2:3

Vuli vei Au

Elder Kim B. Clark

Ena Vitusagavulu

Dua na Yakavi vata kei Elder D. Todd Christofferson

Tukutuku vei ira na Qasenivuli ni Lotu ena VVL • 26 ni Janueri, 2018 • Valecavu e Salt Lake

Au vakavinavinaka niu mai tiko kei kemuni ena bogi nikua. Meu cavuta mada eso na vosa ni loloma kei na vakavinavinaka vei ira na qasenivuli ni tabagone tubucake tiko mai ena semineri, inisitute, kei na vuli ni lotu ena veikoronivuli ni Lotu, koliji kei na univesiti. Au lomani kemuni, kau vakavinavinakataka na cakacaka totoka o ni vakayacora tiko. Au vakavinavinakataka na nomuni matavuvale kei na veitokoni era solia tiko vei kemuni. O ni sa veivakalougatataki cecere vei ira na itabagone kei na itabagone qasecake o ni vakavulica tiko.

Na bogi nikua au via wasea kei kemuni e dua na vakasama kau nuitaka ni na veivukei ni o vakasaqara na veivuke ena nodra vulica vakatitobu na nomu gonevuli na kosipeli i Jisu Karisito. Na vulici titobu ni kosipeli, na vuli vakataucoko ni yalo kei na lomada, ena yaco ni sa vakalevutaki cake na nodra kaukauwa mana na gonevuli me ra vakayacora na tolu na ka oqo:

Tubu ena kila vakosipeli kei na kila deivaki, ena nodra vakasama kei na yalodra.
Taracake na kila oqori me tauyavutaki kina na ivalavala dodonu, ka veiganiti talega.
Tubu ena ivakarau va-Karisito kei na itovo tudei me rawa mo ni vakataka vakalevu cake sara na Tamada Vakalomalagi kei na Luvena, o Jisu Karisito.

Na Turaga o Jisu Karisito e veisureti meda vuli vakatitobu ena rua na ivolanikalou oqo. Na kena imatai Maciu 11:28–29: “Dou lako mai vei au, koi kemudou vakayadua ga sa oca ka colata na icolacola bibi, ia kau na vakacegui kemudou. Vakataqara vei kemudou na noqui vua, ka vuli vei au, niu sa yalomalua ka yalomalumalumu: dou na kunea kina na vakacegu ni yalomudou.”¹

Na kena ikarua na Vunau kei na Veiyalayalati 19:23: “Mo vuli vei au, ka muria na noqu vosa; mo vakarorogo vua na noqu Yalo Tabu, mo rawata kina na noqu vakacegu.”²

Ena tikina ruarua oqo e veisureti kina vei keda na Turaga: mo vuli vei au. Me vaka e a vakaraitaka o Elder Neal A. Maxwell ena vica na yabaki sa oti, na veisureti oqo e vakataudonutaki tu ena kaukauwa mana ni veivueti i Jisu Karisito ka sa veisureti me da vuli vakatitobu. E tukuna o Elder Maxwell: “E vuqa tu na sala matata eda rawa ni vakatautauvatataka vei keda … na ivolanikalou baleti Jisu kei na Veisorovaki, ia e umani kece tiko ena vakasama oqo: ‘Vakataqara vei kemudou na noqui vua, ka vuli vei au.’³ E dina sara, e sega ni dua tale na sala meda vuli vakatitobu kina!”⁴

Na sala duadua ga me yaco na vuli titobu e sala ni Turaga—ena ivakatakila kei na veivakauqeti ena kaukauwa ni Yalo Tabu, ena vuli kei na sasaga gumatua, kei na noda veivakavulici vakataki keda ka tiko talega kina na loloma soliwale i Jisu Karisito.⁵

E kena ibalebale oqo ni veisureti ni iVakabula “mo vuli vei au” e veiwekani na kena ibalebale e rua ka veirauti saraga ena sala e totoka ni sala ni Turaga ni vuli vakatitobu.

Na imatai ni balebale “mo vuli vei au” sai koya mo: Vulica mo kilai au.

Eda vuli me da kilai Jisu Karisito ena noda vakabauti Koya ka golevi Koya ena veivutuni, ka vakasaqara na Nona veivosoti kei na Nona kaukauwa mana ni veivueti, kei na muria Nona ivunau. Me da kilai Koya sai koya na noda sucu vakayalo Vua, ka vakila na veisau levu e lomada, ka yaco meda Luvena tagane kei na yalewa. Noda vulica meda kilai Jisu Karisito e dolava na lomada kei na noda vakasama kina veivakayarayarataki ni Yalo Tabu ka kauta mai vei keda na veivakadeitaki ni loloma ni Turaga.

Na ikarua ni balebale ni “mo vuli vei au” sai koya mo: Vuli maivei au.

E kila vinaka tu na Turaga o Jisu Karisito na veika eda gadreva. Na Nona kila kei na kila deivaki, Nona vuku kei na Nona itovo tudei, e taucoko, ka uasivi sara. Ni da luvuci keda ena ivolanikalou, eda vuli mai na Nona ivakaraitaki uasivi sara. Baleta ni sa itovo vakaraitaki saraga ni veitovo vakalou o Koya vakakina na itovo tudei, e dodonu me vakanamata vei Koya na noda vulica na kosipeli. Ni da sa yaco me da kilai Koya, e yalataka o Koya me vukei keda meda vuli vakatitobu mai vei Koya. E dina sara, e dodonu me da cakacaka ni da vakabauti Jisu Karisito me da vakayacora noda itavi, ia ni da cakava vakakina, e yalataka o Koya me solia vei keda na kila ka vakatotolotaka na noda kila deivaki ena Yalo Tabu. E yalataka o Koya me na vakalevuya na noda rawa ni cakacaka ena yalododonu ka vukei keda meda vakataki Koya vakalevu cake. Oqo na vuli titobu.

E daru kila ni dina tiko na veika oqo. Kevaka eda sa yalodina, ena vakavulici keda na Turaga ena vosa ena vosa, vunau ena vunau ena noda bula taucoko.

Kemuni na taciqu kei na ganequ, au sureti kemuni mo ni taura ki yalomuni na veisureti ni Vakabula meda vuli mai Vua. Ni o vakayacora oqo, o na vulica vakatitobu, ka o na qai vukei ira na nomu gonevuli mera vuli talega vakatitobu. Au sureti iko mo vakadinadinataka vakaimatai ni tamata ena veidina tawamudu oqo. Esa na dua na kaukauwa mana vei ira na nomu gonevuli me ra rogoci iko ni o vakadinadinataka ena veika o sotava saraga o iko ena nomu mai kila na Turaga ka vuli mai Vua.

Kau mai tinia noqu vosa ena bogi oqo ena noqu ivakadinadina vakaimatai ni tamata. Au kila ni bula tiko na Kalou kei Jisu na Karisito! Au kila na loloma ni iVakabula kei na Nona kaukauwa veivueti mai na veika au sotava kei na ivakatakila mai na Yalo Tabu. Esa dua na ka rokovi ka rekitaki meda vakavulici mai vua na Turaga o Jisu Karisito. Au vakadinadinataka ni sa dina na Nona iyalayala. Na vuli titobu e dina, ka sa noda madigi ka nodra madigi talei na noda gonevuli vakamareqeti. Au sa vakadinadinataka oqo ena yaca i Jisu Karisito, emeni.