O i Tatou o Tusiatafaavae o Lo Tatou Lava Fiafia
Gerald Causse
Fesoasoani Muamua i le Au Epikopo Pulefaamalumalu
Ou uso e ma tuafafine, ua ou matua lagonaina lava le faamamaluina ma le faamanuiaina i le po nei i le avanoa e tautala atu ai ia te outou. Ou te matua faananau lava i talavou matutua o le Ekalesia, ma ua ou fiafia lava ina ua mafai ona tatou mafuta mo sina taimi i lenei afiafi.
E faitau afe outou o loo i ai i lenei Tapeneko matagofie. Ae e toatele atu foi isi e le o mafai ona ou iloa atu o loo faapotopoto i le fia afe o faletapuai i le lalolagi atoa. Peitai, ou te iloa o loo outou gauai mai ma le naunau e aoao. E ui po o fea lava o tatou i ai, ou te iloa e mafai ona i ai le Agaga Paia i soo se mea tatou te i ai. E sili atu foi nai lo le faasalalauga faasatelite, o le mafutaga a le Agaga Paia ua fatuina ai se noataga uiga ese i le va o i tatou uma. Ou te tatalo ina ia mafuta mai o Ia ma i tatou, o le a Ia aoao i tatou, taialaina i tatou, ma musuia i tatou i lenei afiafi.
E Tele Mea e Ofo ai i le Olaga
Ua tatou i ai i se potu ofoofogia, o se maafaamanatu iloga faasolopito ua fai ma saafiafiga i le faatuatua ma le galulue malosi o paionia o e sa faavaeina le Aai o Sate Leki. Sa ou faatoa ulufale i lenei Tapeneko ina ua16 ou tausaga. O le taimi o la’u malaga muamua mai i le Iunaite Setete o Amerika. Na fuafuaina e lo’u tama ma te malaga mai i se tasi o ana malaga faapisinisi i Kalefonia. Ona o au o se alii talavou sa ola ae i saute o Farani, sa ou oso fiafia ai i lenei valaaulia. O le a ou vaai i Amerika! Sa sili atu foi lo’u naunau ona sa aofia ai i la ma’ua malaga se faaiuga o le vaiaso i le Aai o Sate Leki e auai i le konafesi aoao.
Ou te manatuaina lo ma taunuu mai i Iuta i le ma Ford Mustang na totogi ma te feoai ai. I le tele o itula sa ma i ai i luga o le auala, sa ma pasia uato’a o le kiona, o toafa i le mamao sa mafai e mata ona iloa, o vanu matagofie lanumoli, ma atumauga malualii. O le faataatiaga o laufanua na faamatalatalaina ai Amerika i Sisifo ia te au, ma sa matua pupula o’u mata ina ia ou vaai i ni kaupoe po o ni Initia i le alatanu.
O le aso na sosoo ai, ona o le agalelei o se uo, sa matou nonofo ai i totonu o lenei Tapeneko i laina pito i luma, e auai i sauniga o le konafesi. Sa matua faagaeetia lava au. I le gasologa o sauniga, sa ou taumafai e faauiga nai upu faa-Peretania sa mafai ona ou malamalama ai. Ou te manatuaina lava le saunoaga a Peresitene Ezra Taft Benson---e le o ana upu tonu ia, ae o le uunaiga loloto na faia i lo’u loto a o o’u talavou. Sa ou lagona e pei ua ou ola i se miti, i se fatufatuga fou matagofie.
I le taimi lena, mata na mafai ona ou manatu i le mea o le a faataunuuina i lenei afiafi? Mata na i ai se manatu e lauga atu i lenei lava Tapeneko e tasi i se potopotoga ofoofogia? E matua leai lava!
O loo i ai i le olaga le anoanoai o mea e ofo ai, e sa’o? O le lima foi tausaga talu ai ou te lei mafaufauina lava. O le taimi lena sa matou nonofo ai ma lo’u aiga i Pale, ma sa foliga mai ua maea lelei ona faataatia o matou olaga. Sa fananau uma le ma fanau e toalima i le falemai lava lea e tasi e latalata i lo matou fale. Mo i ma’ua, sa le mafai ona ma mafaufau i se olaga ese po o se isi lava mea, e ese mai o matou nuu tuaoi toafilemu latalata mai i Pale, e siosiomia e le ma fanau ma a latou fanau ia ua le o toe mamao. Ona oo lea i se tasi afiafi, sa telefoni atu ai Peresitene Monson ma sa suia atoa ai o matou olaga.
Talu mai lena taimi, ua ou iloa faapea foi lo’u aiga mea o loo sapi ai le olaga i Iuta---o vaaiga faasolopito o le Ekalesia, o le sopo i mauga, o papakiu i tuafale a o goto ifo le la, o ituaiga eseese o hamburger faatosina (e sili ma toe aupito leaga foi!), taaloga lakapi a le Cougar … ma Utes. Ma, e le iloa foi e se isi, pe o le kaupoe o le a e vaai i ai taeao i le alatanu o a’u!
O Le Lumanai e Le Mailoa
O lo’u tofiga i le avea ai ma uso o le Au Epikopo Pulefaamalumalu e maeu ma musuia. Peitai, e matua ese lava lenei aafiaga mai a’u fuafuaga a o ou talavou. A o ou laitiiti, sa ou manao e avea ma tagata suesue o mea faaanamua. Sa faamautinoa e lo’u tina ua a’otauina lelei au. Sa ia tuu mai ia te au se tusi e uiga i le farao talavou o Tutankhamun, ma o iina sa ou amatalia ai se faanaunauga mo aso anamua. Sa tele faaiuga o vaiaso na ou faaaluina e fatufatu ai atatusi o taua anamua, ma sa faatumulia puipui o lo’u potu i nei ata. Sa ou moemiti e i ai se aso ou te alu ai i Aikupito e auai i eliga suesue o malumalu anamua o Aikupito ma tuugamau o farao.
Ua fasefulu tausaga mulimuli ane, e lei avea lava au ma se tagata suesue o mea anamua, ma e foliga mai o le a ou le oo lava i ai. Ou te lei oo lava i Aikupito, ma o la’u galuega mulimuli a o lei avea au ma se Pulega Aoao, sa ou i ai i le faasoasoaga o taumafa. E leai se faiā tele ma a’u fuafuaga faatamaitiiti!
