Dua na Bogi kei na Vakaitutu Raraba: Veika Momona
Dua na Bogi kei na dua na Vakaitutu Raraba
Vakaraubuka, ka 7 ni Feperueri, 2020
A vakananumi keda o Elder Bednar ni veivakavulici e sega ni ka e tukuni; e oka kina na vakarorogo, vakadidike, kei na vakasama. E okati vaka talega kina na veisureti ni Yalo Tabu me vakavulici keda.
Taro
A vakatavulica wale tikoga oqo o Peresitedi Nelson na bibi ni noda ivakatakila. Na cava o na vakavulici keimami kina ena ciqomi ni noda vakatakila?
Elder David A. Bednar
Ni da rokova na noda veiyalayalati, sa rawa ni nodai tokani tudei na Yalo Tabu. Eda dau veivosaki me vaka tu e ka vakavudua na rogoci na domo ni Turaga mai na Nona Yalotabu. Sa dodonu meda vakanamata vakalevu ni kila tu na ka e yaco me vakavuna na biubiu ni Yalo. Kevaka eda sa caka vinaka tiko ka sega ni caka cala bibi sara, sa rawa ni da nuitaka tu ga na Yalo Tabu me tuberi keda.
E vaka mera vakabauta e vuqa na tamata ni veivakauqeti ni Yalo Tabu e vakasakiti, ka levu ka vakasauri. Na ka dina oya ni sa dau veituberi na Yalo Tabu ena sala malua, lailai ka vakaituvatuva ena toso ni gauna. Ko na sega ni dau kila ni o sa ciqoma tiko na ivakatakila ena gauna o ciqoma tiko kina na ivakatakila.
Sa ivakaraitaki vinaka o Nifai ni tuvaki oqo. A lako o koya ka sega ni kila rawa tiko yani na ka [me na] cakava.1 A toso ki liu o koya ka sega ni kila tu ena veigauna ni sa tuberi voli. Sa dodonu meda semata na ka e yaco oqo vei Nifai ni sa rairai sala e dau cakacaka kina vei keda na ivakatakila ena vuqa na gauna.
So na gauna era dau ririko na lewe ni Lotu ni ra na cakacala, ka ra sega kina ni toso ki liu. A vakawirimadigi o Nifai kei rau na tuakana. A sega ni cakacaka vinaka oya. E a cala beka na ka e sotava oya o Nifai? Sega. A vulica o koya e dua na lesoni bibi. Ni ratou saga me kauta mai na peleti parasa mai vei Lepani ena vakayagataki ni nodratou koula kei na veika kece eratou taukena, a vulica o Nifai e dua tale na lesoni me vakarautaki koya ki na veika e koto ki liu.
E tiko na ivakavuvuli eso e semati ki na ciqomi ni ivakatakila. Me ivakaraitaki, a kaya o Peresitedi Packer, “A tukuna vei au o Peresitedi Harold B. Lee ena dua na gauna ni dau basika vakarawarawa na veivakauqeti ena nomu rawa ni butuka na vanua e semati tu ki na kena gagadre. E dina sara o Peresitedi Lee!”2 Sa ka yaga na tiko ena vanua, vakasama tu vagumatua, masumasu, ka qara voli na veivuke.
Na ivakavuvuli oqo e vakaibalebale vakalevu sara ki na ivakarau ni veiqaravi. Era nanuma e vuqa na vakailesilesi ena veiqaravi ni sa rauta ga e dua na itukutuku. Sa gadrevi na gauna eso mo na tiko kina e vale ke veisotari mata kei ira na tamata. O na ciqoma na vakasama kei na veivakauqeti e vale o na sega ni rawata ena dua tale na sala.
Taro
Rawa li ni o vakuria e dua na ka me keimami kila vakamatata kina na vakatakila a ciqoma o Peresitedi Nelson kei ira na iliuliu tale eso ni Lotu?
Elder David A. Bednar
Era sa veivosakitaka e vuqa na lewe ni Lotu na levu ni ivakatakila esa yaco ena gauna sa mai Peresitedi kina ni Lotu o Peresitedi Nelson. Na veisau eso esa yaco tiko mai oqo a sa veivosakitaki ka masulaki tu ena matabose ena vica na yabaki kei na tabayabaki. Ena vuqa na gauna, na vakatakila e sega ni baleta na ka me caka ia na gauna me caka kina.
