Ang Pagpangalagad uban sa Gahum ug Katungod sa Dios

Akong minahal nga mga kaigsoonan, salamat sa inyong debosyon sa Ginoo ug sa Iyang balaan nga buhat. Gikalipay gayud nako og dako nga ikauban kamo. Isip usa ka bag-o nga Unang Kapangulohan, magpasalamat kami sa inyong mga pag-ampo ug sa inyong mapaluyuhon nga mga paningkamot. Mapasalamaton kami sa inyong kinabuhi ug sa inyong pagsebisyo sa Ginoo. Ang inyong debosyon sa katungdanan ug inyong dili hinakog nga pagserbisyo sama ra kaimportante sa inyong mga calling mao usab kami sa among mga calling. Pinaagi sa tibuok kinabuhi nga pagserbisyo niining Simbahan, akong nakat-unan nga dili gayud kana igsapayan asa moserbisyo ang usa ka tawo. Ang gipakabanaan pag-ayo sa Ginoo mao ang giunsa pagserbisyo sa usa ka tawo.

Ako mopahayag og dakong pasalamat kang Presidente Thomas S. Monson, kinsa usa ka ehemplo kanako sa sobra 50 ka tuig. Ug sa iyang mga magtatambag, si Presidente Henry B. Eyring ug Presidente Dieter F. Uchtdorf, ako mopadayag og tumang pagdayeg. Gidayeg nako sila sa ilang pagserbisyo sa Ginoo ug sa Iyang mga propeta. Kaning duha ka maunungon nga mga sulugoon nakadawat og bag-ong mga buluhaton. Padayon silang magserbisyo nga dunay kalagsik ug pasalig. Akong gipasidunggan ug gimahal silang duha.

Usa ka talagsaon nga panalangin ang pagserbisyo sa tinuod ug buhi nga Simbahan sa Ginoo uban sa Iyang katungod ug gahum. Ang pagpahiuli sa priesthood sa Dios, naglakip sa mga yawe sa priesthood, nga bukas alang ngadto sa mga takus nga mga Santos sa Ulahing mga Adlaw mao ang labing mahinungdanon sa tanang mga espiritwal nga panalangin. Makita nato kadtong mga panalangin nga midagayday ngadto sa mga babaye, mga lalaki, ug mga bata sa tibuok kalibutan.

Atong makita ang matinud-anong mga babaye kinsa nakasabut sa gahum nga anaa sa ilang mga calling ug diha sa pagtuga [endowment] ug ubang mga ordinansa sa templo. Kini nga mga babaye nakahibalo unsaon pagsangpit sa mga gahum sa langit aron sa pagpanalipod ug paglig-on sa ilang mga bana, mga anak ug uban pang ilang gihigugma. Kini ang mga babaye nga adunay espiritwal nga kalig-on kinsa mangulo, motudlo, ug mangalagad nga walay kahadlok diha sa ilang mga calling uban sa gahum ug katungod sa Dios! Mapasalamaton kaayo ko kanila!

Sa samang paagi, atong makita ang matinud-anon nga mga lalaki kinsa mibarug sa ilang pribilehiyo isip mga tighupot sa priesthood. Migiya ug miserbisyo sila pinaagi sa pagsakripisyo diha sa pamaagi sa Ginoo uban sa gugma, pagkamabination, ug pailub. Mipanalangin, migiya, mipanalipod, ug mipalig-on sila sa uban pinaagi sa gahum sa priesthood nga ilang gihuptan. Nagdala sila og mga milagro niadtong ilang giserbisyuhan samtang gipabilin nila nga luwas ang ilang kaugalingon nga kaminyoon ug pamilya. Ilang gilikayan ang dautan ug gamhanang mga elder sa Israel. Mapasalamaton kaayo ko kanila!

Karon, mahimo ba akong mosulti sa akong kabalaka? Mao kini: Daghan ra kaayo sa atong mga kaigsoonan ang wala kaayo makasabut sa konsepto sa gahum ug katungod sa priesthood. Molihok sila sama og pagtagbaw ra sa ilang kaugalingong hinakog nga mga tinguha ug mga gana kay sa mogamit sa gahum sa Dios aron sa pagpanalangin sa Iyang mga anak.

Ako nahadlok nga daghan ra kaayo sa atong mga kaigsoonan ang wala makasabut sa mga pribilehiyo nga pweding mailaha. Ang uban natong mga igsoon, sama pananglit, molihok nga sama sa wala sila makasabut kon unsa ang priesthood ug unsa ang mahimo nila tungod niini. Tuguti ko sa paghatag ninyo og piho nga mga ehemplo.

Dili pa lang dugay, mitambong ako og sakrament miting diin usa ka bata ang hatagan og ngalan ug panalangin sa amahan. Ang batan-ong amahan nagsapnay sa iyang bililhon nga masuso, mihatag kaniya og pangalan, ug dayon mihalad og matahum nga pag-ampo. Apan wala siya mohatag sa bata og panalangin. Kadtong matahum nga batang babaye nahatagan og pangalan apan walay panalangin! Kadtong minahal nga elder wala makahibalo sa kalainan tali sa pag-ampo ug sa panalangin sa priesthood. Uban niining katungod ug gahum sa priesthood, makapanalangin unta siya sa iyang masuso, apan wala niya mabuhat. Naghuna-huna ko, “Unsa ka sayang nga kahigayunan!”