O le talavou, i le tulaga masani, o le taimi tonu lava lea e faia ai fuafuaga faaletagata lava ia. E tofu i tatou uma ma miti faatamaitiiti. I le avea ai ma talavou matua, e tatau lava ona i ai au miti mo lou lumanai---outou taitoatasi! Atonu o le faamoemoe e ausia se tulaga faaafeleti, o le fatufatuga o se galuega tele faatufugaga, po o le mauaina o se tipiloma po o se tulaga faapolofesa o loo e sailia ia maua e ala i le galue ma le tinou. Atonu foi o loo i ai se ata taua tele i lou mafaufau o sau tane po o sau ava i le lumanai, o lona fuaitino, o ona uiga, o le lanu o ona mata po o le lauulu, ma fanau aulelei o le a faamanuiaina ai lou aiga.
E fia ou moomooga o le a tino mai? E tumu le olaga i le le mautonu. O le a oso mai le ala o le olaga mea e faate’ia ai. O ai na te iloa le mea e tupu a taeao, o fea o le a e i ai i ni nai tausaga, ma le mea o le a e faia? O le olaga e pei o se talafatu e le o mautinoa, e faigata ona mate lona lagisolo.
O le a i ai taimi taua mo oe e ono suia ai le aluga o lou olaga i se minute. O na taimi e mafai ona na o se tepa lava, se talanoaga, se mea e lei fuafuaina. Ma te manatuaina lava ma Valérie le taimi tonu na alofa faavalea ai le tasi i le isi i le taimi o le a’oga pese a le aufaipese a le matou autalavou matutua i Pale. O se mea na matuai le fuafuaina lava! Na ma masani lava a o ma laiti, ma e lei i ai ni o ma lagona tosina o le tasi i le isi. O le afiafi lena, sa ou taina le piano ae sa pese o ia i le aufaipese. Sa tau atu le pupula a le tasi i le isi, ona tupu ai lea o se mea. O se mea na tupu i se sekone ae e faavavau!
O le a i ai avanoa fou o le a tulai mai lava i latou i o outou olaga, e pei o le folafolaga talu ai nei mai ia Peresitene Monson e faatatau i le matutua e o ai e faamisiona. Ina ua mavae lena faasilasilaga mai le perofeta, atonu e faitau afe alii ma tamaitai talavou o le Ekalesia i lenei taimi, ua faagasolo le toefetuunai o a latou fuafuaga mo le o atu e faamisiona.1
O nisi taimi, o suiga o fuafuaga i o tatou olaga e afua mai i luitau e lei faamoemoeina po o ni mea foi e le fiafia ai. Ua ou iloa e ala mai i aafiaga, ua na o se vaega o matalalaga o o tatou olaga tatou te puleaina.
Ae o le tele lava o tagata e le fiafia i mea e le o iloa. O lē mautonu o le olaga e afua ai ona le maumanatu nisi, se atuatuvale i le lumanai lea e faaalia mai ia lava i ala eseese. O nisi e faatuatuai ona faia ni tautinoga ona o le fefe i lē taulau, e oo lava foi pe a tulai mai avanoa lelei. Mo se faataitaiga, atonu latou te faatuatuai ona faaipoipo, a’oga, amata se aiga, pe amatalia se gaoioiga faapolofesa mautu, ua fiafia lava i le na ona “tafafaovale”, pe nofonofo ai i le mafana o le mafutaga i fale o o latou matua.
O se isi manatu e faatapulaaina ai i tatou o loo faapupula mai i le muagagana lea: “Aai, feinu, fiafia, aua o taeao tatou feoti, ma o le a tatou lelei” (2 Nifae 28:7). O lenei fuaitau ua ta’u mai ai, tatou te le iloa po o le a le mea e tupu a taeao ma o le a iu lava ina tatou oti uma, o lea e ao ai ona faamalieina i tatou lava i le taimi nei. O lenei manatu e lilifa i le faamalieina o manaoga e fiafia i ai i le taimi lava lea, tusa lava po o a taunuuga e i ai i le lumanai.
Mulimuli i le Ala o le Fiafia
Ou uso e ma tuafafine pele, o la’u savali mo outou i le aso o le, e i ai se ala e ese mai nai lo le atuatuvale ma le le mautonu po o le faamalieina o ou lava tuinanau---o se ala e aumaia ai le manuia, mautinoa, ma le toafilemu i le olaga. E le mafai ona e puleaina matalalaga uma o lou olaga. O le a tutupu mea e lelei ma faigata ia te oe, o mea e te lei faamoemoeina. Peitai, ou te tautino atu o loo ia te oe le puleaina o lou lava fiafia. O outou o tusiatafaavae o lena mea.
Ou te manatuaina lava upu atamai nei na fofogaina mai e Peresitene Dieter F. Uchtdorf i le konafesi aoao talu ai:
“O le faasolo lava ina tatou matutua, o le tele foi lena o lo tatou tepa i tua ma iloaina ai o tulaga i fafo atu e le afaina tele lea, pe iloa ai lo tatou fiafia.
“ … Tatou te fuafuaina lo tatou fiafia.”2
E leai, o lou fiafia e le o le taunuuga moni lea o matalalaga o lou olaga. O le taunuuga o lau vaaiga mamao faaleagaga ma o mataupu faavae na e te fau ai le faavae o lou olaga. O nei mataupu faavae o le a e maua ai le fiafia tusa lava po o a luitau e lei faamoemoeina, ma mea e le maalofia o le a faateia ai i la outou faigamalaga i lenei lalolagi.
O le afiafi nei, ou te manao tatou te toe iloiloina faatasi ma outou nisi o nei mataupu faavae taua.
1. Ia Iloa Lou Taua Patino
O le mataupu faavae muamua o le: Ia iloa lou taua patino.
O le taumafanafana nei na matou faaaluina ai ma lo’u aiga ni aso malolo i Provence, o se itulagi matagofie i saute o Farani. I se tasi afiafi, ina ua faatoa goto ifo le la ma ua ufitia foi le siosiomaga i le pouliuli, sa ou filifilia ai se taimi paganoa mo a’u lava ia e ala i lo’u taotooto i se nofoa malolo i fafo o le fale. Sa matuai pogisa mea uma ma sa faigata ona ou iloa lelei mea sa siosiomia ai au. Sa amata ona vailiili e o’u mata le lagi. Muamua sa uliuli pato’i. Ae na faafuasei ona vaaia se sulu i le lagi, pei se aloiafi, ua lua, ua oo ina tolu. Na faasolosolo malie, a o faamasani o’u mata i le pouliuli, sa oo ina ou matua mata’ia ma le fiafia se mano o fetu. O se mea na ou manatu o se lagi pogisa, ua suia i le Aniva.