Taro
Me ikuri ni ciqomi ni vakatakila ena gauna me caka kina, eda na ciqoma vagauna na vakatakila ena ka talega me caka, e donu li?
Elder David A. Bednar
Kakua ni cakava me sega ni veiganiti kaya; e sega ni o ko qo se o ko ya. Vuqa na gauna esa matata saraga na vakatakila ena ka me caka. Ia sai koya na vakayagataki ni gauna ni kena caka era sotavi dredre tiko kina e vuqa na tamata. Ia, ni sa gadrevi, sa rawa ni da ciqoma ruarua na ivakatakila ena ka me caka kei na gauna me caka kina—sega walega ni dua se dua tale.
Taro
Ni da qasenivuli, eda vakarautaka na noda lesoni, ka masulaki ira na gonevuli. Eda dau kila vakacava na veivakauqeti me baleti ira eda vakavulica ka qarava tiko?
Elder David A. Bednar
Ni o vakavakarau ka masumasu voli, ena dau yaco vakasauri e dua na vakanananu, itara veivakauqeti, ka na rairai vakasamataka e dua na yaca se raica saraga e dua na mata kilai levu. E vakamacalataka na Parofita o Josefa Simici me “itara vakasauri ni vakasama eso.”3 Ni yaco mai vakasauri, sa rawa ni o kila ni o sa ciqoma sara tu ga na ka e gadrevi, ka ra sa totoka saraga na veigauna vakaoya.
Dua na vurevure levu sara ni raiyawa o na rawata sai koya na taro eso era na taroga na nomu gonevuli. Ena vica vata na yabaki, au sa vakatovotovotaka ni sauma rawa na nodra taro e udolu na itabagone kei na itaba qase cake. Ena vuku ni wiliwili levu ena veisoqoni, au dau vakatarai ira ni textaka mai vei au na nodra taro ena dua na sala qarauni. (Au sega ni vakatututaka tiko mo kitaka talega vakakina.) Na wiliki ni taro vuni eso oya esa dua na vuli vakaitamera me sotava e dua ni cakacaka voli kei ira na itabagone. Era taroga vakaidina na ka e vakaleqai ira tu kei na ka era gadreva tu kina na veivuke. Eda kila vakacava na ka meda kaya se vakavulica me yacova ni da sa kila rawa na vanua era tiko kina?
Taro
Ena qarai ni ivakatakila, e sega ni dodonu me dua na noda lisi ni vakamacala—me lisi ni veika meda cakava kei na kena gauna. Sa dodonu ga me yavutaki vakalevu ena ivakavuvuli, e donu li? Ia sa noda vei ivakaraitaki tu o Nifai, Josefa Simici, kei Joseph F. Smith ena wiliki ni volanikalou, rogoci ni parofita, kei na ciqomi ni ivakatakila. Era sa ivakavuvuli beka oya, se sa dua ga na ituvatuva?
Elder David A. Bednar
Eda tugana na vosa ni Kalou me rawa ni da rogoca ka kila na domo ni Turaga. Ni da vukica na qarai ni vakatakila ki na dua na lisi—cakava na veika oqo ka na yaco na ka oqo—oya sa gauna ni noda qaqarauni. Sa dodonu meda waraka na Turaga, vakila tu ka kidava na Nona gauna—eda sega ni tugaraka na vakatakila e yavutaki ena noda gauna.
Taro
E rawa vakacava meda bula voli ena dua na ivakarau eda na tu vakarau ga kina ki na ivakatakila ena gauna cava ga sa tu vakarau kina na Turaga me sovaraka mai vei keda?
Elder David A. Bednar
Na malanivosa tu vakarau esa vakasakiti. Sa dodonu meda dau bula vakarau tu ena ivakatakila—me rawa “ni tiko ga vata kei [keda] na nona Yalotabu.”4
Ena rairai tiko eso ka taura vakatani na ka oqo; yalovinaka vakayagataka na yalomatua.
