Ko e hā ʻa e lakanga fakataulaʻeiki?
Ko e lakanga fakataulaʻeikí ko e mālohi mo e mafai taʻengata ia ʻo ʻetau Tamai Hēvaní. Naʻe fakatupu pea puleʻi ʻe he ʻOtuá ʻa e ngaahi langí mo e māmaní ʻo fakafou ʻi he lakanga fakataulaʻeikí. ʻOkú Ne huhuʻi mo hakeakiʻi ʻEne fānaú ʻi he mālohi ko ʻení. ʻOkú Ne foaki ʻa e mafai ki he kau maʻu lakanga fakataulaʻeiki moʻui tāú ke fakahoko ʻa e ngaahi ouau ʻo e fakamoʻuí. ʻE lava ke fakafeʻungaʻi e fānau kotoa ʻa e Tamai Hēvaní ke maʻu ʻa e ngaahi ouau ko ʻení pea maʻu e mālohi mo e ngaahi tāpuaki ʻo e lakanga fakataulaʻeikí.
Teuteuʻi fakalaumālie koe
Ko e hā hoʻo ʻilo fekauʻaki mo e lakanga fakataulaʻeikí? Ko e hā e meʻa ʻokú ne ueʻi fakalaumālie koe ke ke ako kau ki he lakanga fakataulaʻeikí?
ʻOku ʻilo nai ʻe he finemuí ʻa hono mahuʻinga ʻo e lakanga fakataulaʻeikí ʻi heʻenau moʻuí? Ko e hā te ke lava ʻo fai kimuʻa he kalasí ke ʻilo e meʻa ʻoku ʻilo ʻe he finemui takitaha kau ki he lakanga fakataulaʻeikí? Te ne takiekina fēfē nai ʻa e meʻa ʻokú ke fili ke akoʻí?
ʻI hoʻo teuteú, ako ʻi he faʻa lotu e ngaahi potufolofola mo e ngaahi maʻuʻanga tokoni ko ʻení. Ko e hā ha ngaahi potufolofola mo e ngaahi lea ʻe tokoni ke mahino ki he kau finemuí e lakanga fakataulaʻeikí?
Hepelū 5:4; T&F 107:1–5; Ngaahi Tefito ʻo e Tuí 1:5 (ʻOku ui e kau maʻu lakanga fakataulaʻeikí ʻe he ʻOtuá pea fakanofo ʻe ha taha ʻokú ne maʻu e mafaí)
T&F 84:17–22 (ʻOku hā e mālohi ʻo e anga faka-ʻOtuá ʻi he ngaahi ouau ʻo e lakanga fakataulaʻeikí)
T&F 121:34–46 (ʻOku toki ngāue pē ʻa e mafai ʻo e lakanga fakataulaʻeikí ʻi he ngaahi tefitoʻi moʻoni ʻo e moʻui angatonú)
Henry B. Eyring, “ ʻAʻeva mo Au,” Ensign pe Liahona, Mē 2017, 82–85
M. Russell Ballard, “Ko ʻEku Ngāué ʻEni mo Hoku Nāunaú,” Ensign pe Liahona, Mē 2013, 18–21
Neil L. Andersen, “Mālohi ʻi he Lakanga Fakataulaʻeikí,”Ensign pe Liahona, Nōvema 2013, 92–95
“Lakanga Fakataulaʻeikí,” Tuʻu Maʻu ʻi he Tuí (2004), 94–99
“Lakanga Taulaʻeiki Faka-ʻĒloné,” Tuʻu Maʻu ʻi he Tuí, 92–94
“Lakanga Taulaʻeiki Faka-Melekisētekí,” Tuʻu Maʻu ʻi he Tuí, 91–92
Vitiō: “ʻAtā e Ngaahi Tāpuaki ʻo e Lakanga Fakataulaʻeikí ki he Taha Kotoa”
Ko e faiako ‘i he founga ‘a e Fakamo‘uí
Naʻe fakaʻaongaʻi ʻe he Fakamoʻuí ʻa e folofolá ke faiako mo fakamoʻoni fekauʻaki mo ʻEne misioná. Naʻá Ne akoʻi ʻEne kau ākongá ke fekumi ʻi he folofolá ke maʻu ha tali ki he ngaahi fehuʻí pea maʻu mo ha mālohi fakalaumālie. Ko e hā nai ha ngaahi founga te ke poupouʻi ai e kau finemuí ke nau fekumi ʻi he folofolá ke maʻu e tali ki heʻenau ngaahi fehuʻí mo e ngaahi faingataʻaʻiá?