Sa ou mafaufau: “E tali foliga lava lea i la ma sootaga patino ma le Atua. E toafia tagata e talitonu e matua mamao lava o Ia pe lē o i ai foi? O tagata na ua manatu e matuai pogisa ma uliuli pato’i le olaga. Latou te faaaluina se taimi pe faia se taumafaiga e vaili ai le lagi ma iloa ai o loo i ai o Ia iina, e matuai latalata mai lava ia i tatou.”
Sa faaauau pea ona ou manatunatu. Sa ou mafaufau i le lautele o le atulaulau o loo taatia mai nei i o’u luma ma lo’u lava tino faatauvaa, ma sa ou fesili ifo ia te au lava, “O le a so’u tulaga e faatusatusa i lenei mamalu ma le ofoofogia?” Na oo mai i lo’u mafaufau se mau. O se mau matagofie lava, o se tasi o salamo a Tavita, o ana solo e musuia ai lava au.
“A ou vaai atu i lou lagi, o le galuega a ou tamatamai lima, o le masina atoa ma fetu na e faia;
“se a ea le tagata e te manatu mai ai ia te ia, ma le atalii o le tagata e te asiasi mai ai ia te ia?” (Salamo 8:3–4).
Na vave ona oo mai le fuaitau faamafanafana lenei:
“Aua ua e faamaulalo ane teisi o ia i agelu; ua e faapaleina foi o ia i le mamalu ma le matagofie” (Salamo 8:5).
O le tala uigā lea ma le vavega o le foafoaga. E lautele naua ma e le gata mai le atulaulau, peitai, e tofu i tatou ma se aoga tulaga ese, e mamalu ma e le gata i le silafaga a lo tatou Mataisau. O lo’u i ai i la le tino e lamo’imo’ī, ae o lo’u lava taua patino, e lemafuatiaina le taua i lo’u Tama Faalelagi.
Na tautino mai e Peresitene Uchtdorf:
“Pe o fea lava o e i ai, pe o a foi ou tulaga o i ai, e le faagaloina lava oe. E tusa lava pe o le a le foliga faaletonu o ou aso, e tusa lava pe o le a lou lagonaina o lou faaletaua, e tusa lava pe o le a le lofituina ua e manatu ua e i ai, e le faagaloina lava oe e lou Tama Faalelagi. O le mea moni, e alofa o Ia ia te oe, i se alofa e le mavae.
… O loo silafia ma manatua oe e le Tagata e aupito sili ona tamalii, mamana, ma mamalu i le lalolagi atoa! O loo alofaina oe e le Tupu o le vateatea e le gata ma e faavavau!”3
O le iloaina e silafia i tatou e le Atua ma e alofa mai ia i tatou taitoatasi, e pei o se sulu ua faamalamalamaina ai o tatou olaga ma e aumaia ai lona uiga. Ou te manatuaina se tamaitai talavou sa sau e vaai au ina ua maea se faeasaite na ou lauga ai i Roma, i Italia. Sa tetete lona leo i le ootia, ma sa talanoa mai ia te au e uiga i lona uso o loo feagai ma taimi o faafitauli ma le atuatuvale. Ona ia fesili mai lea: “E mafai faapefea ona ou fesoasoani ia ona iloa e alofa lona Tama Faalelagi ia te ia?”
Pe le o le fesili talafeauga ea lena? E mafai faapefea ona tatou iloa e alofa le Atua ia te i tatou? E tele taimi e faavae ai o tatou lagona i lo tatou taua patino, i le alofa ma le fiafia mai o i latou e vagaia i tatou. Peitai o nisi taimi e leai ai le alofa lenei. O le alofa o tagata e tele taimi e le tonu ai, e le atoatoa, pe manatu faapito foi.
Peitai, o le alofa o le Atua e tonu, e atoatoa, ma e le manatu faapito. Po o ai lava a’u, pe i ai ni au uo pe leai, pe ou te lauiloa pe leai, pe teena foi au pe sauaina e isi, ua ou matuai mautinoa lava e alofa lo’u Tama Faalelagi ia te au. Na te silafia o’u manaoga; e malamalama o Ia i o’u popolega; e naunau o Ia ia ou manuia. Ma o le faailoaga tele o Lona alofa mo au o le, “aua ua alofa tele mai o Ia i le lalolagi, ua Ia auina mai ai Lona Alo pele e toatasi” (Ioane 3:16). Na te lei aveesea le ipu oona a le Faaola ma e mautinoa foi sa mafatia o Ia lava a o Ia silasila ifo i Lona Alo o mafatia i le Faatoaga o Ketesemane ma luga o le satauro. Sa togiolaina e Keriso agasala a tagata uma, ma o se vaega o lena Togiola sili sa faataunuuina mo au ma ua teuina mo au i le taimi nei. O lenei meaalofa e le gata, na tofu sao i ai le Tama ma Lona Alo, ua faamautu ai i lo’u agaga lo’u lava taua ia i La’ua.
Ou uso e ma tuafafine, manatu pe o le a le uiga pe a mafai ona e vaai atu ia te oe lava e faapei ona silasila mai le Atua ia te oe. E faapefea pe a e vaai ifo ia te oe lava ma le agalelei, alofa, ma le mautinoa e pei ona faia e le Atua? Manatu i le aafiaga o le a i ai lou olaga, ia malamalama i lou gafatia e faavavau e pei ona malamalama i ai le Atua. Afai e mafai ona e vaavaai ifo ia te oe lava i Ona fofoga, mata o le a se uunaiga o le a faia e lena mea i lou olaga?
