Pagtudlo sa Relihiyon ngadto sa Kabatan-onan ug mga Young Adult - Panel nga Diskusyon
Bahin II sa Panaghisgotan – Presidente Oaks, Chad Webb, Adam Smith
Presidente Dallin H. Oaks: Brother Webb, kanindot nga makauban ka. Brother Smith. Sige mopadayon na ta.
Brother Webb: Nan, Salamat. Mahinamon kaming makauban kamo karon. Ug salamat nianang maanindot nga mensahe. Gani, ang pagpaminaw sa inyong tambag nakamugna og daghang pangutana nga ganahan natong mahisgotan. Ug magsugod kita niining usa, samtang naghisgot kamo bahin sa gugma alang sa atong mga estudyante, ug ang tipik sa paghigugma sa atong mga estudyante mao ang pagtudlo nila sa ebanghelyo ug pagtabang nila aron makasabot niadtong mga butanga nga labing bililhon. Unsaon nato sa pagsiguro nga sa tanang nagkalain-laing butang nga mahimo natong itudlo, nga atong iprayoridad ang mga butang nga adunay labing dako nga bili sa atong mga estudyante?
Presidente Oaks: Ang sa atong Church Education System mao ang atong responsibilidad nga magtinguha nga makat-on dili lang pinaagi sa pagtuon, apan sa hugot nga pagtuo usab.
Brother Adam Smith: Kon maghunahuna ko sa mga butang nga atong ikatudlo sa mga estudyante nga adunay labing dakong bili, nagiyahan ko sa pagtulun-an ni Presidente Eyring nga gusto nakong ipaambit. Miingon si Presidente Eyring, “Sa tanang kamatuoran nga ipasabot dinhi niining scripture block, hain ang makatabang sa akong mga estudyante nga mas mapaduol ngadto sa Langitnong Amahan ug sa Manluluwas ug mogiya ngadto sa kaluwasan?” Si Presidente Eyring dayon miingon: “Sa inyong pag-andam og leksyon, pangitaa diha ang makapakabig nga mga baroganan. … Ang makapakabig nga baroganan mao kanang moresulta ngadto sa pagkamasulundon sa kabubut-on sa Dios.”1 Ang akong makuha niining talagsaong pagtulun-an ni Presidente Eyring mao nga kadtong mga butang nga may kinadak-ang bili sa atong mga estudyante mokonektar kanila sa personal nga paagi ug sa talagsaong paagi ngadto sa Langitnong Amahan ug ni Jesukristo. Kita kinahanglan motudlo niadtong mga butang nga makatabang sa estudyante nga mobati ug makasabot sa mga kamatuoran sa ebanghelyo, apan ilabi na sa kamatuoran bahin sa reyalidad ni Jesukristo ug sa Iyang Pag-ula ug Pagkabanhaw—ug makatabang nila nga mobati niana sa praktikal nga paagi, si Jesus adunay gahom sa pag-ayo ug pagtabang ug paghupay ug paglimpyo kanila. Tingali kadto ang labing importanting butang nga atong matutokan.
Presidente Oaks: Gamhanan og tinuod.
Brother Webb: Salamat. Ug mokonektar gyod kini sa ideya nga masiguro nga sila makat-on sa hugot nga pagtuo—nga sila molihok diha sa hugot nga pagtuo ug makabaton og kompirmasyon sa Espiritu Santo nga ang mga butang nga ilang nakat-onan ug gisunod naggikan gayod sa Langitnong Amahan. Busa salamat. Presidente, naghisgot sab ka sa tahas sa Espiritu Santo sa among pagtudlo. Mao nga mangutana ko kon unsa pa ang kamatuoran kalabot sa Espiritu Santo ug sa Iyang impluwensiya ug tahas diha sa among mga klasehanan nga imong ikapaambit namo.
Presidente Oaks: Siguro ang importante sa pagbati sa Espiritu Santo mao ang pag-ambit sa sakramento. Tungod kay adunay saad diha sa mga pakigsaad nga atong gihimo kon kita moambit sa sakramento nga kita “kanunayng makabaton sa Espiritu ngari [kanato].” Kana ang sukaranan.
Brother Webb: Kahibalo ka, ganahan ko nga miingon ka niana. Nagpahinumdom kini nako sa dihang batan-on pa ko nga magtutudlo, migahin ko og pipila ka bulan sa pagtuon sa mga baroganan nga modumala sa pagdapit sa Espiritu Santo. Ug siguro nindot gayod kana nga oportunidad nga kita kinahanglan mopadayon sa pagtuon niana. Apan ang bugtong importanting butang nga akong nakit-an mao ang imong gisulti: nga ang pag-ampo sa sakramento nga nag-ingon nga kon kita mohinumdom Kaniya, kita makabaton sa Espiritu uban kanato. Ug dili lang kana atol sa sakramento o sa Dominggo, apan sa kanunay—lakip sa atong klasehanan. Kon atong tutokan ang Manlulwas—kon kita mohinumdom Kaniya isip ang ehemplo kon unsaon sa pagsunod sa ebanghelyo ug makakuha sa Iyang gahom ug sa Iyang mga pagtulun-an—kon kita mohinumdom Kaniya, kita nagdapit sa Espiritu Santo aron maanaa sa kasinatian sa pagkat-on. Siguro ang nag-unang responsibilidad o tahas sa Espiritu Santo mao ang pagpamatuod sa atong mahigugmaong Langitnong Amahan ug ni Jesukristo isip ang sentro diha sa plano sa Langitnong Amahan. Busa kon gusto natong dapiton ang Espiritu Santo sa atong klasehanan, atong tutokan ang mga butang nga Siya makapamatuod. Mao nga ganahan ko niana. Salamat.
