O Jisu Karisito na Kena iWali.

Elder Ronald A. Rasband

Ena Kuoramu ni iApositolo Le Tinikarua

Dua na Bogi kei na Vakaitutu Raraba • Feperueri 8, 2019 • Valecavu e Salt Lake City

Kemuni na tacqiu kei na ganequ, o kemuni o ni tiko eke ena Valecavu ena Lomanibai ni Valetabu kei kemuni o ni soqoni vata e vuravura raraba, keirau sa doka kei Sister Rasband na tiko vata kei kemuni. Au raicalesu na nodra veivakayarayarataki na qasenivuli ni semineri kei na inisitute ka veisautaka noqu bula. Me yacova mai nikua au se raica tu ga na kena imawe na noqu qasenivuli ena ivakarau ni noqu vulica na ivolanikalou ka vakauasivi na levu ni noqu taleitaka na iVola i Momani.

Au vakamareqeta talega na draki ni veimaliwai au sotava niu tiko ena dua na vanua taqomaki vinaka kei ira noqu itokani era taleitaka neimami tiko vata ena dua na ituvaki vakosipeli. Keimami gade voli ena vale ni semineri e koronivuli vakakina ena inisitute mai na koliji. Au dau nanamaki meu kauti Melanie Twitchell ki na danisi ni inisitute. Sa watiqu tiko oqo, o Melanie na marama taleitaki ka totoka.

Ni da qasenivuli ni semineri kei na inisitute eda dau cakacaka vakabalavu me kau mai na yalo vei Jisu Karisito. O dau masulaki ira nomu gonevuli, o vuli me rawa ni o sauma na nodra taro; o vakarautaki iko vakayalo mo veivakavulici ena Yalo; o laveta ka vakaitavitaka ka serauna na dina ni kosipelil.

Ni vaqara na Turaga o ira e rawa ni ra veivuke vua na gone e sotava tiko na dredre, na itabagone sa voleka sara me lutu tani yani, e dua na Luvena sa malumu sobu tiko nona ivakadinadina kei na nona kilaka, sa vakarautaki o Koya me kalawa yani i liu ka cakacaka vata kei ira na itubutubu kei ira na iliuliu ena Lotu. Mo tu e matadra nomu gonevuli ka vakadeitaka na dina ni bula tiko o Jisu Karisito, ni lomani keda yadua na Tamada mai Lomalagi, ka dua noda tikina ena Nona ituvatuva tawamudu. E ka uasivi duadua, ni o vakabauta.

O iko, me vaka sa dau tukuna wasoma o Elder Jeffrey R. Holland, “e dua na qasenivuli mai vua na Kalou.”¹

“E vica … era sa kau mai me lagata na loloma veivueti, ia oqo e baleta na mana ni nona vosa e tu vei [iko], e sega beka kina ni dodonu mo reki?

“Io, e dodonu mo vakacaucautaki koya me tawamudu, ni sai Koya na Kalou sa Cecere Sara.”²

Ia ena so na gauna na tarabi ni veilaveti, veivakavulici, kei na veivakayaloqaqataki vei ira na itabagone e voleka sara me dau sega ni rawa. Sa kila tu na Turaga ni dau dredre sara na cakacaka oqo ni kauta mai na yalo Vua. Au a vulica oya niu peresitedi voli ni kaulotu mai New York City ni voqa ki yaloqu na ivolanikalou oqo mai na Alama: “Oqo ni da sa yalolailai, ka via lesu tale, raica, sa vakacegui keda na Turaga, ka kaya: Ni lako vei ira na wekamuni … ka mo ni vosota vakadede na veika rarawa ena yaco vei kemuni, kau na qai solia vei kemuni na qaqa.”³

E se bera ni vakacegu na vunica ena veika sa rawata na matanitu ni Kalou me yacova mai oqo. E vinakata tale eso. E voravora sara o koya ka sega vua na loloma. E taketetaki ira tiko na nomu gonevuli; eda raica vei ira eso ni ra “kani yatedra ena nodra rere.”⁴

iVakatakilakila

vakasama tiko e dua na goneyalewa

Era sa butuseva eso na gonevuli, ia ena Yalo ni Turaga, e rawa ni o veivuke me ra butu donu tale. A kaya na iApositolo o Paula, “Sa buku na druadrua … ia keitou sa sega ni drigiti; keitou sa lomaocaoca ga, ia sa sega ni yalolailai; vakacacani, ka sega ni biu laivi; vakabalei sobu, ka sega ni vakarusai.”⁵

Na cava na vuna?

