ចូររៀននឹងខ្ញុំចុះ

អែលឌើរ គីម ប៊ី ក្លាក

ក្នុងពួកចិតសិបនាក់

ជំនួបពេលល្ងាចជាមួយនឹងអែលឌើរ ឌី ថត គ្រីស្តូហ្វឺសិន

សុន្ទរកថាទៅកាន់គ្រូបង្រៀនខាងសាសនា ស៊ី.អ៊ី.អេស•ថ្ងៃទី ២៦ ខែ កុម្ភៈ ឆ្នាំ ២០១៨•រោងឧបោសថទីក្រុងសលត៍ លេក

ខ្ញុំមានអំណរគុណដែលបាននៅជាមួយនឹងបងប្អូននារាត្រីនេះ ។ ខ្ញុំសូមផ្ដល់នូវក្ដីស្រឡាញ់ និងអំណរគុណចំពោះគ្រូបង្រៀននៃជំនាន់កំពុងពេញវ័យនៅ ក្នុងថ្នាក់សិក្ខាសាលា ថ្នាក់វិទ្យាស្ថាន និងការអប់រំខាងសាសនានៅ ក្នុងសាលារៀន មហាវិទ្យាល័យ និងសាកលវិទ្យាល័យទាំងឡាយរបស់សាសនាចក្រ ។ ខ្ញុំស្រឡាញ់បងប្អូន ហើយខ្ញុំមានអំណរគុណចំពោះកិច្ចការដ៏អស្ចារ្យរបស់បងប្អូន ។ ខ្ញុំក៏មានអំណរគុណចំពោះក្រុមគ្រួសារបងប្អូន និងការគាំទ្រដែលពួកគេបានមានចំពោះបងប្អូនផងដែរ ។ បងប្អូនគឺជាពរជ័យដ៏មហិមាមួយចំពោះយុវវ័យ និងយុវជម្ឈិមវ័យដែលបងប្អូនបង្រៀន ។

នាយប់នេះ ខ្ញុំចង់ចែកចាយគំនិតមួយជាមួយបងប្អូន ដែលខ្ញុំសង្ឃឹមថានឹងជាប្រយោជន៍ នៅពេលបងប្អូនព្យាយាមជួយដល់សិស្សឲ្យរៀនកាន់តែជ្រៅជ្រះអំពីដំណឹងល្អរបស់ព្រះយេស៊ូវគ្រីស្ទ ។ ការរៀនសូត្រដំណឹងល្អជ្រៅជ្រះ ជាការរៀនសូត្រចេញមកពីដួងចិត្ត និងព្រលឹងទាំងមូល ដែលវាកើតមាននៅ ពេលសិស្សរបស់យើងចម្រើនអំណាចរបស់ពួកគេដើម្បី ធ្វើនូវរឿងបីយ៉ាង ៖

រីកចម្រើននៅក្នុងចំណេះដឹង និងការយល់ដឹងអំពីដំណឹងល្អក្នុងគំនិត និងដួងចិត្តរបស់ពួកគេ ។
ស្ថាបនាចំណេះដឹងនោះដើម្បីអភិវឌ្ឍសមត្ថភាពដើម្បីធ្វើសកម្មភាពដ៏មានប្រសិទ្ធភាព និងសុចរិត ។
រីកចម្រើនខាងអាកប្បកិរិយា និងអត្តចរិតដូចជាព្រះគ្រីស្ទ ដើម្បីប្រែក្លាយកាន់តែដូចជាព្រះវរបិតាសួគ៌ និងព្រះរាជបុត្រាទ្រង់ ព្រះយេស៊ូវគ្រីស្ទ ខ្លាំងឡើងៗ ។

ព្រះអម្ចាស់ ព្រះយេស៊ូវគ្រីស្ទ បានផ្ដល់ការអញ្ជើញមួយឲ្យរៀននៅក្នុងបទគម្ពីរពីរនេះឲ្យបានជ្រៅជ្រះ ។ ទីមួយ គឺម៉ាថាយ ១១:២៨-២៩ ៖ « អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯ ខ្ញុំ ខ្ញុំនឹងឲ្យអ្នករាល់គ្នាឈប់សម្រាក ។ ចូរទទួលនឹមខ្ញុំ ហើយរៀននឹងខ្ញុំចុះ ដ្បិតខ្ញុំស្លូត ហើយមានចិត្តសុភាព នោះអ្នករាល់គ្នានឹងបានសេចក្តីសម្រាកដល់ព្រលឹង » ។^១

ទីពីរ គឺ គោលលទ្ធិ និង សេចក្តីសញ្ញា ១៩:២៣ ៖ «ចូររៀនអំពីយើង ហើយស្ដាប់តាមព្រះបន្ទូលទាំងឡាយរបស់យើងចុះ ចូរដើរក្នុងភាពស្លូតបូតនៃព្រះវិញ្ញាណរបស់យើង នោះអ្នកនឹងបានសេចក្ដីសុខសាន្តក្នុងយើង » ។^២