Presidente Oaks: Ug si Presidente Nelson mipamatuod sa kasamtangang kaimportante niana niini nga mga pulong. Miingon siya, “Sa umaab[o]t nga mga adlaw, dili na posible ang espirituhanon nga pagsugakod kon wala ang paggiya, pagdirekta, paghupay, ug ang makanunayon nga impluwensya sa Espiritu Santo.”2
Brother Webb: Salamat. Nan, nagpasalamat gyod ko unsay nasulti, ug makapangutana ko: Naghisgot kita’g diyutay bahin sa unsay unahon sa mga magtutudlo sa paagi nga magdapit sa Espiritu Santo. Unsaon nato sa pagtabang ang atong mga estudyante nga unahon ang unsay labing importante sa ilang kinabuhi?
Presidente Oaks: Samtang maghunahuna ko bahin niana niining panahona kon dunay daghan kaayong kalibotanong impluwensiya nga nagpalibot kanato ug sa atong estudyante, siguro kinahanglan atong hinumduman nga ang mga butang sa kalibotan—ang mga butang nga gibahandi sa kalibotan—mga temporaryo og bili. Sa kataposan, kini dili kaayo importante kay sa mga baroganan nga gikinahanglan sa pagkat-on sa katuyoan niining kinabuhi ug sa atong kapalaran sa kahangtoran. Unsay inyong ikadugang niana, Brother Smith?
Brother Smith: Presidente Oaks, samtang nagtudlo ka niana, usa ka bersikulo sa kasulatan ang misantop nako sa dihang ang Manluluwas, sa wala pa Siya misulod sa Getsemane, mihalad og sagradong pag-ampo, ug Siya miingon, “Ug kini mao ang kinabuhing dayon: nga ang mga tawo moila kanimo nga mao ang bugtong matuod nga Dios ug kang Jesukristo, nga imong gipadala.”3 Siguro kon atong tabangan ang atong mga estudyante nga makasabot nga sila kinahanglan motino kon asa mogahin sa ilang panahon ug asa nila ihatag ang ilang pagtagad, makatabang ba kini nila nga masayod ug mohigugma sa Langitnong Amahan ug ni Jesukristo? Ug laing hunahuna nga akong ipuno niana mao ang butang nga imong gitudlo kanamo sa bag-ong kinatibuk-ang komperensiya, Presidente Oaks, ug kana mao ang pagpangutana, “Asa man kini mosangpot?” Ug kon hunahunaon kana nga pangutana sa konteksto nga “mas makadala ba kini nako nga mas mapaduol ngadto sa Langitnong Amahan ug ni Jesukristo? Makadala ba kini nako sa pagtuman sa akong balaan nga pagkatawo o katuyoan?” Ug siguro kana makahatag og gamhanang salaan alang ni bisan kinsa kanato. Ug kita makatabang usab sa atong mga estudyante nga makasabot niini nga salaan sa ilang mga pagpili kon asa nila igahin ang ilang panahon, ug unsa ang ilang tan-awon o paminawon o pangitaon. Sila kinahanglan gayod mohimo og ilang kaugalingong mga pagpili. Apan kon kita makatabang kanila sa pagpangutana, “Asa man kini mosangpot, ug modala ba kini nako nga mas maduol sa Langitnong Amahan ug ni Jesukristo?”
President Oaks: Oh, pagka-importante niana, ug pagkamakahuloganon kaha niini kon ang tanan sa atong estudyante makasabot niana nga baroganan.
Brother Webb: Ug alang sa mga magtutudlo sa pagpasabot niana ug paghatag og pagpamatuod niadtong mga butang aron madapit ang Espiritu Santo sa pagkompirmar sa kaimportante—dili lang sa pagkatinuod, apan sa kaimportante niadtong mga baroganan sa ilang kinabuhi. Tingali modugang usab ko, kon mahimo, sa ideya lang nga may kalabotan. Siguro ato lang mahimo mao ang pagtabang sa pagdapit sa mga estudyante aron makadiskobre sa kalabotan niadtong mga baroganan sa ilang kinabuhi. Usahay maghunahuna ko nga hisgotan nato kining mga butanga sa paagi nga makigkompetensiya sa ilang oras o pagtagad. Ug usahay kita kinahanglan gayod nga mouna sa mga butang nga labing bililhon. Apan siguro makatabang usab kita kanila nga makakita kon unsa ang papel sa ebanghelyo sa ilang inadlaw-adlaw nga kinabuhi. Pananglitan, akong nakat-onan, samtang estudyante pa ko, nga kon akong tumanon ang pagbalaan sa Igpapahulay, ug kon akong gitun-an ang mga kasulatan sa wala pa ko magtuon, sa pagkatinuod nahimo ko nga mas maayong estudyante kay sa ibulag kadtong mga butanga ug moingon, “mogahin ko’g oras sa espirituhanon, ug oras sa sekular.” Apan sa matag aspeto sa akong kinabuhi, kon akong ilakip ang Langitnong Amahan—kon ilakip ko ang Espiritu sa pagtabang nako—nan bisan ang mga butang nga ingon og temporal sa atong estudyante, ilang makita ang kalabotan sa ebanghelyo diha sa mga butang nga ilang gipaningkamotan nga matuman sa ilang kinabuhi. Imbis mokompetensiya sa ilang oras, kini maghiusa.
