Giya diha sa Panaw
Gabii uban sa usa ka General Authority
Miyerkules, Pebrero 5, 2020
Mapasalamaton kami nga makauban kamo karong gabhiuna. Si Jill ug ako migahin og upat ka tuig sa usa ka buluhaton uban sa maanindot nga mga tawo sa Europe, ug nasurpresa kaayo mi ug nahimuot sa dihang si Presidente Nelson mihangyo kanamo sa pagbalik sa CES. Mura og nahibalik sa panimalay ang pakasuod diha kaninyo kinsa mipahinungod og dako kaayong paningkamot ug kasingkasing sa pagtabang sa batan-ong katawhan sa pagkat-on ug pagsunod sa ebanghelyo ni Jesukristo.
Samtang naniid sa mga panghitabo sa mga panaw sa atong kaugalingon nga mga kinabuhi ug sa uban, naghunahuna ko kabahin niining atong panaw ngadto sa kinabuhing dayon. Alang kanato kinsa modawat ni Jesukristo ug sa Iyang Pag-ula, ang sumbanan sa atong mga kinabuhi managsama ra. Mopakita kita og hugot nga pagtuo diha sa Manluluwas ug mosunod Kaniya bisan pa man sa mga hagit. Mohinulsol kita sa atong mga sala, modawat og mga mahinungdanon nga mga ordinansa, ug molahutay hangtud sa katapusan. Apan ang mga detalye sa matag kinabuhi lahi kaayo, ug ang mga hagit nga among giatubang nagkadaiya sa kada indibidwal.
Hunahunaa ang panaw sa pamilya ni Lehi ngadto sa gisaad nga yuta. Ang ilang lahi nga panaw makahatag og mga panglantaw sa atong kaugalingong mga panaw. Nasayud sila nga padulong sila ngadto sa gisaad nga yuta, apan wala sila masayud sa tanang butang mahitungod sa padulngan o sa eksaktong dalan padulong didto. Misinati sila og seryoso nga mga hagit sa pagpadulong. Gani si Nephi, kinsa wala magbagulbol, mipasabut nga sila “nag-antus sa daghan nga mga kasakit ug hilabihan nga kalisud, … hilabihan kaayo nga kami dili na makasulat sa tanan.”1
Sila gigiyahan sa ilang pagpadayon. Sa pagkatinuod, si Lehi gisultihan sa pagkagabii nga “sa pagkaugma siya kinahanglan mopanaw ngadto sa kamingawan.”2 Pagkasunod buntag iyang nakit-an ang Liahona diha sa pultahan, naghatag og balaan nga direksyon sa ilang panaw. Apan ang pag-angkon sa Liahona wala makapausab sa hiyograpiya tali kanila ug sa ilang gisaad nga yuta. Wala kini mopagamay sa Peninsula sa Arabia o sa kadagatan nga kinahanglan nilang tabukon. Kinahanglan gihapon sila nga mopadayon sa unahan diha sa pagsinati og mga hagit nga may kalabutan sa ilang lahi nga panaw. Apan ang Liahona migiya gayud kanila ngadto “sa labaw nga tambok nga mga bahin sa kamingawan,”3 ug kon sila dili pa tapulan, nakatabang kini kanila sa pag-agi sa husto nga dalan.4
Si Laman ug Lemuel mibagulbol tungod sa kalisud nga ilang giatubang diha sa biyahe. Ang pipila niadtong mga kalisdanan ilang kaugalingon nga mga binuhatan. Apan, bisan kon sila nagsunod sa direksyon ug tukma nga nagbiyahe, nagsagubang gihapon sila sa pagkaon og hilaw nga karne ug sa mga naghingapin nga kainit sa adlaw diha sa desyerto. Susama sa kasinatian ni Laman ug Lemuel, usahay ang mga tawo maghunahuna nga sila dili moatubang og mga hagit, nga kon sila magbuhat kon unsa ang matarung, ang tanan mahimong sayon. Dili kana ingon niana. Nagpasabut kini nga kita mahimong mapalig-on ug magiyahan apan dili pasabut nga dili kita mag-atubang og mga hagit.
Bisan mibalhin sila isip usa ka grupo, sila anaa usab sa indibidwal nga panaw. Bisan ang ilang panaw mihatud kanila ngadto sa samang lugar, ang ilang tagsa-tagsa ka padulngan managlahi kaayo ug natino pinaagi sa personal nga mga desisyon ug mga aksyon samtang nagpadayon.
Matag usa kanato adunay tinagsa tagsa nga panaw niining kinabuhi, apan atoa usab gipaambit ang tipik niana nga panaw ngadto sa uban. Pananglitan, nagdungan kita diha sa atong mga paningkamot sa Seminaries and Institutes of Religion ug sa edukasyon sa Simbahan. Kita adunay katuyoan; kita sa kinatibuk-an nasayud sa atong padulngan, apan wala kita masayod sa tanang mga babag o sa kada detalye sa rota nga padulong didto.
Matag usa kanato mopili kon sa unsang paagi nga kita mobiyahe uban sa grupo. Mahimo kita nga magbagulbol. Mahimo kita nga magmaya. Mahimo kitang magmapasalamaton bisan taliwala sa mga hagit. Alang sa uban, ang kausaban sa mga polisiya sa Simbahan o pamaagi mahimong malisud. Nahimuot kaayo ko nga makita kon sa unsang paagi ang S &I mitubag sa dinasig nga kausaban sa gipahingusgan nga nakasentro sa panimalay ug gisuportahan sa Simbahan nga pagkat-on sa ebanghelyo.
Kita, mag-atubang gayud og mga hagit. Pinaagi sa pagsunod sa paggiya sa Ginoo, kita makabuntog ug makakat-on gikan niining mga hagit. Ang Propeta nga si Joseph Smith miingon, “Klaro kaayo nga ang Ginoo mihatag kanato og gahum katimbang sa trabaho nga atong pagabuhaton, ug ang kalig-on sumala sa lumba nga gibutang sa atong atubangan, ug ang grasya ug panabang sigun sa atong panginahanglan”5
Nagdawat kita og giya aron sa pagtabang kanato sa pagsubay sa direkta nga rota ug mobiyahe lahos sa labaw nga tambok nga mga bahin sa kamingawan diha sa atong panaw. Kita adunay giya gikan sa mga propeta. Nasayud ko nga kita giniyahan sa mga propeta, manalagna, ug mga tigpadayag. Pagkadakong panalangin! Kita gitudloan sa Church Board of Education, ug anaa usab kanato si Brother Webb, ang iyang team, ug ang uban nga dinasig nga mga lider. Agig dugang, matag usa kanato angayan alang sa personal nga giya samtang mag-atubang kita og piho nga mga isyu diha sa atong indibidwal nga mga buluhaton.
Ang Church Board of Education ug ang executive committee sa Board managtigum sa matag bulan. Dinhi niining mga panagtigum kita makadawat og mga direksyon ug tambag. Makaangkon usab kita sa panalangin sa tinuig nga “Gabii uban sa General Authority,” ug sa milabay nga katuigan atong nadawat ang mapuslanon kaayo ug nakatutok nga giya sa pagtabang kanato sa atong panaw—isip usa ka organisasyon ug sa indibidwal nga paagi.
Ako nag-ampo nga kita mahimong bukas ngadto sa giya ug direksyon gikan sa Ginoo. Nasayud ko nga Siya buhi ug motabang kanato ug mogiya kanato.
Sa ngalan ni Jesukristo, amen.