Ou te molimau atu o loo i ai o Ia iinei. Saili o Ia! Su’e ma aoao. Tatalo ma ole atu. Ou te folafola atu o le a auina mai e le Atua ia te oe ni faailoga vaaia o Lona i ai ma Lona alofa ia te oe. Atonu e oo mai i se tali i se tatalo; atonu o le uunaiga filemu a le Agaga Paia o faamafanafaina oe; atonu o se musumusuga faafuasei po o se malosiaga fou e te iloa e le’i sau mai ia te oe; atonu o se tagata o le aiga, uo, po o se taitai perisitua ua i ai i le nofoaga sa’o i le taimi sa’o e faamanuia ai lou olaga. I se isi itu, a o e liliu atu ia te Ia, o le a Ia ta’u atu ia te oe o loo i ai o Ia iina.
2. Avea ma Lē e Tatau ona Avea ai Oe
O let taimi nei, o se mataupu faavae lona lua o le fiafia: Ia avea ma lē e tatau ona avea ai oe.
O lenei fasifuaitau, “avea ma lē e tatau ona avea ai oe,” e faasino ia Pinda, o se tasi o fatusolo aupito tautaua i Eleni.4 E foliga mai o se tala e uigā. E mafai faapefea ona ou avea ma tagata lea ua avea ai nei a’u?
Tuu mai au se’i ou faapupulaina atu le mataupu faavae lenei e ala i se tala. Sa ou matamata talu ai nei i se ata tifaga e ta’ua o le Age of Reason. O loo faamatala i lea ata ia Makerita, o se teutupe maumea e ola i se olaga soonafai, e tumu i malaga ma fonotaga i itu e fa o le lalolagi. E ui lava ua faaipoipo o ia, ae fai mai e leai sona taimi e fai ai sana fanau.
O le aso na atoa ai lona 40, na ia maua ai se tusi uiga ese sa faapea mai: “Ia te au la’u pele, o le aso ua atoa i ai lo’u fitu tausaga ma ua ou tusi atu ia te oe lenei tusi e fesoasoani ai ia e manatua ia folafolaga sa ou faia i le vaitausaga o le faautauta, ma ia e manatua foi lē ou te manao ia avea ai.” Sa faafuasei ona malamalama Makerita o le tusitala o le tusi e le o se isi a o ia lava ina ua fitu ona tausaga. O mea na sosoo ai o ni itulau o loo faamatala auiliili ai e le teineitiiti ana sini o le olaga.
Na iloa ai e Makerita o le tagata ua avea ai o ia, e leai se mea o foliga mai ai i le mea sa ia manao i ai a o teineitiiti. A o faia sana faaiuga ia toe maua mai le tagata sa ia muai vaai i ai a o teineitiiti, sa matuai fulifao lona olaga sa manaia ona fuafuaina ma faatulagaina. Sa toe faalelei o ia ma lona aiga ma fuafua ai e faapaia aso o totoe o lona ola e auauna atu ai i tagata e manaomia le fesoasoani.5
Au uo pele, afai e te mauaina se tusi mai lou taimi ua tuanai, mata o le a se tala? Mata o a mea o le a i ai i se tusi atonu na e tusia mo oe lava i le aso o lou papatisoga ina ua valu ou tausaga? O le a ou toe foi teisi i tua atu. Afai e mafai ona e maua mai se tusi mai lou mua’i olaga, mata o le a se tala? Mata o le a se aafiaga o oe i se na tusi mai se lalolagi ua galo ae e moni, pe afai o le a e mauaina i le aso?
Atonu o le a faapea mai lena tusi: “Ia te au la’u pele, Ua ou tusi atu ia te oe ina ia e manatua pe o ai ou te manao ia avea ai. Sa ou alaga fiafia i le avanoa ou te sau ai i le lalolagi. Ua ou iloa o le olaga i le lalolagi o se auala taua e mafai ai ona ou tuputupu ae i lo’u gafatia atoa, ma ola ai e faavavau faatasi ma lo’u Tama Faalelagi. Ou te faamoemoe o le a e manatua lo’u manao aupito sili, o le avea lea o se soo i lo tatou Faaola, o Iesu Keriso. Ou te lagolagoina Lana fuafuaga, ma a oo ina ou i ai i le lalolagi ou te manao e fesoasoani ia te Ia i Lana galuega o le faaolataga. Faamolemole ia e manatua foi, ou te manao ia avea o se vaega o se aiga o le a faatasi i le faavavau atoa.”
O le manatu mulimuli lenei e faamanatu mai ai ia te au se pese matagofie o loo maua i le tusipese faa-Farani a le Ekalesia---o se pese e le maua i viiga a se isi atunuu. O loo faaulutalaina, “Souviens-toi,” o lona uiga “Manatua,” ma ua faamusikaina mai le New World Symphony na fatuina e Antonín Dvořák. O le pese a se matua o loo talanoa atu i se pepe meamea.
Tuu mai sei ou faitauina atu le fuaiupu lona tolu ia te outou:
“Manatua, si a’u tama e: I le amataga,
O i ta’ua o se uo sa taaalo i le matagi.
Ona oo lea i se tasi aso, i le fiafia, sa ta filifili ai
E talia le fuafuaga sili o le olaga mai le Alii.
I lena afiafi, la’u tama e, sa ta folafola atu ai,
E ala i le alofa, e ala i le faatuatua, ta te toe faatasi.6
“Manatua la’u tama e.” O se tasi o mea sili o le olaga o le sailia lea po o ai moni i ta’ua, o fea na ta o mai ai, ona ta ola ai lava lea e tusa ma lo ta’ua faasinomaga ma le faamoemoega o o ta’ua olaga.
Na saunoa Polika Iaga: “O le lesona aupito sili e mafai ona outou aoaoina o le iloa lea o outou lava. … E tatau ona outou o mai iinei e aoao le mea lea. … E leai se tagata na te iloa lelei ia lava, e aunoa ma le malamalama i mea a le Atua; e leai foi se tasi e mafai ona aoaoina ma malamalama i mea a le Atua e aunoa ma le iloaina o ia lava: e tatau ona iloa e ia o ia lava, pe o le a le mafai lava ona ia iloa le Atua.”7
Talu ai nei, na ta’u mai ai e o’u afafine ia te au se talafaatusa manaia tele o lenei mataupu faavae o lo maua i le ata tifaga o le The Lion King. Na ola ae la outou tupulaga i leo ma ata o lenei tifaga. Atonu tou te manatuaina le vaega lea na oo mai ai i a Simba se asiasiga a lona tama, o Mufasa le tupu ua maliu. Ina ua maliu lona tama, sa solaese Simba mai le malo ona sa ia lagona le tausalaina i le maliu o lona tama. Sa manao o ia e solaese mai ona tiutetauave, o le suli i le nofoaiga tupu.