Presidente Oaks: Ug atong mahinumdoman nga ang Ginoo nagtudlo kanato nga Siya wala gayod maghatag og bisan unsa nga temporal nga mga sugo. Ang tanan sa Iyang mga sugo ug giya espirituhanon.
Brother Smith: Usa pa ka hunahuna nga misantop samtang naghisgot ka niana—bisan nalang sa atong mga estudyante sa seminary—mao ang programa sa Kabataan ug Kabatan-onan sa Simbahan. Kana ang usa ka gamhanang paagi sa paghimo sa ebanghelyo nga may kalabotan ug makahimo og praktikal nga mga tumong aron magamit ang ebanghelyo sa pagtabang kanato sa bisan unsang aspeto sa atong kinabuhi sa pagsulay nga mas mahisama sa Manluluwas.
President Oaks: Tinuod gayod. Karon, gusto kong mangutana sa duha ka tawo kinsa mga propesyonal nga mga magtutudlo sa relihiyon: Kaigsoonan unsa man ang nakat-onan ninyo ug sa inyong kaubanan kabahin sa pagtudlo sa ebanghelyo ni Jesukristo atol sa pandemya nga gisinati natong tanan?
Brother Smith: Ako moingon una sa tanan nga kitang tanan nakat-on—moingon ko nga kita gipahinumdoman, ug gipasabot—nga kita dunay nindot kaayo nga mga magtutudlo, nga sila nahigugma gayod sa Dios ug nahigugma sa mga estudyante ug mihimo sila og labaw pa, ug kita mapasalamaton kaayo. Naghunahuna sab ko nga ang pandemya nakahatag og gibug-aton sa elemento sa pagpangalagad nga anaa na sa pagtudlo sa ebanghelyo. Siguro mas maayo na kita sa pagpaminaw sa mga estudyante, sa pagtino sa ilang mga panginahanglan ug mga abilidad ug sa paghimamat kanila, ug sa paghigugma kanila kon asa man sila, ug pagpangita sa mamugnaong paagi sa pagtabang kanila nga maduol sa Langitnong Amahan ug ni Jesukristo. Naghunahuna usab ako nga sa panahon sa pandemya sa diin daghan kaayo ang kalisdanan, atong nakita kana nga balaan nga tabang nga nag-uban sa magtutudlo nga naningkamot sa paghigugma sa Dios ug paghigugma sa ilang mga estudyante ug mibuhat sa ilang pinakamaayo.
Brother Webb: Maayo kaayo kanang pagkasulti. Gusto lang kong moingon nga salamat ug mopuno sa akong pagpasalamat. Kahibalo mo, duna tay mga magtutudlo nga naningkamot sa pagtudlo sa face to face ug nagkat-on sa pagtudlo online. Misul-ob sila og mga mask nga usahay dili komportable. Gibutang nila ang ilang kaugalingon sa risgo ug mihimo niini sa ingon kadakong gugma alang sa ilang mga estudyante ug sa Langitnong Amahan uban sa dakong pasalig. Gusto lang kong moingon nga salamat sa tanang sakripisyo ug mga paningkamot sa pagbuhat niini atol sa lisod kaayong panahon.
Presidente Oaks: Iapil ko, alang sa Unang Kapangulohan, ang akong pagpasalamat sa unsay imong gipahayag. Gihigugma namo kamo mga kaigsoonan kinsa nagtudlo sa atong mga seminary ug institute sa pagtudlo sa relihiyon sa unibersidad ug kolehiyo.
Brother Webb: Salamat; mahinungdanon kana. Laing pangutana nga gusto kong ipangutana nimo tungod sa mga butang nga imong gitudlo sa laing kahimtang: Nganong importante nga itudlo nato ang baroganan ug dili ang lagda?
Presidente Oaks: Nalipay ko nga nangutana ka niana. Paborito kini nako. Sa usa ka kolum diha sa Church News, Si Tad R. Callister, ang atong kanhi presidente sa Sunday School, naghisgot bahin niini: “Una, ang mga lagda limitado sa usa o tingali pipila ka pihong sitwasyon, samtang ang mga baroganan sa kinatibuk-an mas halapad ang paggamit. Ikaduha, ang mga baroganan makahimog kahimtang nga magamit ang kabubut-on samtang ang lagda mopagamay sa kabubut-on pinaagi sa pagdili [ug] usahay modiktar sa atong mga pagpili.” Modugang ko niana nga ang Manluluwas mipuli sa Balaod ni Moises, nga gipadagan sa lagda, sa mas taas nga balaod ni Kristo, nga gipadagan sa baroganan. Si Brother Callister mipasabot niana nga baroganan sa mosunod. Miingon siya: “Haom ang mga baroganan sa mas taas nga balaod, ang mga lagda sa mas minos. Ang atong makanunayong tutokan mao ang pagtudlo sa doktrinal nga baroganan. Ngano man? Kay ang mga baroganan dunay talagsaong kapasidad sa pagbayaw kanato sa celestial nga gitas-on, ug sa kataposan, ang mga baroganan—dili lagda—maoy magdumala sa celestial nga gingharian.”4 Kana ang kataposan sa kinutlo.