Vakasamataka na sala a yaco kina me vunivola i Josefa Simici o Oliva Kauderi. A rogoca o koya me baleta na peleti koula, me baleti Josefa Simici, ka sa gadreva tu me sotavi Josefa. A cakacakataka o koya na gagadre oya.
A cauraka vei Oliva na Turaga:
“Ko sa kalougata ena ka ko sa kitaka; raica ko sa dau kerekere vei au, ka raica, ni sa levu na nomu kerekere ko sa ciqoma na idusidusi ni Yaloqu. Ke a sega o ya, ke o a sega ni lako mai ki na vanua ko sa tiko kina oqo.
“Raica, ko sa kila ni ko sa kerekere vei au kau sa vakararamataka na nomu vakasama.”5
Na yatuvosa ka tarava ena tikina oqo esa veirawai saraga vei au. E a vakauqeti tiko o Oliva ka sega ni kila tu ni sa vakauqeti tiko. E a ciqoma tiko na vakatakila ka sega ni kila tu ni sa ciqoma tiko na ivakatakila. Sa mani curumi Josefa kivei Oliva e dua na vakatakila me tukuna vei Oliva ni sa vakauqeti ka sa ciqoma tiko na vakatakila.
“Ia au sa tukuna vei iko na veika oqo mo kila ni sa vakararamataki iko na Yalo na vu ni ka dina.”6
Oqori na ka au vakaibalebaletaka me baleta na kena tikoga vata kei keda na Nona Yalotabu.
Taro
O ni tukuna ni a vakawirimadigi o Nifai kei rau na tuakana me kilai kina o cei me lako ka kerea na peleti parasa ka qai saga me voli ira ena koula kei na siliva. Ni da gadreva me caka e dua na ka, eda na vakadeitaka vakacava me da cakava ena kena gauna donu? Eda kila vakacava ni da sa cakava tiko vakadodonu?
Elder David A. Bednar
O Nifai e sega ni cakava e dua na cala se vakatulewataka cala na kena gauna. A sa ka ni vuli saraga, vosa ena vosa, vunau ena vunau. E a vakarautaki tiko o koya ena sasaga yadua—“sega ni kila rawa tiko yani na ka [me] na cakava.”7
Kevaka eda sa caka vinaka tiko ka segata voli meda vakatabui ka yalodina, eda na sega ni vakayarayarataki ira tu vakatawadodonu na tani. Sa liutaka tiko o lomalagi na cakacaka oqo, sega ni o iko kei au. Me vaka niu dua na lewe ni Kuoramu ni Apositolo Le Tinikarua, sa tiko na noqu ilesilesi ena veigauna kece au kila niu sega ni rawa ni cakava tu vakai au. Ni ko caka vinaka tu, o sa vakalevutaki ka vaqaqacotaki. O na sega ni dau kila matata tu ni sa kena gauna donu. Cakava ga na nomu vinaka taucoko.
Dau vakavulica wasoma o Peresitedi Hinckley, “Esa yaco taucoko vakakina.” Au sa vakadinata oya, kau se vakasamataka ga, “Isa, sa dodonu me na levu cake tale.” Na noqu sa qase tikoga, na levu ni noqu kila deivaki ni sai koya ga ya na isaunitaro e tiko. Na Kalou ena sega ni laivi iko duadua tu ena nomu tovolea mo vakabulai, susugi , ka qaravi ira na Luvena. Kevaka o sa caka vinaka, ka yalododonu tu, ena yaco vakakina. Ko na qai vulica na lesoni eso ena ilakolako oqori.
Taro
Eda na vakavulica vakacava na gonevuli era rairai yalo lailai ni sa dodonu mera vakarau tu ki na ivakatakila ena veigauna kece? Oqori sa vaka tu e dua na itavi drakidrakita vei ira.
Elder David A. Bednar
Mai na vakasamataki ni, “Cava au na kaya tu vei ira?” na rai sa dodonu me, “Cava au na kerei ira kina?” Ka sega walega ni, “Cava au na kerei ira kina?” ia “Cava au na sureta me ra ni cakava?” talega.