Tuguti ko sa paghatag og laing mga pananglitan. May nahibaloan kaming mga kaigsoonan kinsa mi set-apart sa mga sister isip mga lider sa Primary, Young Women, o Relief Society ug mga magtutudlo apan napakyas sa pagpanalangin kanilasa—sa pagpanalangin kanila og gahum sa pagtuman sa ilang mga calling. Mihatag lang sila og mga pahimangno ug instruksyon. Makakita kita og takus nga amahan kinsa pakyas sa paghatag sa iyang asawa ug mga anak og mga panalangin sa priesthood kon kana mao gayud ang ilang gikinahanglan. Ang gahum sa priesthood napahiuli dinhi sa yuta, ug sa gihapon daghan kaayo sa atong mga kaigsoonan ang nakasinati og makalilisang nga mga pagsulay sa kinabuhi nga wala pa gayud makadawat og tinuod nga panalangin sa priesthood. Pagkadako nga trahedya! Usa kana ka trahedya nga mahimo ra natong wagtangon.

Mga kaigsoonan, naghupot kita sa balaan nga priesthood sa Dios! Anaa kanato ang Iyang katungod sa pagpanalangin sa Iyang katawhan. Hunahunaa lang ang talagsaong pasalig nga gihatag sa Ginoo sa dihang Siya miingon, “Si bisan kinsa nga imong panalanginan Ako mopanalangin.” Atong pribilehiyo ang paglihok pinaagi sa ngalan ni Jesukristo sa pagpanalangin sa mga anak sa Dios sumala sa Iyang kabubut-on alang kanila. Mga presidente sa stake ug mga bishop, palihug siguroha nga ang matag sakop sa mga korum ubos sa inyong pagkatinugyanan makahibalo kon unsaon sa paghatag og panalangin sa priesthood—lakip na sa personal nga katakus ug espiritwal nga pagpangandam nga gikinahanglan alang sa hingpit nga pagtawag sa gahum sa Dios.

Sa tanang mga kaigsoonan nga naghupot sa priesthood, gidapit ko kamo nga magdasig sa mga miyembro sa pagtuman sa ilang mga pakigsaad, magpuasa ug mag-ampo, magtuon sa mga kasulatan, magsimba sa templo, ug magserbisyo nga may hugot nga pagtuo isip mga anak nga lalaki ug mga babaye sa Dios. Makatabang kita sa tanan nga makakita uban ang mata sa hugot nga pagtuo nga ang pagkamasulundon ug pagkamatarung makapaduol kanila kang Jesukristo, tuguti sila nga makatagamtam sa pagpakig-uban sa Espiritu Santo, ug makasinati og kalipay sa kinabuhi!

Ang timailhan sa tinuod ug buhi nga Simbahan sa Ginoo kanunay mao ang organisado, gidumala nga paningkamot sa pagpangalagad ngadto sa indibidwal nga mga anak sa Dios ug ilang mga pamilya. Tungod kay kini Iyang Simbahan, kita isip Iyang mga sulugoon mangalagad ngadto sa usa, sama sa Iyang gibuhat. Mangalagad kita sa Iyang ngalan, sa Iyang gahum ug katungod, ug uban sa Iyang mahigugmaong pagbati.

Usa ka kasinatian nako sobra 60 ka tuig na ang milabay sa Boston mitudlo kanako kon unsa gayud ka gamhanang pribilehiyo ang one-on-one nga pagpangalagad. Usa ako ka resident surgeon niadto sa Massachusetts General Hospital—nagtrabaho og maadlaw, matag ikaduhang gabii, ug duha ka tapus sa semana matag bulan. Aduna akoy limitado nga panahon alang sa akong asawa, among upat ka mga anak, ug kalihukan sa Simbahan. Bisan pa niana, ang among presidente sa branch misangon kanako sa pagbisita sa panimalay ni Wilbur ug Leonora Cox uban sa paglaum nga si Brother Cox maaktibo og balik sa mga kalihukan sa Simbahan. Siya ug si Leonora na-seal na sa templo. Apan, si Wilbur wala na moapil sulod sa daghang mga katuigan.

Ako ug ang akong kauban [companion] miadto sa ilang panimalay. Sa among pagsulod, mainiton ming giabi-abi ni Sister Cox, apan si Brother Cox daling milakaw ngadto sa laing lawak ug misira sa pultahan.

Miadto ko sa sirado nga pultahan ug nanuktok. Wala madugay, nakadungog ko og hinay nga “dayon.” Giablihan nako ang pultahan og nakita si Brother Cox nga naglingkod tupad sa han-ay sa mga panglingaw-lingaw [amateur] nga ekipo sa radyo. Niana nga gamayng lawak, nagdagkot siya og sigarilyo. Klaro kaayo, wala siya malipay sa akong pagbisita.