Na faaali atu lona tama ia te ia ma tuu atu se lapataiga: “Ua galo ia te oe lou faasinomaga ma ua galo a’u ia te oe. Vaavaai ifo i lou loto, Simba. Ua sili atu oe nai lo le mea ua avea ai oe. E tatau ona e nofoia lou nofoa i le lio o le olaga.” Ona saga fai ai lava lea o lenei valaaulia: “Manatua pe o ai oe. … Manatua pe o ai oe.”
Na matua gatete Simba i lenei aafiaga, ma tonu ai e talia lona taunuuga. Sa ia faamatala i lana uo, le manuki sooupu e faapea ua “foliga mai ua i ai suiga o matagi.”
Na tali atu le manuki, “O suiga e lelei.”
Ma sa fai atu Simba, “: “E lelei suiga, ae e le faigofie. Ua ou iloa le mea e tatau ona ou fai. Ae o le toe foi o lona uiga, e tatau ona ou feagai ma lo’u taimi ua tuanai. Ua leva tele ona ou sola ese mai ai.”
“O fea a e alu i ai?” na fesili atu ai le manuki ia te ia.
“O le a ou toe foi!” o le tagi lea a Simba.8
Tatou te mafaia uma lava ona talia---pe toe faaui i tua---lo tatou nofoaga i le li’o o le olaga. Ia avea oe ma lē e tatau moni ona avea ai oe. O lou fiafia ma le tomai e maua ai le paleni i lou olaga o le a tulai mai pe a e sailia, iloa, ma talia lou faasinomaga moni o se atalii po o se afafine o lo tatou Tama Faalelagi ona ola ai lea e tusa ma lena iloa.
3. Faalagolago i Folafolaga a le Atua
O le a ou faasoa atu nei ia te outou le mataupu faavae lona tolu o le fiafia: Faalagolago i folafolaga a le Atua.
Ou te fiafia lava i upu faaosofia nei a Peresitene Thomas S. Monson: “E susulu le lumanai e faapei o lou faatuatua .”9 O lo tatou manuia ma lo tatou fiafia i le olaga e faalagolago tele i le vaega o lo tatou faatuatua ma lo tatou faalagolago o le a taitai ma taialaina i tatou e le Alii e faataunuu lo tatou faamoemoega.
Ua ou matauina alii ma tamaitai ua ausia ni faamoemoega ofoofogia i le olaga, e matele ina tele lo latou talitonu mautinoa i o latou lumanai mai lava i uluai tausaga o lo latou talavou. O se faataitaiga o lena mea o Winston Churchill, le faipule tautaua o Peretania. A o talavou o ia, sa i ai sona talitonuga mautinoa e le maluelue e uiga i lona lumanai. A o tautua o ia i se vaegaau lagolago i Initia i le 23 o ona tausaga, sa ia tusi atu i lona tina, “Ua i ai lo’u faatuatua i lo’u lumanai---ua ou faamoemoe e faia se mea i le lalolagi.”10 Oka se mafaufauga faavaloaga! O le mea moni, na muai vaai o ia, o le a avea o ia ma se tagata taua i le talafaasolopito o lona atunuu, ma sa avea o ia ma tamalii sa taitaia Peretania Tele i le manumalo i le taimi o le Taua Lona Lua a le Lalolagi.
Ou te talitonu o outou uma taitoatasi, talavou o le Ekalesia a Iesu Keriso, e tele atu mea nai lo se fetu i le lagi e taialaina outou. O loo vaavaaia outou e le Atua ma ua Ia faia ni folafolaga ia te outou.
O loo i ai se mau mai le tusi a Malaki i le fatu o le Toefuataiga o le talalelei, ma sa ta’u atu e le agelu o Moronae i ana asiasiga taitasi i le taulealea o Iosefa Samita. Fai mai le agelu, ma ou te sii maia Elia le perofeta: “Ma o le a ia totoina i loto o fanau folafolaga na faia i tamā, ma o le a liliu atu loto o fanau i o latou tamā. Afai e le faapea, o le a faaumatia atoa le lalolagi i lona afio mai” (Iosefa Samita—Talafaasolopito 1:39).
Ou uso e ma tuafafine talavou, faafetai i le Toefuataiga, o outou o fanau o le folafolaga. O le a outou mauaina e fai ma outou tofi ia folafolaga na faia i o outou tamā. O nei folafolaga mai le Alii e avea ai outou o se augatupulaga tautupu.
O le toatele o outou o loo ou tautala atu i ai, ua faitaulia o ni paionia tamalii o outou augatama, o ni agaga maoae sa fesoasoani e faatuina le Ekalesia toefuataiina e ala i lo latou lotototoa ma osigataulaga. Na muamua atu ia te outou ni augatupulaga totoa o Au Paia. O nisi o loo faalogologo mai ia te au i le aso, o ni paionia o o latou lava aiga ma i o latou lava laueleele. O outou o uluai sooga i mea o le a avea ma filifili e faavavau. Po o le a lava lau tala ma lou talaaga, i le avea ai o ni tagata o le Ekalesia, ua soofaatasi uma outou i se aiga faaleagaga. O lou gafa faaleagaga ua avea ai oe o se tofi o tamā, e pei ona sa muai ta’u mai e perofeta, ma suli o folafolaga a le Atua ia i latou.
Toe faitau lou faamanuiaga faapeteriaka. I lena faamanuiaga ua faamautu mai ai e le Alii ua noatia oe i se tasi o ituaiga e sefululua o Isaraelu, ma ona o lena mea, e ala i lou faatuatua, e avea ai oe o se suli i faamanuiaga maoae na folafola atu ia Aperaamo, Isaako, ma Iakopo. Na folafola atu e le Atua ia Aperaamo e faapea “ona o le toatele e taliaina lenei Talalelei o le a ta’ua i [lona] igoa, ma o le a faitauina o [ana] fanau, ma o le a tutu a’e ma faamanatu ia te [ia], o lo latou tama” (Aperaamo 2:10). . A o faitauina lou faamanuiaga faapeteriaka, ia mataitu folafolaga a le Alii na fai atu patino ia te oe. Mafaufau i folafolaga taitasi. O le a le uiga o na folafolaga ia te oe?
