻuʻanga tokoni ko ʻení. Ko e hā e meʻa ʻokú ke ongoʻi ʻoku ueʻi fakalaumālie ke ke vahevahe ki he kau finemuí ke mahino kiate kinautolu e mahuʻinga ʻo e ngaahi ouaú?

Mātiu 3:13–17 (Papitaiso ʻo Sīsū Kalaisí)

Ngāue 19:1–6 (Ko hono toe papitaiso ʻe Paula ha niʻihi fakafoʻituitui naʻe ʻikai ke papitaiso he founga totonú)

3 Nīfai 11:21–26 (Ko hono foaki ʻe Sīsū Kalaisi e mafai ke faipapitaisó mo fakahinohinoʻi hono founga totonú)

Molonai 8:10–12 (Ko e akonaki ʻa Molomona fekauʻaki mo e papitaisó)

T&F 84:19–21 (Ko e hāsino e mālohi ʻo e anga faka-ʻOtuá ʻi he ngaahi ouau ʻo e lakanga fakataulaʻeikí)

Ngaahi Tefito ʻo e Tuí 1:3–5 (ʻOku mahuʻinga e ngaahi ouaú ki he fakamoʻuí)

David A. Bednar, “Tauhi Maʻu Ai pē ha Fakamolemole ʻo Hoʻomou Ngaahi Angahalá,” Ensign pe Liahona, Mē 2016, 59–62

Gary E. Stevenson, “Ko Hoʻo Miniti ʻe Faá,” Ensign pe Liahona, Mē 2014, 84–86

“Ngaahi Ouau mo e Ngaahi Tāpuaki ʻo e Lakanga Fakataulaʻeikí,” Tohi Tuʻutuʻuni Fika 2: Ko Hono Puleʻi ʻo e Siasí (2010), 20.1

“Ngaahi Ouaú,” Tuʻu Maʻu ʻi he Tuí (2004), 136–37

Vitiō: “Faith in the Power of the Priesthood”

1:38

Vahevahe ʻo e ngaahi aʻusiá

Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa ku nau ako ʻi he lēsoni ʻo e uike kimuʻá. ʻE poupouʻi heni ʻa e ului fakatāutahá mo tokoniʻi ai e kau finemuí ke nau sio ki he kaunga ʻo e ongoongoleleí ʻi heʻenau moʻui fakaʻahó.

Fakafeʻiloaki e tokāteliné

Fili mei he ngaahi fakakaukau ko ʻení pe ko ha fakakaukau pē ʻaʻau ke fakafeʻiloaki ʻaki e lēsoni ‘o e uike ní:

Hiki e foʻi lea ko e ouau ʻi he palakipoé, pea kole ki he kau finemuí ke nau fokotuʻu ha ngaahi ʻuhinga ʻo e foʻi leá ni (kapau te nau fie maʻu ha tokoni, ʻai ke nau sio ki he palakalafi he kamataʻanga ʻo e fokotuʻutuʻu ko ʻení). ʻE tali fēfē ʻe he kau finemuí ki ha taha ʻokú ne pehē ʻoku ʻikai fie maʻu e ngaahi ouaú ia? (Kapau ʻoku fie maʻu ʻe he kau finemuí ha ngaahi fakakaukau, te nau lava ʻo ʻalu ki he konga ʻoku ui ko e “Ko e Laumālie Māʻoniʻoní mo e Ngaahi Ouau ʻo e Lakanga Fakataulaʻeikí” ʻi he lea ʻa ʻEletā David A. Bednar “Tauhi Maʻu Ai pē ha Fakamolemole ʻo Hoʻomou Ngaahi Angahalá.”)
Kole ki he kau finemuí ke nau hiki ki he lahi tahá e ngaahi ouau ʻo e ongoongoleleí te nau lava ʻo fakakaukau ki aí. Tokoniʻi ke nau ʻiloʻi e ngaahi ouau ʻi he lisí ʻoku fie maʻu ki he hakeakiʻí (kapau ʻe fie maʻu ha tokoni, ʻe lava ke nau lau e “Ngaahi Ouaú” ʻi he Tuʻu Maʻu ʻi he Tuí). Ko e hā naʻe ʻomi ai ʻe he Tamai Hēvaní e ngaahi ouaú ni kiate kitautolú?

