Aua na Afio Mai o Ia

Ae ou te lei tuuina atu la’u tautalaga na saunia, ou te fia faaaogaina ni upu se lua. Fai mai se tagata o upu aupito taua ia i le gagana Peretania. Ou te fia faapea atu faafetai atu ia te outou uma sa faia se taumafaiga tele ina ia auai mai i lenei taeao. Ou te fia fai atu faafetai atu ia te outou uma o loo faafofoga mai. Ou te fia fai atu faafetai atu i tagata faigaluega uma a le Ekalesia ma i latou i tofi o le Au Pulega Aoao, o e o loo matuai fesoasoani tele ia i matou ma tuuina mai lo latou gauai tuuto ma galuega maoae.

Ua ou matua talitonu o loo i ai iinei le Agaga o le Alii i le po nei. Ou te fia molimau atu foi ia te outou i le lalolagi uma, sa ia te au le tiutetauave e filifili ai ni o’u fesoasoani. Sa ou matuai tatalo malosi. E toatele i latou semanu e mafai ona avea ma fesoasoani; ua ia te i latou uma le tomai. Sa sili atu lo’u iloa o nisi nai lo isi, ae sa ou faatalitali seia oo ina ta’u mai e le Alii ia te au e ala i le Agaga i la’ua e tatau ona galulue i o’u autafa. Ma ou te faafetai atu ia i la’ua—ma i latou o loo galulue faatasi ma i la’ua—ma outou uma o loo paau mai i lenei afiafi.

O le po nei ua tatou toe potopoto faatasi ai foi o ni uso ma tuafafine i le mea lea ua avea nei ma a tatou faigalotu masani o le Kerisimasi. Ua ootia moni lava o tatou loto a o tatou faalogologo atu i musika faalelagi ma savali musuia. Se ata ina a matagofie o le soifua mai o le Faaola ua tatou maimoaina i se vitio.

I nai aso ma vaiaso ua mavae atu, ua ou molimauina ai e faapei foi o outou, le mea ua avea i le tele o tausaga ma taulaiga o le sailiga o tupe i le vaitau o le Kerisimasi. Ua ou faanoanoa lava i le vaai atu ua tele ina faaitiitia le faasino o le Kerisimasi ia Keriso, ae ua tele naua i maketi ma faatauga, o pati foi ma meaalofa.

Peitai, o le Kerisimasi lava. E ui lava i mea faalavefau uma, e mafai lava ona tatou faamautinoaina e totonugalemu Keriso i mea tatou te faamanatuina ai. Afai tatou te lei faia lava lena mea, e mafai ona tatou faavaeina ni tu masani o le Kerisimasi mo i tatou lava ma o tatou aiga, ia e fesoasoani tatou te maua ai ma tausisia le agaga o le Kerisimasi.

E mafai ona ou manatuaina, sa i ai la’u aga masani patino i le taimi o le Kerisimasi. E iloa e lo’u aiga lena mea, a o lalata mai le Kerisimasi, ou te toe faitauina la’u faaputugatusi e faatatau i le Kerisimasi, ma mafaufau i upu ofoofogia a tusitala. Muamua o le Talalelei na tusia e Luka---le tala o le Kerisimasi. Ona sosoo ai lea o le faitauga o le A Christmas Carol, na tusia e Charles Dickens ma faaiu ai, i le toefaitauina o le The Mansion,, na tusia e Henry Van Dyke.

E tatau lava ona ou soloia ou mata pe a faitauina nei tusiga musuia. E ootia ai lo’u loto ma aumaia ia te au le agaga o lo tatou Faaola.

I le tusi o le A Christmas Carol,, tatou te faitau ai i le tala faamama’i ia Epenesa Scrooge ma asiasiga a Jacob Marley ia te ia, o lana paaga faapisinisi ua maliu, ma aitu o Kerisimasi ua mavae, Kerisimasi i le taimi nei, ma Kerisimasi e lei oo mai. O Scrooge o se agaga e lē lelei, ma ua avea ai o se faaupuga ua taliaina i le atulaulau mo se tagata lotovale pe manatu faapito.

I le gasologa o le po a o lumanai le Kerisimasi, o loo faaali mai ai Scrooge i lona tulaga sa i ai i lona olaga, o le tulaga o i ai i le taimi nei, ma le tulaga o le a i ai lona olaga pe afai e tumau ai i le ala sa ia filifiliaina. Ua mafai e ia ona iloa le sese o ona ala. Ua ia iloa e mafai ona tatou maua le fiafia pe afai tatou te faagalo i tatou lava ma mea o le lalolagi, ae punouai e fesoasoani atu i isi ma aoao e opomau le alofa i aiga ma uo. O lea ua liua nei i se olaga o le agalelei atu ma le auauna atu, ua tautino mai ai e Scrooge i le faaiuga: “O le a ou faamamaluina le Kerisimasi i lo’u loto ma taumafai e tausisia i le tausaga atoa. O le a ou mafaufau i le Taimi ua Te’a, o le Taimi Nei, ma le Lumanai. O le a avea agaga o na taimi uma e tolu ma uunaiga malosi i totonu ia te au. O le a ou le faataliga tuli lava i lesona latou te aoao maia.”¹ O le a musuia pea lava au i lenei tala faamomoiloto.”

