E Tumau Upumoni

Elder D. Todd Christofferson

O Le Korama a Aposetolo e Toasefululua

O Se Afiafi ma Elder D. Todd Christofferson

Saunoaga i Faiaoga o Mataupu Faalelotu a le OAE • 26 Ianuari, 2018 • Tapeneko i Sate Leki

Ou te faafetai i lo’u Tama Faalelagi mo le avanoa le laumaua e mafuta ai ma outou i lenei po. Ou te faafetai ia Elder Kim B. Clark, ma Uso Chad H. Webb. E loloto lo’u faamemelo ia i latou uma o e sa ta’ua i lenei afiafi po o e foi o loo tusia i le polokalama. E loloto lo’u talisapaia mo le Ofisa mo Aoga a le Ekalesia, mo seminare ma inisitituti. E loloto foi lo’u faamemelo mo i latou uma o e o loo auauna atu—o paaga, o volenitia, o i latou uma o loo saofaga. Ou te talitonu o le tautua o loo outou tuuina atu atonu o mea silisili ia ua ofoina atu e le Ekalesia i ona tagata, aemaise i tupulaga faia’e taitasi, ma ou te faafetai atu ai ia te outou.

Ou te fia talanoa atu ia te outou i lenei afiafi e uiga i upumoni. Ua tuuto atu le Ofisa o Aoga a le Ekalesia i le aoaoina atu ma le totoina pea o le upumoni, aemaise o na uluai upumoni taua o loo avea ma faavae o le ola e faavavau. Sa taua pea lava i taimi uma e le gata ina aoao atu ae faapea foi i le puipuia o le upumoni, ma i o tatou taimi ua foliga mai ua faatuputeleina lena manaoga.

Tatou te manatua uma le talanoaga ina ua molia Iesu i luma o Pilato ma ta’utino atu ai na sau o Ia i le lalolagi e “molimau atu i le upumoni. O i latou uma lava o i le upumoni,” na fetalai ai Iesu, “e faalogo mai i latou i lo’u leo.”¹ Na tali Pilato e foliga mai e aamu, “Po o le a le upumoni?”² Na manino o se fesili faafiapoto. Atonu sa lei talitonu o ia o loo i ai upumoni, pe atonu foi i le mavae ai o se olaga o tapulepulega faaupufai, sa leai sona faamoemoe pe mata na te maua le mea moni a’ia’i. Ae ui o lea, o lana fesili o se fesili lelei, o se fesili e ao ona tatou mafaufau i ai.

I Lana tatalo maoae o le faatoga i le Talisuaga Mulimuli, na faamautu ai e le Alii o le afioga a le Tama o le upumoni.³ Na Ia tautino atu e faapea o le faamaumauga po o le molimau a le Agaga Paia e moni ia, ma “o le upumoni e mau e faavavau ma faavavau lava.”⁴ Ua taufai tautino ai o le Tama ma le Alo “e tumu i le alofa tunoa ma le upumoni.”⁵ E ala mai i faaaliga i le Perofeta o Iosefa Samita, na tuuina mai ai e le Faaola e peiseai o le faauigaga aupito iloga o le upumoni: “O le upumoni o le iloa lea o mea e pei ona i ai, ma e pei ona sa i ai, ma e pei ona o le a oo mai.”⁶

E ui ina tuusao mai lena faauigaga, ae o lona faaataataga e faapea, a aunoa ma le fesoasoani faalelagi, o le malamalama o le tagata soifua e uiga i le upumoni e le mafai ona faalautele naua. Sa faamalamalama mai e le polofesa ua malolo faamamaluina o le BYU o Chauncey C. Riddle faapea:

“E leai se tagata ola e mafai ona maua soo se mea, ae ua na o sina momoimea itiiti o le upumoni e uiga i mea o i ai, sa i ai, ma o le a i ai. Ma talu ai tatou te malamalama e ala i sootaga, i le avea ai o i tatou o ni tagata ola e le mafai ona tatou malamalama atoatoa i lena momoimea [o le upumoni] aua ua i ai i lena momoimea lona taua atoatoa sei vagana ua fesootai i isi mea uma ua tuanai, [taimi nei] ma le lumanai o isi mea uma.

“O le upumoni la o se mea ua malamalama atoatoa i ai na o atua, o i latou e silisili ese ma o e vaai ma iloa mea uma i le tuanai, taimi nei ma le lumanai.”⁷

Ua faaauau le tala a Polofesa Riddle:

“Ina ia laveai mai le tagata mai lona tomai utiuti e iloatino ai le upumoni, o lea ua tuuina mai ai e lo tatou Tama ia i tatou lo tatou Faaola o Iesu Keriso, ma le Agaga Paia. Ua tuu mai e lo tatou Faaola i alii ma tamaitai uma e fananau mai i lenei lalolagi le Malamalama o Keriso, lea e mafai ai ona latou iloa le lelei mai le leaga.… Afai e talia ma fiafia le tagata i le Malamalama o Keriso, ma aoao e faaaoga o se masani e iloatino ai le lelei mai le leaga, o le a saunia o ia e maua le molimau a le Agaga Paia. … O se tagata ua i ai [le meaalofa o le Agaga Paia] ua i ai le aia tatau mo le mafutaga faifaipea ma le Agaga Paia. Soo se tagata e maua lena mafutaga faifaipea e maua ia upumoni uma. ‘Ma o le mana o le Agaga Paia e mafai ona outou iloa ai le moni o mea uma lava [Moronae 10:5].’”⁸