Ako fakataha

ʻE tokoni e ngaahi ʻekitivitī takitaha ʻi laló ke mahino ki he kau finemuí e ʻuhinga oku mahuʻinga ai e ngaahi ouaú. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga lelei taha ki hoʻo kalasí:

ʻI he lea ʻa ʻEletā David A. Bednar ko e “Tauhi Maʻu Ai pē ha Fakamolemole ʻo Hoʻomou Ngaahi Angahalá,” ʻoku hanga ʻe he konga “Ko e Maʻu mo Tauhi ha Fakamolemole ʻo e Ngaahi Angahalá ʻo Fakafou he Ngaahi Ouaú,” ʻo fakamatalaʻi e ngaahi tāpuaki ʻo e ngaahi ouau ʻo e papitaisó, hilifaki ʻo e nimá ke maʻu e meʻafoaki ʻo e Laumālie Māʻoniʻoní pea mo e sākalamēnití. Fakaafeʻi e finemui takitaha ke ne fili ha ouau ʻe taha peá ne lisi e meʻa kotoa pē ʻokú ne ʻilo ʻo kau ki ai mei he konga ko ʻení, ke tokoni ke nau ʻilo ai e founga ʻe lava ke faitokonia ai kinautolu ʻe he ngaahi ouaú ni. Pea fakaafeʻi e kau finemuí ke akoʻi e toenga ʻo e kalasí e meʻa ne nau akó ʻi ha founga mohu founga—te nau lava ʻo fakaʻaongaʻi ha ngaahi fakatātā pe ko ha kiʻi keimi.
Fakaafeʻi ha fakaafe fakalangilangi ke lea pe ko ha finemui kuó ne lavaʻi lelei ha meʻa maʻongoʻonga ke vahevahe pe ko e hā ʻa e ngaahi fie maʻu ki he lavameʻa ko iá pea mo e founga naʻá ne fakahoko ai kinautolú (mahalo naʻá ne maʻu ha pale Fakalakalaka Fakatautaha, ʻi ai haʻane lavameʻa fakaako, pe lava lelei ʻo fakaʻaliʻali (audition) ke kau atu ki ha tulama). Pea fakaafeʻi e kau finemuí ke lau ʻa e palakalafi ʻoku kamata ʻaki “ʻI he founga tatau pē” mei he lea ʻa ʻEletā Gary E. Stevenson “Ko Hoʻo Miniti ʻe Faá.” ʻOku tatau fēfē ʻa e ngaahi ouaú mo e ngaahi fie maʻu ne vahevahe ʻe he tokotaha lea fakalangilangí? Te ke malava foki ʻo lau e toenga ʻo e lea ʻa ʻEletā Stevenson ʻo kumi pe ko e hā fua e ngaahi meʻa kehe naʻá ne akoʻi ʻo kau ki he ngaahi ouaú.
Toe vakaiʻi fakakalasi ʻa e lisi ʻo e ngaahi fie maʻu ʻe fā ki hono fakahoko e ngaahi ouaú ʻi he konga 20.1 ʻo e Tohi Tuʻutuʻuni Fika 2. Fakaafeʻi e kau finemuí ke lau e 3 Nīfai 11:21–26 pea feinga ke ʻiloʻi ʻa e founga hono fakahoko e ngaahi fie maʻú ni ʻi he fakamatala ʻa e Fakamoʻuí ki he papitaisó. Kole ange ke nau fakakaukau ki ha ouau kuo nau toki sio tonu ai pea fakamatalaʻi e founga ʻokú ne fakahoko ai e ngaahi fie maʻu ʻe fā ko ʻení. Ko e hā e meʻa ʻe hoko kapau ʻoku fakahoko ha ouau ka ʻoku ʻikai ke maʻu ai e ngaahi fie maʻu ko ʻení? Fehuʻi ki he kau finemuí pe ko e hā ʻoku mahuʻinga ai ke nau ʻilo kau ki he ngaahi fie maʻu ko ʻení.
Fakaafeʻi e kau finemuí ke nau fakakaukauloto ʻoku nau akoʻi ha taha mei ha tui fakalotu kehe kau ki he papitaisó, peá ne pehē mai ʻe ia, “Ne ʻosi papitaiso au ʻi hoku siasí.” ʻE tokoniʻi fēfē ʻe he kau finemuí ʻa e tokotahá ni ʻi ha founga ongoʻingofua ke mahino ki ai ʻa e ʻuhinga ʻe fie maʻu ai ke toe papitaisó? Ko e hā ha ngaahi potufolofola pe aʻusia te nau vahevahe? Te ke lava ʻo ʻai ke nau sio ki he lisi ʻo e ngaahi fie maʻu ʻi he konga 20.1 ʻo e Tohi Tuʻutuʻuni Fika 2; Mātiu 3:13–17; Ngāue 19:1–6; 3 Nīfai 11:21–26; pe Molonai 8:10–12. Kapau ʻe malava, fakaafeʻi e kau faifekau taimi kakató ke nau haʻu ki he kalasí pea vahevahe e founga ʻoku nau fakamatalaʻi ai ki heʻenau kau fiefanongó ʻa e mahuʻinga ʻo e ngaahi ouaú (tomuʻa maʻu ha ngofua mei he pīsopé).
Vahevahe mo e kalasí e lea ko ʻeni meia Palesiteni Sipenisā W. Kimipolo: “[ʻOku hoko e ngaahi ouaú ko e ngaahi fakamanatu]. Ko e taumuʻa moʻoni ia ʻo e sākalamēnití, ke fakamanatu ke ʻoua naʻa ngalo ʻiate kitautolu, pea mo tokoni ke tau manatuʻi]” (Teachings of Spencer W. Kimball, ed. Edward L. Kimball [1982], 112). Kole ki he kau finemuí ke hiki e ngaahi ouau ʻo e ongoongoleleí (hangē ko ia ʻoku ʻi he peesi 136–37 ʻo e Tuʻu Maʻu ʻi he Tuí) pea aleaʻi takitaha e meʻa ʻoku fakamanatu mai ʻe he ngaahi ouaú ni.

