Gabii uban sa usa ka General Authority
Gabii uban sa usa ka General Authority
Biyernes, Pebrero 7, 2020
Si Elder Bednar mipahinumdom nato nga ang pagtudlo dili pagsulti; kini naglakip sa pagpaminaw, pag-obserbar, ug pagkamatikod. Naglakip usab kini sa imbitasyon sa Espiritu Santo sa pagtudlo kanato.
Pangutana
Si Presidente Nelson bag-ong mitudlo mahitungod sa kaimportante sa personal nga pagpadayag. Unsa ang imong itudlo namo mahitungod sa pagdawat og personal nga pagpadayag?
Elder David A. Bednar
Sa pagtuman nato sa atong mga pakigsaad, makabaton kita sa Espiritu Santo nga atong kanunay nga kauban. Kanunay kitang naghisgot nga mora og ang pagkadungog sa tingog sa Ginoo pinaagi sa Iyang Espiritu talagsa ra nga hitabo. Kinahanglan kitang motutok pag-ayo sa pag-ila unsay nahitabo nga nakaingon sa pagbiya sa Espiritu. Kon kamo ug ako naghimo sa atong labing maayo ug wala makahimo og seryoso nga kalapasan, nan makasalig kita kanunay nga ang Espiritu Santo mogiya kanato.
Daghang tawo nagtuo nga ang inspirasyon nga gikan sa Espiritu Santo madramahon, dako, ug kalit. Ang tinuod mao nga ang Espiritu Santo naggiya sa hinay, hinagawhaw, ug magkadako paglabay sa panahon. Kasagaran kamo dili makamatikod nga kamo nakadawat og pagpadayag sa higayon nga kamo nagdawat og pagpadayag.
Si Nephi mao ang perpekto nga ehemplo niini nga sumbanan. Miadto siya nga wala masayud sa sinugdanan sa mga butang nga siya mobuhat1 Siya mipadayon paingon ngadto sa unahan apan wala masayud sa matag higayon nga siya gigiyahan. Maghimo kita og koneksyon nga unsay nahitabo ni Nephi tingali mao ang sistema sa pagpadayag alang nato sa daghang mga higayon.
Ang mga miyembro sa Simbahan usahay mahadlok nga masayop sila, mao nga sila dili mopadayon. Si Nephi ug ang iyang mga igsoon nagripa. Kana wala magsilbi. Kana ba nga kasinatian ni Nephi sayop? Dili. Nakat-on siya og importante nga leksyon. Sa dihang misulay sila sa pagkuha sa tumbaga nga mga palid gikan ni Laban gamit ang ilang bulawan ug ilang tanang kabtangan, si Nephi nakat-on og laing leksyon aron sa pag-andam niya unsay anaa sa unahan.
Adunay mga baruganan kalabut sa pagdawat og pagpadayag. Pananglitan, si Presidente Packer miingon, “si Presidente Harold B. Lee misulti nako makausa nga ang inspirasyon mas sayon kon ikaw anaa sa dapit nga nagkinahanglan niini. … Husto si Presidente Lee!”2 Importante nga anaa sa lugar, mamalandong, mag-ampo, ug magtinguha og tabang.
Kini nga baruganan adunay dakong mga implikasyon kabahin sa pagpangalagad. Kadaghanan sa adunay mga buluhaton sa pagpangalagad nagtuo nga igo na ang pag-text. Adunay mga okasyon nga kamo kinahanglan nga anaa sa panimalay ug kinahanglan kamong motan-aw sa mga tawo sa ilang mga mata. Makadawat mo og mga impresyon ug inspirasyon diha sa panimalay nga dili ninyo makuha sa bisan unsang laing paagi.
Pangutana
Modugang ba ikaw og bisan unsa sa among pagsabut sa pagpadayag nga nadawat ni Presidente Nelson ug sa ubang mga lider sa Simbahan?
Elder David A. Bednar
Daghang mga miyembro sa Simbahan naghisgot mahitungod kon unsa ka daghan nga pagpadayag ang miabut sukad si Presidente Nelson nahimong Presidente sa Simbahan. Ang mga kausaban nga miabut karon nahisgutan na ug giampoan sa mga konseho sa daghang tuig ug gani mga dekada. Sa daghang mga sitwasyon, ang pagpadayag dili unsay buhaton apan kon kanus-a buhaton.