Na ivakarau saraga ni kena tarogi na taro esa sureti ira tiko mera cakacakataka. Kevaka ena sauma na gonevuli oya, oqori sa dua na ivakaraitaki ni vakabauti Jisu Karisito. Na vakabauta sa dua na ivakavuvuli ni cakacaka kei na kaukauwa. Ni da cakacaka me vakataka na ivakavuvuli i Karisito, eda sa vakalougatataki ena Nona kaukauwa. Na ka e vinakata e levu vei keda na kaukauwa vakailiu me rawa kina ni da cakacaka. E sega ni cakacaka oya.
Na lomada e sega ni dodonu me “Cava au na kaya vei ira?” Ia, na taro eso meda tarogi keda kina “Cava au rawa ni sureta me ra cakava? Na taro veivakauqeti cava soti au rawa ni taroga, ke lomadra mera sauma, ena tekivu sureta na Yalo Tabu ki na nodra bula?” Era sa rawarawa dina sara na taro me tarogi, vaka “Na cava o sa vulica tiko?” Ena saumi ni veitaro, na tamata oya esa sureta tiko na Yalo Tabu me tubera na nona sausaumi. Sa noda itavi me raici ni daumaka tu na veivosakitaki ni veika oya ka sureti ira mera vakayacora me veivakavulici rawa kina na Yalo Tabu.
Kevaka o lomani ira ka sa saga dina tiko mo kitaka na ka e vinakata o lomalagi, o na tuberi tu ena veisala rawarawa sara. E sega ni gadrevi mera dredre na taro. O tovolea mo dikeva na ivakarau ni nodra kilaka baleta ni o kauwai vakaidina.
Sa dau tu ga na lomaleqa vakadonui vei ira na tabagone ka lutu tani. E sa rui vuqa sara tu e se bera ni sureti mera vuli vakai ira; era se vakararavi tu ga ena ka era tukuna vei ira na tani. “Kevaka na ka taucoko daru sa kila tu me baleti Jisu Karisito kei na Nona kosipeli vakalesui mai esa ka era vakavulica se tukuna vei kedaru na tamata tale eso, na yavu ni nodaru vakadinadinataki Koya … sa na tara tu ena dela ni nuku.”8 Oqori na vuna esa vukei ira kina ni tara cake e dua na yavu kaukauwa sara na veisureti mera cakacakataka ka vulica vakai ira.
Taro
E dua na cauravou a wilika na iVola i Momani ena imatai ni gauna ka kaya ni a sega ni vakila na Yalotabu. De rairai e a waraki ira tiko na agilosi mai lomalagi me tukuna ni sa dina. Eda na rawa ni veivuke vakacava ena ituvaki vakaoqo?
Elder David A. Bednar
Sa vuqa tu na lewe ni Lotu yalodina vakasakiti e sega ni nanuma ni ra rawa ni bole baleta ni ra se bera ni sotava na ivakaraitaki eso vaka e vakamacalataki ena so na gauna ena soqoni ni lolo kei na soli ivakadinadina. E sega ni ka ni veigauna na ivakaraitaki sotavi eso. Kevaka o rokova na nomu veiyalayalati ka toso tiko ki liu, so donu tiko na ka o cakava ka ko sa matau. O Saula a sega ni saumaki mai na rarama. O Alama Lailai a sega ni saumaki mai na agilosi.
“Me vakaiukuukutaki tiko ga na nomudou vakanananu ena ivalavala savasava; ia ena vakaukauwataki kina na nomu vakabauta ena mata ni Kalou.”9 Sega ni nomu vakabauti iko—nomu vakabauti Rau me vakayacora na ka e sega ni dua vei keda e cakava rawa.
Brother Chad Webb
“Ni veika kecega sa veisureti me da caka vinaka, ka veivakauqeti me vakabauti na Karisito, sa mai vua na Kalou.10 Eda na rairai kurabui ni kidava ena dua na siga ni nanuma eda nanuma ni sa noda esa mai vua na Yalo Tabu vakaidina. Ni sagai tu meda caka vinaka, na noda nanuma kei na gagadre ena tuberi mai na Yalo Tabu.