Vahevahe ʻo e ngaahi meʻa ne nau aʻusiá
Fakaafeʻi e kau finemuí ʻi he kamataʻanga ʻo e kalasi takitaha ke nau vahevahe, akoʻi, mo fakamoʻoni ki he ngaahi aʻusia kuo nau maʻu ʻi hono fakaʻaongaʻi ʻo e meʻa kuo nau ako ʻi he lēsoni ʻo e uike kimuʻá. ʻE poupouʻi heni ʻa e fakaului fakatāutahá mo tokoniʻi ai e kau finemuí ke nau sio ki he mahuʻinga ʻo e ongoongoleleí ʻi heʻenau moʻuí.
Fakafeʻiloaki e tokāteliné
Fili mei he ngaahi fakakaukau ko ʻení pe fakakaukauʻi pē ʻe koe ha meʻa ke fakafeʻiloaki ʻaki e lēsoni ʻo e uike ní:
-
ʻEke ki he kau finemuí pe ko e hā e meʻa ʻoku nau ʻilo ki he lakanga fakataulaʻeikí. Vahevahe mo kinautolu e palakalafi ʻi he kamataʻanga ʻo e fokotuʻutuʻu ko ʻení pe ko e foʻi vitiō “ʻAtā ʻe Ngaahi Tāpuaki ʻo e Lakanga Fakataulaʻeikí ki he Taha Kotoa,” pea fehuʻi ange pe ko e hā e ngaahi moʻoni lahi ange ne nau ako kau ki he lakanga fakataulaʻeikí.
-
Fakaafeʻi fakakalasi pe tauhoa e kau finemuí ke nau fakatātaaʻi ha fealeaʻaki ne ʻeke ai ʻe ha kaungāmeʻa taʻe siasi pe ko e hā e lakanga fakataulaʻeikí. ʻE fakamatalaʻi fēfē ʻe he kau finemuí e lakanga fakataulaʻeikí? Fakaʻaongai e fakamatala ʻi he kamataʻanga ʻo e lēsoni ko ʻení ke tokoni ke mahino kiate kinautolu e lakanga fakataulaʻeikí.
Ako fakataha
ʻE tokoni e ngaahi ʻekitivitī takitaha ʻi laló ke mahino ki he kau finemuí e lakanga fakataulaʻeikí. Muimui ʻi he ueʻi ʻa e Laumālié, ʻo fili ha ʻekitivitī ʻe taha pe lahi ange ʻe ʻaonga taha ki hoʻo kalasí:
-
ʻI heʻene lea “ ‘Aʻeva mo Au’, ” naʻe vahevahe ʻe Palesiteni Henelī B. ʻAealingi ha ngaahi potufolofola naʻá ne pehē ʻe lava “ʻo fakaloloto ange ʻetau ongoʻi ʻaʻapa fekauʻaki mo e lakanga fakataulaʻeiki māʻoniʻoní”(Ensign pe Liahona, Mē 2017, 82 – 83). Kole ki he finemui takitaha ke ako ha taha ʻo e ngaahi potufolofola ko ʻení pea vahevahe leva ki he kalasí ʻa e meʻa naʻá ne ako fekauʻaki mo e lakanga fakataulaʻeikí. ʻOange ki he kau finemuí ha ngaahi miniti siʻi ke nau fakalaulauloto ki he ngaahi fehuʻi naʻe fai ʻe Palesiteni ʻAealingi ʻi he palakalafi ʻoku kamata ʻaki e “Ko e meʻa ʻe taha ke tali ki he faʻahinga fakamatala.” ʻOku ueʻi fēfē kinautolu ‘e he ngaahi fehuʻi ko ʻení ʻi heʻenau ngāue tokoní?
-
Vahevahe fakakulupu e kau finemuí. Vahe ki he kulupu takitaha ke nau fekumi ʻi ha potufolofola ʻe taha pe lahi ange ʻi he fokotuʻutuʻu ko ʻení pe ko ha konga ʻo e lea ʻa M. Russell Ballard ko e “Ko ʻEku Ngāué ʻEni mo Hoku Nāunaú,” ʻo kumi ha ngaahi meʻa ʻoku nau ako fekauʻaki mo e lakanga fakataulaʻeikí. Fakaafeʻi kinautolu ke nau vahevahe e meʻa ʻoku ongo kiate kinautolú. Ko e hā ha ngaahi aʻusia kuo maʻu ʻe he kau finemuí mei he lakanga fakataulaʻeikí?