Pangutana
Gawas sa pagdawat og pagpadayag kanus-a kini buhaton, matag karon og unya makadawat usab kita og pagpadayag unsay buhaton, di ba?
Elder David A. Bednar
Ayaw kini himoa nga eklusibo, dili kini ang usa o ang lain. Daghang higayon ang pagpadayag unsay buhaton klaro kaayo. Apan ang tayming kanus-a kini buhaton maoy nalisdan sa daghang tawo. Busa, kon gikinahanglan, kita makadawat og pagpadayag unsay buhaton ug kanus-a kini buhaton—dili lang ang usa o ang lain.
Pangutana
Isip mga magtutudlo, mag-andam kami sa among mga leksyon ug mag-ampo alang sa mga estudyante. Unsaon namo sa pagkaila sa inspirasyon alang niadtong among gitudloan ug gipangalagaran?
Elder David A. Bednar
Atol sa inyong pagpangandam ug mga pag-ampo, kasagaran adunay kalit nga hunahuna, usa ka daklit nga inspirasyon, ug tingali dunay ngalan nga moabut sa inyong hunahuna o gani makakita og sinati nga nawong. Si Propeta Joseph Smith mihulagway niini nga “hinanaling pagsantup sa mga ideya.”3 Kon kini moabut og kalit, makahibalo kamo nga kamo nakadawat og unsa gayuy gikinahanglan nga pagpadayag, ug kana nga mga sitwasyon talagsaon.
Usa sa labing importante nga mga tinubdan sa pagsabut nga inyong maangkon mao ang mga pangutana sa inyong mga estudyante. Sa milabayng mga katuigan, nakabansay ko sa pagtubag sa mga pangutana gikan sa liboan nga kabatan-onan ug sa mga young adult. Tungod sa kadaghan diha sa mga miting, kasagaran motugot ko nga i-text ang ilang mga pangutana ngari nako sa kontrolado nga paagi. (Wala ko magsugyot nga mao usab ang inyong buhaton.) Ang pagbasa niadtong mga pangutana nga wala makaila sa nangutana mao ang usa sa labing maanindot nga mga kasinatian sa pagkat-on nga maangkon ni bisan kinsa uban sa mga batan-on. Ipangutana gayud nila unsay nakasamok nila ug unsa nga tabang ang ilang gikinahanglan. Unsaon nato sa pagkahibalo unsay isulti o itudlo hangtud kita masayud asa na sila?
Pangutana
Sa pagtinguha og pagpadayag, kinahanglan nga kami walay listahan sa mga butang nga buhaton—listahan sa mga butang nga among buhaton ug kanus-a. Kinahanglan nga kini gibase sa baruganan, di ba? Gani kita adunay mga ehemplo nila ni Nephi, Joseph Smith, ug Joseph F. Smith nga nagbasa sa mga kasulatan, naminaw sa propeta, ug dayon nakadawat og pagpadayag. Kadto ba mga baruganan, o kadto mga sundanan?
Elder David A. Bednar
Magbusog kita sa pulong sa Dios aron kita makadungog ug makaila sa tingog sa Ginoo. Kon atong himoon ang pagpangayo og pagpadayag ngadto sa usa ka listahan—buhata kining mga butanga ug kini mahitabo—kana kon kita anaa sa makuyaw nga dapit. Kinahanglang maghulat kita sa Ginoo, magbantay ug mosunod sa Iyang tayming—dili kita mangayo og pagpadayag base sa atong tayming.
Pangutana
Unsaon namo sa pagpakabuhi sa paagi nga kami andam kanunay sa pagpadayag sa matag higayon nga ang Ginoo andam sa paghatag niini kanamo?
Elder David A. Bednar
Ang mga pulong andam alang sa importante. Kinahanglan kitang magpuyo nga andam sa pagpadayag—aron kita “makabaton sa iyang Espiritu uban [kanato].”4
Adunay uban nga pasobrahan ang pagsabut niini; palihug gamita ang sentido komon.
Hunahunaa sa unsang paagi si Oliver Cowdery nahimong tigsulat ni Joseph Smith. Nakadungog siya sa bulawang mga palid, mahitungod ni Joseph Smith, ug adunay tinguha nga makigkita ni Joseph. Gibuhat niya kana nga tinguha.