Ena vosa i Peresitedi Nelson ena ivakatakila, a sureti keda o koya meda sovaraka na yaloda kivua na Tamada Vakalomalagi, veivosaki kei Koya, yalodina tu Vua, ka qai vakarorogo. A kerei keda meda vola na veivakauqeti e basika ka qai cakacakataki ira. Qai kaya o koya, “Ni ko sa taleva tiko na ivakarau oqo ena veisiga, veivula, veiyabaki, ko na ‘tubu ki na ivakavuvuli ni vakatakila.’”11
E vuqa na veivakauqeti esa yaco vei au vakaiau e sega ni basika niu a masu voli. Au masu; au tugana; au tovolea ni vola na veivakauqeti e yaco mai. Ia niu cakacakataka, sa qai yaco mai na veivakauqeti. Ena dua na lesoni, ni lagati tiko na serenilotu, ni veivosaki tiko kei na dua, se ena dua tale na ituvaki, na isau ni masu sa tekivu me basika.
Elder David A. Bednar
Dua na ivakasala: na sala se ivakarau ni ivakatakila e rawa ni duidui ki na tamata e vuravura taucoko. Me ivakaraitaki, e Aferika, dau wasoma nodra tadra vakamareqeti na tamata. E sega ni ka vou vei ira na daukaulotu ni sotava e dua e gaunisala ka kaya, “Au a tadrai kemudrau, ka tiko vei kemudrau e dua na itukutuku mai vua na Kalou. Au via rogoca na ka o drau na tukuna vei au.” Au sega ni dau tadra me vakataki ira eso na Yalododonu yalodina e Aferika.
Eda veivakavulici vakalevu mai na veika eda dui sotava, ia me sa qarauni meda kakua ni dulaka na ivakarau ni ka eda sotava vei ira na tani. E sega ni kena ibalebale ni nodra ivakarau e lailai na kena dodonu se yaga. Nanuma ni tiko na mataqali sala duidui eso e rawa ni sema kina na Yalo ni Turaga ki na vakasama kei na yalo ni dua na tamata.
Yalovinaka lomasoli tu ki na levu na ka eso o na rairai sureta ka uqeta kina e dua me cakava me rawa ni ra cakacakataka ka vulica vakai ira.
Taro
Eda na vakalevutaka vakacava na yalodei ena sagai ni kena ciqomi na noda ivakatakila ka sega ni vakararavi ki na dua na ivakarau eda rairai rogoca se wilika tu mai vua tale e dua?
Elder David A. Bednar
E dua na malanivosa nei Peresitedi Joseph F. Smith esa dua na ivurevure vakasakiti kivua e dua ka sa tekivutaka na ilakolako oqo ena rawati ni nuidei me ciqoma na ivakatakila:
“Vakaraitaki ira mai na Yalododonu Edaidai vei au era dau vakararavi ki na cakacaka mana, na ivakatakilakila, kei na raivotu me ra tudei tiko kina ena Lotu, kau na qai vakaraitaka vei iko na lewenilotu e sega ni vinaka tu na kedra ituvaki ena mata ni Kalou, ka ra dau lakova na veisala titidara eso. Eda na sega ni vakadeitaki ena dina mai na veivakatakilai vakasakiti, ia ena yalomalua kei na talairawarawa yalodina ga ki na ivakaro kei na lawa ni Kalou. …
“Niu se cauravou lailai … au dau kerea … vua na Turaga me vakaraitaka vei au eso na ka vakasakiti me rawa ni dua kina na noqu ivakadinadina. Ia a tabonaka vei au na Turaga na ka vakasakiti, ka vakaraitaka vei au na dina, na vosa ena vosa, … me yacova niu sa rawa ni kila na dina mai buradelaqu ki na qeteqete ni yavaqu, ka yacova ni sa yali tani vei au na vakatitiqa kei na rere. E sega ni tala mai o Koya e dua na agilosi mai lomalagi me vakayacora oqo, ka sega talega ni vosa ena biukila ni dua na agilosi liu. Ena vakasolokakana ni domo malua lailai ni yalo ni Kalou bula, a solia o Koya vei au na ivakadinadina au taukena tu.
“Ia ena ivakavuvuli kei na kaukauwa oqo ena solia kina o koya vei ira kecega na luve ni tamata me ra kila na dina ka na tudei tu vei ira, ka na vakayacora mera kila na dina, me vaka sa kila tu na Kalou, ka cakava na loma i Tamada me vakataki Karisito. Ka sega ni dua nai wiliwili vakasakiti ni vakatakila ena vakataucokotaka rawa na ka oqo.”12
E dua e sotavi dredre tiko sa rawa ni taura na matai ni ikalawa ka cakava na ka e cakava o Joseph F. Smith.