Sa faamautuina e le Faaola lenei mea i se fetalaiga i le Talisuaga Mulimuli: “A e a maliu mai o ia, o le Agaga lea e tupu mai ai le upumoni, e taitai e ia ia te outou i upumoni uma.”⁹ Ia Iosefa Samita sa Ia faaopoopo atu, “O ia o le tausia ana poloaiga, e maua e ia le upumoni a le malamalama, seia oo ina faamamaluina o ia i le upumoni ma iloa e ia mea uma.”¹⁰

O lea la, o le mea muamua lava e tatau ona tatou malamalama i ai e uiga i le upumoni, o le, o se malamalama i le upumoni i soo se fuataga iloga e moomia ai le fesoasoani faalelagi, a le ala mai i le Malamalama o Keriso po o le fesoasoani a le Agaga Paia. E tusa ai ma lo tatou malosiaga utiuti faaletagata soifua ma punaoa, afai e le lagolagoina i tatou i faaaliga, e le mafai lava ona tatou ausia se malamalama loloto o mea e pei ona sa i ai, o i ai, ma o le a i ai, ma pe faapefea ona fesootai soo se mea se tasi i isi mea uma sa i ai, o i ai, ma o le a i ai.

E ui o lea, sa fautuaina e le Alii le Perofeta o Iosefa Samita e “suesue ma aoao, ma faamasani i tusi lelei uma, ma gagana, tautala, ma tagata.”¹¹ Ma ua Ia faalautele mai foi lena lava fautuaga ia i tatou uma, “ia outou saili mai totonu o tusi sili ona lelei upu o le poto [pe e mafai ona tatou faapea “upumoni”]; saili i le aoaoina, e ala lava lea i le suesue ma le faatuatua foi.”¹² Ma e ao ina tatou faia lenei mea “ma le filiga,”¹³na ia fetalai mai ai. E tatau ona tatou tuu i ai la tatou taumafaiga silisili, ma o lena taumafaiga silisili e aofia ai le faatinoina o le faatuatua—ole atu, saili, ma tuitui atu ma le mataalia ina ia tatala mai ia i tatou le upumoni ma le malamalama lea e sau mai le Atua.¹⁴ Aoaoina loloto, e pei ona sa faamatalaina e Elder Clark i le po nei.

Ou te talitonu o le tele lava o upumoni, pe afai e le o upumoni uma, e mafai ona tatou mauaina e mai le fesoasoani faalelagi, pe tatou te iloaina pe leai foi. I le tusiga e uiga i le Malamalama o Keriso po o le Agaga o Keriso, sa ta’ua ai e Peresitene Boyd K. Packer:

“E mafai e le Agaga o Keriso ona faamalamalama le tagata fatufatu, le saienitisi, le valiata, le vanefaatagata, le fatupese, le tagata faafiafia, le tusiatatosi, le tusitala e faia ni mea sili, pe musuia foi mo le manuia ma le lelei o tagata uma.

“O lea Agaga e mafai ona uunaia le faifaatoaga i lona fanua ma le faifaiva i luga o lona vaa. E mafai ona ia musuia le faiaoga i le potuaoga, le faifeautalai i le tuuina atu o lana lesona. E mafai ona ia musuia le tagata aoao o le e faalogo. Ma le mea e sili ona taua, e mafai ona musuia le tane ma le ava, ma le tama ma le tina.”¹⁵

O i tatou, mai tagata uma, e tatau ona lotomaualalo ma lava le faamaoni e faailoa atu e le gata ina oo mai le faaolataga e ala i le alofa tunoa “pe a uma mea uma e mafai ona tatou faia,” ae o lo tatou malamalama i le upumoni e faapena foi ona oo mai e ala i le alofa tunoa “pe a uma mea uma e mafai ona tatou faia.”¹⁶ “Aua o le afioga a le Alii o le upumoni lea, ma o soo se mea ua moni, o le malamalama lea, ma o soo se mea ua malamalama, o le Agaga lea, o le Agaga lava lea o Iesu Keriso.”¹⁷

Sei ou faitauina atu mai le tautinoga a le Faaola, “e mau le upumoni e faavavau ma faavavau lava.”¹⁸ I le vaega 93 o le Mataupu Faavae ma Feagaiga, o loo tautino mai ai e le Alii, “O upumoni uma lava ua tu le faalagolago i le tulaga ua tuu i ai e le Atua, e gaoioi mo ia lava, e pei foi o atamai uma; a na le faapea, ua leai se olaga.”¹⁹ Ou te malamalama o le uiga o lenei mea e faapea, o upumoni uma, e aofia ai le upumoni o loo pulea ai lo tatou lalolagi i le taimi nei, e tumaoti ma e ese mai. E le aafia i mea ou te manao ai po o o outou manatu. E tutoatasi mai soo se taumafaiga e pulea pe suia ai. E le mafai ona tuleia pe tosinaina i soo se auala. O se mea moni ua mausali.