Ang Ginoo mipahayag ngadto ni Oliver:
“Bulahan ikaw tungod sa imong nabuhat; kay ikaw nagpakisayud kanako, ug tan-awa, sa makadaghan nga ikaw nagpakisayud ikaw nakadawat sa panudlo sa akong Espiritu. Kon kini wala pa unta, ikaw dili unta makaabut sa dapit diin ikaw anaa karon.
Tan-awa, ikaw nahibalo nga ikaw nagpakisayud kanako ug Ako milamdag sa imong panumduman.”5
Ang sunod nga kapahayag niini nga bersikulo mao ang labing madanihon kanako. Si Oliver nadasig ug walay ideya nga siya nadasig. Nakadawat siya og pagpadayag ug walay ideya nga siya nakadawat og pagpadayag. Busa ang pagpadayag miabut pinaagi ni Joseph ngadto ni Oliver sa pagsulti ni Oliver nga siya nadasig ug nakadawat og pagpadayag.
“Ug karon Ako mosulti kanimo niini nga mga butang nga ikaw unta mahibalo nga ikaw gilamdagan pinaagi sa Espiritu sa kamatuoran.”6
Mao kana ang akong gipasabut sa kanunay makabaton sa iyang Espiritu uban kanato.
Pangutana
Imong gihisgutan nga si Nephi ug ang iyang mga igsoong lalaki nagripa aron sa pagtino kinsa ang moadto ug pangayoon ang tumbaga nga mga palid ug dayon naningkamot sa pagpalit niini gamit ang bulawan ug pilak. Kon kami nakahibalo nga kinahanglan kaming mobuhat, unsaon namo pagkahibalo nga gibuhat namo kini sa sakto nga tayming? Unsaon namo pagkahibalo nga sakto ang among gibuhat?
Elder David A. Bednar
Si Nephi wala makahimo og sayop o nasayop sa paghukom sa tayming. Kasinatian kadto sa pagkat-on, pagtulun-an human sa usa ka pagtulun-an, lagda human sa usa ka lagda. Giandam siya sa matag pagsulay—“wala masayud sa sinugdanan sa mga butang nga [siya] mobuhat.”7
Kon kita naghimo sa atong labing maayo ug naningkamot nga mopahinungod ug mohalad, kita dili makaimpluwensya sa uban sa dili angay nga paagi. Ang langit mao ang nagdumala niini nga buhat, dili kamo ug ako. Isip sakop sa Napulog Duha ka mga Apostoles, ako adunay mga buluhaton sa tanang higayon nga dili posible nga akong mabuhat sa akong kaugalingon lamang. Samtang buhaton ninyo ang labing maayo, kamo molambo ug mouswag. Kamo dili makahibalo kanunay kanus-a ang sakto nga panahon. Buhata lang ang inyong labing maayo.
Si Presidente Hinckley kanunay mitudlo, “Mahimo ra ang tanan.” Ug nagtuo ko niana, apan naghunahuna gihapon ko, “Uy; aduna pay mas labaw niana.” Samtang nagkatigulang ko, mas nakasabut ko nga kana mao lamang ang tubag nga anaa. Ang Dios dili mobiya kaninyo nga mag-inusara lang samtang naningkamot mo sa pagtabang ug pag-amuma ug pagpangalagad sa Iyang mga anak. Kon inyong buhaton ang inyong labing maayo, mosalir ra kining tanan. Ug makat-on kamo og leksyon.
Pangutana
Unsaon namo sa pagtudlo ang mga estudyante kinsa mobati nga dili angay nga sila andam sa pagpadayag sa tanang higayon? Ingon og kini bug-at nga buluhaton alang kanila.
Elder David A. Bednar
Imbis maghunahuna, “Unsay akong isulti nila?” ang tutukan mao ang, “Unsay akong ipangutana nila?” Ug dili lang, “Unsay akong ipangutana nila, apan usab “Unsay akong idapit nila nga ilang buhaton?”
Ang pagpangutana nila niana nga pangutana mao ang pagdapit nila sa pagbuhat. Ug kon kana nga estudyante motubag, kana mao ang pagpakita og hugot nga pagtuo diha ni Kristo. Ang hugot nga pagtuo usa ka baruganan sa buhat ingon man sa gahum. Sa atong pagbuhat sumala sa mga pagtulun-an ni Kristo, kita panalanginan sa Iyang gahum. Unsay kasagaran gusto nato mao ang gahum una aron kita makabuhat. Dili kana mao.