Brother Webb: Nagpasalamat usab ako niana. Adunay laing kaayohan niana. Diha ko sa usa ka pundok sa magtutudlo bag-ohay lang kinsa nagsulti nako nga sa ilang klasehanan ingon og daghan pa og—ang pulong ilang gigamit ang “panagbingkil” samtang daghan og pangutana ang mga estudyante ug dunay lahi nga panglantaw sa mga butang. Ug ganahan ko sa unsay imong gitudlo namo tungod kay nakatabang kini nako nga makaamgo nga usa sa paagi sa paghimo niana dili ang pagtudlo sa aplikasyon, diin ilang madebatihan diha sa ilang kahimtang, nga dili kaayo mahitabo kon magtudlo sa baroganan sa ebanghelyo. Moadto sa sukaranan—ang pagtudlo sa plano sa kaluwasan, sa doktrina ni Kristo, sa mga baroganan sa ebanghelyo, ug sa pagtugot og personal nga aplikasyon uban sa tabang sa Espiritu Santo.
Presidente Oaks: Maayong pagkasulti.
Brother Webb: Nagtuo lang ko nga praktikal kana ug makatabang sa unsay atong gipaningkamotan, Presidente. Salamat. Brother Smith, modugang ka ba niana?
Brother Smith: Nan, nagtuo ko nga parehas na sa imong gipasabot, Brother Webb. Usab, pinaagi sa pagtudlo og baroganan imbis sa aplikasyon, modapit kita sa estudyante sa pagbuhat isip tinugyanan sa proseso sa pagkat-on ug sa ilang paglambo—nga sila modawat sa baroganan ug magtinguha og personal nga pagpadayag, makatuon mismo niini og dugang ug motino sa labing maayong lakang alang nila samtang sila mogamit sa baroganan sa personal nga kahimtang.
Brother Webb: Salamat. Nan ang pangutana mao ni, “Uban sa tanang impluwensiya—tanang tingog sa kalibotan—unsaon nato pagtabang ang atong estudyante sa pagsugakod sa mga impluwensiya sa katilingban?”
Presidente Oaks: Kinahanglan atong sabton nga ang yawa ang amahan sa tanang bakak—“usa ka bakakon sukad sa sinugdanan,”5 nag-ingon ang kasulatan. Ang iyang labing maro nga paghatod sa iyang mga bakak mao ang pagsagol niini sa kamatuoran. Mao nga, makadani ug makatakod sa pagpangita sa maayong tawo pinaagi sa pagsagol sa kamatuoran ug bakak. Busa, usa sa labing bililhong butang nga sulayan nato sa pagkat-on sa mortalidad mao ang mga pagtudlo sa Espiritu Santo nga motugot kanato nga maalisto kon unsa ang mao—ug ang dili—tinuod.
Brother Smith: Sa samang paagi, kining pagsagol sa tinuod ug bakak, ang kaaway motangtang usab sa tinuod gikan sa kahulogan niini ug gikan sa dapit niini sa plano sa Dios. Kana mopadako sa kalagmitan sa kamatuoran nga masayop sa paggamit o sa pagsabot. Pananglitan, pipila ka minutos ang milabay, Presidente Oaks, nindot kaayo ang imong pagtudlo namo bahin sa gugma ug ang dapit niini sa plano sa Dios—ang kaimportante sa gugma sa Dios ug gugma sa atong silingan—kana nga gugma mao gayod ang pwersa nga makapadasig nga nagpaluyo sa tinguha sa Langitnong Amahan sa pag-andam nato sa kinabuhing dayon, ang labing dakong gasa sa Dios. Ug ang atong gugma sa Dios ang nagdasig kanato sa paghigugma ug pagserbisyo sa uban. Nan, kon ang kaaway malampuson nga mobulag sa baroganan sa gugma gikan sa gipasabot niini, dali ra kining tuison. Ug ang tawo nga wala makasabot sa gugma mahimong makighiusa sa sayop nga kawsa. Sila lagmit mobutang sa ilang kaugalingon diha sa oposisyon sa balaod sa Dios ug sa Iyang mga propeta, tungod sa pagkabulag sa kamatuoran gikan sa mahangtorong kahulogan niini nga mosangpot sa mini o sayop nga pagsabot. Ug ang kaaway mobuhat niana sa daghang baroganan.