O la’u faitauga mulimuli o le —The Mansion,na tusia e Henry Van Dyke—e talitutusa ma le natura o le tala ia Epenesa Scrooge ae e faatatau ia Sione Weightman, o se tagata maumea, o se e tele lona malosi i tulaga faaupufai, ma o se tagatanuu faamanuiaina.

I se tasi afiafi, sa nofonofo ai Sione i lona potutusi i se nofoa faalue ma mafaufau loloto ai i lona tamaoaiga. O ona luma sa fofola mai ai faamatalaga ma ata o le vaega o le Weightman o le falemai, ma le Taitaifono o le Tulafono Faaupufai, faapea foi ma se faamatalaga o le tatalaina o le Aoga a Weightman Grammar. Sa lagonaina e Sione lona faamalieina. Ua ia fausia se tamaoaiga tele, ma ina ua ia foai atu, sa manao o ia ina ia faalauiloa aloaia. O lona talitonuga e uiga i le foai atu, e mafai ona aoteleina i lana lava faaupuga: “Leai se pene apa i pulou o tagata ‘aisi! … Taumafai e tuu au meaalofa i le mea e mafai ai ona iloa e tagata au mea o loo fai.”

Sa ia tago atu i le Tusi Paia a le aiga sa i luga o le laulau, ma su’e i se mataupu, ma faitau ai ia te ia lava upu:

“Aua tou te toloai oa mo outou i le lalolagi, o i ai le mogamoga ma le ele e faaumatia ai, o i ai foi tagata gaoi e eli atu ma gaoi ai:

“A ia outou tolo’a’i oa mo outou i le lagi” (Mataio 6:19–20).

Sa foliga mai ua tafetafea ese atu le tusi mai ia te ia. Sa ia punou ifo i luga o le laulau, ma lona ulu i luga o ona lima o piilima. Ua faasolo ai ina moegase.

A o fai lana miti, e faapea ua aveina atu Sione Weightman i le Aai i le Lagi. Sa faafeiloaia e se taiala o ia ma isi sa ia masani ai i le olaga, ma sa ia ta’u atu o le a ia taitaia i latou i o latou aiga i le lagi.

O le isi, o se tane faamaoni o se ava sa mafatia i ma’i, sa faasino atu i ai se maota matagofie, e faapena foi se tina, ua leva ona oti lana tane, o lē sa tausia se aiga tulaga ese. O se tamaitai talavou e pipili, sa faataotolia i lona moega mo le 30 tausaga—“sa faiesea ae sa tumau pea le faamoemoe”—na ia maua foi se maota matagofie. Na faamanuiaina o ia i se vavega o le lototoa i lona faamoemoega tutasi: ia le faitio lava ae ia faasoa atu pea lava pea sina vaega o lona olioli ma le filemu i tagata uma na sosō atu i ona autafa.

Sa latou tutu i luma o se faletele matagofie, ma sa fai mai le taiala, “O le [maota] lea mo oe [Dr. McLean]. Susu i totonu; e le toe i ai ni [ma’i] iinei, leai ni oti, leai se faanoanoa, po o ni [tiga]; aua ua faatoilaloina uma ou fili tuai. Ae o mea lelei uma sa e faia mo isi, o fesoasoaniga uma na e ofoina atu, o faamafanafanaga uma sa e aumaia, o le malosi uma ma le alofa na e tuuina atu i e mafatia, ua i ai iinei; ma o mea uma na na matou fauina ai lenei maota mo oe.”

Sa taitai faasolosolo atu taitasi le aumalaga i o latou maota ma sa ulufale atu ma le fiafia; ma sa lagona atu foi i faitotoa o matalatala ia leo malu o faafeiloaiga mai totonu.

E oo atu i lena taimi, ua le lava e Sione Weightman ona onosai lona fia vaai po o le a le maota lea e faatalitali mai mo ia. A o la savavali atu pea ma le taiala, sa oo ina laiti fale. Mulimuli ane, sa la taunuu atu i se fanua lautele, e foliga valevalenoa ma tuufua. I le ogatotonu o le fanua sa i ai si tamai faleoo. Fai mai le taiala, “O lou maota lea, Sione Weightman.”

