2:3

’Ia ha’api’ihia ’outou e au

Elder Kim B. Clark

Nō te Hitu ’Ahuru

Hō’ē ’āru’i ’e ’o Elder D. Todd Christofferson

Aʼoraʼa nā te mau ʼorometua haʼapiʼi ’evanelia • 26 nō Tēnuare 2018 • Fare menemene nō Roto Miti.

Tē māuruuru nei au ’ia tae mai i rotopū ia ’outou i teie ’āru’i. Fāri’i mai i te tāpa’o here ’e te māuruuru, e te mau ’orometua o te u’i ’āpī nō te séminaire, te institut ’e te mau ha’api’ira’a fa’aro’o, i te mau fare ha’api’ira’a tuarua, tuatoru a te ’Ēkālesia. ’Ua here au ia ’outou, ’ua māuruuru vau i te ’ohipa fa’ahiahia tā ’outou e rave nei. ’Ua māuruuru ato’a vau i tō ’outou ’utuāfare i te pāturura’a ia ’outou. E ha’amaita’ira’a rahi ’outou nō te feiā ’āpī ’e te feiā ’āpī pa’ari tā ’outou e ha’api’i ra.

I teie pō, e mana’o tā’u e hina’aro e fa’a’ite ia ’outou, maita’i ē, e tauturu ia ’outou ’a ’imi ai ’outou i te tauturu i tā ’outou mau pīahi ’ia ha’api’i i te hōhonu o te ’evanelia a Iesu Mesia.Te ha’api’i-hōhonu-ra’a i te ’evanelia, te ha’api’ira’a ma tō tātou ’ā’au ato’a ’e tō tātou vārua, e tupu ïa i te taime e rahi mai te pūai o te mau pīahi ’ia rave e toru mea :

Tupu rahi i roto i te ’ite ’e te māramaramara’a i te ’evanelia, i tō rātou ferurira’a ’e i tō rātou ’ā’au
Patu i ni’a i terā ’ite nō te fa’atupu i te ’aravihi nō te ’ohipa tano ’e te parau ti’a.
Tupu rahi i roto i te mau huru o te Mesia ’e tōna nāturara’a nō te riro rahi atu ā mai te Metua i te Ao ra ’e tāna Tamaiti, ’o Iesu Mesia.

Tē tu’u nei te Fatu Iesu Mesia i te hō’ē anira’a ’ia ha’api’i hōhonu i roto e piti ’īrava : ’A tahi, te Mataio 11:28-29 : « E haere mai ’outou iā’u nei, e te feiā ato’a i ha’a rahi, ’e tei teiaha i te hōpoi’a, ’e nā’u ’outou e fa’aora. ’A rave mai i ta’u zugo i ni’a ia ’outou, ’e ’ia ha’api’ihia ’outou e au, tē marū nei ho’i au ’e tē ha’eha’a o te ’ā’au : ’e e noa’a ho’i te ora i tō ’outou vārua ».¹

Te piti, ’o Te Parau Ha’api’ira’a ’e te mau Parau Fafau 19:23 : [’Ia ha’api’ihia ’outou e au], ’e ’a fa’aro’o mai na i ta’u mau parau ; ’a hāhaere ho’i i roto i te marū o tō’u nei Vārua, ’e e noa’a ïa ia ’oe te hau i roto iā’u nei ».²

I roto i nā ’īrava to’opiti, tē tu’u nei te Fatu i te hō’ē anira’a : ’Ia ha’api’ihia ’outou e au. Mai tā Elder Neal A. Maxwell i parau e rave rahi matahiti i teienei, ’ua fa’atumuhia teie anira’a i ni’a i te mana tāra’ehara a te Fatu Iesu Mesia, ’e e anira’a ho’i ’ia ha’api’i hōhonu. ’Ua parau Elder Maxwell : « E rave rahi rāve’a e nehenehe e fa’aau i ni’a ia tātou… i te mau ’īrava nō ni’a ia Iesu ’e te Tāra’ehara, tei raro a’e rā i teie ’apu parau : ‘’A rave mai i ta’u zugo i ni’a ia ’outou, ’e ’ia ha’api’ihia ’outou e au’.³ Inaha ho’i, ’aita e rāve’a ’ē nō te ha’api’i hōhonu ! »⁴

Te rāve’a noa nō te ha’api’i hōhonu, ’o te rāve’a ïa a te Fatu—nā roto i te heheura’a ’e te fa’aurura’a nā roto i te mana o te Vārua Maita’i, nā roto i te tuatāpapara’a itoito rahi ’e te tauto’ora’a, ’e nā roto i te ha’api’ira’a te tahi i te tahi ma te tauturuhia e te maita’i o Iesu Mesia.⁵

Tē aura’a ra, te anira’a a te Fa’aora « ’ia ha’api’ihia ’outou e au », e piti ïa aura’a tū’ati’ati e tano nehenehe mau i te rāve’a a te Fatu nō te ha’api’i hōhonu.

