Veidusimaki ena iLakolako
Dua na Bogi kei na Vakaitutu Raraba
Vukelulu, nai ka 5 ni Feperueri, 2020
Keirau vakavinavinaka vakalevu ni keirau tiko rawa kei kemuni ena bogi nikua. E a va na yabaki na noqu qaravi tavi tu kei Jill ki vei ira na lewenivanua totoka e Iurope, ka keirau a kurabui ka marautaka vakalevu na nona sa kerei keirau o Peresitedi Nelson me keirau lesu tale ki na CES. E sa vaka na lesu mai ki vale me keirau veitaratara vakavoleka kei kemuni ka sa solibula tu ena nodra vukei na itabagone me ra vulica ka bulataka na kosipeli i Jisu Karisito.
Ni dikevi tu nai moimoi eso ni neirau kei na nodra tale eso ena ilakolako ena bula oqo, au sa vakasamataka na ilakolako eda sa mua tiko kina ki na bula tawamudu. Kivei keda ka vakadonui Jisu Karisito kei na Nona Veisorovaki, na iwalewale ni noda bula esa tautauvata. Eda cakacakataka na vakabauti ni iVakabula ka muri Koya se vakacava tu na bolebole eso. Eda veivutunitaka na noda ivalavala ca, ciqoma na cakacaka vakalotu ka veiganiti, ka da vosota me yacova na ivakataotioti. Ia na matailalai ni bula yadua esa duidui sara, kei na bolebole e sotava na tamata vakayadua e duidui.
Vakasamataka na ilakolako ni matavuvale i Liai ki na vanua yalataki. Na nodra ilakolako vakasakiti sa rawa ni vakavurea eso na vakasama me baleta na noda ilakolako vakaikeda. Era kila ni ra sa mua tiko ki na dua na vanua yalataki, ia era sega ni kila na ka kece me baleta na kena icavacava se na sala dodonu me ra muria me ra yacova kina. Era a sotava na vei bolebole dredre eso ena nodra ilakolako. O Nifai mada ga, ka a sega ni bau vosa kudrukudru, e vakamacalataka ni ra “a sotava e levu na ka rarawa kei na veika dredre, io, sa rui levu dina ka sega ni rawa me keimami vola kece.”1
Era a tuberi voli ena ilakolako. E dina madaga, a tukuni vei Liai ena bogi “me cavutu ena mataka ka kauta na nona ilakolako ki na lekutu.”2 Ena kena mataka ka tarava a kunea o koya na Liaona ena katuba ni nona valelaca ka vakaraitaka na idusidusi tabu ena nodra ilakolako. Ia a sega ni veisautaka na Liaona na ituvaki ni vanua era tiko kina kei na vanua e sa yalataki vei ira. E a sega ni vakalailaitaka na Ucuna mai Arapea se na wasawasa ea gadrevi me ra na takosova. Sa dodonu mera toso tikoga ki liu ka sotava na veibolebole e dau sala vata mai kei na mataqali ilakolako balavu vaka oya. Ia sa tuberi ira na Liaona “ki na vanua bulabula ni lekutu,”3 ia kevaka era sa sega ni vucesa, esa vukei ira ni vakadodonutaka na kena salatu.4
A vosa kudrukudru o Leimani kei Lemueli ena vuku ni dredre eso era sotakaya ena ilakolako. Eso na dredre oya rau a vakavuna ga vakairau. Ia, ena gauna mada ga rau a muri vakasala ka lako dodonu tiko kina, era se sotava ga na kana lewe ni manumanu droka ka salamuria talega yani na katakata ni siga. Me vaka na veika a sotava o Leimani kei Lemueli, era dau nanuma eso na tamata ni ra na sega ni sotava na bolebole, kevaka era sa cakava tiko na ka dodonu, ena rawarawa na veika kece. E sega ni vaka tu kina oya. E kena ibalebale ni sa rawa meda na vakaqaqacotaki ka tuberi, ia e sega ni da na sega ni sotavi dredre.
Dina ga ni ra toso tu vakailawalawa era sa tomana tale tikoga na nodra dui ilakolako. Dina ga ni ra vakauti ki na dua vata ga na vanua, e duidui sara na nodra ilakolako tawamudu vakayadua ka sa vakatautaki ki na nodra dui vakatulewa kei na cakacaka ena ilakolako.
Sa tiko na noda dui ilakolako vakaikeda ena bula oqo, ia eda wasea talega na veitiki ni lakolako oya vata kei ira na tani Me kena ivakaraitaki, eda sa lako vata tiko ena sasagataki ni semineri kei na inisitute kei na vuli ena Lotu. Sa dua tiko na noda sasaga—eda sa kila levu tu na vanua eda mua tiko kina, ia eda sega ni kila tu na itatarabe kece se na matailalai taucoko ni sala meda yaco kina ki kea.
Eda sa dui digitaka na gaunisala eda na salavata kina vakailawalawa. E rawa ni da vosa kudrukudru. E rawa ni da yalomarau. E rawa ni da vakavinavinaka dina mada ga ni tiko na vei bolebole eso. Ki na so, sa rawa ni veibolei tu na veisau eso ena lawatu ni Lotu se ivakarau. A ka marautaki vei au na noqu raica na sala esa vakamuria tiko kina o S &I na veisau veivakauqeti eso e vakadreti tiko kina na vulici ni kosipeli e vale kei na veitokoni vaka-Lotu.
Eda na, ka sotava na dredre eso. Ena muri ni veituberi ni Turaga sa rawa ni da ulabaleta ka vuli mai na veibolebole oqo. A kaya na Parofita o Josefa Simici, “E sa kilai vakamatata tu ni sa solia vei keda na kaukauwa na Turaga ena ivotavota ni cakacaka me vakayacori, kei na yaloqaqa e vakatau tu ki na cici sa vakarautaki vei keda, kei na loloma soliwale kei na veivuke eda sa gadreva vakaoti.”5
Eda ciqoma na veituberi me vukei keda meda muria na sala dodonu duadua ka muria talegana veitiki ni lekutu dakoba sara ena noda ilakolako. Eda sa tuberi mai vei ira na parofita. Au kila ni da sa liutaki mai vei ira na parofita, daurairai, kei ira na dauvakatakila. Sa dua dina na veivakalougatataki! Eda sa vakasalataki mai na Matabose ni Vuli ni Lotu, ka sa tiko talega o Brother Webb, o ratou na nona timi, kei ira na iliuilu vakauqeti tale eso. Me ikuri, sa noda vakayadua na dodonu ni veituberi ni da sotava na veika vakatabakidua ena noda ilesilesi yadudua.
Rau dau sota vakavula na Matabose ni Vuli ni Lotu kei na komiti ecake ni Matabose oya. Ena veisoqoni oqo keimami dusimaki ka vakasalataki kina. Keimami sa vakalougatataki talega ena “Dua na Bogi kei na Vakaitutu Raraba,” ka ciqoma ena veiyabaki na veituberi momona ka matata sara me vukei keimami ena neimami lakolako—vakaisoqosoqo ka vakayadua.
Sa noqu masu ni da na ciqoma na veituberi kei na veidusimaki ni Turaga. Au kila ni bula tiko o Koya ka na vukei ka tuberi keda.
Ena yaca i Jisu Karisito, emeni.