Ang atong hunahuna dili “Unsay akong isulti nila?” Imbis, ang pangutana mao ang pagpangutana sa atong kaugalingon, “Unsay akong idapit nga ilang buhaton? Unsa nga dinasig nga mga pangutana ang akong ipangutana, nga, kon sila andam nga motubag, masugdan ang pagdapit sa Espiritu Santo ngadto sa ilang kinabuhi?” Ang mga ipangutana yano ra kaayo, sama sa “Unsay inyong nakat-unan?” Pinaagi sa pagtubag sa mga pangutana, kana nga indibidwal nagdapit sa Espiritu Santo sa paggiya sa iyang mga tubag. Ang atong tahas mao nga luwas ang paghisgot niadtong mga butanga ug sa pagdapit nila sa pagbuhat aron nga ang Espiritu Santo makatudlo.
Kon gihigugma ninyo sila ug kon kamo naningkamot sa pagbuhat unsay gusto sa langit, kamo giyahan sa pinakayanong mga paagi. Ang mga pangutana dili kinahanglan nga komplikado. Paningkamot kamo sa pagsusi asa na sila sa ilang pagsabut tungod kay kamo nagpakabana.
Duna gyuy rason kanunay nga mabalaka sa mga batan-on nga mipalayo. Daghan kaayo ang wala madapit sa pagkat-on alang sa ilang kaugalingon; nagsalig lamang sila sa unsay gisulti nila sa mga tawo. Kon ang tanan nga inyo o akong nahibaloan mahitungod ni Jesukristo ug sa Iyang gipahiuli nga ebanghelyo mao lamang ang gitudlo o gisulti kanato sa uban, nan ang pundasyon sa atong pagpamatuod Kaniya … natukod diha sa balas.8 Mao nga ang pagdapit nila sa pagbuhat ug pagkat-on sa ilang kaugalingon makatabang nila sa pagtukod sa lig-on nga pundasyon.
Pangutana
Usa ka batan-ong lalaki nagbasa sa Basahon ni Mormon sa unang higayon ug nakaingon nga siya wala mobati sa Espiritu. Tingali siya naghulat sa mga anghel gikan sa langit nga mopahayag nga tinuod kini. Unsaon namo sa pagtabang nining matanga sa sitwasyon?
Elder David A. Bednar
Adunay daghang matinud-anon kaayong mga miyembro sa Simbahan nga naghunahuna nga sila wala makahimo sa unsay gilauman nga ilang mahimo tungod kay sila walay talagsaong mga kasinatian sama niadtong usahay gihulagway diha sa miting sa pagpuasa ug pagpamatuod. Ang talagsaong mga kasinatian dili mao ang normal. Kon kamo nagtahud sa inyong mga pakigsaad ug nagpadayon, maayo ra kaayo kamo, ug kamo normal. Si Saulo wala makabig tungod sa kahayag. Si Alma nga Batan-on wala makabig tungod sa anghel.
“Himoa ang hiyas nga modayan-dayan sa inyong mga hunahuna nga walay paghunong; unya ang inyong pagsalig mosamot pagkalig-on sa atubangan sa Dios.”9 Dili ang pagsalig sa inyong kaugalingon—pagsalig Kanila nga mahitabo ang unsay walay usa nato ang makabuhat.
Brother Chad Webb
Kana nga nagdapit sa pagbuhat og maayo ug sa pagtuo diha kang Kristo, gikan kini sa Dios.10 Tingali kita masurprisa nga makahibalo sa umaabut nga ang mga hunahuna nga atong gihunahuna nga atoa sa tinuod gikan sa Espiritu Santo. Sa atong pagpaningkamot sa pagbuhat og maayo, ang atong mga hunahuna ug mga tinguha pagagiyahan sa Espiritu Santo.
Sa pakigpulong ni Presidente Nelson bahin sa pagpadayag, siya midapit kanato sa pagbu-bu sa atong mga kasingkasing ngadto sa Langitnong Amahan, makig-istorya Kaniya, magmatinuoron Kaniya, ug dayon maminaw. Mihangyo siya nga isulat ang mga impresyon nga moabut ug dayon mobuhat niini. Dayon miingon siya, “Kon inyong balikbalikon kini nga proseso matag adlaw, matag bulan, matag tuig, kamo ‘molambo ngadto sa baruganan sa pagpadayag.’”11
Kadaghanan sa inspirasyon nga personal nga moabut nako wala moabut samtang ako nag-ampo. Ako mag-ampo, ako mamalandong, ako maningkamot sa pagsulat sa mga impresyon nga moabut. Apan sa akong pagbuhat, ang inspirasyon moabut. Atol sa usa ka leksyon, kon manganta og himno, o makigsulti sa usa ka tawo, o sa ubang mga kahimtang, ang mga tubag sa mga pag-ampo magsugod sa pag-abut.