E moni nei folafolaga. Afai tatou te faia la tatou vaega, o le a faia e le Atua Lana. E ese lo’u fiafia i upu nei na fofogaina mai e Alema i le aso na ia tuuina atu ai faamaumauga paia i lona atalii o Helamana:
“E, ia e manatua, ia e manatua, lo’u atalii e Helamana. …
“… Afai e te tausia poloaiga a le Atua, ma e faia i nei mea ua paia e tusa ma mea e poloaiina ai oe e le Atua, … faauta e leai se mana o le lagi po o seoli e mafai ona aveesea i latou mai ia te oe, ona ua mamana le Atua e faataunuu ana afioga uma.
“Ona o le a ia faataunuuina ana folafolaga uma ia o le a ia faia ia te oe, ona ua ia faataunuuina ana folafolaga ia na ia faia i o latou tama” (Alema 37:13, 16–17).
O le faataunuuina o folafolaga a le Atua e noatia i taimi uma i le usiusitai i tulafono e aumai faatasi ai. Na fetalai mai le Alii: “O A’u, o le Alii, e noatia a’u pe a outou faia mea Ou te fai atu ai, ae a outou le faia mea Ou te fai atu ai, e leai se folafolaga mo outou” (MF&F 82:10).
I se isi itu, o nei folafolaga e le faapea ua mautinoa ai o mea uma e tutupu i o tatou olaga o le a ogatusa ma o tatou faamoemoega ma naunauga. Ae, o folafolaga a le Atua e faamau ai faapea o mea e tutupu ia i tatou o le a ogatusa ma Lona finagalo. O nisi taimi o le a tulai mai ai lava ni tofotofoga e tatau ona tatou faatoilaloina; o nisi taimi o le a umi ona faatalitali faamanuiaga folafolaina. Ae o le a oo mai le taimi o le a tatou iloa ai, o nei tofotofoga ma nei faatuatuai, sa mo lo tatou lelei ma lo tatou alualu i luma e faavavau. O le a la se isi mea e mafai ona tatou mananao ai?
O le mea silisili e mafai ona tatou mananao ai i le olaga o le faaogatusa lea o o tatou manao ma le finagalo o le Alii, ia talia Lana faatulagaga mo o tatou olaga. Na te silafia mea uma mai lava i le amataga, e ia te ia se vaaiga tatou te le o maua, ma e alofa ia i tatou i se alofa e le gata.
Tuu mai sei ou faapupulaina atu lenei mataupu faavae e ala i se aafiaga patino. A o ou talavou, sa ou filifili ai e sauniuni mo se suega ulufale i aoga faapisinisi i Farani. O lena sauniuniga, na atoa le tausaga, sa matua faigata ma sa manaomia ai lo’u galue i aso uma. I le amataga o le tausaga, sa tonu ia te au po o le a lava le mamafa o le galuega, o le a ou le faatagaina lava a’u suesuega e taofia ai au mai lo’u alu i sauniga i Aso Sa po o le auai atu i vasega inisitituti taitasi i le vaiaso. Sa ou ioe foi e fai ma failautusi i la’u uarota a talavou nofofua matutua, lea e tele itula o vaiaso taitasi e alu ai. Sa ou talitonu o le a silafia e le Alii lo’u faamaoni ma o le a fesoasoani mai ia te au ia ou ausia o’u faamoemoega.
I le faaiuga o le tausaga, ina ua oo mai le suega, sa ou lagonaina ua ou faia le mea silisili. Sa atili foi ona ou matua faamaoni i a’u tatalo ma anapogi. Ina ua ou taunuu atu i le suega o le a’oga aupito faatuatuaina, sa matua atoa lo’u talitonuga o le a tali mai e le Alii o’u manaoga. Ae paga lea, na matua ese le mea na tulai mai nai lo le mea sa ou faamoemoeina. O le suega faatalatalanoa i la’u mataupu ou te aupito malosi ai, o se mala e lei faamoemoeina---na ou maua se togi e le’i pasi na ou le mafai ai ona ou ulufale atu i lenei a’oga sa ou moomoo i ai. Sa ou matua le fiafia lava. Na faapefea ona tuulafoaiina au e le Alii ae sa ou tumau i lo’u faamaoni?
Ina ua ou alu atu i la’u suega faatalatalanoa mo le a’oga lona lua i la’u lisi, sa tumu au i le faaletonu ma le le mautonu. O le aoga lenei, o le suega na sili ona taua o se faatalanoaga e 45-minute ma se laulauāfono e taitaifono ai le faatonusili o le aoga. Sa lelei lava le amataga o le faatalanoaga, … seia oo ina ua fai mai se fesili e matua uiga ese lava: “Matou te iloa na tele lau tapenapenaga mo lenei suega. Peitai, matou te fia iloa po o a au gaoioiga i fafo atu o au suesuega.” Sa misi se ta o lo’u fatu! Mo le tausaga e tasi, na o le lua lava mea sa ou faia: o le suesue ma alu i le lotu! Sa ou iloaina o se taimi o le mea moni. Sa ou fefe nei faauiga sese e le laulauāfono lo’u auai i le Ekalesia. Peitai, mo se sekone, sa ou faia ai se faaiuga ia ou tumau faamaoni i a’u mataupu faavae.
Sa ou fai atu: “O au o se tagata o Le Ekalesia a Iesu Keriso o le Au Paia o Aso e Gata Ai.” Pe 15 minute pe a, sa ou faamatalaina ai a’u gaoioiga i le Ekalesia: o sauniga i le Sapati, vasega inisitituti, ma o’u tiute o se failautusi a le uarota.
Ina ua uma, sa saunoa le faatonusili o le aoga: “Ua e iloa, ua ou fiafia ina ua e fai mai lena tala. A o ou talavou, sa ou aoga i le Iunaite Setete. O se tasi o a’u uo mamae o se Mamona. O se alii talavou maoae, o se tasi sa i ai ni uiga auaumama lelei tele. Ou te mafaufau i Mamona o ni tagata lelei tele.”
Oka se faamama avega! O lena aso na ou maua ai se tasi o togi aupito sili, lea na mafai ai ona ou ulufale i lenei aoga faatasi ma se faamamaluga.
