សេចក្ដីណែនាំអំពីការធ្វើដំណើរ
ជំនួបពេលល្ងាចជាមួយនឹងពួកអ្នកមានសិទ្ធិអំណាចទូទៅ
ថ្ងៃ ពុធ ទី ៥ ខែ កុម្ភៈ ឆ្នាំ ២០២០
យើងមានអំណរគុណយ៉ាងខ្លាំងដែលនៅជាមួយនឹងបងប្អូននារាត្រីនេះ ។ ជៀល និងខ្ញុំបានចំណាយពេលបួនឆ្នាំក្នុងកិច្ចចាត់តាំងជាមួយបងប្អូនដ៏អស្ចារ្យនៅទ្វីបអឺរ៉ុប ហើយយើងបានភ្ញាក់ផ្អើល និងរីករាយយ៉ាងខ្លាំង ពេលប្រធានណិលសុនបានសុំយើងឲ្យត្រឡប់មក ស៊ី.អ៊ី.អេស វិញ ។ យើងមានអារម្មណ៍ដូចបានត្រឡប់មកផ្ទះវិញ មកនៅជិតដិតនឹងបងប្អូនដែលមានការលះបង់ និងការខិតខំយ៉ាងខ្លាំងដើម្បីជួយយុវវ័យឲ្យរៀន និងរស់នៅតាមដំណឹងល្អរបស់ព្រះយេស៊ូវគ្រីស្ទ ។
ខណៈដែលបានអង្កេតមើលដំណើរត្រឡប់ទៅមករបស់យើងផ្ទាល់ និងរបស់មនុស្សដទៃក្នុងជីវិតនេះ ខ្ញុំបានគិតអំពីដំណើរ ដែលយើងកំពុងធ្វើឆ្ពោះទៅជីវិតដ៏អស់កល្ប ។ សម្រាប់ពួកយើងដែលទទួលយកព្រះយេស៊ូវគ្រីស្ទ និងដង្វាយធួនរបស់ទ្រង់ គន្លងនៃជីវិតរបស់យើងគឺស្រដៀងគ្នា ។ យើងអនុវត្តសេចក្តីជំនឿលើព្រះអង្គសង្រ្គោះ ហើយធ្វើតាមទ្រង់មិនថាមានឧបសគ្គយ៉ាងណាទេ ។ យើងប្រែចិត្តពីអំពើបាបរបស់យើង ទទួលពិធីបរិសុទ្ធដែលចាំបាច់ ហើយកាន់ខ្ជាប់ដល់ចុងបំផុត ។ ប៉ុន្ដែសេចក្ដីលម្អិតនៃជីវិតនីមួយៗគឺខុសគ្នាខ្លាំងណាស់ ហើយឧបសគ្គដែលយើងប្រឈមក៏ខុសគ្នាពីបុគ្គលម្នាក់ទៅបុគ្គលម្នាក់ទៀតដែរ ។
សូមគិតអំពីដំណើររបស់គ្រួសារលីហៃទៅកាន់ដែនដីសន្យា ។ ដំណើរដ៏វិសេសរបស់ពួកគេអាចផ្ដល់នូវការយល់ដឹងខ្លះមកក្នុងដំណើររបស់យើងផ្ទាល់ ។ ពួកគេបានដឹងថា ពួកគេបានឆ្ពោះទៅដែនដីសន្យា ប៉ុន្ដែពួកគេមិនដឹងអ្វីគ្រប់យ៉ាងអំពីទិសដៅ ឬក៏ផ្លូវជាក់លាក់ដើម្បីទៅដល់ទីនោះទេ ។ ពួកគេបានប្រឈមនឹងឧបសគ្គដ៏ធ្ងន់ធ្ងរតាមផ្លូវ ។ សូម្បីតែនីហ្វៃ ដែលមិនដែលរអ៊ូរទាំនោះ ក៏បានពន្យល់ថា ពួកគេ « រងទុក្ខសេចក្ដីវេទនា និងសេចក្ដីលំបាកមកជាច្រើនក៏ដោយ មែនហើយ គឺច្រើនណាស់រហូតដល់ [ ពួកគេពុំអាច ] សរសេរឲ្យអស់ទេ » ។១