Presidente Oaks: Makita nato ang daghang ebidensiya niana sa kalibotan sa atong palibot, dili ba? Brother Webb, isip mga magtutudlo unsaon ninyo sa pagtubag ang mga pangutana bahin sa bag-ong problema diha sa hunahuna sa mga estudyante sama sa makalibog nga mga hilisgotan sa kasaysayan sa Simbahan, mga isyu sa LGBT, mga pangutana bahin unsaon pagsunod sa pagkontrolar sa gobyerno kalabot sa pandemya, ug uban pa? Ang mga pangutana walay kahumanan. Unsaon ninyo sa pagtubag kadto nga mga pangutana kalabot sa pagpasabot sa atong relihiyon diha sa mga klasehanan?
Brother Webb: Maayo kaayo na nga pangutana ug butang nga giatubang sa mga magtutudlo sa kanunay. Mosugod ko pinaagi sa pagsulti nga ganahan ko sa gitudlo ni Apostol Pablo kanato nga motudlo o mamulong sa matuod diha sa gugma. Busa syempre kinahanglan kita motudlo sa ebanghelyo. Kita nagkinahanglan motudlo sa mga kasulatan ug sa pagtulon-an sa mga propeta sa bag-ong panahon. Kita kinahanglan motudlo sa kamatuoran. Dili makahatag og kaayohan ni bisan kinsa ang pagtudlo sa mga butang nga dili tinuod; kana dili mosangpot sa kalipay. Apan ang laing bahin niana—nagtuo ko nga kana importante gayod: sa dihang Siya miingon sa pagbuhat niana diha sa gugma, sama sa imong gisulti pag-usab karong gabhiona. Tingali importante nga magsugod sa mga relasyon. Aduna nay daghang pagsiksik nga nahimo nga klarong nagpakita kanato nga aron makat-on ang estudyante, nag-agad kini sa mga relasyon. Ug para nako, kadtong mga relasyon magsugod sa mga magtutudlo kinsa andam sa pagpaminaw—sa pagsabot sa tinud-anay sa mga estudyante ug sa ilang mga kahimtang ug sa pagpakitag pagsabot sa ilang panginahanglan. Tingali importante usab ang pag-ila nga ang tanan adunay ikatampo, nga atong gihatagan og bili—nga kita nagkinahanglan sa usag usa ug sa kasinatian nga makuha sa usag usa ug makat-on gikan diha. Mao nga daghan kaayo ang ikasulti bahin niining pangutana, ug ganahan ko sa pangutana. Apan alang nako, kini mao ang pagpamulong sa kamatuoran uban sa gugma, ug kana nagpasabot og mga relasyon nga motabang sa mga tawo sa pagsalig ug magdungan sa pagkat-on ug magdapit sa Espiritu Santo ngadto sa kasinatian.
Presidente Oaks: Ang imong gisulti bahin sa mga relasyon nagpahinumdom nako sa bag-ong gibasa nga nindot nga pakigpulong sa atong Kinatibuk-ang Presidente sa Young Men, si Steven J. Lund, sa bag-ong Komperensiya sa Kababayen-an sa BYU . Siya mihulagway—nagpasabot sa mga relasyon isip makapadasig nga impluwensiya nga kita mamahimo sa kinabuhi niadtong nagpangita og maayong ehemplo ug tigmatuto. Miingon siya nga ang atong mga tigsiksik nakakaplag nga ang espirituwal nga kalamboan sa batan-on nga LDS nag-agad gyod sa kalidad sa ilang mga relasyon, lakip sa mga ginikanan, higala, ug magtutudlo. Ug kadtong mga relasyon uban sa mga lider mapalambo og maayo diha sa seminary ug sa Sunday School ug sa mga klase sa korum diin sila makat-on sa pagtahod ug mohigugma sa ilang mga lider ug sa isig ka santos.6 Kana ang kataposan sa kinutlo. Kining tanan, ako motapos, motumbas sa usa ka dalaygon nga pag-endorso sa kaimportante sa mga magtutudlo nga mohigugma ug makigtambayayong sa ilang mga estudyante. Ang pagsalig nga napalambo niining paagiha mahimong usa ka impluwensiya sa pagmatuto nga mopalig-on kanila sa pagtubag sa makalibog nga mga pangutana alang sa ilang kaugalingon.
Brother Webb: Salamat. Oo, mao kana ang kinauyokan sa unsay atong gipaningkamotan nga matuman: ang pagtukod sa relasyon. Ug gikan sa unsay imo lang gipaambit namo, makahimo kita og pipila ka butang sa seminary sa pagtabang kanila nga mapalig-on ang uban nga mga relasyon. Imong gihisgotan ang programa sa pagpalambo sa kabatan-onan. Kita makapunting nila ngadto sa ilang mga lider sa kabatan-onan, sa mga bishop, sa ilang mga lider sa Young Women. Makatabang kita sa pagpalig-on sa ilang mga relasyon sa ilang ginikanan sa paagi nga makig-istorya ta nila bahin sa pamilya ug ipaduol sila sa ilang ginikanan. Kanang tanan importante gayod—dili lang sa pagtukod sa atong mga relasyon uban kanila, apan sa pagpalig-on sa ilang mga relasyon sa mga tawo nga mogiya nila sa hustong direksyon. Busa salamat sa pagpaambit niana. Busa uban niana, naghunahuna ko kon makahisgot ba kita og diyutay pa bahin kon unsaon nato sa pagtudlo kining mga sukaranang mga butang sa paagi nga dili makasilo o makapahilayo sa mga batan-on gikan sa ebanghelyo. Gani, mopaambit lang ko kadali og ehemplo aron mapahimutang ang pangutana nga naa sa akong hunahuna. Usab, kini lang semanaha, duna koy magtutudlo nga mitawag nako nga miingon nga usa ka ginikanan miabot aron kuhaon ang iyang anak nga babaye gikan sa seminary kay nagtudlo siya og mga baroganan ug kaimportante bahin sa pamilya. Ug kining ginikanan nasakitan tungod sa kahimtang sa ilang pamilya ug dili gusto nga matudloan ang bata sa importanting tahas sa pamilya—bisan diha sa kahulogan sa plano sa kaluwasan. Kining magtutudlo naguol kaayo nga nawad-an sa iyang estudyante ug nangutana: “Unsaon man nako pagtudlo ang kamatuoran? Unsaon man nako pagsagubang niini sa kalibotan diin dili nato abugon palayo ang mga tawo, apan kita kinahanglan motudlo sa ebanghelyo sa lunsayng paagi sa atong mga estudyante?”