Nanuma na veisureti ni iVakabula “dou lako mai vei au, koi kemudou vakayadua ga sa oca ka colata na icolacola bibi, ia kau na vakacegui kemudou.”⁶

Sa kaya na Turaga: “O koya mo dou marau kina, ka kakua ni rere, ni’u sa tiko vata kei kemudou koi Au na Turaga, kau na tu e yasamudou; ka mo dou na tukuni au yani, io ko Jisu Karisito, ni sai Au na Luve ni Kalou bula, Ni’u a bula e liu, Au bula tiko edaidai, Ka’u na bula tikoga ena gauna mai muri.”⁷

Eda na sega ni rawa ni “marau tiko”⁸ka qai bikai tu ena rere. O rau na rua qo—marau kei na rere—erau sega ni veiriti. Kevaka eda muria na ivakaro ni Turaga—kevaka eda marau—eda sa na tuvakarau me da tukuni Koya, na iVakabula kei vuravura. Eda na kila se o cei o Koya ka vakadinadinataka na Nona itavi me laveti keda me da ulabaleta na veiveisau ni vuravura.

Na marau sai koya me da vakabauti Koya tikoga ni sega ni yaco me vaka noda inaki na veika eso. E kena ibalebale me da toso tikoga ni yaco mai na veika dredre kei na tavuki ni bula e sega ni namaki, ni vorolaka noda tatadra na leqa sega ni namaki kei na dredre. Ia e vakananuma vei keda na Turaga, “ni sa sega ni taucoko na nomudou reki ena vuravura oqo, ia vei au sa taucoko sara na nomudou reki.”⁹.

E rawa ni o kila ena nomu kalasi se o cei na gone sa dau “marau tiko.” Era se sotava tikoga na dredre kei na leqa, ia era sotava ena dela ni vakabauta kei na vakanuinui vua na Kalou. Era dabe ena kalasi, ka vakarau me ra saumitaro, vakanuinui me ra kila na dina era na vakavulici kina, ka yalodei se o cei o ira. Vei ira, “Au Luve ni Kalou”¹⁰na kilaka kei na veimaroroi, e sega ni dua walega na ivakananumi ni lagasere ena Lalai. Era vaqara mai na veigauna vakayalo, vakasama titobu, kei na vosa me iwali ni nodra lomatarotaro. Era vinakata me vaqaqacotaki nodra inuinui ni ra sokota e dua na vuravura ni veileti, ena loma ni nodra dredre e vuqa, na rarama e matadra ena vakamalumalumutaka na oca ni bula e veisiga.

Ena noqu veisiga ni semineri kei na inisitute—meu vakuria, e vaka ni dua na gauna balavu sa oti—era yaco mai ki na kalasi na gone ena vakabauta, e vaka toka oya vei au. Era a sega niyavalatiena veika era raica ena initaneti, baleta ni se bera kina na initaneti. Era sega ni kauta voli ena nodra katodreketi na kauwai e viritaka mai vei ira ko vuravura baleta na lotu, ivakatakila, parofita, se na vakabauta na Kalou.

Vakacava o ira ena iyatu e muri ka coba toka na matadra ena nodra ivola? Se na goneyalewa se qai kotiva laivi kece na uluna ka sega ni via sota na matamudrau? O rau na lewe rua erau dau veitalanoa yani ki loma ni kalasi ka sa tuyadua sara na gauna rau qai veitalanoa kina ena gauna oqo? Vakacava na gonevuli vakairogorogo ka vaka me sa sega ni taleitaka na veitalanoa vakosipeli, sa levu cake nona vakalutu mai na nona tiko? Vakacava nodra matawanono eso, era raisara tu ka sega talega ni vakaitavi? Eso na gonevuli era lako mai ki na kalasi, dabe oti ra curu tale yani i katuba, sega ni dua na ka era kauta—sega mada ga na Yalo. Sa vakatawani nodra bula vakamareqeti ena oca, rere, veitemaki, na bula leqaleqa, kei na yalorarawa.

iVakatakilakila

cauravou vakila na lomaocaoca.

O sa bau tarogi iko mada, “Na cava sa yaco tiko eke?” Au dau cakava!

Na rere kei na vutugu: oqori na ka sa yaco tiko. Rere ni sega ni ciqomi mai vei ira na itokani. Rere ni sega ni vinaka nona vuli, lomaocaoca, kei na leqaleqa mai vale sega ni ra walia rawa. Rere ni sega ni vakabauta rawa e dua ka sega ni dua e vakabauti koya. Rere ni tu duadua, kei na rere ni vakailawalawa. Rere ni ra sa icolacola vei ira tale eso Rere ni lotu tauyavutaki se dua ga na lotu. Rere ni sega na iwali se na veivuke ena nodra mosi. Na rere e susuga na yalolailai kei na yaluma, na lomaleqa kei na lomaocaoca; na rere e vakavuna na yaloca ka na vakabasikata na ca. Na rere e vakabauta ni na sega ni dua e ciqoma ka, qai ca vakalevu cake, ni sega mada ga ni dua e taroga, “Cava na leqa?”

E kalouca ni rere ena levu ni kena veimataqali e dau vakavotukana ena kena itinitini ca duadua—na kukuna.