Eso na lewe ni Lotu e via raica e dua na rarama ena gaunisala ki Tamasiko ni bera ni ra vakadinata. E dina? E a rawa beka vei Saula me kidava na domo malua, lailai? Sa dodonu me yaco vua e dua na kaci ni veivakayadrati vakayalo. E vuqa era namaka me raica e dua na agilosi ena sala a raica kina o Alama Lailai. E dina? E a sega tu ni rawa vei Alama me ciqoma na domo malua, lailai? Sa dodonu me yaco vua e dua na kaci ni veivakayadrati vakayalo. Ka vakadinadinataka o Peresitedi Joseph F. Smith ni sega ni rarama se na agilosi. Sai koya na kilai ni domo malua lailai e kauta mai na yalodei. Lako ga ka cakava.
Kevaka eda sega ni muria tiko na ivunau, eda na sega ni rawata na yalodei oya ka da na sega ni rawata na veitokani ni Yalotabu. Sa tiko na itabagone ka dodonu mera veivutuni, ka tiko na itabagone ka vakadredretaka tiko na nodra bula ka sega ni nanuma ni ra sa vinaka tiko. E sega ni gadrevi mo vinaka sara; mo veivutuni ga vakaidina, caka vinaka, cakava nomu vinaka taucoko, ka toso ki liu.
Taro
Ko sa vosataka ka vola e levu sara na ka me baleta na vakaliuci ni gonevuli ka vakanamata ki na nodra rawaka. E tiko li e levu tale na ka o na via vakavulica vei keimami ena sureti ni Yalo Tabu ki na ikalawa oya?
Elder David A. Bednar
“Dou lesia e dua me nomudou qasenivuli, ia mo dou kakua ni vakamacala kecega ena dua vata na gauna; raica me dua ga e vosa ka ra vakarorogo na kena vo ki na nona ivakamacala, ia ni dou sa vosa oti kece, dou sa vuli ka veivakavulici kece tale ga, raica ena soli vakatautauvata na dodonu ki na tamata yadua.”13 Eda sa sega ni qasenivuli; na Yalo Tabu ga. Na tikina oqo sa vakamasuta me lesi na Yalo Tabu me qasenivuli. Kei “na ivakarau”—sega ni vakarau duadua ga—oya me dua ga e vosa ka ra vakarorogo na kena vo ki na nona ivakamacala. E rogo rawarawa sara oya, ka na rairai rawarawa talega.
Kevaka era yalodei na tamata, sa rawa ni ra taroga eso na taro kei na ka era sega ni yalovakacegu kina. Era sa sega ni vuli mai vei ira na tamata tale eso ena loma ni rumu levu, ia na ka e kaya e dua sa rawa ni vakatara na Yalo Tabu me vakavulici ira vakayadua. Era sa vakaitavi ena dua na ivakaraitaki cokovata ni vakabauta na Turaga o Jisu Karisito me vakai ira kece era taro, vaqaqara, ka tukituki tiko ena ituvaki oya. Ia mai na cakacaka vakayadua kei na cokovata ni vakabauta, keimami sa veisureti. Na vosa lesia e sega ni kena ibalebale vakatikora. E sega ni rawa ni da vakatikora na Yalo Tabu me na qasenivuli, ia sa rawa ni da sureta ka vakauqeta na Yalo Tabu me na qasenivuli.
Ena dua na soqoni ni daukaulotu keimami a veivosakitaka e vica na ulutaga, kau a tarogi ira na daukaulotu, “Na cava o ni rogoca tiko ka se sega ni tukuni?” A sauma e dua na daukaulotu yabaki 18, ka veiqaravi tiko me va na macawa, “Elder Bednar, keu sa rogoca e dua na isaunitaro ena domomu se ena domo ni dua tale na kaulotu, oqori sa itukutuku ki na tamata kecega. Keu vakila tu e yaloqu se vakasamataka e lomaqu, oya sa mai vua na Kalou me baleti au ga.” O sa malaude li ena isaunitaro oya? Na cava na balavu ni gauna me tuberi kina e dua se cakava eso na mataqali drama se veika sa sotavi e rawa kina ki na dua na yabaki 18 me rawata na raiyawa vakayalo oya?
