Taha Teu Ngāue Fakafaifekau Tokoní

Ko e fānau fakalaumālie kotoa kitautolu ʻa ha Tamai Hēvani ʻofa. Naʻá Ne fekauʻi mai kitautolu ki māmani mo ha ngaahi poto mo e ngaahi talēniti kehekehe. ʻI he ngaahi meʻá ni, te tau takitaha lava ai ʻo fai ha ngāue tokoni ʻaonga ke tokoni ʻi hono langa hake e puleʻanga ʻo e ʻOtuá ʻi he māmaní. Naʻe folofola ʻa e ʻEikí, “Ko ia, kapau ʻoku mou maʻu ʻa e ngaahi holi ke ngāue maʻá e ʻOtuá ʻoku ui ʻa kimoutolu ki he ngāué” (Tōkateline mo e Ngaahi Fuakavá 4:3). ʻE lava ke maʻu ʻe he tokotaha kotoa pē ʻoku moʻui taau mo maʻu ha holi ke ngāué ha faingamālie ke uiuiʻi ko ha faifekau.

ʻOkú ke fie tokoni ki he Siasí, ki ho koló, mo ho fāmilí? ʻOkú ke fiemaʻu ha ngaahi aʻusia fakalaumālie mahuʻinga ʻi hoʻo hoko ko ha faifekaú? ʻE ala uiuiʻi koe ke ke hoko ko ha faifekau akoʻi pe ko ha faifekau ngāue tokoni. ʻOku uiuiʻi ʻe he ʻEikí ʻa e kau faifekau ngāue tokoní ke nau fakahoko ha ngaahi fatongia ʻi he ngaahi ngāueʻanga ʻa e Siasí, ʻi ha ngaahi kautaha fakakolo ʻikai fakatupu paʻanga kuo fakangofua, pea ʻi honau siteikí.

Ko e fē pē ha feituʻu te ke ʻalu ki ai, pe ko e hā hoʻo ngāué, ʻe tāpuekina lahi koe. ʻI hoʻo hoko ko e faifekau ngāue tokoní, te ke:

Muimui ʻi he Sīpinga ʻa Sīsū Kalaisí.
Fakahoko ha tokoni ʻaonga.
Ako mo lotu.
Fakatupulaki e ngaahi pōtoʻi ngāue ʻo e moʻuí.

Tokoni ʻi hono fakahoko e ngaahi fatongia fakalangi ʻo e Siasí kuo fokotuʻú.

Ngaahi Fehuʻi Angamahení

ʻE fakafuofua pē. Ko ho uiuiʻi fakafaifekaú ʻoku fakalangi! ʻOku fiemaʻu ha taimi ke maʻu ʻa e tuʻunga ʻe feʻunga lelei taha mo ho ngaahi talēnití mo ia ʻokú ke malavá, ko ia, ʻe ala fiemaʻu ke ke talitali pē. ʻOku meimei ke uike ʻe ua pe tolu mei he taimi ʻe ʻosi ai hono fakafonu ʻe hoʻo palesiteni fakasiteikí ʻa e foomu fakaongoongoleleí ki he taimi te ke maʻu ai ho uiuiʻi ngāue fakafaifekaú.

Ko e kau faifekau ngāue tokoní ʻoku nau nofo pē ʻi ʻapi mo ngāue fakalotofonua. ʻOku lahi ha ngaahi ngāue ʻe ala ʻoatu kiate koe. Ko ha sīpinga ʻeni ʻo e ngaahi ngāue ʻe ala ʻoatu kiate koé:

Hisitōlia Fakafāmilí: Tokoni ʻi he ngāue maʻá e kau pekiá ʻaki haʻo ngāue ʻi he polokalama hisitōlia fakafāmilí. ʻE lava ke kau ʻi ho uiuiʻí ʻa e fakahokohoko fakamotuʻalea ʻi he FamilySearch, tokoni ʻi he FamilySearch fakamāmani lahí, taha tokoni ʻi he senitā hisitōlia fakafāmilí, mo ha taha tokoni ʻi he laipeli hisitōlia fakafāmilí.

Seminelí mo e ʻInisititiutí: Tokoni ke ako mo moʻui ʻaki ʻe he kāingalotú ʻa e ongoongoleleí ʻaki hono poupouʻi ʻa e polokalama seminelí mo e ʻinisititiutí. Te ke lava ʻo fakahoko ha ngāue fakaʻōfisi mo ha tokoni fakakomipiuta. Te ke lava ʻo tokoni ʻi he mītia fakasōsialé mo e ngaahi meʻa ʻoku hokó. Te ke lava foki ʻo tokoni ke uki mo lesisita e kau akó.

Ngaahi Ngāue Fakauelofeá: Tokangaʻi ʻa e masivá mo e faingataʻaʻiá ʻaki haʻo ngāue ʻi ha taha ʻo e ngaahi ngāue fakauelofea kehekehe ʻa e Siasí. ʻE faitāpuekina koe ʻi hoʻo ngāue ʻi he fale tukuʻanga koloa ʻa e pīsopé, ngaahi feituʻu ngaohiʻanga koloá, fāmá, ngoue fuaʻiʻakaú, Kautaha Teseletí, pe ngaahi senitā maʻuʻanga tokoni ki he ngāué.

Ngāue Tokoni ʻi he Koló: Fai ha tokoni ki ho koló ʻo fakafou ʻi he ngaahi kautaha ʻikai fakatupu paʻangá mo e ngaahi kautaha fakapuleʻanga kuo fakangofuá. ʻE lava ke kau ʻi ho uiuiʻí ha ngāue fakalotofonua ʻi ha ngaahi feituʻu tānakiʻanga meʻakai, tukuʻanga koloa, ngaahi nofoʻanga, ngaahi senitā ki he kakai toulekeleká, ngaahi ʻapiako pea toe lahi ange ai.

Ngāue Tokoni Kuo Vahe Atu ʻe Hoʻo Pīsopé pe Palesiteni Fakasiteikí: Fai ha ngāue tokoni ki he kakai ʻi ho siteikí. Te ke lava ʻo tokoni ʻi ha ngaahi founga lahi! Hangē ko ʻení, te ke lava ʻo ʻaʻahi ki he kāingalotu toulekeleká pe kakai teʻeki Siasí ʻo fai ha tokoni ʻi honau lotoʻataʻataá pe tukui ʻapí. Te ke lava foki ʻo ako ha pōtoʻi ngāue ke vahevahe pe akoʻi, hangē ko hano fakaleleiʻi e ngaahi mīsini kosí pe ngaahi pasikalá.

ʻIo. ʻOku vahe ʻa e kau faifekau ngāue tokoní ke nau ngāue ʻi he malumalu ʻo e palesiteni fakamisiona ʻi he misiona ʻoku nau nofo aí. ʻOku ʻoatu ʻe he kau taki faifekau ngāue tokoní, ʻi he malumalu ʻo e fakahinohino ʻa e palesiteni fakamisioná, ʻa e fakahinohino fakaʻaho mo e tokoni ki he kau faifekau ngāue tokoní. ʻOku nau ngāue fakataha foki mo e palesiteni fakasiteiki ʻa e faifekau ngāue tokoni takitaha, ʻa ia ʻokú ne maʻu ʻa e ngaahi kī fakalotu ki he faifekaú.