Ni tauyavutaka ena yabaki sa oti na kovana mai Utah e dua na ilawalawa me valuta na tubucake totolo ni nodra kukuna tiko na itabagone, a kerei Peresitedi Russell M. Nelson me lesia e dua na iliuliu ni Lotu me qarava. A lesi au ena itavi bibi oya o Peresitedi Nelson. Au sa vulica ni sega ni dua e galala mai kina. Nodra kukuna na itabagone sa tarai vuravura raraba tu. E vakaraitaki ena iwiliwili ni kukuna sa dua vei iratou na tolu na vu ni mate levu duadua vei ira na itabagone ena maliwa ni yabaki 15 ki na 24. Sai koya oqo: “Na sasaga ni kukuna e levu cake vaka 20 mai na kukuna e yaco kina na mate.”¹¹Oqori eso na itukutuku bibi.

Me da na sotava kece na leqa oqo. Ni da lewena na Lotu i Jisu Karisito ni Yalododonu Edaidai sa dodonu me da yalataki keda me da veisautaka na ivakarau ni rai ni dua na iwalinileqa na kukuna, e dua na ka e rawa ni vakasamataki. Me da vosa vei ira na itabagone baleta na kukuna ka lomani ira me ra kakua ni vakasamataka ni dua na iwali ni nodra mosi na kukuna. Na bula nei Peresitedi Thomas S. Monson e waqa ni malanivosa “ki na veivueti.” Ena gadrevi me noda ibola oya.

Oqori na ka e vakayacora na iVakabula vei keda kece. E vueti keda mai ena Veisorovaki, ka tomana tiko Nona vakaraitaka na loloma tawayalani oya ena nona vakabulai keda, vakayaloqaqataki keda, ka kauta mai vei keda na vakacegu kevaka walega eda gole Vua.

iVakatakilakila

veitauriliga na goneyalewa

E rawa ni da vakaraitaka na loloma kevaka oqori na ka era gadreva na itabagone, kunea vei ira e dua na iitokani, rogoci ira, ka vakasaqarai ira ena vosa kei na ivukivuki vakayalovinaka. Eda na gadreva me da cakacaka vata kei ira nodra itubutubu kei na bisopi me kunei na dauvakasala baleta na dredre ni bula, lomaocaoca, se dua tale na mate ni vakasama. E rawa ni da vakayaco duidui ena nodra bula. Vakabibi ni dau rawarawa nodra goleva na kukuna na itabagone se itabagone qase cake era vakasalewalewa se vakasaganegane. Era gadreva me ra ologi ena ligana na iVakabula ka kila ni ra lomani. Sa vakavuqa ni dau kacivi keda na Turaga; e namaka me da Ligana ni veikidavaki kei na loloma. Eda gadreva me da vakayaloqaqataki ira nodra itokani me ra kitaka vakakina.

Na kukuna e semati vakaukauwa sara ki na mosi ni taro sega ni saumi, na rarawa ni yalo, na vutugu ni yalo, vakacava ke kei na vakacava tu qo. Na yali ni bula vaqo sai ira na leqa e ganita sara ni da dua na umatamata me da dolele yani ena veisala mana me da vakasala, kauwai ka leqataka, ka volekati ira ka tokoni ira noda itabagone. Tovolea mo cavuta mada ga na yaca “Jisu Karisito” ena dua na vanua ni tikoleqa vua e dua sa sega nona inuinui. Nomu kacivi Koya mada ga ena yacana, ena vakarokoroko, e rawa ni vakayaco veisau ena veigauna dredre.

Ena so na vanua era sotava tiko na ka era vakatoka me “veimurimuri” ni kukuna, e vakayacora e dua na itabagone na ivalavala rerevaki oqo ka ra raica na kena vo ni oqo e dua na ka e rawa ni caka era qai vakamuria.

Meu wasea mada vei kemuni na italanoa ni dua na itabagone mai Peritania ka a kaburaki ena itukutuku ni BBC ena Epereli 2018. Na italanoa kei Hati Sparey-South, yabaki 16 ka sa “tovolea oti me vakamatei koya. A rawa ni tovolea tale ka na rairai rawata beka kevaka a sega e dua na qasenivuli a kidava ena kena irairai ni sega tiko ni marau.” E tolu nona itokani eratou sa kunati iratou oti. Sa dau lomaocaoca tu ga ena loma ni rua na yabakisa oti.

E kaya o Haiti, “Au sa dau rarawa tu ga vakalevu. Kau sega ni dau moce rawa.” Sa toso tiko ga na butobuto. Erau sa veibiu nona itubutubu, ka curu suka tiko mai valenibula o tinana ena tauvimate. Ni gole kece tiko vei tinana na vakasama, e sega ni dua e kidava tiko na buto e matai Hati. E sega ni dua e bau taroga, “Sa vakacava tiko o iko? Sa vakaevei toka nikua?”

A curu yani i kalasi ena dua na siga ka dara tu yani e dua na siqeleti sega ni veiganiti, ka se qai koti laivi oti na uluna. A taroga mai nona qasenivuli, “Ei, o vinaka tiko? Sa vavei tiko ?

A tukuna ga mai o Hati, “Vinaka tiko.” Ia a sega ni yaco ga e kea. E dua e raici koya tu mai. “Sa bau ca sara ga na yaloqu,” e kaya. “Au sa rarawa sara ga. “Au a tagi tu ga.