-
Kole ki he kau finemuí ke nau hiki ha ngaahi founga ʻoku maʻu ai ʻe he kakai ʻo e māmaní ha mālohi (paʻanga, ako, manakoa, matamata lelei, mo e alā meʻa peheé). Lau fakataha e Tokāteline mo e Ngaahi Fuakava 121:36–46, pea kole ki he kau finemuí ke nau hiki e ngaahi tefitoʻi moʻoni ʻoku fakatefito ai e mālohi ʻo e lakanga fakataulaʻeikí. Fakafehoanaki e founga ʻoku maʻu ai ʻe he māmaní e mālohí mo e founga ʻa e ʻEikí. ʻOku uesia fēfē nai ʻe he ʻilo fekauʻaki mo e ngaahi tefitoʻi moʻoni ko ʻení ʻa e anga ʻo e vakai ʻa e kau finemuí ki he lakanga fakataulaʻeikí?
-
Fakaafeʻi ha niʻihi ʻo e kau finemuí ke nau lau fekauʻaki mo e Lakanga Taulaʻeiki Faka-ʻĒloné ʻi he Tuʻu Maʻu ʻi he Tuí (peesi 92–94), pea fakaafeʻi e toenga e kau finemuí ke nau lau e Lakanga Taulaʻeiki Faka-Melekisētekí (peesi 91–92). Kole ki he finemui takitaha ke vahevahe ha meʻa naʻá ne ako mei he meʻa naʻá ne laú. Ko e hā ʻoku nau ongoʻi ai ʻoku mahuʻinga ke mahino kiate kinautolu ʻa e lakanga fakataulaʻeikí?
-
Fakaafeʻi e finemui takitaha ke ne lau ha konga ʻe taha mei he lea ʻa ʻEletā Neil L. Andersen ko e “Mālohi ʻi he Lakanga Fakataulaʻeikí.” Hili iá pea kole ki he finemui takitaha ke vahevahe mo e toenga ʻo e kalasí e meʻa naʻá ne ako fekauʻaki mo e lakanga fakataulaʻeikí mo ʻene ʻuhinga kiate iá.
-
Fakaafeʻi e kau finemuí ke nau lau e konga ʻoku ui ko e “Ngaahi Kōlomu ʻo e Lakanga Fakataulaʻeikí” ʻi he peesi 96 ʻo e Tuʻu Maʻu ʻi he Tuí. Ko e hā e ngaahi meʻa ʻoku faitatau ai hono fokotuʻutuʻu e ngaahi kōlomu ʻo e Lakanga Taulaʻeiki Faka-ʻĒloné mo e ngaahi kalasi ʻa e kau finemuí? Ko e hā ʻa e ngaahi faikehekehé? Tokoniʻi e kau finemuí ke nau ʻilo ko hono fokotuʻutuʻu ko ia e kakai fefine ʻo e Siasí ʻoku fakahoko ia he sīpinga ʻo e lakanga fakataulaʻeikí (vakai, Ngaahi ʻOfefine ʻi Hoku Puleʻangá: Ko e Hisitōlia mo e Ngāue ʻa e Fineʻofá [2011], 161).
Kole ki he kau finemuí ke nau vahevahe e meʻa naʻa nau ako he ʻaho ní. ʻOku mahino lelei ange nai kiate kinautolu e lakanga fakataulaʻeikí? Ko e hā haʻanau ngaahi ongo pe fakakaukau? ʻOku toe ʻi ai nai mo haʻanau ngaahi fehuʻi kehe? ʻE ʻaonga nai ke tuku ha taimi lahi ange ki he tokāteline ko ʻení?
Moʻui ʻaki e meʻa ʻoku tau akó
Fakaafeʻi e kau finemuí ke nau fakakaukau pe te nau moʻui fēfē ʻaki nai ʻa e meʻa kuo nau ako he ʻaho ní. Hangē ko ʻení, ʻe lava ke nau:
-
Teuteu mo akoʻi ha lēsoni ʻo e lakanga fakataulaʻeikí ʻi ha efiafi fakafāmili ʻi ʻapi.
-
Tohi ʻi heʻenau tohinoá ha meʻa ne nau ako kau ki he lakanga fakataulaʻeikí.
Vahevahe mo e kau finemuí ʻa e meʻa te nau ako ki ai he uike hoko maí. Ko e hā te nau lava ʻo fai ke nau teuteu ai ke akó? Hangē ko ʻení, te nau lava ʻo lau ha lea, sio ʻi ha vitiō, pe ako ha potufolofola ʻoku fekauʻaki mo e lēsoni ʻo e uike hoko maí.