Aoao mai ia te A’u

Elder Kim B. Clark

O Le Fitugafulu

O Se Afiafi ma Elder D. Todd Christofferson

Saunoaga i Faiaoga o Mataupu Faalelotu o le OAE • 26 Ianuari, 2018 • Tapeneko o Sate Leki

Uso e, ou te faafetai ina ua tatou mafuta i le po nei. Sei ou ofoina atu lava se upu o le alofa ma le talisapaia i faiaoga o le tupulaga faia’e i le seminare, inisitituti, ma aoaoga faalelotu i aoga a le Ekalesia, kolisi, ma iunivesite. Ou te alofa ia te outou, ma ou faafetai mo la outou galuega matagofie. Ou te faafetai i o outou aiga ma la latou lagolago ia te outou. O outou o se faamanuiaga tele i le autalavou ma talavou matutua o loo outou faiaoga ai.

O le po nei, ou te manao e faasoa atu se mafaufauga ia te outou lea ua ou faamoemoe o le a aoga a o outou saili e fesoasoani atu ia outou tagata aooga ia loloto lo latou aoaoina i le talalelei a Iesu Keriso. O le loloto o le aoaoina i le talalelei, aoaoina o le loto atoa ma le agaga, e tupu pe a faateleina e a tatou tagata aooga i lo latou malosiaga le faia o mea e tolu:

Ia tuputupu ae i le iloa ma le malamalama, faatasi ma o latou mafaufau ma loto.
Fausia i luga o lena iloa e atia’e ai le gafatia mo faatinoga mataalia ma amiotonu.
Ia tuputupu ae i uiga faaleatua ma amioga faaKeriso ia saga avea atili ai e faapei o le Tama Faalelagi ma Lona Alo, o Iesu Keriso.

Ua tuuina mai e le Alii o Iesu Keriso se valaaulia e aoao loloto i ni mau se lua. O le mau muamua o le Mataio 11: 28--29: ”Ia outou o mai ia te au, o outou uma o e tigaina ma mafatia i avega, o a’u foi e malolo ai outou. “Ia outou amoina la’u amo, ma ia outou faaa’oa’o ia te a’u, aua o a’u lē agamalu ma le loto maulalo, ona maua lea e outou o le malologa mo outou agaga.”¹

O le lona lua o le Mataupu Faavae ma Feagaiga 19:23: “Aoao mai ia te a’u, ma faalogo mai i a’u upu; savali i le agamalu o lo’u Agaga, ma o le a e maua ai le filemu ia te a’u.”²

I nei fuaitau uma e lua ua tuuina mai ai e le Alii le valaaulia: aoao mai ia te au. E pei ona ta’ua e Elder Neal A. Maxwell i le tele o tausaga ua mavae, o lenei valaaulia e totonugalemu i le mana togiola o Iesu Keriso, ma o se valaaulia ia loloto le aoaoina. Na saunoa Elder Maxwell: “E tele auala patino e mafai ona tatou faatatau ai ia i tatou lava … mau e uiga ia Iesu ma le Togiola, ae o mau uma lava o loo aofia i lalo o le faamalumaluga faalemanatu faavae: ‘Ia outou amoina la’u amo, ma ia outou faaa’oa’o ia te au.’³ O le mea moni, e leai lava se isi auala e aoao loloto ai!”⁴

Na pau lava le ala e aoao loloto ai o le ala a le Alii---e ala i faaaliga ma musumusuga e ala mai i le mana o le Agaa Paia, e ala i le suesue atoatoa ma le filiga ma taumafaiga, ma ala mai i le aoao atu e le tasi le isi e o faatasi ma le alofa tunoa o Iesu Keriso.⁵

O lona uiga o le valaaulia a le Faaola e “aoao mai ia te au” e lua ona faauigaga e tutusa lea e fesootai i se ala matagofie i le ala a le Alii e aoao loloto ai.

O le faauigaga muamua o le “aoao mai ia te a’u” o le: Aoao ia iloa a’u.

Tatou te aoao ia iloa Iesu Keriso e ala i le faatuatua ia te Ia ma liliu atu ia te Ia ia salamo, sailia o Lana faamagaloga ma Lona mana togiola, ma tausi Ana poloaiga. Ina ia iloa o Ia o le fanauina lea faaleagaga ia te Ia, ia iloa se suiga tele o le loto, ma avea o Ona atalii ma afafine. O le aoao ia iloa Iesu Keriso e tatala ai o tatou loto ma mafaufau i le tosinaga a le Agaga Paia ma aumaia ai ia i tatou le faamautinoaga o Lona alofa.

O le faauigaga lona lua o le “aoao mai ia te a’u” o le: Aoao ia te a’u.

Ua silafia lelei e le Alii o Iesu Keriso mea tatou te manaomia. O Lona silafia ma le malamalama, o Lona atamai ma Lana amio, e atoatoa lelei uma, e atoa. A o tatou faatofu i tatou lava i tusitusiga paia, tatou te aoao mai Lana faataitaiga atoatoa lelei. Ona o Ia o le tino mai o uiga faaleatua uma ma amioga, o lea e tatau ai ona taulai atu ia te Ia la tatou suesuega o le talalelei. A oo ina tatou iloa o Ia, ua Ia folafola mai e fesoasoani mai ia i tatou e aoao loloto mai ia te Ia. Ioe, e tatau ona tatou galulue ma le faatuatua ia Iesu Keriso ia faia la tatou pitolaau, ae a o tatou faia, ua Ia folafola mai e aumai ia i tatou le iloa ma segia lo tatou malamalama e ala i le Agaga Paia. Ua Ia folafola mai e faalauteleina lo tatou gafatia mo le faatinoga amiotonu ma fesoasoani ia i tatou ia avea atili e faapei o Ia. O le aoaoina loloto lea.

Ou te iloa e moni nei mea. Afai tatou te faamaoni, o le a aoao mai i tatou e le Alii i lea fuaiupu ma lea fuaiupu, o lea mataupu ma lea mataupu i o tatou olaga atoa.

O’u uso e ma tuafafine pele, ou te valaaulia outou e uai atu i le valaaulia a le Faaola e aoao mai ia te Ia. A outou faia, o le a outou aoaoina loloto, ma o le a outou fesoasoani i a outou tagata aooga e aoaoina loloto foi. Ou te valaaulia foi outou e te molimau atu oe lava e uiga i nei upumoni e faaavavau. O le a matuai mamana lava mo au tagata aoga le faalogo atu ia te oe o e molimau atu i ou lava aafiaga i le iloa ai o le Alii ma aoao mai ia te Ia.

Ma ou te faaiu atu i le po nei i la’u lava molimau patino. Ou te iloa o loo soifua le Atua ma ou te iloa o Iesu o le Keriso! Ou te iloa le alofa o le Faaola ma Lona mana togiola mai o’u lava aafiaga ma faaaliga e ala mai i le Agaga Paia. O se agaga maualalo lava ma le olioli le aoaoina e le Alii o Iesu Keriso. Ou te molimau atu e moni Ana folafolaga. O le aoaoina loloto e moni ia ma o so tatou avanoa e le laumaua ma o le avanoa foi e le laumaua a o tatou tagata aooga pele. Ou te molimau atu ai i le suafa o Iesu Keriso, amene.