Kole ki he kau finemuí ke vahevahe ʻa e meʻa naʻa nau ako ʻi he ʻaho ní. ʻOku mahino nai kiate kinautolu e mahuʻinga ʻo e ngaahi ouaú? Ko e hā haʻanau ngaahi ongo pe fakakaukau? ʻOku toe ʻi ai nai haʻanau ngaahi fehuʻi kehe? ʻE ʻaonga nai ke tuku ha taimi lahi ange ʻi he tokāteline ko ʻení?

Moʻui ʻaki e meʻa ʻoku tau akó

Fakaafeʻi e kau finemuí ke nau fakakaukau pe te nau moʻui fēfē ʻaki ʻa e meʻa kuo nau ako he ʻaho ní. Hangē ko ʻení, te nau lava ʻo:

Akoʻi ha lēsoni ʻi ha efiafi fakafāmili ʻi ʻapi kau ki hono mahuʻinga ʻo e ngaahi ouaú.
Fakakakato ʻa e meʻa ʻoku fie maʻu ke aʻusia fika 4 he tuʻunga ʻulungaanga mahuʻinga ʻo e Tuí pe meʻa ʻoku fie maʻu ke aʻusia fika 4 he tuʻunga ʻulungaanga mahuʻinga ʻo e Natula Faka-ʻOtuá ʻi he Fakalakalaka Fakatāutahá.

Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.

Ngaahi ʻEkitivitī Felāveʻi mo e Toʻu tupú

Palani ha ʻekitivitī Mutuale ʻe tokoni ki he kau finemuí ke fakaʻaongaʻi e meʻa naʻa nau ako mei he lēsoni ko ʻení.