President Oaks: Pagkanindot nga ehemplo. Brother Smith, unsay imong ikasulti niini nga hilisgotan?
Brother Smith: Nan, nagtuo na usab ko nga—bag-o lang natong gihisgotan ang kabahin sa mga relasyon. Apan siguro ang estudyante nga misalig sa usa ka magtutudlo—ug mobati nga gihigugma sa ilang magtutudlo—mobukas sa ilang kasingkasing. Usahay dunay motumaw nga depensa kon kita motudlo sa igtutudlo nga dili ang reyalidad sa estudyante. Ug ang usa ka butang nga makawagtang sa depensa kon ang estudyante mohigugma ug mosalig sa ilang mga magtutudlo. Mao nga, usab, importante gyod ni. Ganahan kong mopasabot sa komentaryo sa miaging tubag—aron lig-onon kadtong mga relasyon uban sa estudyante.
President Oaks: Tinuod gayod. Ug hunahunaa nga importante kaayo alang nato ang pagsabot nga kita dili obligado sa pag-uyon sa tanang butang nga gisulti karon—pinaagi man sa estudyante o sa mga ginikanan sa estudyante o sa uban sa katilingban. Wala kita sa buluhaton sa pagmatuod sa tanang pagtuo diha sa daghang mga ideya. Kita gitahasan sa pagtudlo sa kamatuoran. Apan sa pagbuhat niana, kita kinahanglan mag-amping nga kita dili gayod mopakunhod sa atong responsibilidad nga nahatag ngari kanato pinaagi sa Manluluwas, sa paghigugma sa atong mga silingan. Bisan unsa man atong buhaton kinahanglan gyod nga masulod diha sa gugma aron dili kita makiglalis sa tawo, apan ihatag nato ang atong pagtudlo aron ang pagtulon-an ang moatubang nianang sayop nga mga pagtuo. Si Brigham Young, kinsa malalison nga indibidwal mihimo og maayo kaayo nga kalahian nga akong nabasa diha sa pagtulon-an ni—o sa mga diskurso ni Brigham Young. Sa usa sa iyang pakigpulong, miingon siya niini—ako mokutlo: “Wala gayod kini makausab sa akong mga pagbati ngadto sa mga tawo, sa mga lalaki o sa mga babaye, bisan kon sila motuo man sama sa akong gituohan o dili. Kamo ba makapuyo isip mga silingan nako? Ako makahimo uban kaninyo; ug dili kini usa ka dako nga butang alang kanako kon kamo motuo ba kanako o dili.”7 Kana ang kataposan sa kinutlo gikan ni Brigham Young. Nagtuo ko nga wala kadto damha nga tinubdan sa pagbaton og ingon ka madayagon nga pamahayag sa matuod nga kita mahigugmaong makig-uban niadtong dili mouyon kanato.
Brother Webb: Oo, Tukma gayod kana sa atong mga magtutudlo karon. Usa kini sa labing importanting hiyas, tingali, sa usa ka disipulo sa Manluluwas karon: aron mahimong dili mouyon ug makapadayon sa paghigugma sa mga tawo ug magpakatinuod nianang relasyon sa mga tawo bisan pa man sa walay panag-uyon sa pagtuo.
Presidente: Laing bahin niana mao nga kinahanglan kita nga mobuhat aron ang atong pagkamahigugmaon ug pagdawat—dili masayop nga masabot isip pag-uyon. Lisod kanang dapita. Ug atong makita sa kalibotan sa politika ug publiko nga mga komunikasyon, gikan sa daghang tinubdan, ang kapakyas sa pag-ila niana. Sa kasagaran ang mga tawo mangagpas nga kita mipaundayon og butang tungod kay gihigugma nato ang tawo nga naapil niini.
Brother Webb: Kining tanan nagkonektar ra, dili ba? Mobalik kini ngadto sa mga relasyon; mobalik kini sa pagpaminaw ug pagsabot. Apan mobalik usab kini ngadto sa pagtudlo sa baroganan. Mobalik kini ngadto sa pagpangagpas kon nganong kita motuo unsa atong gibuhat base sa plano sa kaluwasan ug sa doktrina ni Kristo, ug ilakip kadtong mga butang ug magsubay sa kalisod nga imong gihulagway.