Na sureti ni tani mera vakaitavi—mera cakacakataka nodra vakabauta—sa vukea na uqeti ni Yalo Tabu me vakavulici ira vakayadua ka vakataucoko.
Sa ka bibi sara meda dauvuli vakaliuci ka sureta na Yalo Tabu me sa qasenivuli. Sa tiko na itavi meda cakava. Eda cakava na veisureti kei na veivakauqeti kei na veituberi, ia na qai dusimaka na veika na Yalo Tabu ena sala veivakurabuitaki eso.
Taro
A tarogi au e dua na goneyalewa keu nanuma na noqu vakavulica vua e dua vei ira na ivakavuvuli. E kaya o koya ni sa veisautaka vakaoti na nona bula. Au sa nanuma tu na ituvaki, kau a sega ni vakavulica saraga vua na ka oya; a calata vakaidina o koya na idusi ni ka au a tovolea tiko ni vakavulica. A vakavulici o koya mai na Yalotabu. Eda na vukei ira vakacava na gonevuli ni kila era sa ciqoma tiko na ivakatakila me rawa ni ra yalodei tu ni qara vakalevu cake vakai ira?
Elder David A. Bednar
Na cava o na rairai sureti koya me cakava me rawa ni rawata o koya na mata me raica na ka e se bera ni raica tu eliu?
Na Yalo Tabu ena kauta mai ki na noda vakanananu na ka kecega.14 A sotava o koya e dua na ka veivakurabuitaki e a rogoca kina e dua na ka e sega tu ni tukuni vakamatata. Vukei koya ni raica na ka oya. Kerei koya me vakasamataka na ka a sotava ka dikeva e dua se rua tale na iwase vaka oya. Vukei koya ni raica e dua na ivakarau ena rua se tolu na ka oya esa mai yaco ka dikeva na cava e kauta mai na raiyawa vakayalo oya?”
Sa vakaitamera na duidui vei ira na noda itabagone, ka sa tu na veimataqali bolebole kei na leqa. Ia sa dodonu meda namaki ira mera ka eda tukuna vei ira era sa vakakina. Ka meda sa sureti ira mera cakacakataka. Ka ko na duri kurabui vakataucoko tu ena ka era kauta cake mai. Vakasamataka eliu na ka mo sureti ira me ra cakava me rawa ni ra vulica na ka era gadreva ni vulica.
Taro
Rawa ni o vukei keimami me kila vakamatata, se rairai vulica, na sala me keimami varorogo ka vadidike vakavinaka cake kina?
Elder David A. Bednar
Au na vakatura mo ni taura e dua na ilavelave mamare sau lailai ni Vola i Momani ka wilika mai na ivakatekivu ki na icavacava, ni vakaraici matua na “mata me raica kei na daliga me rogoca,” se veivosa vakaoqo. Raica talega na Vunau kei na Veiyalayalati kei na Veiyalayalati Vou. Gole ki na ivolanikalou me vaka e dua na yamata vuni—taroga, vaqara, ka tukituki voli—kei na nomu taro: “Au na raica vakacava na ka au sega ni dau raica tu? Au na rogoca vakacava na ka au sega ni dau rogoca tu?” Ni ko goleva na ivolanikalou ena veitaro oya, na Yalo Tabu ena vakavulici iko ka vakarautaka na isau ni nomu vakatataro. Au sega ni rawa ni solia vei kemuni; na Yalo Tabu ena vakavulici kemuni vakayadua, ena sala vuni, ka vakai iko se cava na kena isaunitaro vei iko.
Meu wasea mada e dua na ivakaraitaki. Na watiqu, o Susan, e dau dua tu ga na dauveisiko yalodina sara. Ena gauna sa vakayacori kina na veisau ki na veiqaravi ka kerea o Peresitedi Nelson na sala “cecere ka rokovi cake”15 eso ni veiqaravi, a vakarorogo koto o Susan ka vinakata me vakilakila se cava oya. Ni oti na kena tugani ka masulaki, a vakadeitaka matau o koya—me tarogi ira na tacina ka dau veiqaravi kina, “Na cava na kena ibalebale vei iko na cecere ka rokovi cake ena noda veiqaravi?”