Oti qai sorova tu na tagi o Hati, qai drodrova sobu na matana nona isasauni. Ia e sega ni dua na ka sa yacovi koya rawa yani e dua.

A taroga na qasenivuli oqo e dua na taro rawarawa e dau taroga vei ira e levu na gone. Ia ni solia e dua na ivakatakilakila ni kauwai, a kukuva o Hati na isolisoli ni bula oya. Ka vukei o Hati.

Qai vakamacalataka e muri o koya, “E vaka ni dua ga na ka lailai ia e sega ni vakabauti na kena mana ni o tukuna vua e dua na gone, ‘Sa vakacava tiko?’ ni ra curu mai ki valenivuli, ka kila, kevaka sara mada ga era, ‘Vinaka tu,’ era sa na rogoci iko.”¹²

Na tukuna na tuakaqu lomani o Jeffrey R. Holland, “Na cava ga ko ni sasagataka tiko, kemuni na taciqu kei na ganequ—ka ni vakasama se ka ni yalomu se ka ni yagomu se dua ga na ka—kakua sara ni digitaka mo vakacacana na mareqeti ni bula mo yalana! Vakararavi vua na Kalou. Taura matua na Nona loloma. Kila tiko ni dua na siga ena rarama sara mai na malawa oqori ka na dro na iyaloyalo ni bula vakayago. Dina ga ni da na vakila ni da sa vaka “na bilo sa kavoro” me vaka e kaya na dau ni Same, e dodonu meda nanuma tiko, ni bilo oqori e tiko e ligana na dau tuli kuro vakalou.”¹³

E sega ni dua tuvatuva me baleti koya e rawa ni vakaleqai. O ira na itabagone oqo era dau vakatagi biukila, lewe ni matasere, qito ena timi ni soka, se tawa iyaya mai na sitoa ni suka na vuli. Era dau lako mai lotu, eso vei ira—era veitokani kei ira ena nomu kalasi, e dina ni so vei ira era sa vakatikitikitaki ira makawa sara mai na lotu. Ia e tu eso na ka e tautauvata: na cudru,sega ni ciqomi, muduki na vei tau, na veicacati, na veivaqaseni, na lomaocaoca vakavuli, kei na ka eda rawa ni vakatoka me yalorarawa vakaitabagone.

Na Lotu sa raica sara vakabibi na kukuna ni itabagone, sa tauyavutaka e dua na mataveilawa kei na itukutuku, na vidio ena initaneti, veivuke vei ira galili, talevoni ni veivuke, ka tuvai na ivakatakilakila ni ivakasala ni qaqarauni me, vakataki Hati, era kaci ni veivuke.

Yalovinaka, mo kilai ira vakavinaka na ivurevure eso oqo, o na rawata vakavinaka nomu ilesilesi me vaka “e dua na qasenivuli mai vua na Kalou.”¹⁴

Me da tukuna vakacava vua e dua e kune rarawa tiko ni kila na Turaga na ivakarau ni yalona? Sa taura oti o Koya na nomu veibolebole kei na cala kece sara me Nona. Sa colata o Koya ena vukumu me rawa kina ni Dua nomu dauveiqaravi e kila vinaka tu na vanua e mosi kei na vuna.

Era na vukei o ira era sa dokoulu sobu tiko kevaka e kilai vakavinaka cake o Jisu Karisito. Sa itukutuku ni vakanuinui na Nona loloma kei na vanua talei ni bula vakacerecerei tawamudu sa vakarautaka tu o Koya vei ira. e lomani ira o Koya. Era gadreva me ra kila oya. E tukuna ivolanikalou, “Niu sa tiko vata kei kemudou koi Au na Turaga, kau na tu e yasamudou.”¹⁵E sega ni dua na veitalanoa sega na betena me baleti ira na era sa savasava vuka se o ira era dabe ena matabose ni semineri. Ena tu o Koya e yasamuni yadua na noda itabagone—o keda yadudua—ena noda veiauwa butobuto. Oqori na mana ni Veisorovaki, ka gadrevi me da vakavuvulitaka ena noda igu me yacovi ira yani era kune rarawa voli.

iVakatakilakila

Vakabula tiko e dua na marama o Jisu Karisito

Vukei ira na gonevuli me ra kunea e dua na “ivolanikalou itataqomaki,” e dua e rawa ni ra nanuma ni ra sotava e dua na gauna dredre se ni ra gadreva na igu me ra dro tani. E dua na ka vinaka oqo, “O koya mo dou marau kina, ka kakua ni rere, ni’u sa tiko vata kei kemudou koi Au na Turaga”¹⁶

E dau vakasinaiti tu ga na bula ena bolebole. E sega ni dua e vakuwai kina. Sega ni o iko, o au, se o ira. Era rarawa eso na itabagone ni ra nanuma o ira ga era sotava tiko na leqa. Na tamata kecega e vaka ni ra sotava tiko. Era sa rawai ena vakasama ni kevaka eda vulica na ivolanikalou, ka muria na ivunau, ka masu e veisiga, ena lako siviti iko na mosiniyalo, na bula leqa, sega ni kilai, kei na vakacalaka. E sega ni dau yaco vaqori. Na veitemaki ena lako mai kivei keda kece sara.