Elder David A. Bednar
Usa ka pasidaan: ang mga paagi o mga matang sa pagpadayag magkalahi alang sa mga katawhan sa tibuok kalibutan. Pananglitan, sa Africa, ang mga tawo sa kasagaran dunay talagsaong mga damgo. Komon alang sa mga misyonaryo nga makasugat og mga tawo sa dalan nga moingon, “Nakita ko kamo sa damgo, ug kamo adunay mensahe gikan sa Dios. Gusto ko nga maminaw unsay isulti nimo kanako.” Wala koy mga damgo sama sa pipila ka matinud-anong mga Santos sa Africa.
Kita nagtudlo gikan gayud sa atong kaugalingong kasinatian, mao nga kita magmabinantayon nga dili ipamugos ang atong sundanan sa kasinatian ngadto sa uban. Wala kini magpasabut nga ang ilang sundanan dili kaayo balido o mapuslanon. Hinumdumi nga adunay daghang nagkalain-laing mga paagi nga ang Espiritu sa Ginoo makakonektar sa hunahuna ug kasingkasing sa usa ka tawo.
Kinahanglang bukas ka sa lapad nga panan-aw sa mga butang aron ikaw makadapit ug makadani og tawo sa pagbuhat sa ingon aron sila makabuhat ug makat-on sa ilang kaugalingon.
Pangutana
Unsaon namo sa pagpalambo og pagsalig sa among abilidad sa pagdawat og personal nga pagpadayag ug dili magsalig sa proseso nga among nadunggan o nabasa gikan sa uban?
Elder David A. Bednar
Usa ka kinutlo gikan ni Presidente Joseph F. Smith usa ka talagsaong kapanguhaan alang sa usa ka tawo nga nagsugod niini nga panaw sa pag-angkon og pagsalig sa pagdawat og pagpadayag:
“Pakit-a ako og mga Santos sa Ulahing mga Adlaw kinsa kinahanglan nga magsalig sa mga milagro, mga timailhan, ug mga panan-awon aron sa pagpabilin kanila nga lig-on diha sa Simbahan, ug ako mopakita kaninyo og mga miyembro sa Simbahan kinsa dili maayo og dungog diha sa atubangan sa Dios, ug kinsa naglakaw diha sa dangog nga mga dalan. Dili pinaagi sa kahibulongan nga mga pagpakita ngari kanato nga kita matukod diha sa kamatuoran, apan pinaagi sa pagpaubos ug matinuoron nga pagkamasulundon sa mga sugo ug sa mga balaod sa Dios. …
“Sa dihang ako isip usa pa ka bata … ako kanunay … mangayo sa Ginoo sa pagpakita kanako og pipila ka katingalahang butang, aron ako unta makaangkon og pagpamatuod. Apan ang Ginoo mipugong sa mga katingalahang butang gikan kanako, ug mipakita kanako sa kamatuoran, pagtulun-an human sa usa ka pagtulun-an … hangtud iyang napahibalo kanako ang kamatuoran gikan sa alimpulo sa akong ulo hangtud sa mga lapa-lapa sa akong tiil, ug hangtud nga ang pagduha-duha ug kahadlok sa hingpit nga nawala gikan kanako. Wala na kinahanglana nga magpadala pa Siya og anghel gikan sa mga kalangitan sa pagbuhat niini, ni kinahanglan Siya nga mamulong gamit ang trumpeta sa usa ka arkanghel. Pinaagi sa mga paghunghong sa ligdong nga hinagawhaw nga tingog sa Espiritu sa buhi nga Dios, iyang gihatag kanako ang pagpamatuod nga akong naangkon.
“Ug pinaagi niini nga baruganan ug gahum siya mohatag sa tanang mga anak sa katawhan og usa ka kahibalo kabahin sa kamatuoran nga magpabilin diha kanila, ug kini makahimo kanila nga masayud sa kamatuoran, sama sa pagkasayud sa Dios niini, ug sa pagbuhat sa kabubut-on sa Amahan sama sa gibuhat ni Kristo niini. Ug walay gidaghanon sa kahibulongan nga mga pagpakita ang makapatuman niini.”12
Si bisan kinsa nga nakigbisog, makahimo sa unang lakang ug mobuhat unsay gibuhat ni Joseph F. Smith.