Sa ou faafetai i le Alii mo Lona agalelei. Peitai, o le taimi lena, sa le mafai ona ou taliaina lo’u le āu i le a’oga e sili ona manaomia. Sa umi se taimi na ou teuina ai i lo’u loto se lagona o le toilalo ma le faaitu’au. E tele tausaga faatoa ou malamalama i le faamanuiaga ofoofogia na i ai i lo’u le au i le a’oga na ou moemiti i ai. I le a’oga lona lua, sa ou feiloai ai i ni tagata taua. O le aoga o lo’u mafuta ma i latou na iloga i le taimi atoa o la’u matata, ma o loo taua pea lava foi i le taimi nei i lo’u olaga ma olaga o lo’u aiga. Ua ou iloa nei, e oo lava i lena taimi o lo’u talavou, sa taialaina e le Alii o’u laasaga ma le silafia lelei o le misiona o le a Ia poloaiina au e faataunuu i se taimi mulimuli ane i lo’u olaga
Ou uso e ma tuafafine, a uma ona e faia mea uma i lou malosi, afai e le tulai mai mea i le ala na e faamoemoe i ai, ia e sauni e talia le finagalo o lou Tama Faalelagi. Ua tatou iloa o le a Ia le tuuina mai lava se mea ia i tatou e lē mo lo tatou lelei. Faalogologo mo lena leo faamafanafana e musumusu mai i ou taliga, “Aua ua i ai tagata uma i o’u lima; ia filemu ma iloa o A’u o le Atua” (MF&F 101:16).
Sa ou matamata talu ai nei i se ata faamomoiloto na toe faamatala ai le talafaasolopito o vaega o taavaletosolima a Uili ma Matini. Ia Me 1856, sa i ai ni vaega se lua o tagata e silia ma le afe le Au Paia na tuua Egelani ae malaga mai i Iuta. Ina ua latou taunuu i le ono masina mulimuli ane i le Vanu o Sate Leki i le faaiuga o la latou malaga matautia, e silia ma le 200 i latou na le’i maua. O le toatele na maliliu i ma’i, fiaaai, po o le lailoa i le ala e tau atu i le nuu na latou ta’ua o “Siona.”
O se tasi o paionia sa i ai i le ata na matua faagaeetia ai lava au. Na ia faatumulia nei vaega o tagata i ona uiga malie ma le naunautai. Peitai, sa le pei o ia o le tele o paionia. O se alii faatinoiti ma e matua le atoatoa lona malosi, ae o ia lava o se vavega! Sa ou aoaoina o lenei paionia lototoa o Robert Pierce o Cheltenham, Egelani.
Sa faamatalaina o ia e se tasi o ana soa i le malaga, “o se pipili aupito tuga ua ou vaai i ai i le malaga. E pe atoa le pito i lalo o lona tino, ma sa matua leaga faia lava lona tino, ae sa malosi lona faatuatua. Sa mafai e ia ona uunaia o ia lava i se saoasaoa e maofa ai, i le faaaogaina o tootoo.”11
I se tasi aso na sese ai le ala na alu ai Robert Pierce ma ua ia le iloa ai le aumalaga. E toatele tamaloloa na o e sue mai o ia, ma sa iu ina maua atu o ia i se tulaga matautia. Ou te ta’ua a latou upu:
“Sa matou vaaia se laau tele ma ni luko lapopoa faaefuefu o feosofi ane ai, ma ni aeto o faapepepe ane i luga o le laau e faatalitali mo le taimi e uma ai lona faataio ma le fesasaa’i o ona tootoo ae se’i tulioso ifo i ona luga ma faaumatia o ia a o faapupuu ai i le tafue o le laau. …
“O le taimi lea na matou taunuu atu ai ma laveai o ia mai lenei mala semanu e oo ia te ia, ma ave o ia ma tuu i luga o le taavaletoso na matou aumaia, faanofolelei ai, ma matou toe foi atu i le tolauapiga.”
Ia, o se vaaiga i le uiga maoae o Robert: “Sa tauanau e si alii i matou e tuu o ia e savali aua sa fai mai na ia folafola mai … ina ua amata la matou faigamalaga, o le a savali i mita uma o le ala e tau atu i le Aai o Sate Leki.”
Ae, o le vaega faanoanoa o lenei tala: “Ae ui o lea, sa na ona matou faasaoina o ia e malaga mo na o ni nai aso, aua o le maea ai o le aso lona ono o le savaliga na muta ai ona mafatiaga i lenei lalolagi, ma sa tanumia o ia i autafa o le Vaitafe o Elkhorn.”12
Na ta’ua e Sister Jolene Allphin, o le na tuufaatasia le tala ia Robert Pierce, e uiga ia te ia: “O se mea ofoofogia moni lava ona sa savalia e Robert Pierce le 600 maila i ona tootoo a o lei maliu o ia i faigata o le ala. O le faanaunauga o lona loto ia faapotopoto faatasi ma le Au Paia i Siona, ma ia aua nei avea o ia o se avega mamafa i se tasi o le au malaga. … E lei manao Robert e avea o ia ma faalavelave pe ese se faiga o ia.”13
Sa ou fesili ia te au lava ia i le fesili lenei: Mata aisea na tuu ai e le Atua lenei tagata faatuatua tele e oti i le ala i ni nai aso mulimuli ane, a o lea na laveaiina i se ala faavavega mai luko ma aeto?
O lona oti o se tasi sa sili ona toafimalie. I le ata, na ia fai mai ai, e lata i le faaiuga:
“Na ta’u mai ia te au e faifeautalai, e taua au ma e i ai se aso o le a ou maoae ai! ! …
… Sa ou manao lava i se tino malosi. A o lea, o le a ou maua. A outou taunuu i Siona, mafaufau mai ia te au.”14
A ou mafaufau ia Robert Pierce, ou te manatua upu Paulo i lana tusi i tagata Eperu:
“Na oti i latou nei uma lava o faatuatua, e le’i maua mea na folafolaina, a ua iloa ai e i latou a e mamao, na mautinoa foi, ma latou talia, ma le fiafia, ma latou tautino mai o tagata ese i latou ma aumau i le lalolagi.
“… O i latou o e fai mai upu faapena, ua latou matua faapea mai o loo saili e i latou lo latou lava nuu. …
“A ua naunau i latou lava i le nuu e sili ona lelei, o le faalelagi lea” (Eperu 11:13–14, 16).