Na bula leqaleqa, na bolebole, veivakatovolei, na veika rarawa, na dredre, yaluma—se cava ga o vakatokai ira kina—era tiki ni bula lako oqo me da vaqaqacotaki kina ka veitaraicake. Na kena veivakalougatataki oya ena Veisorovaki nei Jisu Karisito eda se rawa tikoga ni “marau.”¹⁷

Kakua ni laiva me liu na yasana vakavuli ni veidusimaki vakosipeli mai na mana ni kena tatara ka veivakayaloqaqataki vei ira nomu gonevuli na Yalo. Vakarautaki ira me ra ciqoma na veivakauqeti ka cakacakataka. Vakarautaki ira me ra ciqoma na nodra ivakatakila me vaka e vakabibitaka o Peresitedi Nelson.¹⁸

Ni sa vakakina, era na raica na cakamana ni nona veidusimaki kei na veituberi na Turaga, e dua na ivatuka dina ni Nona loloma.

Na cava au digitaka kina meu vosa ena kukuna kei na kena itokani—rere, galili, yalolailai, nuiqawaqawa, kei na mosi—ena dua na gauna rokovi vaqo? Baleta o kemuni, na taciqu kei na ganequ lomani, ni lewena na “mataivalu taumada,” ni kena valuti, kevaka e sega, au sureti kemuni mo ni vakakina. Na kukuna kei na kena itokani butobuto era ka dina. Sa tubu tikoga ena kedra maliwa na noda itabagone ena dua na itotogi ka bacani kina o ira sara mada ga na gone digitaki ka nanamki tu ki na veigauna vinaka, me ra nanuma ni sega ni vakainaki nodra bula. E sega tale ni dua na ka e yawa cake mai na dina.

iVakatakilakila

veitauriliga wavoki o ira na gone

Na bula e rawarawa ni kavoro. Eda sega ni kila na gauna ena yaco kina vua e dua e dua na ka ka da na kidacalataka sara. Eda vakila ni da sega tu ni vakarau ka sega ni kila na ka me da cakava. Ia kevaka era lako mai na veivuvale dau caka kina na masu vata, vuli ivolanikalou, kei na lotu vakamatavuvale era na qaqaco vinaka tu na iyaya ni “tautauri matua.” Yalovinaka me kakua ni cala noda nanuma, ke a taqomaki vinaka tu e dua noda itabagone kevaka a dau vakayacori tiko na veika oqo. E dua na gone a vola vaqo ena dua na itaviqaravi ni lotu vakamatavuvale ka ra kerei kina na lewe ni matavuvale me ra vola e dua na ka bibi vei ira. A vola vaqo na gone yabaki 14 ka vaka me tu saraga ena dela ni nona vuravura, e vola vakaoqo: “Meu kila ni tiko e dua dau kauwaitaki au.”

E dua noqu itokani vinaka a sega ni tauri semineri me yacova nona veiyabaki e muri ena vuli torocake. A sega ni dau lako i lotu o koya; me tekivu sara ni se qai yabaki 13. Me vaka ni dau lagasere, a nanuma me tovolea na matasere ni semineri, ka mani rawata. (Era na lewena kece na matasere ni semineri!) E sega ni nanuma rawa e dua na lesoni ena kalasi. Ia, ena veigauna kece era lagasere kina, e vakasinaita na rumu na Yalo, ka kila ni duatani oqo mai na sere ni koronivuli a dau lagasere kina ena tai ni sala kadua. E vakila e dua na ka se bera vakadua ni bau vakila e liu. E vakila na Yalo. Ni lako mai na dua na matavuvale kavoro ka sega kina na veidusimaki vakosipeli, e matalia vua na Yalo. Sa yaco me vakamareqeta ka vakararavi kina. E tudei tu o koya ena kosipeli i Jisu Karisito o koya baleta “ni a tiko e dua e kauwaitaki koya.” Ia oqo, ni sa oti e vica na yabaki, e dau veivosaki ena veigauna eso kei na nona qasenivuli ni semineri, e dua na “qasenivuli ka lako mai vua na Kalou.”¹⁹

Me baleti ira o vakavulica ka sega ni ra tokoni, na kaukauwa mai vale oya, sa ka bibi kina ena nodra tiko vinaka na nomu veivakavulici. Sai ira beka era taroga lo e dua na taro me rawa tiko kina na veivosaki vakosipeli baleta oqori duadua ga na gauna e rawa kina na veisemati vakayalo ena nodra siga. Yalovinaka, vakamareqeta na veimadigi vaqori, ka solia vei ira eso na gauna.