Pipila ka mga miyembro sa Simbahan nga gusto makakita og kahayag sa dalan padulong sa Damascus sa dili pa sila motuo. Mao ba? Si Saulo sa bisan unsa nga kondisyon makaila sa hinagawhaw ug hinay nga tingog? Siya kinahanglan og espituhanong pagpukaw. Daghan ang nagpaabut nga makakita og anghel pareha sa nahitabo ni Alma ang Batan-on. Mao ba? Si Alma walay bisan unsa nga kahimtang nga makadawat sa hinagawhaw, hinay nga tingog. Siya kinahanglan og espituhanong pagpukaw. Ug si Presidente Joseph F. Smith mipamatuod nga dili ang kahayag ni ang anghel. Kini mao ang hinagawhaw, hinay nga tingog nga naghatag og pagsalig. Lakaw lang ug buhata.
Kon kita wala magsunod sa mga sugo, kita dili makabaton sa pagsalig, ug kita dili ubanan sa Espiritu. Dunay mga batan-on nga kinahanglan maghinulsol, ug dunay mga batan-on nga naglisud-lisud sa ilang kaugalingon nga sila wala maghunahuna nga sila maayo kaayo. Dili kinahanglan nga ikaw hingpit; kinahanglan lang kang magbinuotan, maghimo sa imong labing maayo ug mopadayon.
Pangutana
Nakapamulong ug nakasulat ka og daghan bahin sa pagsentro sa estudyante ug pagtutok sa ilang kauswagan. Aduna pa bay lain nga gusto nimong itudlo namo mahitungod sa pagdapit sa Espiritu Santo ngadto niana nga proseso?
Elder David A. Bednar
“Pagtudlo diha sa inyong mga kaugalingon og usa ka magtutudlo, ug dili ang tanan magdungan sa pagpamulong; apan himoa nga ang usa mamulong sa tagsa-tagsa ka higayon ug himoa nga ang tanan maminaw ngadto sa iyang mga gipamulong, nga sa diha nga ang tanan mahuman sa pagpamulong nga ang tanan unta mahatagan og kaayohan sa tanan, ug nga ang matag lalaki [ug babaye] makabaton og managsama nga kahigayunan.”13 Dili kita mga magtutudlo; ang Espiritu Santo mao ang magtutudlo. Kini nga bersikulo mao ang pahimangno sa pagtudlo sa Espiritu Santo nga mao ang magtutudlo. Ug “usa ka sundanan”—dili lang mao ang sundanan—ang pagtugot sa usa ka tawo sa pagsulti sa usa ka higayon ug ang tanan maminaw sa iyang gipangsulti. Kana ingon og yano kaayo, ug tingali sayon tan-awon.
Kon ang mga tawo mobati nga luwas, sila makapadayag sa ilang mga pangutana ug unsa ang dili nila sigurado. Dili sila makat-on gikan sa ubang mga tawo diha sa kwarto, apan unsay gisulti sa usa ka tawo mahimong makapatugot sa Espiritu Santo sa pagtudlo kanila sa tagsa-tagsa. Sila moapil sa hiniusa nga pagpadayag sa hugot nga pagtuo diha kang Jesukristo ingon nga ang tanan niana nga sitwasyon nangutana, nangita, ug nanuktok. Ug nianang indibidwal ug hiniusa nga pagpakita og hugot nga pagtuo, kita modapit. Ang pulong pagtudlo wala magpasabut nga pagpili. Dili kita makapili sa Espiritu Santo nga mahimong magtutudlo, apan kita makadapit ug makadani sa Espiritu Santo nga mahimong magtutudlo.
Sa usa ka miting sa misyonaryo nahisgutan namo ang daghang mga isyu, ug nangutana ko sa mga misyonaryo, “Unsay inyong nadunggan nga wala masulti?” Usa ka 18 anyos nga misyonaryo, nga upat pa lang ka semana diha sa natad sa misyon, mitubag, “Elder Bednar, kon ako makadungog niini sa imong tingog o sa tingog sa laing misyonaryo, mensahe kana alang sa tanan. Kon bation nako kini sa akong kasingkasing o dunay mosulod sa akong hunahuna, kana gikan sa Dios, ug kini alang lang nako.” Nadani ba kamo niana nga tubag? Unsa ka dugay ang pagtudlo og tawo o sa paghimo og role-play o ubang kasinatian diin ang 18 anyos makaangkon nianang espirituhanong pagsabut?