Ma le ofo tele, sa fai atu Sione Weightman i le taiala, masalo ua feleilogaa’i o ia ma se isi Sione Weightman. Faatasi ai ma le to’atama’i tele, sa ia leotele atu ai, “Pe o se maota talafeagai lenei mo se tasi sa matua lauiloa ma tuuto? Aisea ua matuai laitiiti tele ai ma mataga? Aisea na le fauina ai faatele ma fai faamanaia, e pei o isi?”

Sa tali atu le taiala, “Na pau lava nei o meafaufale na e auina mai ia i matou.”

Sa maasiasi Sione Weightman. “E te lei faalogo sa ou fauina se faleaoga; se vaega o se falemai; … tolu… falesa.”

“Faatali,” sa tapatapa atu ai le taiala. “… E le faapea e le lelei. Peitai, sa faama’oti ma faaaogaina o ni faavae mo le igoa ma le maota o Sione Weightman i le lalolagi. … E moni, ua e maua foi le taui mo na mea. Pe o le a totogiina ea la faalua oe?”

Sa tuuina atu e Sione Weightman faanoanoa a ua atamai se fesili taua: “O le a ea la le mea e faitaulia iinei?”

Na tali mai le taiala: “Ua na o mea lava e ofo moni atu. … Ua na o mea lelei e faia i le alofa. Ua na o fuafuaga e faaautu i le soifua manuia o isi. Ua na o galuega e tele atu le osigataulaga e faia ai nai lo le taui. Ua na o meaalofa ia e faagalo ai e lē na te foai atu, ia lava.”

Sa mou atu le leo ina ua fafaguina Sione Weighman i le tatagi o le uati. Na susulu atu nai sulu iti o le malamalama o le taeao i totonu o le potu, i nai vaiti o pupuni mafiafia. Na moe o ia i le po atoa. Na suia o ia e le savali o lana miti, o loo i ai pea se olaga e tatau ona ia ola ai, ia faasoa atu le alofa, ma foai atu ni meaalofa.²

E le uma lava le aumaia e nei faitauga ia te au, o le agaga o le Kerisimasi. O le agaga o le Kerisimasi, o le agaga lea o le alofa ma le limafoai, ma le agalelei. E aumaia ai le malamalama i le faamalama tele o le agaga, ma tatou vaavaai atu ai i le olaga pisi i le lalolagi, ma tatou naunau atili atu ai i tagata ae le o mea [o le lalolagi].

O le agaga o le Kerisimasi o se mea ou te faamoemoe o le a maua e i tatou uma i o tatou loto, ma o tatou olaga, e le gata i lenei vaitau iloga ae i le gasologa o tausaga.

Sa fautuaina e se Kerisiano atamai i se tasi taimi, “Aua tatou te faamaimauina le Kerisimasi … ae ia tatou teuina le Kerisimasi i o tatou loto ma o tatou olaga.”³

O la’u tatalo atu lea i lenei po, aua a tatou tausia le agaga o le Kerisimasi, ua tatou tausisia le Agaga o Keriso, aua o le agaga o le Kerisimasi o le Agaga lea o Keriso.⁴ O le a pupunia ai mea faasalavei uma o loo siomia ai i tatou ma e mafai ona faaitiitia ai le Kerisimasi ma tofatuimoanaina ai lona uiga moni.

E leai se isi taimi e sili atu nai lo le taimi nei, le vaitau lenei o le Kerisimasi, mo i tatou uma e toe tuuto atu ai i tatou lava i mataupu faavae na aoao mai e Iesu Keriso.

Ona sa afio mai o Ia i le lalolagi, o lea ua i ai ia i tatou se faataitaiga atoatoa e mulimuli ai. A o tatou taumafai e avea atili e faapei o Ia, o le a tatou maua le olioli ma le fiafia i o tatou olaga, ma le filemu i aso taitasi o le tausaga. Afai tatou te mulimuli i Lana faataitaiga, o le a totogo a’e i totonu ia i tatou le agalelei ma le alofa tele, o le faaaloalo foi ma le amanaiaina tele o isi.

Ona sa afio mai o Ia, ua i ai foi le uiga taua o lo tatou ola ai.

Ona sa afio mai o Ia, ua tatou iloa ai le ala e aapa atu ai ia i latou o fememea’i pe faanoanoa, i soo se mea o latou i ai.

Ona sa afio mai o Ia, ua leai ai se tui o le oti po o le manumalo i le tuugamau. O le a tatou toe ola ona sa afio mai o Ia.

Ona sa afio mai o Ia ma totogi mo a tatou agasala, ua tatou maua ai le avanoa e maua ai le ola e faavavau.

Ona sa afio mai o Ia, o lea ua tatou potopoto ai i le po nei e tapuai atu ia te Ia, i fusi o le alofa faaleusoga.

Ia mafutaina i tatou e Lona agaga faapelepele, ma ia avea pea o Ia ma totonugalemu o a tatou faafiafiaga ma i o tatou lava olaga, ou te tatalo ai i Lona suafa paia, amene.