Na fetalai mai le Faaola e faapea a aunoa ma lenei mea moni ua mausali o le upumoni, “ua leai se olaga.”²⁰ Ma ou te talitonu o le mea lena sa mafaufau i ai Liae ina ua ia aoao mai:

“Afai tou te fai mai ua leai se tulafono [o le tulafono o loo faaaogai ii e uiga tutusa ma le upumoni, le upumoni e ‘tu le faalagolago i le tulaga ua tuu i ai e le Atua’], o le a outou fai mai foi ua leai se agasala [agasala o le le usitai lea i le tulafono]. Afai tou te fai mai ua leai se agasala, o le a outou fai mai foi ua leai se amiotonu [amiotonu o le usitai lea i le tulafono; i se isi faaupuga, a aunoa ma le tulafono po o le upumoni ua leai se mea e usitai i ai pe le usitai foi i ai]. Ma afai e leai se amiotonu e leai foi se fiafia [o le fiafia o le taunuuga lea o le amiotonu]. Ma afai e leai se amiotonu po o se fiafia, ua leai se faasalaga po o se pagatia [faasalaga ma le pagatia o le taunuuga lea o le agasala]. Ma afai e leai nei mea, ua leai se Atua. Ma afai ua leai se Atua, ua leai i tatou, po o le lalolagi; ona semanu po ua leai se foafoaga o mea, e leai foi se gaoioi po o le faagaoioi; o le mea lea, semanu po ua mou atu mea uma.”²¹

O lona uiga, o nei mea, ua tatou iloa ai o loo i ai le upumoni, o loo avea ma sui o le mea moni mausali ma le le mafaafitia, e tusaoloto, le tele o le upumoni e mafai e tagata soifua ona iloatino e matua itiiti lava, ma o lea tatou te faalagolago ai i le fesoasoani a faaaliga mai le lagi e aoao ai “le moni o mea uma,”²² ma e faalagolago i tatou ma le Atua i le upumoni e gaoioi ai ma fatufatu, “a na le faapea ua leai se olaga.”²³ Ua tatou aoao foi mai isi mea e le feteenai le upumoni ma le upumoni, ae ia mafai ona taaofai upumoni uma i le mea atoa e tasi.

Ia, o fea o tatou i ai i tatou lava i le lalolagi i ona po nei, a o tatou saili e aoao atu ma faamautu le upumoni aemaise ai le upumoni faaleagaga?

I le tele o le lalolagi, o mafaufauga fefāiāa’i ua avea ma filosofia ua fuaaoina. O le fefāiāa’i o lona uiga ia te au, o le vaaiga faapea o upumoni e tatau pe faamaoni e fefāiāa’i, e faalagolago i uiga faaalia ma lagona o i latou o e e umiaina, ma e leai se tasi e mafai ona faamasinoina le aoga o le “upumoni” a se isi tagata. Tou te faalogo i le tele o tautalaga i nei aso e uiga i “la’u upumoni” po o “lana upumoni”. O lenei ituaiga o mafaufauga ua faamatalaina e le tusitala o David Brooks, a o ia toeiloiloina le tusi o le Lost in Transition na tusia e Nortea Dame, Christian Smith (sociologist) ma isi. Ua lipotia mai e Brooks:

“O le tali masani, lea na fefo’ifo’ia’i ai le toatele [o tagata na faatalanoaina eSmith], e faapea o filifiliga tonu ua na o se mataupu o le tofo faaletagata lava ia. ‘E patino lava,’ o le tali masani ia a tagata tetee. ‘E pule lava le tagata ia. O ai a’u e fai atu ai?’

“O le teena o le gauai atu i le pule e aunoa ma se fesili, ua toatele ai tupulaga talavou ua faano’uno’u atu i isi mea matautia: ‘O le a ou faia le mea ou te manatu ou te fiafia ai pe ou te lagonaina. E le o i ai se isi lava ala ou te iloa ai se mea e fai vagana ai mea ou te lagonaina i lo’u loto.’

“E toatele sa vave ona talanoa e uiga i o latou lagona moni ae mumusu e faafesootai nei lagona i soo se mafaufauga e lautele atu e uiga i se auivi po o se matafaioi moni e tutusa ai. E pei ona faaupu e se tasi, ‘O le uiga o la’u tala, ou te matea o le mea e faasa’o ai se mea o lo’u lava ia lagona e uiga i ai. Ae e eseese lagona o tagata, o le mea la lea, e le mafai ona ou tautala e fai ma sui o se isi lava tagata pe o le fea e sa’o ma po o fea foi e sese.’”²⁴

Ou te manatu o le a outou ioeina le faapea o le filosofia lelei ae le mautinoa tonu ua afua ai le tele o le malepelepe i o tatou taimi. “O le le faamasino atu” ua avea o se tagavai e toetoe ina le mafai ona lu’iina mo talanoaga ma amioga. Ae o le mea moni lava, tatou te faia uma lava ia faamasinoga i mea e sa’o ma sese, ae le mo na o i tatou lava, ae mo tagata ma potopotoga o loo vagaia i tatou. O tulafono ma faiga o tulafono, e oo lava i faiga faaupufai, o le ata lea o tulaga tonu faatauaina ma upumoni o loo vaaia. I se sosaiete suifefiloi, atonu tatou te felafolafoai pe o a tulaga faatauaina e tatau ona puipuia i tulafono po o aiaiga aloaia ma pe o le fea e sa’o pe sese pe moni, ae i le iuga, i soo se faafitauli, se manatu o se tasi, po o manatu o se vaega, e manumalo le upumoni ma oo ina fusia ai tagata uma i le upumoni.