Presidente Oaks: Ug mobalik usab kini ngadto sa una ug dakong sugo sa paghigugma sa Dios, ug dayon ang Manluluwas miingon, “kon kamo nahigugma kanako, tumana ang akong mga sugo.”8 Ug unya ang ikaduhang sugo mao ang paghigugma sa atong mga silingan. Sa pagkatinuod nga kita naghigugma sa atong mga silingan wala nagpasabot nga kita wala nahigugma sa Dios una ug motuman una sa Iyang mga sugo.
Brother Webb: Salamat.
Brother Smith: Aduna koy nahunahunaan nga kahimtang sa usa ka magtutudlo kinsa namulong sa kamatuoran diha sa gugma ug midepensa sa doktrina ni Kristo uban sa kaisog—apan gihigugma usab niya ang iyang mga estudyante, busa mibati sila nga luwas, ug ang mga estudyante misalig ug nahigugma sa magtutudlo. Mao nga tingali adunay usa ka estudyante nga dili mouyon sa usa ka elemento sa doktrina ni Kristo—o usa ka baroganan sa ebanghelyo tingali ang mas maayo nga paagi sa pagsulti niini—apan moadto gihapon sila sa klase. Ug sila moadto gihapon sa institute o seminary tungod kay sila mibati nga luwas, ug nakapalig-on sa hugot nga pagtuo diha ni Jesukristo sa niana nga palibot. Mao nga kining balanse nga atong gihisgotan importante kaayo nga makab-ot: sa pagpanalipod sa kamatuoran ug paghigugma niadtong dili mouyon sa kamatuoran aron ang klasehanan sa seminary ug institute mahimong luwas nga dapit sa estudyante.
Presidente Oaks: Ug akong gibati ang pagsulti nga kadtong atong mga naminaw kanato kinsa naapil sa institute ug sa pagtudlo og relihiyon diha sa mga unibersidad ug koliheyo adunay mas dakong hagit sa partikular nga hilisgotan. Ang mas hingkod nga mga estudyante mas dunay kalagmitan nga maghunahuna alang sa ilang kaugalingon ug mahimong malalison kay sa mga estudyante sa seminary, pananglitan. Apan ang mga baroganan managsama ra. Ang aplikasyon managlahi pinasikad sa kahimtang ug sa kahingkod sa indibidwal, apan ang mga baroganan mao kadtong atong gihisgotan.
Brother Webb: Salamat.
Presidente Oaks: Ania ang pangutana nga mousab sa hilisgotan og diyutay lang, apan may kalabotan gihapon sa atong panahon: Unsaon nato pag-agni ang atong mga estudyante sa pagpadaplin sa ilang mga cell phone atol sa oras nga maningkamot kita sa pagtudlo nila?
Brother Webb: Sa tinuod lang nindot na nga pangutana, mokonektar na sa panaglalis o dili pagsinabtanay diha sa mga klase, tungod kay usahay mao kana ang mamugna niini, dili ba? Busa—Brother Smith?
Brother Smith: Bitaw, sigurado nga adunay panahon diha sa palibot sa pagkat-on nga ang mga estudyante gikinahanglan moundang ug hiposon ang ilang mga cell phone. Ang pinaka maayo tingaling buhaton nga makatabang nila sa pagbuhat niana mao ang pagpaapil ug makapaikag nga pagtudlo. Si Elder Ballard—o Presidente Ballard—sa makausa misulti nato nga siguradohon nga ang atong pagtudlo makapaikag. Apan adunay panahon usab nga diin makadapit kita og tigkat-on sa paggamit sa ilang cell phone diha sa kasinatian sa pagkat-on. Gamit ang kapanguhaan sa ChurchofJesusChrist.org ug diha sa Gospel Library nga app, kita sa ubang higayon makadapit sa estudyante sa pag-apil sa kasinatian sa pagkat-on pinaagi sa paggamit og makapalig-on sa pagtuo nga sulod diha sa ilang telepono. Ug kana adunay panalangin—usa ka positibo nga epekto alang kanila gawas sa klase—nga lagmit ilang makita kining himan isip butang nga labaw pa kay sa himan sa pagdula o social media—o sa pipila, usa ka tinubdan sa tentasyon. Ug sila mahimong makat-on nga sa pipila ka higayon, kanang samang himan magamit sa pagpalig-on og hugot nga pagtuo ni Jesukristo. Nagkinahanglan gayod kini og pag-aghat sa bahin sa magtutudlo—ug balanse. Apan ang Ginoo motabang nato sa pagpangita og mga oportunidad sa pagpalig-on sa hugot nga pagtuo pinaagi sa paggamit sa himan ug usab sabton nga dunay panahon nga kini kinahanglan pawngon ug hiposon.