Na veivakabulai ena yaco mai vua na iVakabula, ka sa “lako sobu mai ki ra sara”²⁰me rawa ni vakila kina “me vaka na veika vakayago na sala me vukei ira kina na nona tamata me vaka na nodra veimalumalumu.”²¹

Vakasamataka mada nona vakani ira na lewe lima na udolu o Jisu ena vica na ika kei na ibuli madrai na kena ivakasigalevu e dua na gonetagane oti qai lako duadua cake ki na ulunivanua me masu. Era a soko kosova na wasa o Kalili na nona tisaipeli, ni toso na bogi a lako yani vei iratou ko Jisu e dela ni wai. Ni ratou raici koya, eratou sa “qoqolou ni ra sa rere,”²²qai kaya o Koya, “Dou vakacegu; koi Au ga; dou kakua ni rere.”²³

Ni sobu yani ko Pita e yasa ni waqa ena yaloqaqa ena bogi ko ya ni kacivi koya mai na Turaga ka tekivu me lako yani ena dela ni wai, a sinai ena vakacegu me yacova ni raica sobu yani na veitubutubui ni ua ni wasawasa. A qoqolou ni sa rere.

A dodoka yani vua na ligana ko Jisu sega ena veivakalialiai ia ena yalololoma. E vakamacalataka o Moronai na noda dui lutu “Me laveti [keda] cake mada ko Karisito, na nona vakararawataki kei na nona mate, … na nona loloma cecere, na nona vosota vakadede kei na inuinui ni nona lagilagi kei na bula tawamudu, me tiko ena [noda] vakasama me sega ni mudu.”²⁴

Kemuni na taciqu kei na ganequ, a vosa tiko vei keda ko Koya baleta o keda kece, eda tu e dela ni wai.

Ena dua tale na ituvaki ena Veiyalayalati Vou, sa ra mai wavolita tu e dua na turaga “tauvi-paralasi, a sa davo koto ena dua nai mocemoce.”²⁵Sa raici koya yani na Turaga o Jisu Karisito ka vakila na nodra vakabauta o ira era tu wavoliti koya ka kaya, “Mo vakacegu.”²⁶

Ena iotioti ni itabagauna oqo a vosa o Jisu Karisito mai vei Josefa Simici vei ira na Nona italai era a lako yani vakaulotu ka sotava na veika rerevaki ka dredre, ka kaya, “Dou reki ka marau na gonelalai, niu sa tiko ena kemudou maliwa.”²⁷

A raici ira na iApositolo ena raivotu o Josefa Simi ena nodra kaulotu voli mai Igiladi “era tu wavoki ka rairai oca, e kabasu na nodra isulu ka vuvuce na yavadra, era rai sobu tu, e tu ena kedra maliwa ko Jisu, ka ra sega ni raici Koya. A raici ira na iVakabula ka tagi.”²⁸

E rawa beka ni o raica na kena ivakarau? E vakatakilai na kaukauwa i Karisito ena kena rawarawa ni tu ga o Koya me baleti keda. Se cava ga ena yaco mai, ena tiko kei keda o Koya, ena vakacegui keda o Koya, ka na vakabulai keda kevaka eda lako mai Vua ka vakayagataka na Nona kaukauwa me vakabulai keda. E vakavuqa ni dau vakabula na yalo mavoa. Ena caka vakacava, eda na taroga? Ena mana ni Veisorovaki sa vakayagataki ena noda bula nikua, sega ena ivakataotioti ni se bera na iotioti ni veilewai, ia e veisiga ni da segata me da vakataki Koya, me da lomana na ka e dau lomana, me da muri ira na Nona parofita digitaki.

Niu vulica na Veisorovaki, au saga meu vakasamataka na iVakabula ni tekiduru tu ena Were e Kecisemani. Ka qai masu o Koya, “Tamaqu, kevaka ko ni sa vinakata, ni kauta tani vei au na bilo oqo: ia me kakua ni yaco na noqu lewa, me yaco ga na nomuni lewa.”²⁹E kaya o Koya me baleta na Nona Vakararawataki, “Na kena mosi ko sega ni kila, na kena bibi ko sega ni kila, io, na kena dredre mo vosota ko sa sega ni kila.”³⁰E gadrevi me ra kila vakamatata na noda itabagone na veika bibi oqo.

iVakatakilakila

Era vakacegui Jisu na agilosi mai Kecisemani

“A sa rairai mai vei koya e dua na agilosi mai lomalagi, a sa mai vakaukauwataki koya.”³¹

Ena Nona gagadre, me colata na noda ivalavala ca kece, na noda veisiga ca sara, noda malumalumuu kei na yalorarawa, a rairai mai e dua na agilosi me vakacegui Koya. Ena nomu veika dredre duadua, taciqu kei na ganequ, sa vakarautaka na Turaga me “vakavolivoliti keda na [nona] agilosi me ra laveti [keda] cake.”³²Oi kemuni na qasenivuli lomani, sai iko beka na agilosi oya.

E vakamatatataka na iVakabula ena Kana Vata ni Lako Sivia na Nona ilesilesi kei na yalayala ni sautu ni kaya, “Dou na kunea e vuravura na rarawa; ia mo dou vakacegu; au sa vakamalumalumutaki vuravura.”³³E dei tu o Koya ena veika sa tu e matana, e dei tu o Koya ena Nona itavi me mai vakavotukanataka na yavu ni veivakabulai ka qai vakayaloqaqataki ira na Nona tisaipeli, “Mo dou vakacegu.”