Oya na taro rawarawa ka matata duadua o rawa ni taroga, ia na sausaumi mai vei ira na tacina sa veivakurabuitaki sara. A taroga e dua na tacina se na lako vata li ki na valetabu. A taroga e dua tale na tacina se na wiliki ni dua na vosa ni koniferedi raraba ka qai sota vata ena vakasigalevu me veivosakitaka na ka era sa vulica. E vakananuma o Susan ke a cakava cala taumada e dua na ka. A sega ni cakava o koya e dua na ka cala. Cecere ka rokovi cake—sa tadolavi na mata me laurai na sala eso era sega ni raica tu eliu.
Taro
Ena vica na miniti sa vo tiko, rawa beka ni o wasea na cavaga o nanuma mo wasea kei na nomu ivakadinadina?
Elder David A. Bednar
Au lomani kemuni. Au taleitaka iko vakai iko kei na ka o segata tiko mo vakataka. Au taleitaka na ka o cakava. Eda rawa ni vinaka cake taucoko, ia au kaya, “Vinaka vakalevu.” Au kaya vinaka vakalevu ena vukudratou na Mataveiliutaki Taumada kei na Kuoramu ni iApositolo Le Tinikarua kei na Matabose ni Vuli ni Lotu.
Na bula tu e vuravura ena draki ni tabagauna ni taucoko ni gauna oqo esa veivakalougataki ni bula taucoko. Ena vica na yabaki sa oti, a tukuna vakavica vei au o Peresitedi Gordon B. Hinckley, “David, oqo na gauna levu duadua ena itukutuku ni Lotu vakalesui mai.” Io e dina saraga o koya!
Vakasamataka na veika eda sa kalougata ni raica. Navuca ni yabaki oqo sai ka 200 ni yabaki ni Matai ni Raivotu. Na valetabu sa kacivaki oti mai Papua Niu Qini kei Phnom Penh, Cambodia. Era sa tiko na daukaulotu ena Soviet Union kei na veivanua komunisi taumada kei na dua na valetabu ena Ukraine. Oqo na gauna levu duadua ena itukutuku ni Lotu vakalesui mai.
Sa tiko e dua na noda itavi vakatabakidua ena siga edai. Kevaka eda sa vakabulai me baleta na siga edai, esa baleta ni tiko e levu na ka meda cakava, ka sa tiko na noda itavi ena nodra vukei na itabatamata tubu cake tiko mera vakarau tu. Oqo na gauna levu duadua ena itukutuku ni Lotu vakalesui mai—na veisaqasaqa levu duadua kei na madigi levu duadua. Oi keda vata kece, ena siga edai sa tiko na madigi oqo meda kauwai, meda wase ivakadinadina, meda veiqaravi, ka veivuke.
Sa noqu masu ni na vakatawana na Yalo Tabu na vanua lala ena maliwa ni vosa au tukuna kei na ka au segata meu vakaraitaka. Au vakadinadinataka ni a rairai na Tamana kei na Luvena vei Josefa Simici ena 200 na yabaki sa oti. Au vakadinadinataka na Tamana esa Tamada, ka sai Koya na ivakatekivu ni tuvatuva ni bula marau. Au kila, au vakadinadinataka, ka ivakadinadina ni sa Luvena Duabau Ga na Tamada Tawamudu o Jisu Karisito. Au vakadinadinataka ni bula tiko o Koya. Sa tucake tale ko koya; sa lala na ibulubulu. “Sa sega eke ko koya, sa tucake tale.”16
Au vakadinadinataka ena vuku ni Parofita o Josefa Simici, na dodonu ni lewa ni matabete kei na idola ni matabete esa vakalesui mai ki vuravura ka sa vakavuna na Vakalesuimai ni kosipeli na rairai ni Tamada kei na Luvena. Au vakadinadinataka ni sa tomani tikoga na Veivakalesuimai oya.
Au wasea na ivakadinadina oqo ka vakaraitaka na noqu lomani kemuni ena yaca tabu ni Turaga o Jisu Karisito, emeni.