E le aoga lava la le lelei ae le mautinoa tonu pe afai e tatau ona faatulagaina tatau ma le amiotonu i sosaiete. Pe mafai ona sese le fasioti tagata mo le toatele ae sa’o mo nisi? Pe i ai se aia tatau i le tagata gaoi e tuu ai ma ia mea na te gaoia ma faifai pea le gaoi aua ua talitonu o ia o le faomea o se mea sa’o lea mo ia, aemaise ona sa ola a’e o ia i se tulaga mativa? Po o le matau atu i se mea taatele i talafou i nei aso, pe faatagaina se tamaloa ona faia uiga feusuai faamalosi i se fafine ona ua ia manatu e ogatusa ma ona lagona faaletagata o le sa’o ma le sese?

“Ia,” e ono faapea mai se tasi, “ua e talanoa mai e uiga i mea ua talia lava e le lautele faapea e sese. E i ai ni nai tulaga faatauaina ua i ai lava e piiama i le soifua o le tagata ua avea ma faavae mo tulafono e faasaga i le fasioti tagata, tosoteine, gaoi, ma isi taga e faamanualia ai tagata pe faalavelave i a latou tulimataiga talafeagai o le fiafia. O aia tatau taua ma laugatasia ia faaletagata soifua, e faafitia ai soo se aia tatau patino faaletagata lava ia e auese ai. Ua na o talaatu lava o nei aia tatau aloaia faaletagata soifua e faaaoga i ai manatu alagatatau e le moni a’ia’i, lea e mafai ai e tagata taitoatasi ona faamalamalama mo ia lava pe o le fea e sa’o pe sese.” Peitai, o le laina lea o le faautaga e aumaia ai le manatu faapea e moni e i ai tali e tonu, pe tou te faaigoaina o ni aia tatau laugatasia faaletagata soifua po o se isi igoa. O le mea sili e i ai ni nai upumoni ma manatu faavae lelei o loo i ai, e ese mai manatu faivavale po o manaoga faasilia faaletagata lava ia. Na pau le felafolafoaiga moni lava, po o a tonu lava ae pe o le a foi le mamao e oo i ai. O le mea o loo tatou faasino i ai o le manatu tonu fefāiāa’i, o se felafolafoaiga moni o loo faifai pea e uiga i le taliaina:O a taga ma eseesega e tatau ona taliaina i sosaiete ma i sootaga faaletagata soifua?

O lo tatou valaauga, ma ua matua faanatinati lava i lenei siosiomaga, o le aoao atu o le upumoni o manatu faavae tonu: pe o a ae pe o le a foi le mamao e oo i ai. Tatou te fuaina le taua o le upumoni e uiga i soo se mataupu mai soo se faapogai, ae o le upumoni e faavavau, aemaise pe a aafia ai le uiga ma le faamoemoega ma le amioga o le olaga, e tatau ona tatou maua mai le Atua. O manatu alagatatau ae le moni a’ia’i, e masani e le iloa atu se matafaioi po o le tatau ona i ai le Atua i lenei talanoaga, ma ua masani ona masalosalo o loo soifua o Ia. O le a sili ona le faigofie mo i latou pe afai o i ai o Ia, aemaise pe afai e fetalai mai o Ia i le tagata. E mafai ona tau na ona mafaufau se tasi e uiga i le upumoni faapea e fefāiāa’i pe afai e leai se Atua.

Na lipotia mai talu ai nei Pew Research e faapea mo le uluai taimi, ua fai mai ai le toatele o tagata Amerika (56 pasene) e le o se mea e tatau ai le i ai o se talitonuga faalelotu ina ia avea ai ma tagata lelei. “’E le o manaomia le Atua mo mea lelei e faatauaina ma le ola mama,’ o le tala lea a Greg Smith, o le faatonu lagolago o le sailiiliga a Pew, i lana tala faalele e uiga i mea na maua.”²⁵

Ou te talitonu o le a tatou ioeina e faapea, o tagata o e le talitonu e i ai se Atua po o e e leai ni a latou tapuaiga po o se talitonuga faalelotu e mafai, ma e tele lava o, tagata lelei ma amiosao. Ae o le a tatou le ioeina faapea, e tupu lena mea e aunoa ma le Atua. E pei ona ta’ua muamua, pe fiafia i ai se tagata pe leai, talitonu i ai pe leai, pe o iloaina foi pe leai, ua faatumuina o ia i le Malamalama o Keriso ma o le mea lea ua i ai ia te ia se lagona masani o le sao ma le sese lea tatou te ta’ua i nisi taimi o le lotofuatiaifo. Na fetalai le Faaola, “O au o le malamalama moni ua faamalamalama ai tagata uma e o mai i le lalolagi.”²⁶ Ua tatou faitauina foi: “Ma o le Agaga na te tuuina mai le malamalama i tagata taitoatasi e sau i le lalolagi; ma o le Agaga e faamalamalamaina tagata taitoatasi i le lalolagi atoa, o e e faalogo i le siufofoga o le Agaga.”²⁷

Na aoao mai e Peresitene Boyd K. Packer, i le tusiga na ou ta’ua muamua:

“O alii uma, tamaitai, ma fanau o malo uma, faatuatuaga, po o lanu---tagata uma, e le afaina po o fea e nonofo ai pe o le a foi latou te talitonu i ai pe o a foi mea latou te fai---ua i ai i totonu o i latou le Malamalama o Keriso e le mafaaumatiaina. I lea tulaga, ua foafoaina tutusa ai tagata uma. O le Malamalama o Keriso i tagata uma, o se molimau lea e le faailoga tagata le Atua (tagai MF&F 1:35). E tutusa Lona taulimaina o tagata uma i lena meaalofa o le Malamalama o Keriso.”²⁸

O le i ai o le Malamalama o Keriso i tagata soifua uma o le mea lea na manatu i ai Liae ina ua ia tautino mai, “Ma ua lava le aoaoina o tagata ua latou iloa ai le lelei mai le leaga. … Ma ona ua togiolaina i latou mai le pau ua latou saoloto ai e faavavau i le iloa o le lelei mai le leaga; e fai mo i latou lava.”²⁹ Na uunai mai Mamona: “”Sailiili ma le filiga i le malamalama o Keriso ina ia outou iloa le lelei mai le leaga; ma afai tou te taofi mau i mea lelei uma, ma le tauleagaina ia mea, o le a avea moni outou ma ni fanau a Keriso.”³⁰

O le manatu alagatatau ae le moni a’ia’i, e faatamaia moni ai lava aua e galue e faaitiitia le lotofuatiaifo lelei. Afai e aloaia ma mulimuli ai, o le a tau atu le lotofuatiaifo lelei i le malamalama e sili atu ma le upumoni. Ae o le faatuatuanai i ai po o le faatoilaloina o le lotofuatiaifo lelei, e mautinoa lava le taitai ese ai o le tagata mai le malamalama ma le upumoni i le faafitia, sese, ma le faanoanoa. O le faafoliga e leai se upumoni mausali ma le faaituau ua na o se taumafaiga e aloese ai mai le tiutetauave ma le tali atu. E le o se mea lea e tau atu i le fiafia.

I le luasefulu tausaga talu ai, sa tusia ai e J. Budziszewski, o se polofesa o le malo ma filosofia i le Iunivesite o Texas, Austin, se tala malie mo le tusi talaaga Katoliko o le First Things sa faaigoaina: O Le Tauimasui o le Lotofuatiaifo Lelei.” Sa ia talanoa e uiga i le lotofuatiaifo o se vaega o le tulafono faalenatura, “o se tulafono ua tusia i loto o tagata soifua uma.” E moni, o le a tatou faamatalaina e faapei o le Malamalama o Keriso. I soo se itu, o ana matauga e uiga i taumafaiga e tuuitiitia le lotofuatiaifo e anoa.

Na ia tusia e faapea “o lo tatou malamalama i mataupu faavae tupito [e faapei o ia e aofia ai i Poloaiga e Sefulu] e tumau pea lava. O tulafono nei e le tatau ona tatou le iloa.”³¹ O manatu alagatatau ae le moni a’ia’i ua faafitia ai le i ai o nei mataupu faavae tupito, pe afai foi o i ai, ua faafitia ai lo latou sa’o mo tagata uma. Ua fai mai a manatu alagatatau ae le moni a’ia’i e faapea, tatou te le iloa moni le upumoni, ae o loo tatou sailia ma le faamaoni ma faia le mea sili tatou te mafaia, ma taumafai e vaai atu i se po puaoa, atonu tou te faapea mai ai. Ua tautino mai e Budziszewski, “E sili atu lo tatou iloa; tatou te le o faia le mea sili tatou te mafaia. … I se vaaiga masani, ua tatou iloa e sa’o ai le sese, ae moomoo maimau pe ana tatou te lei iloaina. Ua na ona tatou faatalitonuina o loo tatou saili mo le upumoni---ina ia mafai ona tatou faia le mea sese, faatuatuanai le sese, pe oono i lo tatou salamo ona o mea sese sa fai i le taimi ua tuanai. … [O] lo tatou toilalo e le ona o le valea moni ae o le solipalaina moni. E le faapea e le o aoaoina i tatou, ae ua ‘faafitia.’ E le faapea e le lava lo tatou malamalama moni; o loo tatou solipalaina.”³²

O le mea na faamatala atu e Alema i lona atalii o Korianetona faapea “o le faanoanoa o le mafaufau”³³ e moni lava, ma ua ta’u mai e Budziszewski e faapea, o taumafaiga e taomia i lalo le lotofuatiaifo pe aveesea le faanoanoa, e aunoa ma le salamo, e le faamanuiaina i le iuga. Ua tatou vaaia i tagata e faafoliga faapea o mea ua latou iloa e sese, e le sese. Atonu latou te toe faia foi ma toe faia ma le loto i ai se agasala i se taumafaiga e lelemo le leo o le lotofuatiaifo. Atonu e tulimatai e nisi le faalavefau faifaipea e ala i le faatotofuina o i latou i fesootaiga faaagafesootai, taaloga vitio, po o musika fai pea i o latou taliga e aloese ai mai taimi toafilemu e ono talanoa mai ai le lotofuatiaifo. Ua tatou vaaia i fetuutuunaiga ia e foliga mai e le muta, a le o fuainumera, ia o le fatufatu mea fou. Ua ta’ua e Budziszewski le tasi lea, “Ua ou ta’u ifo ia te au lava e faapea o feusuaiga [i fafo o le faaipoipoga] e le afaina aua o le a ou faaipoipo i la’u paaga, aua ou te manao i la’u paaga ma te faaipoipo, pe ona e tatau ona ou iloa pe mafai ona ma fiafia pe a ma faaipoipo, … [po o lea:] ‘tatou te le manaomia ni folafolaga aua ua ma faananau alofa le tasi i le isi.’ Ioe, o le aafiaga, o i latou o e [mananao pe] manaomia folafolaga [e manino lava] e le mama le alofa.”³⁴