ពួកគេបានទទួលការណែនាំនៅតាមផ្លូវ ។ តាមពិតទៅ លីហៃបានដឹងនៅយប់នោះថា « ស្អែកឡើងលោកត្រូវធ្វើដំណើរចូលទីរហោស្ថានទៀត » ។២ នៅព្រឹកបន្ទាប់ លោកបានរកឃើញលីអាហូណានៅទ្វារត្រសាលរបស់លោក ដែលបានផ្ដល់ការដឹកនាំមកពីព្រះនៅក្នុងដំណើររបស់ពួកគេ ។ ប៉ុន្ដែការមានលីអាហូណាមិនបានផ្លាស់ប្ដូរភូមិសាស្ដ្ររវាងពួកគេ និងដែនដីសន្យាឡើយ ។ វាមិនបានបង្រួញឧបទ្វីបអារ៉ាប់ ឬក៏សមុទ្រដែលពួកគេត្រូវឆ្លងដែរ ។ ពួកគេនៅតែត្រូវឆ្ពោះទៅមុខ ដោយប្រឈមនឹងឧបសគ្គដែលមាននៅក្នុងដំណើរដ៏យូររបស់ពួកគេ ។ ប៉ុន្ដែលីអាហូណាបានដឹកនាំពួកគេ « ទៅតាមទិសនៃដុំមូល ដែលនាំយើងទៅក្នុងតំបន់ដ៏មានជីជាតិច្រើននៃទីរហោស្ថាន » ៣ ហើយប្រសិនបើពួកគេមិនខ្ជិលច្រអូសទេនោះ វាបានជួយពួកគេឲ្យជ្រើសរើសផ្លូវត្រូវ ។៤
លេមិន និងលេមយួលបានរអ៊ូរទាំ ដោយសារតែទុក្ខលំបាកដែលពួកគេបានជួបនៅក្នុងដំណើរនោះ ។ ទុក្ខលំបាកទាំងនោះខ្លះគឺជាកំហុសរបស់ពួកគេផ្ទាល់ ។ ប៉ុន្ដែ ទោះជាពេលពួកគេបានធ្វើតាមការដឹកនាំ និងធ្វើដំណើរត្រឹមត្រូវហើយក្ដី ក៏ពួកគេនៅតែបរិភោគអាហារសាច់ស្រស់ឆៅ និងត្រូវកម្ដៅថ្ងៃហែងនៅលើវាលខ្សាច់ ។ ស្រដៀងគ្នានឹងបទពិសោធន៍របស់លេមិន និងលេមយួល ពេលខ្លះមនុស្សគិតថាពួកគេនឹងមិនជួបឧបសគ្គទេ បើពួកគេកំពុងធ្វើអ្វីដែលត្រឹមត្រូវ នោះអ្វីៗនឹងងាយស្រួល ។ នោះមិនត្រឹមត្រូវឡើយ ។ វាមានន័យថា យើងអាចទទួលបានការពង្រឹងកម្លាំង និងការដឹកនាំ ប៉ុន្ដែមិនមែនមានន័យថា យើងមិនជួបឧបសគ្គឡើយ ។
ទោះជាពួកគេបានធ្វើដំណើរជាក្រុមក្ដី ក៏ពួកគេម្នាក់ៗនៅលើដំណើរផ្ទាល់ខ្លួនគេផងដែរ ។ ទោះជាដំណើររបស់ពួកគេនាំពួកគេឲ្យទៅទីតាំងដូចគ្នាក្ដី ក៏គន្លងដ៏អស់កល្បរបស់ពួកគេម្នាក់ៗខុសគ្នាយ៉ាងខ្លាំង ហើយត្រូវបានសម្រេចដោយការសម្រេចចិត្ត និងសកម្មភាពផ្ទាល់ខ្លួនរបស់គេនៅតាមផ្លូវផងដែរ ។
យើងម្នាក់ៗមានដំណើរផ្ទាល់ខ្លួន និងជាលក្ខណៈបុគ្គលក្នុងជីវិតនេះ ប៉ុន្ដែយើងក៏មានផ្នែកនៃដំណើរនោះជាមួយមនុស្សដទៃផងដែរ ។ ឧទាហរណ៍ យើងនៅលើដំណើររួមគ្នាមួយក្នុងកិច្ចខិតខំរបស់យើងក្នុងថ្នាក់សិក្ខាសាលា និងវិទ្យាស្ថានសាសនា និងការអប់រំក្នុងសាសនាចក្រ ។ យើងមានកម្មវត្ថុមួយ ជាទូទៅយើងដឹងពីកន្លែងដែលយើងទៅ ប៉ុន្ដែយើងមិនដឹងពីឧបសគ្គទាំងអស់ ឬសេចក្ដីលម្អិតនៃផ្លូវដើម្បីទៅដល់ទីនោះឡើយ ។
