Pagtudlo sa Relihiyon ngadto sa Kabatan-onan ug mga Young Adult - Pasiuna nga Pakigpulong
Presidente Dallin H. Oaks
Part I
Akong minahal nga kaigsoonan,
Mapasigarbuhon kami nga nakatambong niini nga panagpundok sa mga magtutudlo sa seminary ug sa institute ug mga magtutudlo sa relihiyon sa atong mga unibersidad ug sa kolehiyo. Nalipay kaayo mi nga kamo giubanan sa inyong mga kapikas, kinsa importante kaayo sa inyong sagradong mga responsibilidad sa pagtudlo. Kami mibati nga nahagit nga mamulong kaninyo niining talagsaon ug malisod nga panahon—taliwala sa usa ka tibuok kalibotan nga pandemya.
Sama sa gitambag ni Commissioner Paul V. Johnson kaninyo, human sa akong mubo nga pasiuna nga pakigpulong, kita adunay duha ka lain-laing panaghisgotan aron sa pagbalanse sa atong programa.
Magsugod ko sa pagtuki sa gahom sa gugma. Ngano nga ang gugma sa Dios ang unang dakong sugo? Mao kini ang una tungod kay kini mao ang sukaranan sa pagsabot ug pagsunod sa plano sa Dios ug sa Iyang mga sugo alang sa Iyang mga anak. Ang atong gugma sa Dios ug sa Iyang gugma alang kanato mao ang importanting baruganan sa ebanghelyo, mahinungdanon sa unsay makaimpluwensya kanato ug mahinungdanon sa unsay kinahanglan natong hinumdoman. Ang Dios nahigugma kaninyo isip Iyang mga magtutudlo. Ang Iyang mga lider nahigugma kaninyo isip mga magtutudlo sa Iyang plano ug sa Iyang pulong. Ug gihigugma ninyo ang inyong mga estudyante. Si Elder Gordon B. Hinckley mihiusa niini sa usa ka kapahayag diha sa usa ka pakigpulong ngadto sa mga magtutudlo sa daghang katuigan na ang milabay: “Wala nay mas maayo pa nga paagi sa pagpakita og gugma alang sa iyang mga anak, ilabi na niadtong kinsa miabot … aron sa pagkat-on sa inyong atubangan ”1
Ang akong amahan namatay sobra sa 80 ka tuig na ang milabay. Unsa ang akong nahinumdoman nga pinakamaayo sa among relasyon? Ang iyang mga pagtulun-an? Ang iyang pagdisiplina kanako? Dili, ang akong nahinumdoman pagayo nga siya nahigugma kanako.
Sa samang paagi, nagtuo ko nga mahinumdoman pag-ayo sa inyong mga estudyante unsay ilang gibati mahitungod sa inyong mga pagbati alang kanila. Sila mahinumdom giunsa ninyo pagtabang kanila sa mapinanggaong paagi sa pagkat-on sa ebanghelyo, pag-ila sa mga pag-aghat sa Espiritu, ug paggamit sa ebanghelyo sa ilang kinabuhi. Ang gugma mao ang makadasig nga gahom diha sa pagtudlo.
Mga 70 na ka tuig sukad ako usa ka estudyante sa seminary. Unsa ang akong nahinumdoman pag-ayo bahin sa akong duha ka magtutudlo sa seminary sa Vernal, Utah? Dili na gani ko makahinumdom sa hilisgotan sa mga klase nga ilang gitudlo, apan nahinumdom ko nga silang duha nahigugma kanako ug nag-amuma kanako isip usa ka tawo.
Ang gugma adunay gahom: gahom sa pagsabot sa Pag-ula ni Jesukristo, gahom sa pagsabot sa plano sa kaluwasan, ug gahom sa pagpasabot sa mga sugo sa Dios.
Kon kita wala makasabot sa gugma, ang tanang butang bahin sa ebanghelyo masukwahi o mahimong huyang tungod sa mga tintasyon sa kaaway ug sa gahom sa kalibutanon nga mga mithi ug sa kalibotananon nga mga tawo nga naglibot kanato.
Ang akong ikaduha nga hilisgotan mao ang hilisgotan sa ebanghelyo nga inyong itudlo.
Sa pagtudlo sa mga hilisgotan bahin sa butang sa kalibotan, pamilyar ug kasagaran madawat ra alang sa mga magtutudlo nga magbutang sa ilang mga kaugalingon isip mga eksperto diha sa hilisgotan. Dili kini madawat diha sa pagtudlo sa relihiyoso nga mga baruganan. Kita dili mga batid sa ebanghelyo ni Jesukristo. Ang naay awtoridad mao ang Espiritu Santo, usa ka sakop sa Dios nga Kapangulohan, kansang tumong mao ang pagpamatuod sa Amahan ug sa Anak sa paggiya kanato ngadto sa kamatuoran. Siya molamdag sa atong mga pagtudlo. Busa, dili sama sa mga magtutudlo sa mga hilisgotan bahin sa butang sa kalibotan, kinahanglan dili gayod kita modawat og pasidungog alang sa ideya nga nagdugang og kalig-on sa talagsaong mga kamatuoran sa ebanghelyo. Kinahanglan dili gayod kita maglihok diha sa lawak klasehanan o sa bisan asa sa pamaagi nga makabalda sa hugot nga pagtuo o sa mga pagtulun-an sa atong Manluluwas nga si Jesukristo. Kita kinahanglan dili mopakita og personal nga interes sa bisan unsa nga hilisgotan nga atong itudlo.
Kita motudlo tungod sa gugma alang sa atong Amahan sa Langit ug sa Iyang Anak nga si Jesukristo ug uban sa gugma alang sa Iyang mga anak, nga atong mga estudyante. Kita madasig sa atong determinasyon nga molambo ang ilang abilidad sa pagpaminaw ug pagpatalinghog Kaniya kinsa mao ang atong Manluluwas.
Ako mopamatuod sa atong Manluluwas nga si Jesukristo, ug nag-ampo alang sa Iyang mga panalangin nga maanaa kanato samtang kita nagpadayon og abante, sa ngalan ni Jesukristo, amen.