I talaatu o le faafoliga, faalavefau, ma le fetuutuunai, atonu e taumafai ia tagata e aumai isi e faatino le aga tausalaina e fai o se aualae tauamiotonuina ai i latou lava. Latou te “le faia le agasala faalilolilo; latou te sailia mai isi.”³⁵ E mafai ona tatou faapea, o Satani o le alii sili i le saili, “aua ua saili o ia ia pagatia tagata uma pei o ia.”³⁶ O e sili ona pagatia o i latou o e fai mai pea lava “e tatau ona suia sosaiete ina ia le toe tutu atu i ni faamasinoga matautia. O lea ua latou suia ai tulafono, ua ulufia aoga, ma amatalia faigamalo faamalosi a le au mautofi mo le soifua manuia faaagafesootai.”³⁷ Na talafeagai lelei le lapataiga a Isaia, “Oi talofa ia te i latou o e faimai, ua lelei le mea leaga, a e leaga le mea lelei; o e fai ma malamalama le pouliuli, ae fai foi ma pouliuli le malamalama; o e fai ma mea suamalie le mea oona, ae fai ma mea oona le mea suamalie!”³⁸

O lea, ua faaiu ai e Budziszewski, o a tatou taumafaiga e taomia ia ‘au mamana a le lotofuatiaifo ma fetuutuunai le tausalaga lea e afua ai ona saga mamao ese atu le sosaiete mai upumoni moni.³⁹ Ou te fia faaopoopo atu e faitaulia ai foi le ita lea ua faateleina le faaalia i soo se talanoaga e fuafua e aofia ai tulaga faatonuina ma faiga faasosaiete.

Na fetalai atu Iesu ia Nikotemo:

“O le faasala foi lenei, ua oo mai le malamalama i le lalolagi, a o tagata e sili lo latou manao i le pouliuli i lo le malamalama aua e leaga a latou amio.

“Aua o i latou uma o e fai mea leaga e inoino i latou i le malamalama, e le o mai foi i le malamalama, nei faailoa a latou amio.

“A o le faamaoni ana mea e fai, e sau lava o ia i le malamalama, ia faaalia ana amio ina ua tatau i le Atua.”⁴⁰

O taumafaiga e taomia le lotofuatiaifo e le gata ina le aoga, ae afai e malamalama ia tagata i mea i o latou malamalama moni, o le a leai lava se tasi e manao e taumafai. Sa ou ta’ua e lata i le amataga le mea na aoao mai e Liae e uiga i le taumafai e solaese mai le faasalaga ma le faanoanoa e ala i le faafitia o le moni o le agasala—“afai tou te fai mai e leai se tulafono, ole a outou fai mai … e leai se agasala.”⁴¹ Afai e mafai ona tatou tapeese le tulafono, po o le upumoni, e faapei ona taumafai i latou o e tauivi faasaga i le lotofuatiaifo e fai, e mafai moni lava ona tatou alofia le tausalaga po o le faasalaga po o le faanoanoa. Ae manatua, e pei ona sa lapatai mai Liae, a aunoa ma le tulafono o le a leai foi se aoga o lo tatou ola ai. O le a tatou aveesea le gafatia o le amiotonu ma le fiafia. O le a tatou aveesea le foafoaga ma lenei olaga. Ua iloatino, o le manatu i le aveesea po o le toesea o le upumoni, e leai se uiga, ae e i ai le auala e tuuitiitia ai le faanoanoa a o faasaoina le avanoa mo le fiafia. Ua ta’ua o le aoaoga faavae po o le talalelei a Keriso---faatuatua ia Keriso, salamo, ma le papatisoga, i le vai ma i le Agaga.⁴²

E tatau ona tatou fesoasoani ia i latou tatou te aoaoina, e pei ona faaupu mai e le Faaola, “fai i le faamaoni,”⁴³—o lona uiga, ia talia ma le loto atoa le Malamalama o Keriso ua i totonu o i latou ma faaulufale mai le malamalama faaopoopo ma le upumoni lea e aumai e ala i le Agaga Paia. O le teena, fetuutuunai, ma le faafoliga, e le aoga. Ua na o le salamo ma le usiusitai i le upumoni e mafai ona aumaia le “mea moni a’ia’i” o loo manaolasi i ai le toatele. E na o e salamo ma le usiusitai i le upumoni e mafai ona faasao ma faateleina lo tatou fiafia ma le saolotoga.