A dikeva rawa o Elder Neal A. Maxwell: “Sa vakarau me sobuti Jisu na yaluma sega ni vakasamataki rawa; sa vakarau me soli Koya yani o Jutasa. Ena qai kau vakavesu o Jisu ka beitaki; nodra talabusese me vaka na sipi na Le Tinikarua; na kanakuita veivakalolomataki ni iVakabula; na veilewai sega ni dodonu; na nodra kailavaka na ilawalawa ca na yacai Parapa ka sega o Jisu; oti sa qai ia na veivakamatei ena kauveilataki mai Kalivari. Na cava me da kune vakacegu kina? Ena ka saraga e tukuna o Jisu: Ni sa vakamalumalumutaki vuravura oti! Sa vakarau me yaco na Veisorovaki. Sa vakadeitaki na tucake tale ni kawatamata. “Sa na sega tale na mate—sa druka ko Setani ena nona via tarova na Veisorovaki.”³⁴

Eda rawa ni vakavuvulitaka na dina a cavuta o Peresitedi Russell M. Nelson: “Ke sega na Veisorovaki tawayalani ni noda Dauniveisereki, e sega ni dua vei keda ena rawa ni nuitaka me lesu vua na Tamada Vakalomalagi. Ke sega Nona Tucake tale, sa na icavacava ga na mate. Na Veisorovaki ni noda iVakabula sa yaco kina me rawa na bula tawamudu kei na bula tawavuca me rawa vei keda kece.”³⁵

Vakasamataka vakatitobu mo tugana vakacava ki yalodra na nomu gonevuli na nona igu na iVakabula, nona loloma vei keda kece, kei na nona rokova na ituvatuva vakalou nei Tamana. Masuta mo vukei ira me ra kila ni Veisorovaki i Jisu Karisito e baleti ira kei na cava na kena ibalebale ena nodra bula osooso.

Vakayaloqaqataka na veiqaravi ena matanitu ni Kalou ka na kauta mai na Yalo ni Kalou.

Niu a veiqaravi ka veiliutaki ena Tabacakacaka ni Valetabu ena vica na yabaki, au dau marautaka niu curuma yani na valetabu ka raica ni ra laini tu na cauravou kei na goneyalewa me ra laki papitaiso ena vukudra na mate. Ni o vakabibitaka na mana ni valetabu ena nomu ivakavuvuli, o sa vaqaqacotaka tiko na madigi cecere oqo ni dodonu me ra kilai Jisu Karisito, me ra kila ni sai Koya na ivurevure ni nodra kune “vakacegu.”

Au vakavinavinakataka na iwliwili tubucake tiko ni cauravou goneyalewa itabaqase vakaedaumeni vou era sa liganicakacaka vakalotu ni valetabu. Ni ra vakaisulu ena isulu vulavula, ena ituvaki sa totoka qai rakorako, era tu ena vanua tabu ka tukuni Koya, ni a bula e liu, bula tiko edaidai, ka bula tikoga ena gauna mai muri.³⁶Na noda qarava na Turaga ena valetabu e sala duadua ga eda rawa ni vakila kina na iVakabula.

Vakayaloqaqataki ira nomu gonevuli me dua nodra ivolatara ni valetabu—yalani se tudei vakatau ena yabaki kei na ituvaki ni bula—me ra qai dau wasea nodra nanuma me baleta na tiko e valetabu, na ivakatakila kei na veivakauqeti e yaco mai ni ra yacova yani na taudaku ni bula oqo baleta “na veika e uasivi cake”³⁷ni ra veiqaravi e vukudra era sa sega ni rawa ni cakava na veicakacaka vakalotu.

A kaya o Peresitedi Nelson, “Ni vakanamata na noda bula ki na ituvatuva ni veivakabulai ni Kalou… vei Jisu Karisito kei na Nona kosipeli, e rawa ni da reki veitalia na cava e yaco—se sega ni yaco—ena noda bula.”³⁸

Niu tabaki meu iApositolo, a cavuta o Peresitedi Monson niu sa dua na ivakadinadina bula digitaki ni yaca i Jisu Karisito e vuravura taucoko. Au sega ni taura vakamama na ivakaro oya. Au wilika ka vulica na ivolanikalou meu kila na Turaga ena Yacana kei na itutu. O ira kece oqo kau na wasea vei kemuni era tauri mai na veitikina ena ivolanikalou ka vakananuma vei keda na noda inuinui sa tu Vua. Sai Koya:

Nuinui Nei Isireli.³⁹
Kalokalo iVolasiga e Serau tu.⁴⁰
iVakatawa Vinaka.⁴¹
Daunivakasala.⁴²
Na Tui ni Sautu.⁴³
Vakabula.⁴⁴
Rarama kei Vuravura.⁴⁵
Bete Levu ena ka vinaka ena muri mai.⁴⁶
Qaqa me veivakabulai.⁴⁷
O Koya sa tu Vua na kaukauwa kecega.⁴⁸

Nona veivakayarayarataki, ivakatakilakila, kei na Nona iyalayala na Karisito e kovuta na ka kecega. E tu o Koya ni da lutu ka segata me da toso ki liu. Kevaka eda sikalutu, na Nona “rarama sa cilava na butobuto”⁴⁹—e dua tale na Yacana—sa ramase vakalevu cake. E lomani keda o Koya ena noda gauna serau duadua kei na gauna butobuto duadua.

