Kev ua yog toog muab los rau tus Yaj Saub Joseph Smith thiab Sidney Rigdon, nyob hauv Hiram, Ohio, lub Ob Hlis Ntuj hnub tim 16, xyoo 1832. Ua cov lus qhia ua ntej zaj ceev xwm txheej rau txoj kev ua yog toog no, Joseph Smith zaj keeb kwm hais tias: “Thaum kuv rov qab tom lub rooj sab laj uas nyob hauv Amherst los, kuv rov qab txhais cov Vaj Lug Kub ntxiv mus. Los ntawm ob peb zaj kev tshwm sim uas tau txais lawm, kuv tau pom tias ntau yam tseem ceeb txog tib neeg txoj kev cawm seej twb raug muab tshem tawm hauv phau Npaivnpaum lawm, los yog twb xub ploj ua ntej thaum muab phau ntawd sau los ua ke. Tshuav tej ntsiab lus tseeb nyob hauv phau Npaivnpaum, uas qhia tau hais tias yog Vajtswv muab nqi zog rau txhua tus raws li tej yam uas lawv ua thaum nyob hauv ntiaj teb no, ces lo lus ‘Ceeb Tsheej,’ uas yog qhov chaw rau Haiv Neeg Ntseeg nyob mus ib txhis, yuav tsum muaj ntau tshaj ib lub nceeg vaj. Muaj li ntawd ces, … thaum tab tom txhais Yauhas txoj Moo Zoo, kuv tus kheej thiab Txwj Laug Rigdon tau ua yog toog pom raws li nram no.” Thaum muab txoj kev yog toog no los, tus Yaj Saub tab tom txhais Yauhas 5:29.