I le popofou o la’u matata faaloia, sa ou vaai tino ai i taunuuga leaga o le amanaiaina o le lotofuatiaifo ma le faalagolago i pepelo. Sa avea au ma failautusi o le tulafono i le Faamasino o le Itumalo o le I.S. o Faamasino John J. Sirica i Uosigitone D.C.Na amata se faapogai faalumaina faalemalo sa lauiloa o le Watergate i sina taimi ae lei leva ae amata la’u galuega faafailautusi, ma taualumaga o le faamasinoga o le Watergate na alu ai le taimi o Faamasino Sirica, ma faapea foi i lo’u taimi, sa toetoe o le isi lua ma le afa tausaga atoa. E aunoa ma le faamatalaina atu o auiliiliga, o le a na ona ou fai atu faapea, i le 1972 o faatinoga o faatosinaga mo le toe faia o le palota mai ia Peresitene Nixon, o le Komiti e Toe-Palotaina le Peresitene, e ala i le ulufale e aunoa ma se faatagaga, ma le faalogologo nana i faatalatalanoaga, sa taumafai ai e gaoi faamatalaga mai le Komiti Faatemokalasi a le Malo. Sa molia tagata, ma sa amataina loa lava se taumafaiga e nana soo se fesootaiga i nei gaoioiga e le tusa ai ma le tulafono i le au faatosina a Peresitene Nixon po o soo se tasi o taitai o le Fale Paepae. O lea taumafaiga e nana ia faamatalaga, sa aofia ai se papupuni solitulafono o le amiotonu ma sa oo ina aofia ai ma Peresitene Nixon.

Sa foliga mai ia te au sa tele ni taimi i le isi lua tausaga a o lei faamavae o ia, semanu e mafai ai e Nixon, faatasi ai ma se lotofuatiaifo ua fagua, ona taofia ma faapea atu, “E le o sa’o lenei mea, o le a tatou le faaauauina, tuu pea nutigamea e toulu i le mea e toulu i ai,” semanu e mafai lava ona ia onosaia le maasiasi faaupufai ma faitioga le maalofia, ma faauma lana nofoaiga. Ae na te lei faapea mai lava e taofi. Ae, sa atili ai ana lava taumafaiga e nana faamatalaga o taupulepulega leaga. O le taimi le lelei mo au o le taimi na ma faalogologo ai ma Faamasino Sirica i se lipine na pue o se talanoaga na faia i e aso 21 Mati, 1973, i le va o le peresitene ma le loia a le Fale Paepae, o John Dean, i le Ofisa Faaofuofu.

O Dean sa pulea le taumafaiga e nana faamatalaga i totonu o le Fale Paepae, ma sa ia manatu ua amata ona mama. O lea la ua ia sau e fesili ia Nixon mo se faatonuga. I lea talanoaga sa pueina, sa faamalamalama ai e Dean le mea sa faia i masina ua mavae atu, e aofia ai le fuafuaina o le tupe e auina atu i aiga o i latou o e sa tausalaina i le ulufale nana i le taimi o le Watergate. Na tuuina atu lea tupe e faafilemu ai i latou e tusa ma tagata o tulagatofi maualuluga i le Komiti e Toe-palotaina le Peresitene, o le sa fuafuaina ma faatonuina le ulufale nana, ae o lea ua latou faamata’uina ona sa lei maua le tupe mo o latou aiga, pe e le’i tele e pei ona latou manatu sa folafolaina atu.

Sa faateia i ma’ua ma Faamasino Sirica a o ma faalogoina ia Nixon o fesili malie atu, “E fia se tupe e faafilemu ai aiga?” O lona si’uleo, sa peiseai na faateia ai Dean lava ia i le tali lea, ma se fuainumera e pei sa na ona faalele i le ea na ia tali ai, “Se miliona tala.” Sa tali atu Nixon o le a leai se afaina i le sueina o lena aofaiga, ae sa popole o ia pe o le a faapefea ona tufatufa e aunoa ma le iloa. Sa ma le talitonu ma le faamasino—ma te lei mananao e talitonu—i le mea sa ma faalogoina, ma sa ia tuu maia se fasipepa sa fai mai ai e toe tuu i tua le lipine ae ma toe faalogologo. Sa uma ona ma faalogologo i le talanoaga ona ma teueseina lea o le lipine, e aunoa ma se upu i le tasi ma le isi, ae ma vave o i le fale. E oo mai lava i le taimi nei, ou te manatua lava le lagona o le maasiasi ma le faanoanoa. O le taimi lea e na o ni nai masina a o lei faamavae ia Nixon, ae sa ma iloaina i lena taimi o le a molia le peresitene pe afai e le faamavae muamua.

Sa ou taumanatunatu i lea taimi, pe aisea sa faatagaina ai e Nixon lenei mataga ia faatupulaia ma atili ai ona leaga. Ou te lagona pea lava le maofa, ona ua umi le taimi o matua lava ai le gase o lona lotofuatiaifo ua oo ai lava i taumafaiga e faamata’u le peresitene o le Iunaite Setete e le au gaoi o le Watergate, e lei fagua ai sona toatamai. O le lesona o le olaga na ou aoao mai lenei aafiaga e faapea, o lo’u faamoemoe mo le aloese mai le avanoa o se mala faapea i lo’u lava olaga e maua mai i le le faia lava o setuusaunoaga---ia gauai atu e le aunoa ma le le maliliua i faatonuga a le lotofuatiaifo. O le solipalaina o le amiosa’o o se tasi, tusa lava pe mo ni nai taga e matua iti lava i ni mataupu e matua iti, e tuu ai lava le tagata i se tulaga matautia o le iu ina le toe maua uma faamanuiaga ma le puipuiga o le lotofuatiaifo. Ou te talitonu e i ai nisi ua “sao mai ai,” o lona uiga sa latou le faamaoni pe sa faia e le tusa ai ma le tulafono i pisinisi po o le olaga faapolofesa pe faaupufai ma e lei molia lava i latou e tali atu e tusa ma a latou taga (i lenei olaga). Ae o se lotofuatiaifo vaivai, ma o le mea moni o se lotofuatiaifo ua gase, e tatala ai le faitotoa mo “Watergates,” pe tetele pe laiti, se vaega tuufaatasi pe patino i le tagata---mala matautia e mafai ona mafatia ai ma faataumaoia e tausalaina faapea foi e taumamaina.