Busa ang pagdapit sa uban sa pagbuhat—sa pagpakita sa ilang hugot nga pagtuo—makatabang sa pagdani sa Espiritu Santo sa pagtudlo nila sa tinagsa-tagsa ug tiningub.
Importante kaayo nga tutukan ang tigkat-on ug dapiton ang Espiritu Santo nga mao ang magtutudlo. Kita adunay tahas nga buhaton. Kita ang modapit ug modani ug mogiya, apan ang Espiritu Santo modumala sa mga butang sa talagsaong mga paagi.
Pangutana
Usa ka batan-ong babaye nangutana nako kon nakahinumdom ba ko nga nagtudlo kaniya og piho nga baruganan. Miingon siya nga nakapausab kini sa iyang kinabuhi sa kahangturan. Nakahinumdom ko sa sitwasyon, ug ako wala magtudlo kaniya niana; wala niya masabti ang punto sa unsay akong gitudlo. Gitudloan siya sa Espiritu. Unsaon namo sa pagtabang ang mga estudyante nga makahibalo nga sila nagdawat og pagpadayag aron sila makabaton og pagsalig sa pagpangita pa niini og dugang alang sa ilang kaugalingon?
Elder David A. Bednar
Unsay inyong mahimong idapit nga iyang buhaton aron siya adunay mga mata nga makakita unsay wala niya makit-i kaniadto?
Ang Espiritu Santo mopahinumdom kaninyo sa tanan.14 Siya dunay talagsaon nga kasinatian sa dihang nakadungog siya og butang nga klaro nga wala masulti. Tabangi siya nga makaila niana. Hangyoa siya sa paghunahuna mahitungod sa iyang kasinatian ug pagdiskobre og usa o duha ka mga yugto nga sama niana. Tabangi siya nga makakita og sundanan niadtong duha o tulo ka butang nga nahitabo ug magdiskobre unsay nakaingon nianang espirituhanong panabut.
Adunay daghang kalainan ang atong mga batan-on, ug anaa nila ang tanang matang sa mga hagit ug mga isyu. Apan kita kinahanglan molaum nga sila maingon sa kon unsa ang gisulti nato kanila nga sila mao. Ug kita kinahanglan nga modapit nila sa pagbuhat. Ug matingala kamo kon unsay ilang mahimo. Hunahunaa una unsa ang idapit nila nga ilang buhaton aron sila makat-on unsay ilang kinahanglang makat-onan.
Pangutana
Makatabang ba ikaw namo nga makasabut, o tingali makat-on, unsaon pagpamati ug pag-obserbar sa labing maayong paagi?
Elder David A. Bednar
Morekomendar ko nga magkuha mo og dili mahal nga kopya sa Basahon ni Mormon nga papel ang hapin ug mobasa niini gikan sa sinugdanan hangtud sa katapusan, mangita sa matag sitwasyon sa “mga mata sa pagtan-aw ug mga idulunggog sa pagpatalinghug,” o sa susama nga pinulongan. Usab pangitaa sa Doktrina ug mga Pakigsaad ug sa Bag-ong Tugon. Basaha ang mga kasulatan isip tinugyanan—mangutana, mangita, ug manuktok—sa imong pangutana: “Unsaon nako sa pagkakita unsay kasagaran nga di nako makita? Unsaon nako sa pagkadungog unsay kasagaran di nako madungog?” Samtang kamo mobasa sa mga kasulatan uban niana nga mga pangutana, ang Espiritu Santo motudlo kaninyo ug mohatag sa tubag sa inyong mga pangutana. Dili ako makahatag niini kaninyo; ang Espiritu Santo motudlo kaninyo tagsa-tagsa, sa pribado, ug sa personal unsa kana nga tubag nga alang ninyo.
Mopakigbahin ko og sanglitanan. Ang akong asawa, si Susan, kanunay nga talagsaon nga matinud-anong visiting teacher. Sa dihang ang kausaban gihimo sa pagpangalagad ug si Presidente Nelson naghangyo og “mas taas ug mas balaan”15 nga mga paagi sa pagpangalagad, si Susan naminaw ug gustong makasabut kon unsa kana. Human mamalandong ug nag-ampo, siya nakahimo og talagsaong paghukom—sa pagpangutana sa iyang mga sister nga iyang gipangalagaran, “Unsay gipasabut sa mas taas ug mas balaan nganha kaninyo sa atong pagpangalagad?”