ពួកយើងម្នាក់ៗជ្រើសរើសពីរបៀបដែលយើងនឹងធ្វើដំណើរជាក្រុម ។ យើងអាចរអ៊ូរទាំ ។ យើងអាចរីករាយ ។ យើងអាចមានអំណរទោះក្នុងឧបសគ្គក្ដី ។ សម្រាប់មនុស្សមួយចំនួន ការផ្លាស់ប្ដូរក្នុងគោលនយោបាយ ឬនីតិវិធីរបស់សាសនាចក្រអាចជាឧបសគ្គ ។ ខ្ញុំរីករាយខ្លាំងណាស់ដែលឃើញពីរបៀបដែល ស&វ ឆ្លើយតបនឹងការផ្លាស់ប្ដូរដ៏បំផុសគំនិតនេះ ដែលសង្កត់ធ្ងន់លើការរៀនសូត្រដំណឹងល្អដែលផ្ដោតលើគេហដ្ឋាន និងគាំទ្រដោយសាសនាចក្រ ។
យើងនឹងជួប ហើយយើងកំពុងតែជួបនឹងឧបសគ្គ ។ តាមរយៈការធ្វើតាមការដឹកនាំរបស់ព្រះអម្ចាស់ យើងអាចយកឈ្នះ ហើយរៀនមកពីឧបសគ្គទាំងនេះបាន ។ ព្យាការី យ៉ូសែប ស្ម៊ីធ បានពោលថា « វាជាក់ច្បាស់ណាស់ថា ព្រះអម្ចាស់បានប្រទានដល់យើងនូវអំណាចដល់កិច្ចការដែលត្រូវធ្វើ ព្រមទាំងកម្លាំងស្របតាមផ្លូវដែលយើងត្រូវរត់ និងព្រះគុណ ក៏ដូចជាជំនួយតាមដែលយើងត្រូវការ » ។៥
យើងទទួលបានការដឹកនាំដើម្បីជួយយើងឲ្យដើរលើផ្លូវត្រង់បំផុត ហើយធ្វើដំណើរតាមផ្លូវដែលមានជីវជាតិជាងក្នុងទីរហោស្ថាននៃដំណើររបស់យើង ។ យើងមានការដឹកនាំមកពីព្យាការី ។ ខ្ញុំដឹងថា យើងត្រូវបានដឹកនាំដោយពួកព្យាការី អ្នកមើលឆុត និងអ្នកទទួលវិវរណៈ ។ នេះគឺជាពរជ័យ ! យើងត្រូវបានដឹកនាំដោយកម្មាភិបាលអប់រំសាសនាចក្រ ហើយយើងក៏មានបងប្រុសវិប ក្រុមការងាររបស់លោក និងថ្នាក់ដឹកនាំដ៏បំផុសគំនិតផ្សេងទៀតផងដែរ ។ បន្ថែមលើនេះ ពួកយើងម្នាក់ៗមានសិទ្ធិទទួលការដឹកនាំផ្ទាល់ខ្លួន នៅពេលយើងប្រឈមនឹងបញ្ហាណាមួយក្នុងការចាត់តាំងផ្ទាល់ខ្លួនរបស់យើង ។
ទាំងកម្មាភិបាលអប់រំសាសនាចក្រ ទាំងគណៈកម្មាការប្រតិបត្តិនៃកម្មាភិបាលនោះបានជួបប្រជុំគ្នារាល់ខែ ។ នៅក្នុងការប្រជុំទាំងនេះ យើងទទួលបានការដឹកនាំ និងការប្រឹក្សា ។ យើងក៏មានពរជ័យមកពី « ជំនួបពេលល្ងាចជាមួយនឹងពួកអ្នកមានសិទ្ធិអំណាចទូទៅ » រាល់ឆ្នាំផងដែរ ហើយជាច្រើនឆ្នាំកន្លងមក យើងបានទទួលការដឹកនាំដ៏មានប្រយោជន៍ និងចំគោលដៅយ៉ាងច្រើនដើម្បីជួយយើងក្នុងដំណើររបស់យើង—ក្នុងនាមជាអង្គការ និងជាបុគ្គល ។
ខ្ញុំអធិស្ឋានថា យើងអាចបើកចិត្តទទួលការដឹកនាំ និងការណែនាំមកពីព្រះអម្ចាស់ ។ ខ្ញុំដឹងថា ទ្រង់មានព្រះជន្មរស់ ហើយនឹងជួយដឹកនាំយើង ។
នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។