នៅក្នុងបទគម្ពីរទាំងពីរនេះ ព្រះអម្ចាស់បានធ្វើការអញ្ជើញ ៖ ឲ្យរៀននឹងខ្ញុំចុះ ។ ដូចជា អែលឌើរ ណែល អេ. ម៉ាកស្វែល បានកត់ចំណាំអស់ជាច្រើនឆ្នាំកន្លងទៅអំពីការអញ្ជើញនេះថា គឺជាចំណុចសំខាន់នៅក្នុងព្រះចេស្ដាដ៏ប្រោសលោះរបស់ព្រះអម្ចាស់ ព្រះយេស៊ូវ គ្រីស្ទ និងវាជាការអញ្ជើញ ឲ្យរៀនសូត្រឲ្យជ្រៅជ្រះ ។ អែលឌើរ ម៉ាកស្វែល បានមានប្រសាសន៍ថា ៖ « មានវិធីជាក់លាក់ជាច្រើនដែលយើងអាចប្រៀបប្រដូចទៅនឹងខ្លួនយើង…បទគម្ពីរអំពីព្រះយេស៊ូវ និង ដង្វាយធួន ប៉ុន្តែទាំងអស់នោះគឺស្ថិតនៅក្នុងរង្វង់នៃគំនិតនេះថា ‹ ចូរទទួលនឹមខ្ញុំ ហើយរៀននឹងខ្ញុំចុះ › ។^៣ តាមពិត ពុំមានផ្លូវឯណាទៀតដើម្បីរៀនសូត្រជ្រៅជ្រះទេ ! »^៤

វិធីតែមួយគត់ដើម្បីរៀនសូត្រជ្រៅជ្រះ គឺតាមមាគ៌ារបស់ព្រះអម្ចាស់—តាមរយៈវិវរណៈ និង ការបំផុសគំនិតតាមរយៈព្រះចេស្ដានៃព្រះវិញ្ញាណបរិសុទ្ធ ដោយសារការសិក្សាដ៏ឧស្សាហ៍ព្យាយាម និងកិច្ចខិតខំប្រឹងប្រែងយ៉ាងសកម្ម និងតាមរយៈការបង្រៀនគ្នាទៅវិញទៅមក ដែលបានចូលរួមដោយព្រះគុណនៃព្រះយេស៊ូវគ្រីស្ទ ។^៥

នេះមានន័យថា ការអញ្ជើញរបស់ព្រះអង្គសង្គ្រោះដើម្បី « រៀននឹងខ្ញុំចុះ » មានអត្ថន័យទំនាក់ទំនងពីរយ៉ាងដែលឆ្លើយតបដោយរបៀបដ៏ល្អមួយចំពោះ មាគ៌ារបស់ព្រះអម្ចាស់ដើម្បីរៀនសូត្រជ្រៅជ្រះ ។

អត្ថន័យទីមួយនៃ « រៀននឹងខ្ញុំចុះ » គឺ ៖ រៀនស្គាល់ខ្ញុំ ។

យើងរៀនស្គាល់ព្រះយេស៊ូវគ្រីស្ទ តាមរយៈការមានជំនឿទៅលើទ្រង់ និងការបែរទៅរកទ្រង់ដើម្បីប្រែចិត្ត ស្វែងរកការអភ័យទោសពីទ្រង់ និងព្រះចេស្ដាប្រោសលោះរបស់ទ្រង់ ព្រមទាំងរក្សាបទញ្ញត្តិរបស់ទ្រង់ ។ ដើម្បីស្គាល់ទ្រង់គឺត្រូវកើតពីទ្រង់ខាងវិញ្ញាណ មានបទពិសោធន៍នៃការផ្លាស់ប្ដូរដួងចិត្តដ៏ធំ ការក្លាយជាបុត្រា និងបុត្រី របស់ទ្រង់ ។ ការរៀនស្គាល់ព្រះយេស៊ូវគ្រីស្ទ បើកដួងចិត្ត និងគំនិតរបស់យើងទៅកាន់ឥទ្ធិពលនៃព្រះវិញ្ញាណបរិសុទ្ធ ហើយនាំការអះអាងពីក្ដីស្រឡាញ់របស់ព្រះអម្ចាស់ចំពោះយើង ។