I le faaiuga, na iloa e Robert Pierce o lona taunuuga faaiu lava o le malo o le lagi, ae le o le Vanu o Sate Leki.
Ma e faapena uma lava i tatou. O folafolaga a le Alii e faamautinoa ai lo tatou taunuuga faaiu. E eseese le faasologa o le faigamalaga mo i tatou taitoatasi e tusa ma le muai silafia a le Atua. E ono suia o tatou tulaga, e ono tulai mai mea e lei faamoemoeina, e ono tulai mai ni luitau, ae o folafolaga a le Atua ia i tatou, e faamautinoa e ala i lo tatou faatuatua.
Na matagofie le otootoina e Sister Anne C. Pingree o le uiga o le faatuatua i folafolaga a le Atua. Sa amata i lona sii maia o le saunoaga a Elder Bruce R McConkie e faapea:
“‘O le faatuatua i lona foliga atoatoa ma le mama, e manaomia ai se mautinoa e le maluelue ma le … talitonuga mautu o le a faafofogaina e le [Atua] a tatou aioiga ma talia a tatou talosaga i Lana lava taimi. O le talitonuina o lena mea, e mafai ai foi e i tatou ona ‘tutu mausali i le faatuatua’ i le asō ma a taeao.”
Ona faaauau lea o le saunoaga a Sister Pingree:
“E le afaina po o fea tatou te nonofo ai ae po o a foi tulaga o o tatou tagata taitoatasi. O lo tatou ola amiotonu ai i aso taitasi, e mafai ona faapupulaina ai se faatuatua ia Iesu Keriso lea e ati le vaai i talaatu o le ulu tiga, lē fiafia, ma folafolaga e le faataunuuina. O se mea e mamalu le i ai o se faatuatua e mafai ai ona tatou naunau atu i lena aso ‘o le a taunuu ai mea uma na folafola mai i le Au Paia’” (“Vaaia o Folafolaga i se Mea Mamao.’”15
Ou uso e ma tuafafine, o tulaga ua i ai nei lo’u olaga ua matuai ese lava mai le mea sa ou fuafuaina ao ou pei o outou. Peitai, ou te le talitonu sa sili atu so’u fiafia. Afai e tuuina mai ia te au, ina ua 20 o’u tausaga, le tala o lo’u olaga e oo mai i le taimi nei, ou te manatu ou te sainia lava e aunoa ma se faatuai i lena taimi!
E Susulu Lo Outou Lumanai e Pei foi o Lo Outou Faatuatua
Ou te fia talanoa atu e uiga ia te au ma Valérie. O le tele ona ou mafaufau loloto i le aluga o o ma’ua olaga, o le tele foi lena o lo’u talitonu o le mea na faia ai le eseesega o le, taimi a o ma talavou sa tutusa a ma’ua vaaiga mamao i le ola e faavavau. Sa ma mananao e amatalia se aiga e faavavau. Sa ma iloaina le mafuaaga na ma i ai i lenei lalolagi, ma o ma’ua faamoemoega e faavavau. Sa ma iloaina e alofa le Atua ia i ma’ua ma sa matua taua i ma’ua i Lana silafaga. Sa i ai lo ma talitonuga atoa o le a Ia tali mai i a ma’ua tatalo i Lana ala ma i le taimi Na te silafia ua lelei. Ou te le iloa pe na ma saunia e talia Lona finagalo i mea uma, aua o se mea lena sa tatau ona ma aoaoina---ma o loo faaauau pea ona aoaoina. Peitai, sa ma mananao e faia le mea sili ma te mafaia e mulimuli ai ia te Ia ma faapaiaina i ma’ua lava mo Ia.
Ou te molimau atu, faatasi ai ma Peresitene Monson, “e susulu lo outou lumanai e faapei o lo outou faatuatua.” E tele atu le faalagolago o lo outou fiafia i mataupu faavae tou te filifilia nai lo tulaga e faavavau o lo outou olaga. Ia faamaoni i nei mataupu faavae. Ua silafia oe e le Atua ma e alofa ia te oe. Afai e te ola e tusa ai ma Lana fuafuaga e faavavau ma afai e te faatuatua i Ana folafolaga, ona susulu lea o lou lumanai!
O i ai ni au miti ma ni sini? Lelei tele! Galue ma lou loto atoa ina ia ausia. Ona tuu atu lea i le Alii o mea e totoe. O le a Ia taitai oe i mea e le mafai ona taitaia e oe lava; O le a Ia faia oe i le mea e te le mafai ona faia e oe lava.
I taimi uma, ia e talia Lona finagalo. Ia e nofo sauni e alu i le mea Na te poloaiina oe e te alu i ai, e fai le mea Na te poloaiina oe e fai. Ia avea oe ma alii po o le tamaitai o loo Ia faafaileleina oe e avea ai.
Ou te tatalo ia e lagonaina le alofa o lo tatou Tama Faalelagi i lou olaga, ia e iloa pe faapefea ona e faatuatuaina oe lava e pei ona Ia faatuatuaina oe. Ou te tatalo ina ia e faamaoni e le aunoa, i taimi uma ma i nofoaga uma. Ou te alofa tele ia te outou ma e loloto lo’u faananau atu ma lo’u faaaloalo i le avea ai o outou ma faataitaiga ma malosiaga i le lalolagi atoa.
Ou te molimau atu o le olaga lenei o se taimi matagofie tele o le faavavau. Ua tatou i ai iinei ma se sini mamalu, ia saunia e fetaiai ma le Atua. O loo soifua Lona Alo o Iesu Keriso, ma o Lana Togiola o se meaalofa e le iu o le alofa lea e tatala ai faitotoa i se fiafia e faavavau. Ua toe i ai nei Le Ekalesia a Iesu Keriso i le lalolagi, ma se perofeta a le Atua o loo taiulu ai. O se matua fiafiaga lava ma se faamanuiaga le avea ma se tasi o lenei Ekalesia. I le suafa o Iesu Keriso, amene.
© 2012 Puletaofia e le Intellectual Reserve, Inc. Ua taofia aia tatau uma. Faamaonia le faa-Peretania: 5/12. Faamaonia le faaliliuga: 5/12. Faaliliuga o le We Are the Architects of Our Own Happiness. Samoan. PD50039056 890