Kana mao ang labing yano ug labing klaro nga pangutana nga inyong mapangutana, apan ang mga tubag gikan sa iyang mga sister talagsaon. Usa ka sister mihangyo nga mangadto sa templo. Laing sister mihangyo nga mobasa og pakigpulong sa kinatibuk-ang komperensya ug dayon dungang maniudto aron hisgutan unsay ilang nakat-unan. Si Susan naghunahuna kon siya nakahimo ba og sayop kaniadto. Wala siyay nahimong bisan unsa nga sayop. Mas taas ug mas balaan—ang mga mata nabukas aron makakita sa mga paagi nga wala nila makita kaniadto.
Pangutana
Sa nahibiling pipila ka minuto, mahimo ba nga mopaambit ka bisan unsay imong gibati nga ipaambit ug sa imong pagpamatuod?
Elder David A. Bednar
Gimahal ko kamo. Gimahal ko kinsa kamo ug unsay inyong gipaningkamutan nga mamahimo. Ganahan ko unsay inyong gihimo. Kitang tanan molambo, apan ako moingon, “Salamat.” Moingon ko nga salamat alang sa Unang Kapangulohan ug sa Korum sa Napulog Duha ug sa Church Board of Education.
Ang pagpuyo dinhi sa yuta niining panahona sa dispensasyon sa kahingpitan sa panahon mao ang panalangin sa tibuok kinabuhi. Pipila ka tuig na ang milabay, si Presidente Gordon B. Hinckley mibalik-balik sa pagsulti nako, “David, kini ang labing nindot nga panahon sa kasaysayan sa gipahiuli nga Simbahan.” Ug husto gayud siya.
Hunahunaa ang mga butang nga gipanalangin nato. Ikonsiderar nga niining tuiga mao ang ika-200 nga anibersaryo sa Unang Panan-awon. Mga templo ang gipahibalo sa Papua New Guinea ug sa Phnom Penh, Cambodia. Kita dunay mga misyonaryo sa Soviet Union ug sa kanhi mga nasud nga komunista ug usa ka templo sa Ukraine. Kini mao ang labing talagsaong adlaw sa kasaysayan sa gipahiuli sa Simbahan.
Kita adunay responsibilidad niining adlawa. Kon kita gitagana alang niini nga panahon, kini tungod kay duna kitay daghang buluhaton, ug kita adunay tahas sa pagtabang sa nagtubo nga henerasyon nga makaandam. Kini ang labing nindot nga panahon sa kasaysayan sa gipahiuli nga Simbahan—ang labing dako nga oposisyon ug ang labing daghang mga oportunidad. Kita tanan, niini nga panahon aduna niini nga oportunidad sa pagserbisyo, sa pagpamatuod, sa pagpangalagad, ug sa pagtabang.
Ako nag-ampo nga ang Espiritu Santo mopuno sa haw-ang tali sa mga pulong nga akong gisulti ug unsay gusto nakong ipasabut. Ako mosaksi nga ang Amahan ug ang Anak nagpakita ngadto ni Joseph Smith 200 ka tuig na ang milabay. Ako mosaksi nga ang Amahan mao ang atong Amahan, ug Siya ang nagpasiugda sa plano sa kalipay. Nasayud ko, nagpamatuod ko, ug nagsaksi ko nga si Jesukristo mao ang Bugtong Anak sa Mahangturong Amahan. Mosaksi ko nga Siya buhi. Siya nabanhaw; ang lubnganan way sulod. “Wala na Siya dinhi: kay Siya nabanhaw.”16
Ako mosaksi nga pinaagi ni Propeta Joseph Smith, ang awtoridad sa pagkapari, ang mga yawe sa pagkapari gipahiuli nganhi sa yuta ug nga ang pagpakita sa Amahan ug Anak nakapasugod sa Pagpahiuli sa Ebanghelyo. Ako mosaksi nga ang Pagpahiuli nagpadayon.
Ako mohatag niini nga pagsaksi ug mopadayag sa akong gugma kaninyo pinaagi sa sagradong ngalan ni Ginoong Jesukristo, amen.