Ua tusia e Ioane le folafolaga mamana a le Faaola “ia Iutaia, e ua talitonu ia te ia, Afai tou te tumau pea i la’u mataupu o o’u soo moni outou; e iloa foi e outou le mea moni, e tuu saoloto foi outou e le upumoni.”⁴⁴ O le iloa ma mulimuli i le upumoni e sili ona faamautinoa ai le faasaolotoina o i tatou—e muamua saoloto mai pologa o le pouliuli ma le agasala,⁴⁵ ona saoloto ai lea e tulimatai mea lelei uma seia oo ina tatou maua le malo o le Tama ma mea uma e mafai ona Ia tuu mai.⁴⁶ O le iloaina o Iesu lava Ia “o le ala, le upumoni, ma le ola,”⁴⁷ atonu o le uiga aupito taua lea o le upumoni e faasaolotoina ai tatou o le, e ala i Lona alofa tunoa, ua Ia faasaoloto ai i tatou mai le oti ma seoli.⁴⁸

Na tautino mai le Alii, “O le malamalama ma le upumoni e lafoai e le toatasi leaga lena [ua muta ai le pologa i le agasala]. … [Peitai] e sau le amioleaga e toatasi lena ma aveese mai le fanauga a tagata le malamalama ma le upumoni e ala i le le usiusitai, ma ona o le uputuu a o latou tama.”⁴⁹

O loo i ai i le Tusi a Mamona se faataitaiga iloga o le amioleaga o loo aveesea le malamalama ma le upumoni e ala i uputuu sese ma le le usiusitai. Pe tusa o se seneturi ma le afa a o lei afio mai Keriso, sa faamatalaina ai tagata sa Lamana e faapea sa pagatia i tu ma aga sese ma “sa le iloa se mea e uiga i le Alii”⁵⁰ Sa na o le taimi sa faatinoa ai e atalii o Mosaea lo latou misiona ofoofogia sa faalogo ai soo se fuainumera tele o saLamana i le ata o le faaolataga maaoaoina o le upumoni.⁵¹

Mo le Tupu o Lamonae, o le olioli i le sau i fafo o le pouliuli o mea sese i totonu o le malamalama ofoofogia o le upumoni na ia manumalo ai.“Ma o le malamalama lea ua faamalamalamaina ai lona mafaufau, o le malamalama lea o le mamalu o le Atua, o se malamalama ofoofogia lea o lona agalelei---ioe, o lenei malamalama sa faatumulia ai lona agaga i le olioli tele naua, ua tafi ese ai le ao o le pogisa, ma ua faamumu a’e ai i lona agaga le malamalama o le ola tumau-faavavau, ioe, sa iloa e [Amona] ua lofituina ai le tino natura o [Lamonae] ma ua segia ese atu ai o ia i la le Atua.”⁵²

O le mea moni e na o le lua lava filifiliga. O le tasi o le tulimatai o le upumoni e ala i le gauai atu i afioga a Keriso---“O ia o le e tausia ana poloaiga, e maua e ia le upumoni ma le malamalama, seia oo ina faamamaluina o ia i le upumoni ma iloa e ia mea uma.”⁵³ O le isi o le faaseseina e le tiapolo ma taumafai mea e le mafai---e sue ai le fiafia i ana pepelo. E le mafai e se tasi ona manuia i le olaga iinei po o le olaga a sau, i le le amanaiaina o le moni o le upumoni, ae o nisi, o le mea moni e toatele tagata, ua taumafaia—e foliga e matua faigofie atu nai lo le salamo. Peitai e na o le salamo lava ma le usiusitai i le upumoni a le Atua e faasaolotoina ai i tatou mai se lalolagi faafoliga lea e taunuu i le toilalo, “ma [o le a] pau ma nutipalaina lava.”⁵⁴

O upumoni autu, o mea moni tutotonu o loo tatou ola ai, lea e tatau ona tatou aoao atu ma toe aoao atu ma le talitonuga maumaututu mama ma le mana uma e tuuina mai e le Atua ia te i tatou o nei:⁵⁵

O le Atua, lo tatou Tama Faalelagi, o loo soifua, ua na o le pau lea o le Atua moni ma o loo soifua.
O Iesu Keriso o Le Alo e Toatasi Na Fanaua e le Atua.
Na afio mai Iesu Keriso i le lalolagi e togiola Lona nuu; sa puapuagatia o Ia ma maliu e totogi a latou agasala.
Na toetu mai o Ia mai e ua oti, ma faataunuu ai le Toetu.
O le a tutu atu tagata uma i Ona luma ina ia faamasinoina i le aso o le faamasinoga mulimuli, e tusa ai ma a latou galuega.

Ia tatou fiafia ma ola ai i nei upumoni. Ou te tuuina la’u molimau paia e moni ia upumoni. Ina tatou saili atu ia ma le loto atoa ma le naunautai, aoao atu, ma ola ai i le upumoni, ou te tatalo atu ai, i le suafa o Iesu Keriso, amene.