អត្ថន័យទីពីនៃ « រៀននឹងខ្ញុំចុះ » គឺ ៖ រៀនពីខ្ញុំ ។

ព្រះអម្ចាស់ ព្រះយេស៊ូវគ្រីស្ទ ដឹងយ៉ាងច្បាស់នូវអ្វីដែលយើងត្រូវការ ។ ចំណេះដឹង និងការយល់ដឹងរបស់ទ្រង់ ព្រះបញ្ញាញាណ និង ចរិតលក្ខណៈរបស់ទ្រង់ គឺល្អឥតខ្ចោះទាំងស្រុង ។ នៅពេលយើងជ្រមុជខ្លួនយើងទៅ ក្នុងបទគម្ពីរ នោះ យើងរៀនមកពី គំរូដ៏ឥតខ្ចោះរបស់ទ្រង់ ។ ដោយសារតែទ្រង់គឺជាតួអង្គនៃអាកប្បកិរិយា និងចរិតលក្ខណៈជាព្រះ នោះការសិក្សាដំណឹងល្អ របស់យើងគួរតែផ្ដោតទៅលើទ្រង់ ។ នៅពេលយើងមកស្គាល់ទ្រង់ នោះទ្រង់សន្យាថានឹងជួយយើងរៀនកាន់តែជ្រៅជ្រះអំពី ទ្រង់ ។ ប្រាកដណាស់ យើងត្រូវតែធ្វើសកម្មភាពដោយសេចក្ដីជំនឿទៅលើព្រះយេស៊ូវគ្រីស្ទ ដើម្បីធ្វើចំណែករបស់យើង ប៉ុន្តែនៅ ពេលយើងធ្វើ នោះទ្រង់សន្យានឹងប្រទានចំណេះដឹង និងដាស់ការយល់ដឹងរបស់យើងតាមរយៈព្រះវិញ្ញាណបរិសុទ្ធ ។ ទ្រង់សន្យានឹងតម្កើងសមត្ថភាពរបស់យើងសម្រាប់សកម្មភាពសុចរិត ហើយជួយយើងកាន់តែប្រែក្លាយដូចជាទ្រង់ ។ នេះគឺជារៀនសូត្រដ៏ជ្រៅជ្រះ ។

បងប្អូន និងខ្ញុំដឹងថារឿងទាំងនេះពិត ។ បើយើងស្មោះត្រង់ ព្រះអម្ចាស់នឹងបង្រៀនយើងមួយបន្ទាត់ម្ដងៗ មួយសិក្ខាបទម្ដងៗនៅក្នុងជីវិតរបស់យើង ។

បងប្អូនប្រុសស្រីជាទីស្រឡាញ់ ខ្ញុំសូមអញ្ជើញបងប្អូនឲ្យទទួលយកការអញ្ជើញ របស់ព្រះអង្គសង្គ្រោះដាក់ក្នុងចិត្តដើម្បីរៀនអំពី ទ្រង់ ។ នៅពេលបងប្អូនធ្វើដូច្នោះ បងប្អូននឹងរៀនកាន់តែជ្រៅជ្រះ ហើយបងប្អូននឹងជួយសិស្សឲ្យរៀនកាន់តែជ្រៅជ្រះផងដែរ ។ ខ្ញុំក៏សូមអញ្ជើញបងប្អូនឲ្យថ្លែងទីបន្ទាល់ផ្ទាល់ខ្លួនអំពីសេចក្ដីពិតដ៏អស់កល្បជានិច្ចទាំងនេះ ។ វានឹងមានពេញដោយអំណាចដល់សិស្សរបស់បងប្អូន ពេលពួកគេស្ដាប់ឮ អ្នកថ្លែងទីបន្ទាល់អំពីបទពិសោធន៍ផ្ទាល់ខ្លួនក្នុងការស្គាល់ព្រះអម្ចាស់ និងការរៀនសូត្រអំពីទ្រង់ ។

ហើយដូច្នេះ ខ្ញុំសូមបញ្ចប់សុន្ទរកថារបស់ខ្ញុំនៅយប់នេះជាមួយនឹងសាក្សីផ្ទាល់ខ្លួនខ្ញុំ ។ ខ្ញុំដឹងថា ព្រះមានព្រះជន្មរស់ ហើយថាព្រះយេស៊ូវ គឺជាព្រះគ្រីស្ទ ! ខ្ញុំស្គាល់សេចក្ដីស្រឡាញ់របស់ព្រះអង្គសង្គ្រោះ និងព្រះចេស្ដាប្រោសលោះរបស់ទ្រង់ចេញមកពីបទពិសោធន៍ផ្ទាល់ខ្លួនខ្ញុំ និងដោយវិវរណៈតាមរយៈព្រះវិញ្ញាណបរិសុទ្ធ ។ វាគឺការរាបសារ និងអំណរដើម្បីត្រូវបានបង្រៀនដោយព្រះអម្ចាស់ ព្រះយេស៊ូវគ្រីស្ទ ។ ខ្ញុំសូមថ្លែងទីបន្ទាល់ថា ការសន្យារបស់ទ្រង់គឺជាការពិត ។ ការរៀនសូត្រជ្រៅជ្រះ គឺជាការពិត ហើយវាគឺជាឯកសិទ្ធិរបស់យើង និងជាឯកសិទ្ធិរបស់សិស្សដ៏មានតម្លៃរបស់យើង ។ ខ្ញុំ សូម ធ្វើ ទីបន្ទាល់ដូច្នោះ នៅ ក្នុង ព្រះនាម នៃ ព្រះយេស៊ូវគ្រីស្ទ អាមែន ។