Na tisaipeli i Jisu Karisito e sega ni cakacaka vakabekataki. Na Nona salatu e vakatakilakilataki tu vakavinaka ena imawe ni Yavana. Ni da muri Koya, sa yaco me da lomana na veika e lomana o Koya. Ni da vakavouya noda veiyalayalati vata kei Koya e veimacawa ena noda vakaivotavota ena sakaramede tabu, eda na tubu ena noda kila ni o Koya na Dauveivueti kei Vuravura,⁵⁰na Yalo ni Ka Dina,⁵¹na Vosa.⁵²

Vakavulica vei ira nomu gonevuli na mana ni sakaramede, vakauasivi vei ira era yamekemeke tu kei ira era vakawalena tiko na cakacaka vakalotu mareqeti oqo. Me dua na ka e veivosakitaki na veivakalougatataki ni sakaramede, me “tikoga kina kei [keda] na Yalona,”⁵³me ka dina kina noda rawata na mana ni veivakabulai nei Jisu Karisito, mai na Nona Veisorovaki.

Kena ikuri, e tukuni Koya na iVakabula ena veimalanivosa ka vakatakila na Kena ituvaki vakalou kei na Nona itavi tawamudu:

dou tiko lo, mo dou kila Ni’u sa Kalou.”⁵⁴.
“NI sa rawa meu qisi kemudou mo dou savasava.”⁵⁵
“Kau sa vakayacora na lomai [Tamaqu].”⁵⁶
“Koi Au na Turaga … sa ka ni marau meu vakalagilagi ira era sa qaravi au.”⁵⁷
“Sa rauti kemudou na noqu iloloma soliwale.”⁵⁸
“Ko na rawata kina na noqu vakacegu.”⁵⁹
“Dou kakua ni rere … ni dou sa noqu.”⁶⁰

Kemuni noqu itokani, taciqu kei na ganequ, sai Koya oqori na iVakabula au sa kila, au lomana ka’u vakarokorokotaki Koya ena yaloqu taucoko. Au vakadinadinataki Koya mai vu ni yaloqu ena Nona vinaka kei na loloma cecere. Sa yalataka o Koya, “Ni dou sa wekaqu, ena tiko na nomudou ivotavota vakawa vata kei au.”⁶¹

Na kena dina, oi kemuni na taciqu kei na ganequ, sai Jisu Karisito na kenai wali. Ni da kila na Nona itavi kei na Nona kosipeli, ena vakaukauwataki keda na noda lomani Koya, kei na noda vakabauta kei na vakararavi Vua.

E vakamacalataka vakavinaka o Ilamani: “Ia oqo, oi kemudrau na luvequ, mo drau nanuma mo drau nanuma mo drau tara na nomudrau yavu ena uluvatu ni noda Dauveivueti, o koya na Karisito na Luve ni Kalou; ia ni sa vakaliwava mai na tevoro na nona cagi kaukauwa, io, kei na nona moto ena covulaca, io, ni sa liwavi kemudrau na nona uca cevata kecega kei na nona cava kaukauwa, ena sega ni rawai kemudrau me dreti kemudrau sobu ki na ikeli ni rarawa kei na yaluma tawacava rawa, ni sa dei sara na uluvatu drau sa tara kina, ka sai koya na yavudei ia kevaka sa tara cake na tamata ena yavu oqo, ena sega sara ni bale rawa.”⁶²

iVakatakilakila

Sa keveta tiko o Jisu e dua na lami

Au laiva vei kemuni na noqu veivakalougatataki mo ni vakila na loloma ni Turaga ena nomuni bula ka mo ni qai vukei ira na nomuni gonevuli me ra vakila talega. Au vakalougatataki kemuni me tu nomuni inuinui ka kunea na “vakacegu” me na tiko vata kei kemuni na Yalo ni Turaga, vakauqeti kemuni, ka laveti kemuni. Au vakalaougatataki kemuni mo ni rogoci ira nomuni gonevuli, mo ni kidava na veika era sega ni cavuta vakakina na ka era tukuna, kei na veivakauqeti mo ni kila na ka e vinakata na Turaga mo ni cakava. Au vakalougatataka na nomuni matavuvale, kei ira na watimuni. Mo ni kila na vakarokoroko, na vakararavi kei na loloma e tu vei ira noqu itokani iliuliu kei au ena vuku ni cakacaka bibi o ni qarava mo ni kauta mai na yalo vei Karisito. Ka mo ni vakila ni tu volekati kemuni na Turaga ena nomuni vakadinadinataki Koya, na iVakabula kei vuravura. O Jisu Karisito na iwali ni leqa e veigauna kecega.

Ena yacai Jisu Karisito, emeni.