Mitan-aw ko sa lawak nga may katingala ug miingon, “Brother Cox, ganahan kaayo kong makakat-on og dugang mahitungod sa buhat sa panglingaw-lingaw [amatuer] nga radyo. Mahimo ka bang motudlo kanako mahitungod niini? Pasayloa ko pero dili ko magdugay karong gabhiona, pero pwedi ba kong makabalik sa sunod?”

Sa makadiyut nagduhaduha siya, ug dayon mitando. Mao kadto ang sinugdanan sa nahimong usa ka talagsaon nga panaghigalaay. Mibalik ko ug iya kong gitudloan. Misugod ako sa paghigugma ug pagtahod kaniya. Pinaagi sa sunod-sunod nga pagbisita, ang katalagsaon niining tawhana mitumaw. Nahimo kaming suod nga managhigala, mao usab ang among mga minahal nga mahangturong kauban. Dayon, sa paglabay sa panahon, ang among pamilya mibalhin. Ang lokal nga mga lider nagpadayon sa pag-amuma sa pamilyang Cox.

Mga walo ka tuig human niadtong unang pagbisita, ang Boston Stake natukod. Makatag-an mo kinsa ang ilang unang presidente sa stake? Oo! Si Brother Cox! Sa mga katuigan sukad niadto, nakaserbisyo siya isip presidente sa misyon ug presidente sa templo.

Paglabay sa katuigan, isip sakop sa Korum sa Napulog Duha, gitahasan ko sa pagtukod og bag-o nga stake sa Sanpete County, Utah. Atol sa naandan nga mga interbyu, nahimuot ko nga nasurprisa nga nagkita mi pag-usab sa akong minahal nga higala si Brother Cox! Nadasig ko nga tawagon siya isip bag-o nga patriyarka sa stake. Human nako siya ma-orden, nagginaksanay mi ug nanghilak. Ang mga tawo sa lawak nahibulong nganong kining duha ka hamtung nga mga lalaki nanghilak. Apan kami nahibalo. Ug si Sister Cox nahibalo. Mga luha kadto sa among kalipay! Sa hilum among nahinumduman ang dili katuohan nga panaw sa gugma ug paghinulsol nga nagsugod sobra 30 ka tuig na ang milabay, usa ka gabii sa ilang panimalay.

Kini nga istorya wala mahuman didto. Ang pamilya ni Brother ug Sister Cox midaghan nga naglakip sa 3 ka anak, 20 ka apo, ug 54 ka apo sa tuhod. Idugang niana ang ilang epekto sa gatusan ka mga misyonaryo, sa libuan pa diha sa templo, ug sa gatusan pa nga nakadawat sa patriyarkal nga mga panalangin sa mga kamot ni Wilbur Cox. Ang impluwensya niya ug ni Leonora magpadayong moimpluwensya sa daghang henerasyon sa tibuok kalibutan.

Ang mga kasinatian nga sama niining Wilbur ug Leonora Cox nahitabo matag semana—hinaut pa unta, kada adlaw—sulod niining Simbahan. Ang mapahinunguron nga mga sulugoon ni Ginoong Jesukristo mopatuman sa Iyang buhat, uban sa Iyang gahum ug katungod.

Mga igsoon, adunay mga pultahan nga atong maablihan, mga panalangin sa priesthood nga atong mahatag, mga kasingkasing nga atong maayo, mga palas-anon nga atong maalsa, pagpamatuod nga atong malig-on, mga kinabuhi nga atong maluwas, ug hingpit nga kalipay nga atong madala ngadto sa mga panimalay sa mga Santos sa Ulahing mga Adlaw—ang tanan tungod kay kita naghupot sa priesthood sa Dios. Kita ang mga lalaki nga “gitawag ug giandam gikan sa katukuran sa kalibutan sumala sa daan nga kasayuran sa Dios, tungod sa [atong] naghingapin nga hugot nga pagtuo,” sa pagbuhat niini nga trabaho.

Karong gabii giawhag ko kamo sa pagbarug uban kanako sa atong talagsaon nga mahangturong panag-igsoonay. Inig tawag nako sa inyong priesthood nga katungdanan, palihug og barug ug magpabiling magbarug. Mga Deacon, palihug og barug! Mga Teacher, barug! Mga Priest! Mga Bishop! Mga Elder! Mga High Priest! Mga Patriyarka! Mga Seventy! Mga Apostoles!

Karon, mga igsoon, palihug pabiling magbarug ug modungan sa atong koro sa pagkanta sa tanang tulo ka bersikulo sa “Rise Up, O Men of God.” Samtang kamo nagkanta, hunahunaa ang inyong katungdanan isip gamhanang kasundaluhan sa Dios sa pagtabang sa pag-andam sa kalibutan alang sa Ikaduha nga Pag-anhi sa Ginoo. Ato kining katungdanan. Ato kining pribilehiyo. Mopamatuod ko sa pangalan ni Jesukristo, amen.