Te aura’a mātāmua nō te « ’ia ha’api’ihia ’outou e au » : Ha’api’i ’ia mātauiā’u.

E ha’api’i tātou ’ia mātau ia Iesu Mesia nā roto i te roa’ara’a te fa’aro’o iāna ’e te fāriura’a i ni’a iāna nō te tātarahapa, ma te ’imi i tāna fa’a’orera’a hara ’e tōna mana fa’aora, ’e ma te ha’apa’o i tāna mau fa’auera’a. Te mātaura’a iāna, ’o te fānau-fa’ahou-ra’ahia ïa tātou i te pae vārua nā roto iāna, ’o te tupura’a te fa’ahuru-’ē-ra’a rahi o te ’ā’au, ’o te rirora’a ’ei tamaiti ’e ’ei tamāhine nāna. Nā te ha’api’ira’a ’ia mātau ia Iesu Mesia e ha’amahora i tō tātou ’ā’au ’e tō tātou ferurira’a i te fa’aurura’a a te Vārua Maita’i, ’e e fa’atae mai te reira i te ha’apāpūra’a nō ni’a i te here o te Fatu.

Te piti o te aura’a nō « ’ia ha’api’ihia ’outou e au » : Ha’api’i mai roto mai iā’u.

’Ua ’ite pāpū roa te Fatu Iesu Mesia i te mea e tītauhia nō tātou. ’Ua maita’i roa ’e ’ua hope ho’i tōna ’ite ’e tōna māramaramara’a, tōna ’a’apo ’e tōna nāturara’a. ’Ia utuhi tātou ia tātou i roto i te mau pāpa’ira’a mo’a, e ha’api’i tātou mai roto mai i tōna hi’ora’a maita’i roa. Nō te mea ’o ’oia te fa’ahōho’ara’a nō te mau huru hanahana ato’a ’e te nātura, e ti’a i tā tātou tuatāpapara’a ’evanelia ’ia rōtahi i ni’a iāna. ’A mātau noa ai tātou iāna, e parau fafau mai ’oia i te tauturu ia tātou ’ia ha’api’i hōhonu mai roto mai iāna. Parau mau, e ti’a roa ia tātou ’ia ’ohipa ma te fa’aro’o ia Iesu Mesia nō te rave i tā tātou tuha’a, ’ia nā reira ana’e tātou, tē parau fafau nei ’oia e hōro’a mai ’oia ia tātou i te ’ite ’e ’ia ha’apūai i tō tātou māramaramara’a nā roto i te Vārua Maita’i. Tē parau fafau nei ’oia e fa’arahi i tō tātou ’aravihi nō te ’ohipa parau ti’a ’e e tauturu ia tātou ’ia riro rahi atu ā mai iāna te huru . Terā te ha’api’ira’a hōhonu.

’Ua ’ite tātou e parau mau teie mau mea. Mai te peu e ha’apa’o maita’i tātou, e ha’api’i mai te Fatu ia tātou, te a’o nā ni’a i te a’o, te fa’aue nā ni’a i te fa’aue, hope noa atu tō tātou orara’a.

E au mau taea’e, e au mau tuahine, tē ani nei au ia ’outou ’ia rave ma tō ’outou ’ā’au ato’a i te anira’a a te Fa’aora ’ia ha’api’ihia ’outou e ana. ’Ia nā reira ’outou, e ha’api’i hōhonu ’outou, ’e e tauturu ’outou i tā ’outou mau pīahi ’ia ha’api’i hōhonu ato’a. Tē ani ato’a nei au ia ’outou ’ia hōro’a i tō ’outou iho ’itera’a pāpū nō teie mau parau mau mure ’ore. E ’ohipa pūai roa ho’i ’ia fa’aro’o tā ’outou mau pīahi ia ’outou ’ia hōro’a i tō ’outou ’itera’a pāpū nō te mau ’ohipa i tupu nō ’outou i te mātaura’a i te Fatu ’e i te ha’api’ira’a mai roto mai iāna.

Nō reira e fa’aoti au i tā’u parau i teie pō ma tō’u iho nei ’itera’a pāpū. ’Ua ’ite au ē, tē ora nei te Atua ’e ’o Iesu te Mesia ! ’Ua ’ite au i te here o te Fa’aora ’e tōna mana fa’aora i roto i te mau ’ohipa i tupu nō’u ’e nā roto i te heheura’a a te Vārua Maita’i. E ’ohipa fa’atupu ha’eha’a ’e te ’oa’oa ’ia ha’api’ihia ’oe e te Fatu Iesu Mesia. Tē fa’a’ite pāpū nei au ē, e rave ’oia i tāna i parau. E ’ohipa mau ā te ha’api’ira’a hōhonu ’e nō tātou te reira fāna’ora’a ’e nō tā tātou mau pīahi iti. ’O teie ïa tō’u ’itera’a pāpū, i te i’oa o Iesu Mesia, ’āmene.