1 Vim tus poj niam twb ua rau tus txiv uas tsis ntseeg hloov ua neeg dawb huv, thiab tus txiv twb ua rau tus poj niam uas tsis ntseeg hloov ua neeg dawb huv; tsis li ces neb cov me nyuam twb tsis huv, tiam sis nim no lawv twb dawb huv.

2 Nim no, nyob rau lub sij hawm cov thwj tim nyob tau muaj txoj kev cai txiav nyob rau hauv tag nrho cov Neeg Yudais uas tsis ntseeg Yexus Khetos txoj moo zoo.

3 Thiab tau muaj tias muaj ib txoj kev sib cav sib ceg loj tshwm los nyob hauv cov neeg ntsig txog txoj kev cai txiav, vim tus txiv uas tsis ntseeg xav kom nws cov me nyuam yuav tsum ua kev cai txiav thiab coj raws li Mauxes txoj kev cai, uas Yexus Khetos twb ua kom muaj raws li txoj kev cai ntawd tiav lawm.

4 Thiab tau muaj tias cov me nyuam, vim lawv loj hlob los coj raws li Mauxes txoj kev cai, lawv ua raws li lawv cov yawg koob tej kab lis kev cai thiab tsis ntseeg Khetos txoj moo zoo, yog li ntawd lawv hloov los ua tsis dawb huv.

5 Yog li ntawd, vim li no tus thwj tim thiaj tau sau ntawv mus rau cov ntseeg, muab ib lo lus txib rau lawv, tsis yog los ntawm tus Tswv, tiam sis ntawm nws tus kheej, hais tias kom tus ntseeg tsis txhob mus koom nrog tus tsis ntseeg ua neej; tsuas yog nkawd tsum tsis ua raws li Mauxes txoj kev cai lawm xwb,

6 Kom nkawd cov me nyuam yuav nyob tsis ua kev cai txiav; thiab kom txoj kab lis kev cai ntawd yuav tag mus, qhov uas hais tias cov me nyuam yaus tsis dawb huv; vim tau muaj txoj kev cai no nyob hauv cov Neeg Yudais;

7 Tiam sis cov me nyuam yaus yeej dawb huv, vim Yexus Khetos txoj kev theej txhoj ua rau lawv hloov ua dawb huv; thiab qhov no yog lub ntsiab ntawm cov vaj lug kub.