Presidente Oaks: Ang inyong sugyot nga kita dili mahimong masilag sa mga cell phone nagpahinumdom nako og kasinatian—mobalik ko 10 o 15 ka tuig—sa dihang mihapit ko sa klase sa Sunday School sa pangedaron sa Seminary nga batan-ong lalaki ug babaye. Ug miadto ko nga dunay kasilag sa mga cell phone. Apan samtang mitan-aw ko sa palibot sa klase sa daghang estudyante, nakaamgo ko nga dihay usa lang ka basahon nga kasulatan sa klasehanan. Ang tanan nagbasa gikan sa mga kasulatan ug nagsunod sa leksyon diha sa cell phone. Diha nako nakita nga ang pangutana dili ang pagdili apan ang pagbalanse.
Brother Webb: Maayo kana nga pagkasulti, salamat. Nan, Presidente, ganahan gayod kami nga makauban nimo, salamat sa imong tambag karon, ug naghunahuna kami kon makagahin ba kita og minuto lang, Brother Smith, kon imong unhan, sa pagpaambit bisan unsay imong gusto, ug dayon malipay ko nga mobuhat niana, ug magbilin og oras diha nimo.
Brother Webb: Salamat. Samtang maghunahuna ko sa atong sagradong oportunidad sa pagtudlo sa kabatan-onan ug mga young adult sa Simbahan, ug kadtong anaa sa atong mga institusyon sa CES, naghunahuna ko sa pagtulon-an sa atong minahal nga propeta, si Presidente Russell M. Nelson. Miingon siya: “Daghan sa labing halangdon nga mga espiritu sa [Dios]—tingali … ang Iyang labing maayo nga koponan … gipadala sa yuta niining tukma nga panahon. … [Sila] usa sa mga labing maayo nga gipadala sa Ginoo sukad dinhi sa kalib[o]tan.”9 Ug gusto lang ko mopaambit sa akong pagtuo nga ang mga batan-on nga kita adunay oportunidad nga atong ikapakigdait mao gayod ang gitudlo sa mga propeta sa Dios kanato. Ug pagkasagrado nga kahigayonan nga atong maangkon sa pagpamatuod ngadto kanila sa reyalidad ni Jesukristo ug sa Iyang Pag-ula ug sa Iyang pagkabanhaw. Ug Ako mopamatuod sa reyalidad sa Pag-ula ug Pagkabanhaw ni Jesukristo; nga kini Iyang Simbahan; nga kita gipangulohan sa Iyang buhi nga mga propeta, manalagna, ug tigpadayag; ug nga kita nalambigit sa Iyang kawsa samtang kita magtudlo sa kabatan-onan sa ulahing mga adlaw. Ug ako mopaambit niana nga pagpamatuod kaninyo sa ngalan ni Jesukristo amen.
Brother Webb: Amen. Ganahan lang ko modugang usab sa akong pagpamatuod sa reyalidad sa atong mahigugmaong Langitnong Amahan ug ni Jesukristo isip Manluluwas ug Manunubos sa kalibotan—nga kini mao ang Iyang Simbahan ug gingharian sa Yuta. Ug ako mapasalamaton kaayo nga nakagahin og panahon sa matag adlaw sa akong kinabuhi sa pagpamatuod bahin Kaniya ug pagtudlo sa uban bahin sa Iyang ebanghelyo. Mapasalamaton ko niadtong kinsa nagtudlo nako ug mipanalangin nako pinaagi sa ilang hugot nga pagtuo ug pagpamatuod diha sa Manluluwas, ug mapasalamaton ko nga mahimong kabahin niining buhat uban ninyo sa pagtudlo sa gipahiuli nga ebanghelyo ni Jesukristo. Ug unya mosulti lang usab og kadali kaayo nga samtang maghunahuna ko bahin sa gugma sa Amahan sa Langit, kita kasagaran maghisgot kon unsa ka dako sa gugma sa Langitnong Amahan sa atong mga estudyante. Apan gusto kong modugang nga ako nasayod nga ang atong Amahan sa Langit nahigugma kaninyo, nga Siya mapasalamaton kaayo nga kamo gustong mogahin sa inyong kinabuhi sa pagtudlo sa Iyang mga anak, ug nga Siya nahigugma sa inyong mga pamilya, ug nga samtang kamo magpadayon nga matinud-anong moserbisyo sa pagtudlo sa Iyang mga anak, Siya mopanalangin kaninyo ug sa inyong pamilya samtang kamo mopanalangin sa Iyang mga anak pinaagi sa inyong pagtudlo ug pagpamatuod ug ehemplo. Mao nga salamat kon kinsa kamo ug sa unsay inyong gibuhat, sa ngalan ni Jesukristo, amen.
President Oaks: Amen. Akong idugang ang akong pagpamatuod ngadto nianang gipamatuod niining maanindot nga mga sulugoon sa Ginoo. Ako mopamatuod sa Amahan ug sa Anak, pinaagi sa gahom sa Espiritu Santo, nga kini Iyang buhat, ug nga kamo Iyang mga sulugoon, isig ka magtutudlo sa ebanghelyo ni Jesukristo. Ug ako mopakanaog sa mga panalangin sa langit diha kaninyo samtang kamo moserbisyo sa Ginoo ug samtang kamo mopadayon uban sa inyong mga pamilya ngadto sa padulngan nga ang Dios miandam alang sa Iyang takos nga mga anak: kinabuhing dayon. Ug ako mobuhat sa ingon sa ngalan ni Jesukristo, amen.
All: Amen.